Read gen 1Kronikà 11 Bible Online

1Kronikà 11 - gen bible

1Kronikà 11

¹Izràɛl dùkɔ̃a keŋu va bɔ̀ lè David gbɔ, lè Hebrɔ̀n. Wo gblɔ̃ na ɛ̀ be: “Kpɔɖa, àpo èpu ku àpo ŋutilã ye miawo mi nyi, so tɔgbe ɖèka gbɔ.

²Sãa, wàlɛbɛ kè Saolò le ɖùfìɔa ŋutɔ cã a, èwò ye kplɔ̀nà Izràɛlviwo yìnà àhùagbewo keŋu ji, gbà gbɔ̀nà. Eye Tɔhonɔ̀ Mawu wò gblɔ̃ na wò be: 'Èwò ye la nyì Izràɛl dùkɔ̃ kè nyi dùkɔ̃ nyèa. Èwò ye la nyi èfìɔ lè Izràɛl dùkɔ̃ kè nyi dùkɔ̃ nyèa nu.'”

³Ekèa ŋuti Izràɛl dùkɔ̃a be àmè sĩsĩwo kenu va kpɔ èfìɔa lè Hebrɔ̀n, eye David ɖùzò ku wo lè Tɔhonɔ̀ be ŋùmè lè Hebrɔ̀n. Àmè sĩsĩawo do àmì èta na David, sɔ ɖo è èfìɔ ɖo Izràɛl nu, sɔ zɔ̃ ɖo Tɔhonɔ̀ be ènyà kè be àŋɛ̀ Samuɛl va do na woa ji.

⁴David lè ŋùkɔ̀ na Izràɛl dùkɔ̃ bliboa, eye wo zɔ̃ ɖo Yèruzàlɛm be èdù kè wo yɔna be Yebus, èdù kè mè Yebusìtɔwo nɔ̀nà sãa ji.

⁵Yebus be èdùamètɔwo gblɔ̃ na David be: “Àpo àfɔ̀ ɖèka mu la ɖo miabe èdù mè ò!” Gãkea, David ɖo àsi Ziɔ̀n be àgbògbòa ji. Ekèa ŋuti ye wo yɔna ɛ̀ be David be èdù ɖo.

⁶Jè ŋùkɔ̀a, David gblɔ̃ be: “Àmè cucugbã kè la tɔ Yebusìtɔwo wùwua, la trɔ zũ èga kè la nyi àhùaŋùkɔ̀nɔ̀tɔa. Ekèa yomè a, Yoab, Seruyà be èvia, jè ŋùkɔ̀, tɔ Yebusìtɔwo wùwu, eye be trɔ zũ àhùaŋùkɔ̀nɔ̀tɔ.

⁷David yì nɔ̀ àgbògbòa mè. Ekèa ŋuti wo ɖo nyikɔ na àgbògbòa be David be èdù ɖo.

⁸Ekèa yomè a, David sò èdùa kpe do kplògòdò, so àgbògbòa be tèpe kè wo ɖo nyikɔ na be Milòa, sɔ yì èdùa be èkɔ kèwo ye lè e godoa mè. Yoab ya gbìgbɔ̀ tù èdùa be tèpe kpɔ̀tɛawo.

⁹So ekèa jia, David le kpɔ ŋusɛ̃ ɖo e ji, so ŋùkèkè, yì ŋùkèkè, ɖoa, Tɔhonɔ̀ Ŋusɛ̃kpatatɔa lè kudo è.

¹⁰Àmè kèwo ye nɔ̀ ŋùkɔ̀ na David be kãlìwɔ̀tɔwo be àhùakɔ̃woa ye nyi ekèawo; woawo ye bɔ̀ ɖo Izràɛl be dùkɔ̃a keŋu ŋuti, le David ɖotè goŋu-goŋu, lè yebe èfìɔɖùɖua keŋu mè, sɔ zɔ̃ ɖo ènyà kè Tɔhonɔ̀ gblɔ̃ ɖo Izràɛl be dùkɔ̃a ŋutia ji.

¹¹David be kãlìwɔ̀tɔ kèawo ye nyi: Yasobeàm kè nyi Hakmonì, kãlìwɔ̀tɔ ègbã be èhasòso be ŋùkɔ̀nɔ̀tɔa be èvi. Àmè kèa ye dà èhuã, sɔ wù àmè àlɔ̀ ètɔ̃ (300), lè àhùawɔ̀wɔ ɖèka mè.

¹²E yomè a, Eleazàr, Dodò kè nyi Ahohì be èdùmètɔ kè nɔ̀ kãlìwɔ̀tɔ ètɔ̃ be èhasòso mèa be èvi.

¹³Àmè kèa ye nɔ̀ David ŋuti lè Pas-Damìm, wàlɛbɛ kè Filistìtɔwo bɔ̀ la wɔ̀ àhùa lè funua. Èlù vũ ɖɔ àgblè ɖe lè funua, eye Izràɛl dùkɔ̃a si lè Filistìtɔwo be ŋùkɔ̀.

¹⁴Izràɛl dùkɔ̃a yì tù àfɔ̀ tè ɖo àgblèa be dòdòmè. Wo kpe àkɔ ku Filistìtɔwo, eye Tɔhonɔ̀ na wo èjiɖùɖu gã ɖe.

¹⁵Ŋùkɔ̀nɔ̀tɔ ègbãawo dòmètɔ ètɔ̃ ɖì va David gbɔ le àkpãwo mè, lè Adulàm be àkpãdoa mè. Filistìtɔwo do àsàɖa ɖo Refaim be bàlìa mè.

¹⁶Wàlɛbɛ ŋuaa, David lè yebe bèbèpea, eye Filistìtɔwo be àhùakɔ̃ ɖe lè Bɛtlɛhɛ̀m.

¹⁷David ɖè èjro kèa sia be: “Àmè kɛ ye la kù èsì lè èsìdo kè lè Bɛtlɛhɛ̀m be àgbonua mè va na mù, ma nù ò?”

¹⁸Ekèa yomè a, àmè ètɔ̃awo yì to ɖo Filistìtɔwo be àsàɖa mè. Wo kù èsì lè èsìdo kè lè Bɛtlɛhɛ̀m be àgboa nua mè, sɔ ɛ̀ va na David. Vɔ̀a, David mu nù èsìa ò. E sɔ ɛ̀ kɔ̀ ɖɛ na Tɔhonɔ̀.

¹⁹David gblɔ̃ be: “Mawu nyè ne sɛ̃kpɛ̃ na mù, ne mù wɔ̀ ènu kèa! Mù la nù èsì kè àmè kèawo sɔ woabe èhũ sɔ plèa? Gbèɖe! Woabe àgbè ye wo sɔ savɔ, gbɔ̀xue kù èsì kèa!” Eye David mu nù èsìa ò. Ènu kèa ye kãlìwɔ̀tɔ ètɔ̃awo wɔ̀.

²⁰Abisai, Yoab be nɔ̀vi ŋusùa ya nyi kãlìwɔ̀tɔ ègbãwo be ŋùkɔ̀nɔ̀tɔ. E ye sɔ yebe èhuã, sɔ wù Izràɛlviwo be èkɛ̃tɔ àlɔ̀ ètɔ̃ (300), eye be xɔ̀ nyikɔ lè àmè ètɔ̃awo dòmè.

²¹Wo do bùbu e ŋuti, zè èvè wu kãlìwɔ̀tɔ ègbãawo, eye be trɔ zũ woabe ŋùkɔ̀nɔ̀tɔ. Gãkea, yebe bùbua mu sù kãlìwɔ̀tɔ ètɔ̃awo tɔ̀ ò.

²²Yehoyada kè Kabsɛ̀l be gbãdãgbã kãlìwɔ̀tɔ ɖe jìa be èvi Benayà wɔ̀ kãlìnu sùgbɔ. E ye wù Arìɛl, Mòab ŋusùa be èvi kãlìwɔ̀tɔ èvèawo. Gbè ɖèkaa, lè àvìvɔ hùenua, e ye ke gbà ɖì yì èsìdoa mè, yì wù jãŋùta.

²³E ye ke gbà wù Ejiptè ŋusù kàkò kè dìdì àbɔglìgo àtɔ̃a. Ejiptè ŋusùa le èhuã kè trì sìgbè àvɔlɔ̃tɔwo be hũvi nènea ɖo àsi. Benayà yaa, zɔ̃ ɖo ŋusùa ji ku èkpò. E gbĩ èhuãa lè Ejiptè ŋusùa si, eye be sɔ ɛ̀ wù ye ŋutɔ.

²⁴Ènu kèwo Benayà, Yehoyada be èvia wɔ̀awo ye nyi eŋuãwo. Ekèa na ɛ̀ nyikɔ lè kãlìwɔ̀tɔ ègbãawo dòmè.

²⁵Wo do bùbu e ŋuti wu kãlìwɔ̀tɔ ègbãawo, vɔ̀a, yebe bùbu mu sù kãlìwɔ̀tɔ ètɔ̃awo tɔ̀ ò. Èfìɔ David na be va nɔ̀ ye ŋutɔ be ɖiatɔwo dòmè.

²⁶Kãlìwɔ̀tɔ kèwo lè àhùakɔ̃a mèawo ye nyi: Asahɛl, Yoab be nɔ̀vi Ɛlhanàn, Dodò, Bɛtlɛhɛ̀m ŋusùa be èvia;

²⁷Samɔt, Harɔt ŋusùa, Helɛs, Pelɔ̀n ŋusùa.

²⁸Irà kè nyi Ikɛ̀s, Tekoì ŋusùa be èvia, Abiezɛr kè nyi Ànatɔt ŋusùa,

²⁹Sibekai kè nyi Husat ŋusùa; Ilayì kè nyi Ahohì be ŋusùa,

³⁰Maherai, kè nyi Netofàt ŋusùa, Halɛd, Baanà kè so Netofàt be èdù mèa be èvia,

³¹Itai kè nyi Rivai kè so Gibeaa be èvia. Wo nyi Bɛnyamìn be jìjimèviwo, Benayà kè nyi Pireatɔ̀n ŋusùa;

³²Hurai kè so Gaas be ètɔ̀sɛ̃sɛ̃wo be àgowo jia; Abiɛl, Arvat ŋusùa;

³³Azmàvɛt, Baharum ŋusùa; Ɛliahbà, Saalvɔ̀n ŋusùa

³⁴Bene-Hasɛ̀m, Gizonì ŋusùa; Yonatàn, Sagè, Hararì ŋusùa be èvia,

³⁵Àhiam kè nyi Sakar, Hararì ŋusùa be èvia, Elifàl, Ur be èvia.

³⁶Hefɛ̀r, Mekerat ŋusùa; Ahiyà, Pelɔ̀n ŋusùa;

³⁷Hɛzrò, Karmèl ŋusùa, Naarai, Ɛzbaì be èvia,

³⁸Yoɛ̀l, Natàn be nɔ̀via, Mivhar, Hagrì be èvia,

³⁹Selɛ̀k, Amɔ̀n ŋusùa, Naheraì, Berɔ̀t ŋusù kè nyi Yoab, Seruyà be èvia be àdèkplɔ̀via,

⁴⁰Irà, Yitrì ŋusùa, Garɛb kè so Yitrì kèa,

⁴¹Hurìa, Hitì ŋusùa. Zavad, Ahlaì be èvia,

⁴²Adìnà, Sizà, Rubɛ̀n be jìjimèvi kè nyi Rubɛ̀n be jìjimèviwo be ŋùkɔ̀nɔ̀tɔa be èvia. Àmè ègbã buwo gbà kpe wo, so jìjimè kèa mè.

⁴³Hanàn, Maakà be èvia ku Yòsafat, Mitnìt ŋusùa;

⁴⁴Uziyà, Asterat ŋusùa Samà ku Yeìɛl, Hotàm, Àroà, ŋusùa be èviwo.

⁴⁵Yediaɛ̀l, Simri be èvia ku nɔ̀via Yohà, Tisì ŋusùa,

⁴⁶Elìɛl, Mahav ŋusùa, Yeribaì ku Yosavìa, Ɛlnaam be èviwo kudo Yitmà, Mòab ŋusùa,

⁴⁷Elìɛl Obɛd gbàkudo Yaasiɛl kè so Sovàa.