Read gen 1Kronikà 15 Bible Online

1Kronikà 15 - gen bible

1Kronikà 15

¹David tù èxɔ̀wo na ye ɖokoe, lè David be èdùa mè. E ɖo nɔ̀pe na Mawu be Zòɖùɖu-Ɖakà a, eye be tù gòxɔ na ɛ̀.

²Ekèa yomè a, David gblɔ̃ be: “Levì be jìjimèviwo kpò ye ɖo la kɔkɔ Mawu be Zòɖùɖu-Ɖakà a, ɖoa, Tɔhonɔ̀ cã wo be wo ne nɔ kɔkɔ Tɔhonɔ̀ be Zòɖùɖu-Ɖakà a, eye woa nɔ sumɔ ɛ̀ kaka sɔ yì.”

³David na Izràɛl dùkɔ̃a keŋu bɔ̀ ɖo Yèruzàlɛm, àleke be woa kɔkɔ Tɔhonɔ̀ be àɖakàa va nɔ̀pe kè be ɖo na ɛ̀a.

⁴E yɔ Arɔ̀n be jìjimèviwo ku Levì be jìjimèviwo cã bɔ̀.

⁵Àmè kèwo so Kehàt be jìjimèviwo dòmèawo be ŋùkɔ̀nɔ̀tɔ ye nyi Urìɛl. E ku nɔ̀viawo lè àgbètɔ èkà ètɔ̃.

⁶Merarì be jìjimèviwo be ŋùkɔ̀nɔ̀tɔ ye nyi Asayà. E ku nɔ̀viawo lè àgbètɔ èkà àtɔ̃ takpo.

⁷Gɛrsɔ̀n be jìjimèviwo be ŋùkɔ̀nɔ̀tɔ ye nyi Yoɛ̀l. E ku nɔ̀viawo lè àgbètɔ èkà ètɔ̃ ci èwo.

⁸Elisafàn be jìjimèviwo be ŋùkɔ̀nɔ̀tɔ ye nyi Semayà. E ku nɔ̀viawo lè àgbètɔ èkà àtɔ̃.

⁹Hebrɔ̀n be jìjimèviwo be ŋùkɔ̀nɔ̀tɔ ye nyi Elìɛl. E ku nɔ̀viawo lè àgbètɔ èkà èvè.

¹⁰Uziɛl be jìjimèviwo be ŋùkɔ̀nɔ̀tɔ ye nyi Aminadàb. E ku nɔ̀viawo lè àgbètɔ àlɔ̀ ɖèka ci woèvè (112).

¹¹David yɔ hũbonɔwo: Sadɔk ku Abiatàr kudo Levìwo Urìɛl, Asayà, Yoɛ̀l, Semayà, Elìɛl ku Aminadàb.

¹²E gblɔ̃ na wo be: “Mìawo ye nyi Levì be xòmètɔwo be ŋùkɔ̀nɔ̀tɔwo. Mìa ku mìa nɔ̀viwo, mì kɔ̀ mìa ɖokoewo ŋuti, ne mìa kɔkɔ Tɔhonɔ̀ be àɖakàa va ɖo tèpe kè mi jràɖo ɖɛ na ɛ̀a.

¹³Ɖo, kè mì mu nɔ̀ e tèpe sã òa, Tɔhonɔ̀, miabe Mawu dɔ̃ èto[4] na mi veve ɖe, ɖoa, mi mu ji ì ɖo ɖoɖo nu ò.”

¹⁴Ekèa ŋuti ye hũbonɔwo ku Levì be jìjimèviwo kɔ̀ woa ɖokoewo ŋuti, ne woa kɔkɔ Tɔhonɔ̀, Izràɛl be Mawu a be àɖakàa yì.

¹⁵Sìgbè lekè Mɔsè ɖè ègbè, sɔ zɔ̃ ɖo Tɔhonɔ̀ be ɖoɖo nu nènea, Levì be jìjimèviwo sɔ àti lɔ̀bɔ̀wo kɔkɔ Mawu be àɖakàa ɖo woabe àbɔta.

¹⁶David gblɔ̃ na Levì be jìjimèviwo be ŋùkɔ̀nɔ̀tɔwo be woa sɔ èhàjìnuwo sìgbè èhɛwo, èkà sãŋùguwo, ègàkokoewo nène, sɔ do èdɔ àsi na woa nɔ̀vi ŋusù kèwo nyi èhàsìnɔ̀woa, ne woa nɔ jì èhà, la nɔ pò èhũ ku jìjɔɛ, sɔ nɔ kafu Tɔhonɔ̀.

¹⁷Nène a, Levì be jìjimèviwo do èdɔ àsi na Hemàn, Yoɛ̀l be èvia, eye, lè nɔ̀viawo dòmèa, wo sɔ Àsaf kè nyi Berɛkìa be èvia. Lè Merarì be èviwo dòmè, kèwo nyi woa nɔ̀viwo dòmèa, wo sɔ Etàn kè nyi Kusayà be èvia.

¹⁸Sɔ kplɔ̀ àmè kèawo do a, wo sɔ woa nɔ̀vi Zakarìa, Bɛn, Yaazìɛl, Semiramɔ̀t, Yehìɛl, Unì, Eliab, Bɛnayà, Màaseyà, Matitiyà, Eliflehu ku Mikneyahu, Ovɛd-Edɔ̀m ku Yehiɛl kèwo nyi àgbonuɖiatɔwo.

¹⁹Lè hàsìnɔ̀wo dòmèa, Hemàn, Àsaf ku Etàn ɖo gàjɛ̃ be ègàkokoe kèwo ɖìnà sɛ̃sɛ̃ ɖe a.

²⁰Zakarìa, Aziɛ̀l, Semiramɔ̀t, Yeìɛl, Unì, Eliab, Màaseyà, Ovɛd-Edɔ̀m ku Benayà ɖo èkà sãŋùgu kè wo pònà na ègbè ɖèka be èhàjìji.

²¹Matitiyà, Eliflehu, Mikneyahu, Ovɛd-Edɔ̀m, Yehiɛl ku Azazyà ɖo èkà ènyi be sãŋùgu kèwo be ègbè yìnàjia, eye wo sɔ kplɔ̀nà èhàjìjia nu.

²²Eye Kenanyà kè nyi Levì be jìjimèviwo be ŋùkɔ̀nɔ̀tɔa kplɔ̀nà èhajìjia, ɖoa, e nya ènu sùgbɔ so e ŋuti.

²³Berekìa ku Ɛlkanà ɖiana Mawu be àɖakàa be nɔ̀pea be àgboa nu.

²⁴Hũbonɔwo Sebanìa, Yòsafat, Netanèl, Àmasài, Zakarìa, Benayà ku Eliezɛr kuna èzè lè ŋùkɔ̀ na Mawu be àɖakàa. Obɛd-Edɔ̀m ku Yehira ɖiana Zòɖùɖu-Ɖakà a be nɔ̀pe mɔnu.

²⁵Nène a, David ku Izràɛl dùkɔ̃a be àmè sĩsĩwo ku gbãdãgbã èkà èwì vɔ àtɔ̃wo be ŋùkɔ̀nɔ̀tɔwo jè èmɔ ku jìjɔɛ, la kɔkɔ Tɔhonɔ̀ be Zòɖùɖu-Ɖakà a gbɔ̀ so Ovɛd-Edɔ̀m be àxomè.

²⁶Ne Mawu ne do àlɔ̀ Levì be jìjimèvi kèwo kɔkɔ Tɔhonɔ̀ be Zòɖùɖu-Ɖakà a, wo sɔ ènyìsu adrɛ̃ ku àgbò adrɛ̃ savɔ.

²⁷David ku Levì be jìjimèvi kèwo ye kɔkɔ àɖakàa, hàsìnɔ̀awo ku Kenayà, woabe ŋùkɔ̀nɔ̀tɔa, woawo keŋu do kploba be àwùgãwo. David ya gbà do hũbonɔwo be àlɛ̃ŋudà be dàbla ɖo e ji.

²⁸Izràɛl dùkɔ̃ bliboa sɔ jìjɔɛ kpɔkpɔ yì kɔkɔ Tɔhonɔ̀ be Zòɖùɖu-Ɖakà a lè àyo sòsowo mè, ku èzè kudo èkpɛ̃kuku, èhàjìji, èhũ, gàkokoe ku èkà sãŋùgu pòpo.

²⁹Wàlɛbɛ kè Tɔhonɔ̀ be Zòɖuɖu-Ɖakà a va ɖo David be èdùa mèa, Mikàl, Saolò be nyɔ̃nùvia va kpɔ flɛsɛ̀ nu. E kpɔ èfìɔ David le tìkpo, le ɖuwè, eye Mikàl crì David so yebe èjì mè.