Read gen 1Kronikà 13 Bible Online

1Kronikà 13 - gen bible

1Kronikà 13

¹David ɖè àɖàŋù ku àmè èkà èwì vɔ àtɔ̃wo kudo èkà èvè takpowo be àhùakɔ̃wo be àhùa ŋùkɔ̀nɔ̀tɔwo, gbàkudo àgbònùglawo keŋu.

²E gblɔ̃ na Izràɛlviwo be àmèhaa keŋu be: “Ne e jè ŋùmè na mì, eye be so Tɔhonɔ̀, miabe Mawu gbɔa, mia do àŋɛ̀ ɖoɖa mia nɔ̀vi kèwo gbà lè Izràɛl-nyigbã keŋu jia, eye mia do àŋɛ̀ ɖoɖa hũbonɔ ku Levì be jìjimèviwo gbɔ, lè èdù kèwo mè wo lèa, àleke be woa va bɔ̀ ɖo mia ŋuti.

³Ekèa yomè a, mi la na miabe Mawu be Zòɖùɖu-Ɖakà a la trɔ gbɔ̀ va mia gbɔ, ɖoa mi mu lebè na ɛ̀ lè Saolò be hùenu ò.”

⁴Àmèhaa keŋu xɔ̀ ɖo e ji, be yèwo la wɔ̀ nènea, ɖoa, dùkɔ̃a keŋu kpɔ ɛ̀ be e jè ŋùmè na yèwo.

⁵Ekèa na be David yɔ Izràɛl dùkɔ̃ bliboa bɔ̀, so Ejiptè be ètɔ̀ wɔ̀adãa nu kaka va ɖo Hamàt be àgbo nu, àleke be woa sɔ Mawu be Zòɖùɖu-Ɖakà a so Kirìat-Yearim va.

⁶David ku Izràɛl-dùkɔ̃ bliboa so, yì Baalà kè nyi Kirìat-Yearim, lè Yudà-nyigbã jia, ne woa sɔ Tɔhonɔ̀ Mawu kè le ɖùfìɔ lè Kèrubimwo ji, àfi kè wo yɔna yebe nyikɔ lèa, be Zòɖùɖu-Ɖakà a va.

⁷Wo kɔ Mawu be Zòɖùɖu-Ɖakà a ɖo kèkevi yeye ji, so Abinadab be àxomè. Uzà ku Ahìo le kù kèkevia.

⁸David ku Izràɛl dùkɔ̃ bliboa le kpɔ jìjɔɛ, eye wo le ɖu èwè lè Mawu be ŋùkumè, wàlɛbɛ kè èhàjìjiwo, èkàsãŋùguwo, èhɛwo, èkpɛ̃wo, èhũwo, ku ègàkokoewo le ɖìa.

⁹Ekè wo va ɖo Kidɔ̀n be èlùfupea, Uzà drɛ̃ àlɔ̀, la sɔ le àɖakàa, ɖoa, ènyìawo klɛ̃ àfɔ̀, la mù àɖakà a pu ànyi klo ye.

¹⁰Àdɔ̀mè ve Tɔhonɔ̀ ɖo Uzà ŋuti, eye Tɔhonɔ̀ pò Uzà pu ànyi, ɖoa, Uzà drɛ̃ àlɔ̀, tɔ àɖakàa. Uzà ku zè ɖèka, lè Mawu be ŋùkɔ̀.

¹¹David titɔ, ekè Tɔhonɔ̀ pò Uzà wùa. Wo gbà yɔna tèpe kèa egbè be “Perɛz-Uzà”, kè gɔ̃mè ye nyi: “Uzà be Ètodɔ̃pe”.

¹²Gbè ŋua gbèa, David vɔ̃ Mawu ŋutɔ, eye be gblɔ̃ be: “Lekè mù la teŋu sɔ Mawu be àɖakàa va ɖokoe nyè gbɔ ɖo ò?”

¹³Ekèa ŋutia, David mu gbà sɔ àɖakàa yì ɖo yebe àxomè, lè David be èdùa mè ò. E sɔ ɛ̀ yì ɖo Obɛd-Edɔ̀m, Gitì ŋusùa be àxomè.

¹⁴Àɖakàa nɔ̀ Obɛd-Edɔ̀m xòmè, wètri ètɔ̃, eye Tɔhonɔ̀ tu sì na Obɛd-Edɔ̀m be àxuea ku ènu kèwo keŋu nyi Obɛd-Edɔ̀m tɔ̀awo.