Read gen 1Kronikà 18 Bible Online

1Kronikà 18 - gen bible

1Kronikà 18

¹Ekèawo yomè a, David ɖù Filistìtɔwo ji, eye be ɖiɖi wo ɖo ànyi. E xɔ̀ Gat be èdùa ku kɔpe kèwo trɔ do èawo lè Filistìtɔwo si.

²David ɖù Mòabtɔwo cã ji, eye wo trɔ zũ sumɔ̃vi kèwo ye tuna ètaciawo na David.

³David gbà ɖù Hadadezɛ̀r, Sobà be èfìɔa cã ji, lè Hamàt lɔ̀ge, wàlɛbɛ kè Hadadezɛ̀r yì be yèa kèkè yèbe àcɛ̀a yì Efratà be ètɔ̀a ŋutia.

⁴David le àhùahũ[7] èkà èwì vɔ àtɔ̃ na Hadadezɛ̀r, kpe ɖo èsɔdotɔ hotu ètɔ̃ èkà èwì vɔ àtɔ̃ ku gbãdãgbã àfɔ̀zɔ̃tɔ hotu èwo ŋuti. David na wo sò àfɔ̀kã na èsɔ kèwo ye dɔ̃nà àhùahũawo keŋu, eye èkà èvè takpo kpò be gble ɖɛ.

⁵Aràmtɔwo so Damaskò va la do àlɔ̀ Hadadezɛ̀r, Sobà be èfìɔa, vɔ̀a, David wù àmè hotu woeɖèka (22000), lè Aràmtɔwo dòmè.

⁶Eye David ɖo èdùjikpɔtɔwo ɖo Aràmtɔwo nu lè Damaskò nyigbã ji. Aràmtɔwo trɔ zũ sumɔ̃vi kèwo ye tuna ètaci. Eye Tɔhonɔ̀ nana èjiɖùɖu David, lè àfi si àfi kè David yìnàa.

⁷David xɔ̀ sìka be àkpoxɔ̀nu kèwo Hadadezɛ̀r be ɖiatɔwo le ɖo àsiawo, eye be sɔ wo va Yèruzàlɛm.

⁸David ɖo àlɔ̀ gàjɛ̃ sùgbɔ ji, lè Tivhàt ku Kun kèwo nyi, Hadadezɛ̀r be èdùwoa mè. Ekèa ye Salomɔ̀n zã sɔ wɔ̀ mawuxɔa[8] be gàjɛ̃ be àdàwa a, sɔtiawo, ku ènu ɖùɖu be ènuzãzãwo.

⁹Ekè Tòu, Hamàt be èfìɔa sè be David ɖù Hadadezɛ̀r, Sobà be èfìɔa be àhùakɔ̃a keŋu jia,

¹⁰Tòu dɔ̃ èvia ŋusù Hadoràm ɖoɖa èfìɔ David, be ne yì dogbè na ɛ̀, ne bèa kafu David ɖo e kpe àhùa ku Hadadezɛ̀r, eye be ɖù Hadadezɛ̀r ji, ɖoa, Hadadezɛ̀r nyi Tòu be èkɛ̃tɔ. Ekèa ŋutia, Tòu na èvia hɛ̃ ènu nana kèwo nyi sìka-nuwo, klòsalò-nuwo ku gàjɛ̃-nuwo yì na David.

¹¹Èfìɔ David sɔ ènu nana kèawo cã yì do àsi na Tɔnonɔ̀, sɔ bɔ̀ ɖo klòsalò ku sìka kè be xɔ̀ lè Edɔ̀m be dùkɔ̃, Mòab be dùkɔ̃, Amɔ̀n be jìjimèviwo, Filistìtɔwo be dùkɔ̃ ku Àmàlɛk be dùkɔ̃wo keŋu sia ŋuti.

¹²Absayì, Seruyà be èvia ɖù Edɔ̀mtɔwo be gbãdãgbã hotu àsiɖèkɛ ji lè èjè be Bàlìa mè.[9]

¹³E ɖo èdùjikpɔtɔwo ɖo Edɔ̀m-nyigbã ji. Eye Edɔ̀mtɔwo keŋu trɔ zũ David be sumɔ̃viwo. Tɔhonɔ̀ le na èjiɖùɖu David lè àfi sia àfi kè David le yìa.

¹⁴David ɖùfìɔ lè Izràɛl dùkɔ̃ bliboa nu, eye be wɔ̀nà ènu jɔ̀jɔɛ, sònà kòjo nyuɛ̃ na yebe dùkɔ̃a.

¹⁵Yoab kè be ènɔ̀ nyi Seruyàa, lè àhùakɔ̃a nu. Yehosafat, Hilud be èvia nyi èfìɔa be ègbèxɔ̀tɔ.

¹⁶Sadɔk, Ahitub be èvi ku Abimèlɛk, Abiatàr be èvi nyi hũbonɔwo. Savsa nyi ènuŋlɔ̀tɔ.

¹⁷Benayà, Yehoyada be èvi lè ŋùkɔ̀ na Keretìtɔwo ku Peletìtɔwo be àhùakɔ̃a, eye David be ŋusùviwo ye nyi àmè cucugbã kèwo nɔ̀nà èfìɔa ŋuti.