Read gen 1Kronikà 14 Bible Online

1Kronikà 14 - gen bible

1Kronikà 14

¹Hiràm, Tirò be èfìɔa dɔ̃ àmè ɖoɖa David. E sɔ sedàtiwo dɔ̃ èkpekpàtɔwo ku kapitàwo ɖoɖa be woa yì tù àxue na David.

²Ekèa na be David sè e mè be Tɔhonɔ̀ ɖo yè èfìɔ ɖo Izràɛl nu, eye, ekè Izràɛl nyi Mawu be dùkɔ̃a, yèbe èfìɔɖùɖua ɖo kɛ̃klɛ̃ tɔ̀xɛ ɖe.

³David gbà ɖè èsrɔ̃ buwo lè Yèruzàlɛm, eye be gbà jì ŋusùviwo ku nyɔ̃nùviwo.

⁴Èvi kèwo wo jì na ɛ̀ lè Yèruzàlɛm be èdùa mèa, be nyikɔwo ye nyi ekèawo: Samùa, Sobab, Natàn ku Salomɔ̀n,

⁵Yivhàr, Elisùa ku Ɛlpalɛt,

⁶Nɔgà, Nefɛg ku Yafìa,

⁷Elisamà, Beɛlyadà ku Elifɛlɛ̀t.

⁸Ekè Filistìtɔwo sè be wo do àmì èta na David, sɔ ɖofìɔ ɖo Izràɛl dùkɔ̃ bliboa nua, Filistìtɔwo keŋu so jè èmɔ be yèwo la yì le David. Kè David sè èa, e so, la yì dogò wo.

⁹Filistìtɔwo va ɖo Refai[3] be bàlìa mè, eye wo gbã ènu sia ènu lè funua.

¹⁰David biɔ Mawu be: “Mù la yì kpe àhùa ku Filistìtɔwoa? Eye, ne mù toa ɖe, wò la do wo àsi na mù a?” Tɔhonɔ̀ ɖo e ŋuti na ɛ̀ be: “Yì, mù la sɔ wo do àsi na wò.”

¹¹Filistìtɔwo va kaka Baal-Perasim, eye David ɖù woa ji lè funua. Ekèa yomè a, David gblɔ̃ be: “Mawu sɔ àlɔ̀ nyè ɖè èmɔ ɖo kɛ̃tɔ nyèwo dòmè, sìgbè lekè èsì ɖènà èmɔ nène.” Ekèa ŋuti ye wo yɔ tèpe kèa be Baal-Perasim ɖo.

¹²Kè Filistìtɔwo gble woabe vòduwo ɖo funua, David ɖè ègbè, eye wo tɔ wo èzò.

¹³Filistìtɔwo gbà va le gble ènu lè Refai be jìjimèviwo be Bàlìa mè ke.

¹⁴David gbà biɔ ègbè Tɔhonɔ̀, vɔ̀a Tɔhonɔ̀ ɖo e ŋuti be: “Mù gbà jè woa yomè ò. Vɔ̀a, trɔ to àzɔ̀ge na wo, ne wòa yì sò wo lè àti sɛ̃sɛ̃awo be ŋùkɔ̀.

¹⁵Eye, wàlɛbɛ kè wò la gbe sè àfɔ̀zĩ lè àtiawo tamè kpòa, zɔ̃ ne wòa kpe àhùa ku wo, ɖoa, Mawu ŋutɔ ye la zɔ̃ lè ŋùkɔ̀ na wò, la pò Filistìtɔwo be àhùakɔ̃a.

¹⁶David zɔ̃ ɖo lekè Tɔhonɔ̀ ɖo na ɛ̀a ji, eye Izràɛlviwo ɖù Filistìtɔwo be àhùakɔ̃a ji, so Gabaɔ̀n kaka va Gɛzɛ̀r.

¹⁷David be nyikɔ le ɖì lè ànyigbãwo keŋu ji, eye Tɔhonɔ̀ do vɔ̃vɔ̃ David ŋuti lè dùkɔ̃wo keŋu be ŋùmè.