Read gen 2Èfìɔ 8 Bible Online

2Èfìɔ 8 - gen bible

2Èfìɔ 8

¹Gbè ɖèkaa, Èlìze gblɔ̃ na nyɔ̃nù kè be èvi e fɔ̃a be: “Sitè ne wòa hũ jo lè àpo xòmèa mè. Yì sò kɔpe ɖo fikè wò teŋu yì nɔ̀a. Ɖo nyàwo Tɔhonɔ̀ la na àdɔ̀ la to lè Izràɛl nyigbã ji na èpè adrɛ̃ sɔ̃ŋu.”

²Nyɔ̃nùa sitè kplà, wɔ̀ ɖo ènyà kè Èlìze gblɔ̃ na ɛ̀a ji. E yì sò kɔpe ɖo Filistì nyigbã ji èpè adrɛ̃.

³Lè èpè adrɛ̃awo yomè a, e trɔ gbɔ̀ va àxue kudo yebe xòmèa, eye e yì èfìɔa gbɔ va yì biɔ yebe àxuea kudo àgblè nyigbã.

⁴Èfìɔa le pò nupo kudo Gèhàzì, Èlìze be sumɔ̃via kù ɖo Èlìze be ènu jɔ̀ àsu kèwo e wɔ̀a ŋuti.

⁵Eye wàlɛbɛ kè Gèhàzì le gblɔ̃ lekè gblɔ̃ɖɛtɔa fɔ̃ ɖèvi kè kua na èfìɔa tutu ye ɖèvia be ènɔa gɛ̃ ɖo fìɔsaa mè. Eye Gèhàzì gblɔ̃ na èfìɔa be: “Èfìɔ bùbùtɔ, kpɔ ɖèvi kè Èlìze fɔ̃a kudo ènɔa ye kèa!”

⁶Èfìɔa biɔ ènyàa nyɔ̃nùa, eye e trɔ kã àseŋuã na ɛ̀ tututu. Troloa, èfìɔa sɔ ènyàa do àsi na yebe àhùaga ɖèka be ne le ŋùku ɖo nyɔ̃nùa be ènyà ŋuti. E gblɔ̃ na ɛ̀ be: “Ne sɔ̀ ne woa trɔ sɔ nyɔ̃nùa be àxue kudo àgblè nyigbãa na ɛ̀ eye woa trɔ sɔ yebe àgblè mè be nukuawo kpata sɔ na ɛ̀.”

⁷Gbè ɖèkaa, Èlìze yì Dàmaskò. Gà ŋua mè tutua, Sirìa-fìɔ Bɛn Hadàd be lãmè gble. Eye wo yì sìa èfìɔa be Èlìze va èdùa mè.

⁸Èfìɔa gblɔ̃ na Hàzàɛl be: “Sɔ ènunana yì na gblɔ̃ɖɛtɔa eye wòa gblɔ̃ na ɛ̀ be ne biɔ Tɔhonɔ̀ sè na yè be yè la gã mà a!”

⁹Hàzàɛl sɔ ènunana nyuɛ̃ kèwo lè Dàmaskòa, bla na èsɔkpotɔnɔ̀ èkà (40). Kè e ɖo Èlìze gbɔa, e gblɔ̃ be: “Àpo sumɔ̃vi Bɛn Hadàd, Sirìa be èfìɔ ye dɔ̃ mù ɖoɖa gbɔ wò ne ma va biɔ wò sè be 'yè la gã lè èdɔ̀ kè le yèa si mà a?'”

¹⁰Èlìze ɖo e ŋuti be: “Yì gblɔ̃ na ɛ̀ be 'e la gã!' Vɔ̀a, Tɔhonɔ̀ na mù nya be e la ku nyàwo.”

¹¹Troloa, gblɔ̃ɖɛtɔa be ŋùkumè trɔ eye mu gbà le pò àɖàbà ò, vɔ̀a e le kpɔnu cɔ̃ɔ̃. Zãɖea, e tɔ àvifãfã.

¹²Hàzàɛl biɔ ɛ̀ sè be: “Nukɛ jɔ̀ ye àpetɔ nyè le fã àvi ò?” Èlìze ɖo e ŋuti be: “Mù le fã àvi ɖo mù nya ènu màɣe kèwo wò la va wɔ̀ kudo Izràɛlviwo. Wò la ɖè èzò ɖo woabe àgbògbò be èdùawo mè. Wò la wù woabe ɖèkajɛwo, la ɖiki woabe ɖèviwo eye wò la zɛ̃ pòdo na woabe èfunɔ̀wo.”

¹³Hàzàɛl gblɔ̃ be: “Leke ekèa la wɔ̀ jɔ̀ ò? Nyè mu ɖo ŋusɛ̃ ɖekpe ò!” Èlìze yì e ji gblɔ̃ be: “Tɔhonɔ̀ na mù nya be wò la trɔ zũ Sirìa be èfìɔ.”

¹⁴Eye Hàzàɛl jo lè Èlìze gbɔ, trɔ yì yebe èfìɔa gbɔ. Sirìa be èfìɔa biɔ ɛ̀ sè be: “Nukɛ Èlìze gblɔ̃ na wò ò?” Hàzàɛl ɖo e ŋuti be: “E gblɔ̃ na mù be wò la gã!”

¹⁵Èŋù kè gbèa, Hàzàɛl yì sɔ kòtòku do èsì mè, sɔ yì cɔ̃ ŋùkumè na èfìɔa sɔ tu gbɔ̃gbɔ̃ ɖo pò na ɛ̀ kaka be ku. Kè Bɛn Hadàd kua, Hàzàɛl ɖùfìɔ ɖo ye tèpe.

¹⁶Lè Yòram, Àkab be èvi Izràɛl be èfìɔ be èpè àtɔ̃gɔ̃a mèa, Yòzàfat be èvi Yòram ɖùfìɔ lè Yudà.

¹⁷Èpè gbã vɔ èvè ye nɔ̀ e si gbɔ̀xue e ɖùfìɔ. E nɔ̀ Yèruzàlɛm xɔ̀ èpè ènyi.

¹⁸Yòram ɖè Àkab be èvi nyɔ̃nù ɖèka. E kplɔ̀ Àkab be xòmèa kudo Izràɛl be èfìɔwo be ètopòɖo vuɛ̃awo do. Eye e wɔ̀ ènu kèwo mu jè Tɔhonɔ̀ be ŋùmè ò.

¹⁹Vɔ̀a Tɔhonɔ̀ mu jro la crɔ̃ Yudà be fìɔdua ò. Ɖo nyàwoa, e fìã na David yebe sumɔ̃via be yebe jìjimèvi ɖe kòkò la nɔ̀ ye tèpe lè fìɔzìkpea ji.

²⁰Lè Yudà be èfìɔ, Yòram be hùenua, Edɔ̀mviwo sitè ɖo yebe jiɖùɖua ŋuti eye wo ɖo èfìɔ bu na woa ɖokoe.

²¹Ekèa na be Yòram kplɔ̀ yebe àhùakèkeviwo kpata yì kɔ̀ ɖo Sàyir. Lè èzã dòmè ke e kpe àkɔ kudo Edɔ̀mviwo. Vɔ̀ yebe àhùakɔ̃a kudo Yudàviwo si trɔ yì woa de.

²²Nène a ye Edɔ̀m be èdùa xɔ̀ ye ɖokoe-si-nɔ̀nɔ lè Yudà be fìɔdua gbɔ eye e kpɔ̀tɔ̀ lè nène kaka na egbè.

²³Èfìɔ Yòram be ŋutinya kpɔ̀tɛawo lè 'Yudà be èfìɔwo be èxotùnya xoma' mè.

²⁴Wàlɛbɛ kè èfìɔa kua, wo yì ɖì ì ɖo tɔgbeawo gbɔ lè David be èdùgãa mè. Èvia Àkazìa xɔ̀ yebe tèpe.

²⁵Lè èfìɔ Yòram, Àkab be èvi, Izràɛl be èfìɔ be èpè woèvègɔ̃a mèa, Yòram be èvi Àkazìa ɖùfìɔ lè Yudà.

²⁶E ɖo èpè èwì gbɔ̀xue ɖùfìɔ eye e nɔ̀ Yèruzàlɛm xɔ̀ èpè ɖèka. Wo yɔna ènɔa be Àtalìa, eye e so Izràɛl be èfìɔ Ɔmrì be xòmèa mè.

²⁷Àkazìa kplɔ̀ Àkab be xòmèa be kpɔwɔɛ bàɖàwo do, ɖo e ɖè nyɔ̃nù lè funu. Nène a ye e cã wɔ̀ ènu kèwo mu jè Tɔhonɔ̀ be ŋùmè ò.

²⁸Àkazìa kplɔ̀ Àkab be èvi èfìɔ Yòram, yì wɔ̀ àhùa kudo Sirìa be èfìɔ Hàzàɛl lè Ramɔ̀t, Gilead nyigbã ji. Lè àhùa mèa, Sirìatɔwo do àbì Yòram ŋuti.

²⁹Èfìɔ Yòram trɔ yì Yizrɛ̀l ne woa yì bla àbìa na ɛ̀. Eye Àkazìa va yì èdùgã kèa mè sɔ yì ji èfìɔ Yòram kpɔ ɖo e kpɔ̀tɔ̀ le vevesèse mè.