Read gen 1Kronikà 17 Bible Online

1Kronikà 17 - gen bible

1Kronikà 17

¹Kè David yì nɔ̀ yebe èfìɔsaa mèa, e gblɔ̃ na gblɔ̃ɖɛtɔ Natàn be: “Kpɔɖa, nyè ya, mù lè sedàti be àxue mè. Vɔ̀a, Tɔhonɔ̀ be Zòɖùɖu-Ɖakà a ya lè àvɔ be gòxɔ mè.”

²Natàn ɖo e ŋuti na David be: “Ènu kèwo kpata gbe lè èjì mè na wò kpòa, wɔ̀ ɛ̀, ɖoa, Mawu lè ku wò.”

³Gbè ŋua gbè be èzã mèa, Tɔhonɔ̀ pò nupo na Natàn, eye be gblɔ̃ na ɛ̀ be:

⁴“Yì gblɔ̃ na sumɔ̃vi nyè David be: 'Mu nyi èwò ye la tù èxɔ̀ na mù, ne ma nɔ̀ e mè ò.

⁵Ɖoa, so kaka gbè kè gbè mù ɖè Izràɛl dùkɔ̃a to lè Ejiptè, kaka va na egbèa, nyè mu nɔ̀ èxɔ̀ mè ò, vɔ̀a, mù sona gòxɔ ɖe mè, yìnà gòxɔ bu mè, eye mù sona nɔ̀pe ɖe, yìnà nɔ̀pe bu.

⁶Àfi kèwo keŋu mù nɔ̀ Izràɛl dùkɔ̃ bliboa dòmè yìa ɖe, mù gblɔ̃ ènyà ɖe na kòjoɖotɔ kèwo mù sɔ ɖo Izràɛl dùkɔ̃a nu, be wo ne nɔ nyì dùkɔ̃ nyèawo dòmètɔ ɖe sɔ biɔ ɛ̀ be: 'Nukɛ ŋuti mì mu tù sedàti be gòxɔ na mù òa?'

⁷Ekèa ŋutia, wò la gblɔ̃ na sumɔ̃vi nyè David be: 'Tɔhonɔ̀, Ŋusɛ̃kpatatɔa gblɔ̃ be: Wàlɛbɛ kè wò nyi àlɛ̃kplɔ̀tɔa, ènyè ye kplɔ̀ wò jo lè àlɛ̃wo yomè, lè woabe ènuɖùpe, ne wòa nyi èfìɔ na Izràɛl, dùkɔ̃ nyèa.

⁸Mù kplɔ̀ wò yì tèpe kèwo keŋu wò yìawo, eye mù pò kɛ̃tɔ wòwo keŋu pu ànyi lè ŋùkɔ̀ na wò. Mù la gbà na nyikɔ wò la ɖì, sìgbè àmègã kèwo ye lè ànyigbã jia be nyikɔwo nène.

⁹Mù la ɖo nɔ̀pe na Izràɛl, dùkɔ̃ nyèa, mù la ɖo èkè ànyi na ɛ̀, eye be la nɔ̀ yebe nɔ̀pe. Mu la gbà nɔ vɔ̃ ke ò. Eye àmè vuɛ̃wo mu la gbà nɔ wɔ̀ èvuɛ̃ ku wo, sìgbè sãa,

¹⁰wàlɛbɛ kè mù ɖo kòjoɖotɔwo ɖo dùkɔ̃ nyè Izràɛl nu nène ò. Mù ɖiɖi kɛ̃tɔ wòwo keŋu ɖo ànyi, eye mù le na wòa nya be Tɔhonɔ̀ la na wò àxuedo.

¹¹Ne àzã wòwo sù, ne wòa jo yì èkuwodea, mù la cã èvi wò jìjiwo dòmètɔ ɖèka ɖo tèpe wò, eye mù la likè yebe èfìɔɖùɖu.

¹²Àmè ŋua ye la tù àxue na mù, eye mù la likè yebe èfìɔzìkpe kaka sɔ yì.

¹³Mù la nyi ètɔ na ɛ̀, eye e la nyi èvi na mù. Nyè mu la xɔ̀ ànùkua nyè lè e si, sìgbè lekè mù xɔ̀ ɛ̀ lè àmè kè tèpe wò lèa si, nène ò.

¹⁴Mù la na be la ɖùfìɔ kaka sɔ yì, lè dùkɔ̃ nyè nu, ɖoa, mù la likè yebe èfìɔɖùɖua kaka sɔ yì.'”

¹⁵Ènyà kèawo keŋu ku ènu kè Mawu ɖè fiɔ Natàn, wàlɛbɛ kè be lè kpɔ ŋùtègãa ye Natàn gblɔ̃ na David.

¹⁶Èfìɔ David va nɔ̀ ànyi lè Tɔhonɔ̀ be ŋùmè, eye be gblɔ̃ be: “Tɔhonɔ̀ Mawu, àmè kɛ ye mù nyi, eye nukɛ xòmè nyèa nyi, be wòa kplɔ̀ mù kaka va ɖo èmɔ kè nu wò ɖo mù a ò?

¹⁷Gãkea, wò gbà kpɔ be mu sù ò, Mawu nyè. Eye wò fìã àjɔ̀gbè na sumɔ̃vi wò be xòmèa na èsɔ̀ godo. Tɔhonɔ̀ Mawu, wò kpɔ mù sìgbè mù wu àgbètɔ kpɔ̀tɛawo nène.

¹⁸Ènyà kɛ ye David la gbà teŋu gblɔ̃ na wò so gogo kè wò le na sumɔ̃vi wòa ŋuti, ekè wò ŋutɔ wò jo jèsi sumɔ̃vi wòa nyuɛ̃ ɖe a ò?

¹⁹Tɔhonɔ̀, ekè wò lɔ̃ sumɔ̃vi wòa ŋuti ye wò wɔ̀ ŋùdãnu kèawo ɖo, la sɔ ɖè àpo ŋuti kɔ̀kɔ̀ɛ gãa fiɔ.

²⁰Tɔhonɔ̀, àmè ɖekpe mu ɖì wò ò. Eye, sɔ zɔ̃ ɖo ènu kèwo miawo ŋutɔ mi sè ku miabe ètowoa, Mawu bu mu lè, tovò na wò ò.

²¹Dùkɔ̃ ɖe gbà lè ànyigbã ji kè ɖì Izràɛl dùkɔ̃ kè nyi àpo dùkɔ̃a? Izràɛl kèa kè wò ŋutɔ, èwò Mawu wò yì ɖè, sɔ wɔ̀ dùkɔ̃ na ɖokoe wò, sɔ do bùbu Mawu be nyikɔ gã, ɖo vɔ̃vɔ̃ kèa ŋutia, dùkɔ̃ ɖe gbà lèa, wàlɛbɛ kè èwò Mawu ŋutɔ, wò nyà dùkɔ̃wo lè dùkɔ̃ kè wò ɖè so Ejiptèa be ŋùkɔ̀a?

²²Tɔhonɔ̀ Mawu, wò sɔ Izràɛl dùkɔ̃ wòa wɔ̀ dùkɔ̃ na ɖokoe wò, kaka sɔ yì, eye èwò, Tɔhonɔ̀, wò trɔ zũ yebe Mawu.

²³Ekèa ŋutia, Tɔhonɔ̀, na ne àjɔ̀gbè kè wò fìã ɖo sumɔ̃vi wò kudo yebe àxuedo ŋutia ne zɔ̃sùu kaka sɔ yì. Tɔhonɔ̀, wɔ̀ ènu kè wò gblɔ̃a!

²⁴Ènyà kèa ne ɖì, ne àpo nyikɔ ŋuti ne kɔ̀, ne woa nɔ kafu wò tɛ̀gbɛ̀, la nɔ gblɔ̃ be: Tɔhonɔ̀, Ŋusɛ̃kpatatɔ, Izràɛl be Mawu nyi Mawu na Izràɛl dùkɔ̃a. Ekèa ŋutia, sumɔ̃vi wò David be àxuedoa la likè lè àpo ŋùku mè!

²⁵Mawu nyè, nyàwo be nyi be wò ŋutɔ ye sìa sumɔ̃vi wò be, yè la ɖo àxuedo na ɛ̀. Ènu kèa ŋuti ye sumɔ̃vi wò dojì, fãkue kèa na wò.

²⁶Fifìa, Tɔhonɔ̀ èwò ye nyi Mawu, eye wò gblɔ̃ nyɔna kèa be ènyà na sumɔ̃vi wò.

²⁷Tɔ̀wò jɔ̀, fifìa, va tu sì na sumɔ̃vi wò be àxuedoa, àleke be ne nɔ̀ àpo ŋùmè kaka sɔ yì, ɖoa, Tɔhonɔ̀, èwò ya, ne wò tu sì na àmèa, sìtu wòa nyina kòkòɖàbì.