Read gen 2Èfìɔ 7 Bible Online

2Èfìɔ 7 - gen bible

2Èfìɔ 7

¹Èlìze gblɔ̃ be: “Mì ɖoto Tɔhonɔ̀ be ènyà! “Èsɔ̀, lè gàpòpo kèa mè tututua, klòsalò ga ɖèka sù la plè èwɔ kìlo woèvè àlo èlù kìlo wìvɔ ènè lè Sàmarìa be àsìa mè.”

²Izràɛl be èfìɔ be àhùaga kè nɔ̀nà e ŋuti gà sia gàmèa, biɔ Èlìze sè be: “Ne Tɔhonɔ̀ gbà hũ flɛsɛ̀ ɖo jiŋùkusi ŋutɔ cã, ènu kèa la teŋu va e mèa?” Èlìze ɖo e ŋuti be: “Wò ŋutɔ wò la kpɔ ɛ̀ ku ŋùkuvi vɔ̀a, wò mu la ɖù lè e mè ò.”

³Èkpònɔ̀ ènè ɖewo sò nɔ̀pe ɖo èdùa be àgboa nu. Wo gblɔ̃ na woa nɔ̀nɔwo be: “Nukɛ ŋuti mi la nɔ̀ fikèa kaka la ku ɖo ò?

⁴Ne mi ɖo èdùa mè cã, mi mu la kpɔ ènu ɖe la ɖù kaka la ku ò. Ne mi kpɔ̀tɔ̀ lè fikèa cã, mi la ku. Eŋuã, mia jo yì Sirìa be àsàɖaa mè, ne mia sɔ mia ɖokoe sɔ na wo. Ne wo mu wù mi òa, mi la ci àgbè. Ne wo wù mia, mi la ku!”

⁵Lè fìɛ̃si mèa, wo sitè kplà tùtà Sirìa be àsàɖa gbɔ. Wo va yì gogo àsàɖaa, vɔ̀a wo mu kpɔ àmè ɖekpe ò.

⁶Nyàwo, Tɔhonɔ̀ na àhùakèkeviwo be zigìdi dodo ɖì lè Sirìatɔwo be àsàɖa mè. Eye Sirìa be àhùakɔ̃awo gblɔ̃ lè woa ɖokoewo mè be: “Izràɛl be èfìɔa yì dà Ejiptètɔwo kudo Hitìtɔwo ne woa va kpe àkɔ ku mi!”

⁷Kè xixea mè le cɔ̃a, wo si sɔ hlùɛ̃ woabe àgbè. Wo gble gòxɔ, èsɔ, èsɔ àkɛtɛwo kudo àsàɖaa ɖɛ sìgbè lekè e lè xoxoa nène.

⁸Èkpònɔ̀awo ɖìsà to àsàɖaa kpata mè eye wo gɛ̃ ɖo gòxɔ ɖèka mè, ɖù ènu gbà nù ènu, be sù wo. Wo lɔ sìka ku klòsalò kudo àwù kèwo wo sɔ yì wla kabaa. Eye wo gbà ɖo gòxɔ bu mè eye wo gbà lɔ ènuwo sɔ yì wla.

⁹Èkpònɔ̀awo gblɔ̃ lè woa nɔ̀nɔwo dòmè be: “Mi mu le wɔ̀ ɛ̀ nyuɛ̃ ɖe ò! Àŋɛ̀nyuɛ̃ kè mi xɔ̀ egbèa, ne mi bɔ̀nu ɖo e ji kaka èŋù kèa, ma nyɔ ò. Mi ɖo la yì gblɔ̃ ɛ̀ lè fìɔsa mè.”

¹⁰Wo trɔ yì Sàmarìa be èdùa be àgboa nu eye wo yɔ àgboɖiatɔwo. Wo gblɔ̃ na wo be: “Mi yì Sirìatɔwo be àsàɖa mè. Àmè ɖekpe mu gbà lè ò, ɖo mi mu sè àgbètɔ ɖe be ènu wɔ̀wɔ cã ò. Woabe èsɔ kudo èsɔ àkɛtɛwo kpò ye lè èkà mè. Àmè ɖekpe mu gbà lè woabe gòxɔwo mè ò.”

¹¹Àgboɖiatɔwo dɔ̃ àmè ɖoɖa ne woa yì gblɔ̃ ènyàa lè fìɔsaa mè.

¹²Èfìɔa sitè gbà lè èzã mè, eye e gblɔ̃ na yebe ŋutimewo be: “Mù la gblɔ̃ ènu kè Sirìatɔwo le bla ɖo mia ŋutia gɔ̃mè na mì! Wo nya be mi mu gbà ɖo ènu ɖekpe la ɖù ò. Eye wo gble woabe àsàɖa ɖɛ, yì wla ɖo àgblèta. Wo la kè nɔ gblɔ̃ be: “Ne Izràɛlviwo to lè Sàmarìa kpòa, mi la le wo àgbèagbè eye mi la xɔ̀ èdùa!”

¹³Èfìɔa be cãmì ɖèka ɖè susu na èfìɔa gblɔ̃ be: “Mi sɔ èsɔ àtɔ̃ lè kèwo kpɔ̀tɔ̀awo dòmè-Ɖo èku kpò ye lè na wo sìgbè Izràɛlviawo ke nène, ne mia dɔ̃ àmè àtɔ̃ ɖewo ɖoɖa ne mia kpɔ ènu kè la jɔ̀ a!”

¹⁴Èfìɔa na wo bla èsɔwo na àhùakèkevi èvè eye e dɔ̃ yebe gbãdãgbãwo jè Sirìa be àhùakɔ̃a yomè ne woa kpɔ ènu kè la jɔ̀ a.

¹⁵Gbãdãgbãwo jè Sirìatɔwo yomè kaka yì kɔ̀ ɖo Yɔrdàn be ètɔ̀a to. Wo mu kè ɖo àmè ɖe ŋuti sɔ wu àwùwo kudo ènu vòvòvò kèwo le xe èmɔ̃ na wo ne woa teŋu si jo kaba ò. Ènu kèawo sùgbɔ hlɛ̃ kɔ̀ ɖo èmɔ̃a ji. Nène a, àmèdɔ̃dɔ̃awo trɔ gbɔ̀, va ɖo ègbèa na èfìɔa.

¹⁶Troloa, Izràɛlviwo kpata to yì hlà Sirìatɔwo be àsàɖa. Eye sìgbè lekè Tɔhonɔ̀ gblɔ̃ ɛ̀ nènea, èwɔ kìlo woèvè àlo èlù kìlo wìvɔ ènè xɔ̀ klòsalò ga ɖèka.

¹⁷Èfìɔa dɔ̃ yebe ŋutime àhùagaa ɖoɖa, ne bèa yì kpɔ ènu kè le jɔ̀ lè èdùgboa nua. Vɔ̀a kè e ɖo funua, àmèhaa ɖiki ì ɖo àgboa ŋuti, eye e ku sìgbè lekè gblɔ̃ɖɛtɔ Èlìze gblɔ̃ ɛ̀a nène.

¹⁸Nyàwo, gbɔ̀xue èŋù la kèa, Èlìze gblɔ̃ na èfìɔ be: “Èsɔ̀ kè gbãnà, lè gà pòpo kèa mè tutua, klòsalò ga ɖèka sù la plè èwɔ kìlo woèvè àlo èlù kìlo wìvɔ ènè lè Sàmarìa be àsìa mè.”

¹⁹Eye èfìɔa be àhùagaa biɔ sè be: “Ne Tɔhonɔ̀ gbà hũ flɛsɛ̀wo lè jiŋùkusi ŋutɔ cã a, ènyà kè wò le gblɔ̃a, la teŋu va e mèa?” Èlìze ɖo e ŋuti be: “Wò la kpɔ ɛ̀ vɔ̀a, wò mu la kpɔ gomè lè emè ò.”

²⁰Eye ènu kèa tutu ye va jɔ̀. Dùkɔ̃a ɖiki àhùagaa tɛ ɖo àgboa ŋuti, eye e ku.