Read gen 2Èfìɔ 9 Bible Online

2Èfìɔ 9 - gen bible

2Èfìɔ 9

¹Gbè ɖèkaa, Èlìze yɔ gblɔ̃ɖɛtɔwo be ɖèkajɛwo dòmètɔ ɖèka. E gblɔ̃ na ɛ̀ be: “Jràɖo ne wòa sɔ àmìgo ŋua eye wòa yì Gilead nyigbã ji lè Ramɔ̀t.

²Ne wò ɖoa, ji Yòzàfat be èvi Yehù kè nyi Nimcì be tɔgbeyɔvia kaka wòa kpɔ. Ne wò kpɔ ɛ̀a, ɖè è jo lè nɔ̀viawo dòmè ne wòa kplɔ̀ ɛ̀ yì èxɔ̀ ɖè ɖovòa mè.

³Eye wò la sɔ àmìa sɔ kɔ̀ ɖo èta na ɛ̀ nɔ gblɔ̃ lè Tɔhonɔ̀ be nyikɔ mè be: “Mù le ɖo wò èfìɔ na Izràɛl!” E yomè a, hũ èhɔ̃a ne wòa si kaba.”

⁴Gblɔ̃ɖɛtɔvia so jè èmɔ̃ tùtà Ramɔ̀t lè Gilead nyigbã ji.

⁵Wàlɛbɛ kè e yì ɖoa, Izràɛl be àhùagawo bɔ̀. Gblɔ̃ɖɛtɔvia gblɔ̃ be: “Àhùaga, mù ɖo àŋɛ̀ ɖe la do na wò!” Yehù biɔ ɛ̀ sè be: “Na àmè kɛ lè mia dòmè ò?” Gblɔ̃ɖɛtɔa ɖo e ŋuti be: “Na èwò, àhùaga!”

⁶Yehù sitè eye e kplɔ̀ gblɔ̃ɖɛtɔa yì àxomè. Funu ye gblɔ̃ɖɛtɔa kɔ̀ àmìa ɖo èta na ɛ̀ lè, le gblɔ̃ ènyà kèawo be: “Tɔhonɔ̀, Izràɛl be Mawu a gblɔ̃ be: “Mù le ɖo wò èfìɔ na Izràɛl be dùkɔ̃a.

⁷Wò la wù àpo èfìɔ Àkab be xòmèa kpata. Nène a ye mù la biɔhlɔ̃ na gblɔ̃ɖɛtɔ kudo sumɔ̃vi kèwo èsrɔ̃a Yèzabɛl na wo wùa yeŋu.

⁸Èfìɔ Àkab be àxuedo a kpata la crɔ̃. Yebe ŋusùtiwo, àmè kèwo vòa kudo kluviwo kpata lè Izràɛl.

⁹Mù la wɔ̀ kudo yebe àxuedo a sìgbè lekè mù wɔ̀ kudo Yèrobòam, Nebàt be èvia, gbàkudo Bacà, Ahìa be èvia cã nène.

¹⁰Eye àmè ɖekpe mu la kpɔ̀tɔ̀ ci àgbè la va ɖì Yèzabɛl ò, ɖo àvũwo la ɖù yebe àmèkpòtia lè Yizrɛ̀l be àgblèa mè” Ekèa yomè a, gblɔ̃ɖɛtɔa hũ àgboa eye e si jo trolo.

¹¹Eye Yehù to, trɔ va cãmì kpɔ̀tɛawo gbɔ. Wo biɔ ɛ̀ sè be: “Ènu ɖe jɔ̀ a! Nukɛ ye àɖàhùatɔ ŋua le ji so gbɔ wò ò?” Yehù ɖo e ŋuti be: “Aò, mì nya ènyà kè àmè ŋua la teŋu gblɔ̃ fàa!”

¹²Àmè kpɔ̀tɛawo gblɔ̃ na ɛ̀ be: “Hoo! Wò ɖàjè. Gblɔ̃ ènu kè jɔ̀ a na mi.” Yehù ɖo e ŋuti be: “E nyɔ! E va do Tɔhonɔ̀ be àŋɛ̀ na mù be: “Mù le ɖo wò Izràɛl be èfìɔ!”

¹³Troloa, àhùaga kpɔ̀tɛawo ɖè woabe àwù èjitɔ̀awo dà ɖo Yehù be àfɔ̀gɔ̃mè. Wo ku èkpɛ̃ eye àmè sia àmè do àpa be: “Èfìɔ Yehù ne nɔ̀ àgbè tɛ̀gbɛ̀!”

¹⁴Nène a, Yehù, Yòzàfat be èvi, Nimcì be èvia blase ɖo Yòram ŋuti. Co Yòram ku Izràɛl kpata ye le wɔ̀ àhùa kudo Hàzàɛl, Sirìa be èfìɔ lè Ramɔ̀t lè Gilead nyigbã ji.

¹⁵Vɔ̀a èfìɔ Yòram trɔ yì Yizrɛ̀l ne woa bla àbì kèwo Sirìatɔwo do è, wàlɛbɛ kè e le wɔ̀ àhùa kudo Sirìa be èfìɔ Hàzàɛl. Yehù gblɔ̃ be “ne mì dà àsi ɖo ekèa jia, àmè ɖekpe mu la yì sà sàkplɛ lè Yizrɛ̀l ò.”

¹⁶Eye Yehù sɔ yebe àhùakèkevia jè èmɔ̃ yì Yizrɛ̀l, ɖo Yòram lè èdɔ̀ba ji lè funu eye Àkazìa, Yudà be èfìɔa cã yì, la yì ji ì kpɔ.

¹⁷Èmɔɖiatɔ kè lè èmɔ̃jikpɔxɔ̀a mèa kpɔ Yehù kudo àhùakɔ̃a. E gblɔ̃ na Yòram be: “Mù le kpɔ àhùakɔ̃ ɖe gbãnà.” Èfìɔ Yòram gblɔ̃ na ɛ̀ be: “Dɔ̃ èsɔkùtɔ ɖèka ɖoɖa yì dogò wo eye bèa nya ne wo hɛ̃ ŋuti fàfa gbãnàa!”

¹⁸Èsɔkùtɔa, yì eye e gblɔ̃ be: “Èfìɔ Yòram le biɔ sè be “ŋuti fàfa ye mì hɛ̃ gbãnà” mà a?” Eye Yehù ɖo e ŋuti be: “Fikɛ ye e kã wò ɖo ò. Va yì ŋùgbe na mù!” Èmɔjikpɔa kpɔ ènu kè jɔ̀ a eye e gblɔ̃ be: “Kè e ɖo funua kpòa, e bu ɖo woa dòmè!”

¹⁹Èfìɔ Yòram gbà dɔ̃ èsɔkùtɔ bu ɖoɖa. Kè e ɖo funua, e gblɔ̃ na wo be: “Èfìɔ le biɔ sè be “ŋuti fàfa ye mì hɛ̃ gbãnà” mà a?” Eye Yehù ɖo e ŋuti be: “Ŋuti fàfa be ènyà ɖe mu kã wò ò, va yì ŋùgbe na mù.”

²⁰Èmɔjikpɔtɔa gbà gblɔ̃ ɖe be: “Kè èsɔkùtɔa ɖo funua, e cã mu gbà trɔ gbɔ̀ ò. Co mù kpɔ Nimcì be èvi Yehù jèsi, ɖo e kùnà èsɔ sìgbè àmè kè jè àɖàhùa nène.”

²¹Nène a, èfìɔ Yòram na ègbè be woa jrà yèbe àhùakèkevia ɖo eye e lia e ji. Yudà be èfìɔ Àkazìa cã lia ye tɔ̀a ji. Wo jè èmɔ̃ yì dogò Yehù lè Nàbɔt so Yizrɛ̀l be àgblèa gbɔ.

²²Wàlɛbɛ kè Yòram kpɔ Yehùa, e biɔ ɛ̀ sè be: “Fàfa lè àzɔ̃lì wòa mèa, Yehù?” E ɖo e ŋuti be: “Wò be nukɛ? Fàfa! Kpao, kaka kè ènɔ̀ wò Yèzabɛl kpɔ̀tɔ̀ le sɛ̃ vòduwo eye e gbà le wɔ̀ àzea!”

²³Eye èfìɔ Yòram trɔ hàa eye e si ku èdù tɔ àpa dodo le gblɔ̃ na Àkazìa be: “Àkazìa kpɔ ɖokoe wò ji, wo do mi àsi!”

²⁴Yehù sɔ yebe àŋùdàtia eye e dà ɛ̀ ɖo Yòram yomè. Àŋùtia yì ŋɔ Yòram be èkpomè, to yebe èjìa mè foto ɖo àkɔta. Eye Yòram jè ànyi lè yebe àhùakèkevia ji.

²⁵Nène a ye Yehù gblɔ̃ na yebe àhùaga Bìdekà be: “Sɔ yebe àmètia dãŋùgbe ɖo Nàbɔt be àgblèa mè lè Yizrɛ̀l! Ɖo ŋùku be kè nyè ku wò mi lè èsɔ ji lè ètɔa Àkab be ŋùgbe dòmèa, Tɔhonɔ̀ gblɔ̃ ètodɔ̃-nyà kèa be:

²⁶“Nyè ŋutɔ mù kpɔ Nàbɔt kudo èviawo be èku, Tɔhonɔ̀ ye gblɔ̃ ɛ̀. Eye mù la ɖo ekèa tèpe na wò pɛpɛpɛ lè àgblè kèa mè!” Eŋuã ŋutia, sɔ yebe àmètia yì dãŋùgbe ɖo àgblèa mè sìgbè lekè Tɔhonɔ̀ gblɔ̃ ɛ̀a nène.”

²⁷Wàlɛbɛ kè èfìɔ Àkazìa kpɔ ènu kè jɔ̀ ɖo Yòram jia, e cã si to àbɔ mè mɔa ji tùtà Bɛt-Gàn. Yehù nyà ɛ̀ ɖonu eye e gblɔ̃ na ye tɔ̀wo be “Mì wù ye cã. Eye wo do àbì e ŋuti lè yebe àhùakèkevia mè lè Ibleàm gbɔ. Vɔ̀a, e teŋu si kaka yì Mègidò be èdùa mè. Funu be yì ku ɖo.

²⁸Yebe sumɔ̃viawo kɔkɔ ɛ̀ ɖo àhùakèkevi mè kaka yì Yèruzàlɛm. Wo yì ɖì ì ɖo ètɔawo gbɔ lè “David be èdùa” mè.

²⁹Àkazìa trɔ zũ Yudà be èfìɔ lè Àkab be èvi Yòram be èfìɔ ɖùɖu be èpè èwogɔ̃a mè lè Izràɛl.

³⁰Yehù yì kɔ̀ ɖo Yizrɛ̀l. Eye kè Yèzabɛl sè ènu kèwo keŋu e wɔ̀a, e jràɖo keŋu-keŋu, do tilò ɖo ŋùku gɔ̃mè, le kpɔ ènu to flɛsɛ̀.

³¹Wàlɛbɛ kè Yehù le to àgboa nu la ɖo èdùa mèa, e do àpa ɖoɖa ɛ̀ be: “Ŋuti fàfa ye wò hɛ̃ vaa, Zimrì be sìmè, àmè kè wù yebe èfìɔa?”

³²Yehù kɔ èta yì ji kpɔ ɛ̀ ɖoɖa lè flɛsɛ̀a nu eye e gblɔ̃ be: “Àmè kɛ lè èji nyè ò? Àmè kɛ ye ò?” Eye kobonɔ̀ èvè àlo ètɔ̃ ɖè èta to le kpɔ ɛ̀ to flɛsɛ̀ ɖoɖa.

³³E ɖègbè na wo be woa kɔ ɛ̀ to flɛsɛ̀, dãŋùgbe ɖoɖa. Nène a ye wo kɔkɔ Yèzabɛl dãŋùgbe to flɛsɛ̀ ɖoɖa. Yebe èhũa hlɛ̃ kɔ̀ ɖo èglìa kudo èsɔwo ŋuti. Yehù zɔ̃ e ji ku yebe àhùakèkevia.

³⁴E yomè a, Yehù yì èfìɔsaa mè. E ɖùnu gbà nù eye e gblɔ̃ na àmè kèwo trɔ do èa be: “Nyɔ̃nù bàɖà kèa nyi èfìɔvi, mì yì ɖì ì.”

³⁵Wo jè èmɔ̃ la yì ɖì ì, vɔ̀a yebe èta kpò ŋuti wo kè ɖo ku àfɔ̀wo kudo àlɔ̀wo.

³⁶Wo trɔ va gblɔ̃ ɛ̀ na Yehù. Eye Yehù ɖoŋùku, gblɔ̃ be: “Ekèa ye Tɔhonɔ̀ gblɔ̃ to Èli kè so Ticebè nyigbã ji be “Àvũwo la ɖù Yèzabɛl lè Yizrɛ̀l be àgblèa mè.

³⁷Eye Yèzabɛl be ŋutilã la kãkã sìgbè kɔkɔli nène lè Yizrɛ̀l be àgblè mè. Eye wo mu la gbà kpɔ Yèzabɛl jèsi ŋutɔ cã ò.”