Read gen 1Kronikà 16 Bible Online

1Kronikà 16 - gen bible

1Kronikà 16

¹Izràɛlviwo sɔ Mawu be Zòɖùɖu-Ɖakà a ɖo gòxɔ kè David tù na ɛ̀a mè, eye wo sɔ ɛ̀ dà ɖo yebe dòdòmè. Ekèa yomè a, wo wɔ̀ ènumème vɔsa ku ŋuti fàfa vɔsa lè Mawu be ŋùku mè.

²Kè David wɔ̀ ènumème vɔsaawo ku ŋuti fàfa vɔsaa vɔ̀a, e tu sì na dùkɔ̃a, lè Tɔhonɔ̀ be ŋùmè.

³Ekèa yomè a, e na wo ma kpɔ̃nɔ, ède vivi be klàko ku vɛ̃ku klàko na Izràɛlviwo keŋu, ŋusù ku nyɔ̃nù[5].

⁴David sɔ Levì be jìjimèvi kèwo sumɔna lè Zòɖùɖu-Ɖakà a be nɔ̀pea, dòmètɔ ɖewo ɖo kafu-dɔ nu, àleke be wo ne nɔ ɖoŋù, woa nɔ kafu, eye woa nɔ mlã Tɔhonɔ̀, Izràɛl be Mawu a.

⁵Àmè kè lè woa nua ye nyi Àsaf. Zakarìa lè e gɔ̃mè. Azɛl kplɔ̀ Zakarìa do. Woa yomè a, Semiramɔ̀t ku Yeìɛl va, Matitiyà kudo Eliab va, Bɛnayà gbàkudo Ovɛd-Edɔ̀m va va. Yeìɛl pònà èkà-sãŋùgu vòvòvòwo, eye Àsaf pònà gàkokoe kèwo ɖìnà sɛ̃sɛ̃ɖea.

⁶Hũbonɔwo Bɛnayà ku Yahazìɛl le ku èzè ètèmàtɔ, lè Mawu be Zòɖùɖu-Ɖakà a be ŋùkɔ̀.

⁷Gbè ŋua gbè ye David do èdɔ àsi na Àsaf ku nɔ̀viawo, cucugbãa be wo ne nɔ mlã Tɔhonɔ̀

⁸Mì mlã Tɔhonɔ̀, eye mì kafu yebe nyikɔ kɔ̀kɔ̀ɛa. Mì ɖè yebe ènu gã wɔ̀wɔwo fiɔ lè dùkɔ̃wo dòmè!

⁹Mì jì èhà na ɛ̀, mì pò èhũ na ɛ̀, eye mì gblɔ̃ yebe ŋùdãnuwo keŋu!

¹⁰Mì go ɖo yebe nyikɔ kɔ̀kɔ̀ɛa ŋuti, eye mìabe èjì ne kpɔ jìjɔɛ, mì, àmè kèwo ye le ji Tɔhonɔ̀a!

¹¹Mì ji Tɔhonɔ̀ ku yebe ŋusɛ̃, mì nɔ ji yebe ŋùku mè wè sia wè!

¹²Mì ɖoŋù ŋùdãnu kèwo be wɔ̀awo, Mì ɖoŋù ènu klìko kèwo be wɔ̀, ku kòjo kèwo be sòa!

¹³Mì, Tɔhonɔ̀ be sumɔ̃vi, Izràɛl be kɔ̀ta mèviwo, mì, Yakɔb be èvi kèwo nyi yebe àmè cãcãwoa!

¹⁴Tɔhonɔ̀, miabe Mawu ye kpà àcɛ̀ na ànyigbã kplògòdòa!

¹⁵Mì nɔ ɖoŋù yebe zòɖùɖua, wè sia wè, ekèa ye nyi èse kòkòɖàbì na jìjimè àkpe àkpewo!

¹⁶Èzò kè be ɖù ku Abràham, yebe sumɔ̃via ji be ɖo èkpe ku àjɔ̀gbè kè be fìã na Izàk.

¹⁷E ye be sɔ wɔ̀ èsedodo be kpèli na Yakɔb, e ye nyi èzòɖùɖu kòkòɖàbì na Izràɛl,

¹⁸Wàlɛbɛ kè Tɔhonɔ̀ gblɔ̃ be: “Mù sɔ Kanàn-nyigbãa na wò. Ekèa nyi ècrɔ̃nu kè nyi èwò ku jìjimèvi wòwo tɔ̀!”.

¹⁹Wàlɛbɛ ŋua, àmèjro kui èvè ɖewo kpò mì nyi va èdùa mè,

²⁰so dùkɔ̃ ɖe gbɔ, le yì dùkɔ̃ bu gbɔ, so fìɔdu ɖe mè, le yì fìɔdu bu mè.

²¹Vɔ̀a, Tɔhonɔ̀ mu ɖè àsi lè àmè ɖe ŋuti, be do àyà na wo ò. E dɔ̃ èto na èfìɔwo ɖo woa ŋuti.

²²“Mì mu gbà tɔ àsi àmèdɔ̃dɔ̃ nyèwo ò! Mì mu gbà wɔ̀ èvuɛ̃[6] ɖe ku gblɔ̃ɖɛtɔ nyèwo ò!”

²³Ànyigbã jitɔwo keŋu, mì jì èhà na Tɔhonɔ̀! Mì kãkã yebe hlùɛ̃gã be ènyàa, ŋùkè ŋùkè!

²⁴Mì do yebe gogo be àŋɛ̀ lè dùkɔ̃wo dòmè! Mì ɖè yebe ŋùdãnuwo fiɔ àmèhawo!

²⁵Ɖoa, Tɔhonɔ̀ lòlò, eye e jè na kafu. Vɔ̃vɔ̃ lè Tɔhonɔ̀ ŋuti, wu vòduwo keŋu.

²⁶Dùkɔ̃wo be vòduwo keŋu nyi ènu gbalowo, eye, Tɔhonɔ̀ ye wɔ̀ jiŋùkusi.

²⁷Àcɔɖoɖo ku kɛ̃klɛ̃ ye lè ŋùmè na ɛ̀, eye ŋusɛ̃ ku zĩzĩ lè Tɔhonɔ̀ be nɔ̀pe.

²⁸Dùkɔ̃ xòmèwo keŋu, mì na gogo, mì na zĩzĩ Tɔhonɔ̀!

²⁹Dùkɔ̃ xòmèwo keŋu, mì na gogo kè jè na Tɔhonɔ̀ be nyikɔa, mì sɔ mìabe ènu nanawo va yebe ŋùmè, mì jè èɖɛ̀ na Tɔhonɔ̀, wàlɛbɛ kè yebe kɔ̀kɔ̀ɛnyinyi le klɛ̃a!

³⁰Ànyigbã kplògòdòa jitɔwo keŋu ne hũhũ lè yebe ŋùmè! Ɛ̃ɛ, xixea keŋu tù àfɔ̀ tè gligã, eye mu hùã ò.

³¹Jiŋùkusi ne kpɔ jìjɔɛ, eye ànyigbã ne sò àyo! Mì gblɔ̃ lè dùkɔ̃wo dòmè be: “Tɔhonɔ̀ nyi èfìɔ!”

³²Àpù ne ɖè ègbè ku yebe àdɔ̀kùnuwo keŋu! Àgblèji kpata ne gli, ne bèa ɖù àzãa!

³³Eye àvewo mè be àtiwo ne kpà àbòbo ku jìjɔɛ, ɖoa, Tɔhonɔ̀ gbãnà la va ɖo kòjo na ànyigbã a.

³⁴Mì kafu Tɔhonɔ̀, ɖoa yebe àdɔ̀mè nyɔ, eye yebe ànùkuawɔ̀wɔ lè tɛ̀gbɛ̀.

³⁵Ekèa ŋutia, mì gblɔ̃ be: “Miabe hlùɛ̃gã be Mawu, xɔ̀ na mi, bɔ̀ mi ɖodu, ne wòa hlùɛ̃ mi gã, lè dùkɔ̃wo dòmè, ne mia kafu àpo nyikɔ kɔ̀kɔ̀ɛ, wàlɛbɛ kè mi la nɔ go be mi le kafu wòa.

³⁶Sìtu na Tɔhonɔ̀, Izràɛlviwo be Mawu a, so mà-vɔ yì mà-vɔ!” Eye dùkɔ̃a keŋu ɖo e ŋuti be: “Àmèn!” Eye wo kafu Tɔhonɔ̀.

³⁷Eye David sɔ Àsaf ku nɔ̀viawo ɖo Tɔhonɔ̀ be Zòɖùɖu-Ɖakà a be sumɔ-dɔa nu, àleke be woa yì èdɔa ji, ètè màtɔ, sɔ zɔ̃ ɖo gbè sia gbè be ɖoɖo ji.

³⁸David ɖo Ovɛd-Edɔ̀m, Yedutùn be èvia ku Hosà, àgbonuɖiatɔwo. Woa nɔ̀vi èkà èvè takpo ci ènyi la bɔ̀ ɖo woa ŋuti.

³⁹David gble hũbonɔ Sadɔk ku hũbonɔ kèwo so Sadɔk be xòmè mèawo kudo nɔ̀viawo ɖo Tɔhonɔ̀ be nɔ̀pea be ŋùkɔ̀ le Gabaɔ̀n be ètoa ji,

⁴⁰Ne woa nɔ wɔ̀ vɔsa mème na Tɔhonɔ̀, lè vɔsakpea ji, ŋùdekɛ̃nyɛ ku wètrɔ, ne woa nɔ wɔ̀ ènu kèwo keŋu wo ŋlɔ̀ ɖo èse kè Tɔhonɔ̀ do àsi na Izràɛl dùkɔ̃a.

⁴¹Hemàn ku Yedutùn kudo àmè cãcã kpɔ̀tɛ kèwo be nyikɔwo wo ŋlɔ̀awo bɔ̀ ɖo àmè kèawo ŋuti, ne woa nɔ kafu Tɔhonɔ̀: “Ɖoa, yebe ànùkua wɔ̀wɔ lè tɛ̀gbɛ̀!”

⁴²Sɔ bɔ̀ ɖo woa ŋutia, Hemàn ku Yedutùn ɖo èzèwo, gàkokoe kèwo ɖìnà sɛ̃sɛ̃ ɖɛawo ku èhũpònu kudo èhàjìnu kèwo wo sɔ do àsi na èkpɛ̃kutɔwo, ne woa sɔ nɔ kplɔ̀ èhà kèwo wo la sɔ nɔ kafu Mawu a. Yedutùn be èviwo lè àgbonuɖiatɔwo dòmè.

⁴³Ekèa yomè a, dùkɔ̃a keŋu trɔ yì àxomè, eye David trɔ yì tu sì na yebe àxue.