Read gen 1Kronikà 10 Bible Online

1Kronikà 10 - gen bible

1Kronikà 10

¹Gbè ɖèkaa, Filistìtɔwo kpe àhùa ku Izràɛlviwo lè Gilbòa be ètoa ji. Filistìtɔwo wù Izràɛlvi sùgbɔ, eye àmè kpɔ̀tɛawo si lè ŋùkɔ̀ na Filistìtɔwo.

²Filistìtɔwo xa Saolò ku èviawo. Filistìtɔwo teŋu wù Yonatàn, Abinadab, ku Malkisua, èfìɔ Saolò be èviawo.

³Àhùaa va sɛ̃ŋu do Saolò, eye, ekè àŋùtidàtɔwo va kè ɖo e ŋutia, àdìka sò è, wàlɛbɛ kè wo do àbì e ŋutia.

⁴Saolò gblɔ̃ na yebe àdèkplɔ̀via be: “Sɔ èwui wòa, ne wòa wù mù. Nyè mu jro be àtɔ̀tɔ̀nɔ̀ kèawo ne wù mù, sɔ ɖìgbɔ mù ò.” Vɔ̀a, Saolò be àdèkplɔ̀via gbe, ɖoa, e le vɔ̃ ŋutɔ. Ekèa ŋutia, Saolò sɔ èwuia, eye be jè e nu.

⁵Ekè àdèkplɔ̀via kpɔ be Saolò kua, e cã jè yebe èwui nu, eye be ku.

⁶Nène a ye Saolò ku èvia ŋusù ètɔ̃awo ku. Nène a ye yebe xòmèa cã gũa yeŋu.

⁷Ekè Izràɛlvi kèwo ye lè bàlìa be èdùwo mèawo sè lekè woabe àhùakɔ̃wo le si ɖo, ku lekè Saolò ku èviawo ku ɖoa, Izràɛlviawo gble woabe èdùawo ɖɛ, eye wo si jo. Ekè Filistìtɔwo va ɖo èdùawo mèa, wo xɔ̀ Izràɛlviawo tèpe.

⁸Kè èŋù kèa, Filistìtɔwo va ɖè àmè kèwo ci àhùaawo be ènuzãzãwo lè woa ŋuti. Wo kpɔ Saolò ku èviawo be àmèkpòtiawo lè Gilbòa be ètoa ji.

⁹Wo ɖè ènuzãzãwo lè Saolò ŋuti. Wo sò yebe èta jo, eye wo fɔ̀ yebe àhùawɔ̀nuwo cã. Filistìtɔwo sɔ ènu kèawo ɖìsà lè Filistì-nyigbãa keŋu ji, ne woa sɔ kãkã ènyà kèa na woabe vòduwo ku woabe dùkɔ̃a.

¹⁰Filistìtɔwo sɔ Saolò be àhùawɔ̀nuawo ɖo woabe vòdu be èxɔ̀ mè, eye wo sɔ yebe èta sɔ trɔ̃ ɖo vòdu Dagɔ̀n be èxɔ̀ mè.

¹¹Àmè kèwo keŋu nɔ̀nà Yabɛ̀s lè Gilead-nyigbã jiawo sè ènu kèwo keŋu Filistìtɔwo wɔ̀ ku Saolò, èfìɔa.

¹²Gbãdãgbã kãlìwɔ̀tɔwo keŋu so, sɔ Saolò ku èviawo be àmèkpòtiawo yì Yabɛ̀s be èdùa mè. Wo ɖì àmèkukuawo be èpuwo ɖo Yabɛ̀s be banìtia gɔ̃mè. Ekèa yomè a, wo bla ènu, ŋùkèkè adrɛ̃, sɔ lòfũ.

¹³Saolò ku, ɖo mu wɔ̀ ànùkua na Tɔhonɔ̀ ò. Mu wɔ̀ ɖo Tɔhonɔ̀ be èsewo ji ò, eye be yì kã àfã, yɔ èxɔ̀ ŋutɔ cã,

¹⁴wàlɛbɛ kè be la yɔ Tɔhonɔ̀ bòhũ, la sɔ biɔ ɛ̀ ènyà sèa. Ènu kèawo ŋuti ye Tɔhonɔ̀ na Saolò ku, eye Tɔhonɔ̀ xɔ̀ èfìɔɖùɖu lè e si, do àsi na David, Jesè be èvia.