Read gen 1Kronikà 19 Bible Online

1Kronikà 19 - gen bible

1Kronikà 19

¹Ekèa yomè a, Nahas, Amɔ̀n be jìjimèviwo be èfìɔa ku, eye èvia ɖùfìɔ ɖo e tèpe.

²David gblɔ̃ be: “Mù la kɔ̀ àdɔ̀mè ɖo Hanun, Nahas be èvia ŋuti, ɖoa, ètɔa wɔ̀ ènyuɛ̃ na mù. David ɖo àmèdɔ̃dɔ̃wo ɖoɖa Hanun, ne woa yì fa àkɔ na ɛ̀, ɖo ètɔa be èku ŋuti. David be àmèdɔ̃dɔ̃awo yì Hanun gbɔ, la fa àkɔ na ɛ̀, lè Amɔ̀n be jìjimèviwo be èdùa mè.

³Vɔ̀a, Amɔ̀n be jìjimèviwo gblɔ̃ na Hanun be: “Wò susu be David jro be yèa do bùbu ètɔ wò ŋuti, ekè be dɔ̃ àmè ɖoɖa wò, be woa va ɖo àsi àkɔ na wòa? Àmèdɔ̃dɔ̃awo va bòhũ, ne woa va kpɔ èdùa mè, la bè kpɔ ànyigbãa be gòglòpewo, àleke be gbè ɖèkaa, woa do zigìdi, la xɔ̀ ɛ̀ lè mia si.”

⁴Hanun na wo le David be àmèdɔ̃dɔ̃awo, wo plɔ ègɛ̃ na wo, eye wo sò woabe àwùwo kaka va dòdò mè, lè ègũi nu, eye wo trɔ ɖo wo ɖoɖa.

⁵Ekè wo va gblɔ̃ ènu kè jɔ̀ ɖo ŋusù kèawo jia na David èfìɔa, e dɔ̃ àmè yì dogò wo, ɖoa, wo do ŋùkpɛ̃ ŋusù kèawo ŋutɔ. Èfìɔa na wo gblɔ̃ na wo be: “Mì ci Yerikò kaka na gà kè mè mìabe ègɛ̃ la toa. Ne ègɛ̃a to vɔ̀a, mìa trɔ gbɔ̀.”

⁶Ekè Amɔ̀n be jìjimèviwo kpɔ be yèwo sɔ yèwo ɖokoewo trɔ zũ kɛ̃tɔwo na David vɔ̀a, Hanun ku Amɔ̀n be jìjimèviwo sɔ klòsalò-gà èkà èwì vɔ àtɔ̃ yì dà àgbãtè gbãdãgbãwo so Mèzòpòtamìa, so Maakà be Aràmtɔwo gbɔ ku so Sobà. Wo dà àhùahũwo ku èsɔdotɔwo.

⁷Wo dà àhùahũ hotu woeàdɛ̃, bɔ̀ ɖo Maakà be èfìɔa ku yebe àhùakɔ̃a cã ŋuti. Woawo keŋu, wo va do àsàɖa kpã ŋùkɔ̀ Madaba. Ekèa yomè a, Amɔ̀n be jìjimèviwo bɔ̀, eye wo to so woabe èdùa mè, va àhùagbea ji.

⁸Ekè David gbe sè è kpòa, e dɔ̃ Yoab ku kãlìwo be àhùakɔ̃ bliboa ɖoɖa.

⁹Amɔ̀n be jìjimèviwo hɔ̃ va, ɖo ɖo àhùa wɔ̀wɔ ji, lè èdùa be àgbo nu, vɔ̀a, èfìɔ kèwo ye lè woa ŋutiawo ya lè àzɔ̀ge, lè ègbea ji.

¹⁰Ekè Yoab va kpɔ be wo le kpe àhùa ku yè, lè ŋùkɔ̀, ku ŋùgbea, e cã ŋusùwo lè Izràɛlviwo be kãlìwo keŋu dòmè, eye be ɖo wo, kpã ŋùkɔ̀ Aràmviwo.

¹¹David sɔ àhùakɔ̃ kpɔ̀tɛa do àsi na nɔ̀via Absayì, eye wo ɖo, kpã ŋùkɔ̀ Amɔ̀nviwo.

¹²Ekèa yomè a, David gblɔ̃ be: “Ne Aràmviwo sɛ̃ŋu wu mù a, wò la va do mù àlɔ̀. Eye, ne Amɔ̀n be jìjimèviwo sɛ̃ŋu wu wòa, ènyè ye la va do wò àlɔ̀.

¹³Èjì ne nɔ̀ àsi wò, eye, mia ɖè miabe ŋusɛ̃ fiɔ, ɖo miabe dùkɔ̃a ŋuti ku ɖo miabe Mawu be èdùawo ŋuti. Tɔhonɔ̀ ne wɔ̀ yebe èjro.”

¹⁴Vɔ̀a, ekè Yoab ku yebe àhùakɔ̃a zɔ̃ ɖo Aràmviwo jia, Aràmviwo si lè woa nu.

¹⁵Ekè Amɔ̀nviwo kpɔ be Aràmviwo le sia, woawo cã si lè Absayì, Yoab be nɔ̀via nu, ɖo èdùa mè. E yomè a, Yoab trɔ yì Yèruzàlɛm.

¹⁶Ekè Aràmviwo kpɔ be Izràɛlviwo ɖù yèwo jia, wo dɔ̃ àmè ɖoɖa Aràmvi kèwo ye lè ètoa godoa, eye wo va. Sofak, Hadadezɛ̀r be àhùakɔ̃a be ŋùkɔ̀nɔ̀tɔa ye kplɔ̀ wo.

¹⁷Ekè wo va gblɔ̃ ɛ̀ na David kpòa, David bɔ̀ Izràɛlviwo be àhùakɔ̃ bliboa, sò Yɔrdàn be ètɔ̀a, ɖo yebe gbãdãgbãwo kpã ŋùkɔ̀ wo. Ekè David ɖo àhùakɔ̃awo kpã ŋùkɔ̀ Aràmviwo a, Aràmviwo ɖè àhùa kpe na David.

¹⁸Vɔ̀a, Aràmviwo si lè Izràɛlviwo nu, eye David wù gbãdãgbã hotu ètɔ̃ èkà èwì vɔ àtɔ̃ lè Aràmviwo be àhùahũ kùtɔwo dòmè, gbãdãgbã hotu èwì, lè gbãdãgbã àfɔ̀totɔwo dòmè. David gbà wù Sofak, àhùaŋùkɔ̀nɔ̀tɔa cã.

¹⁹Ekè Hadadezɛ̀r be gɔ̃mènɔ̀tɔwo kpɔ be Izràɛlviwo ɖù yèwo jia, wo biɔ ŋuti fàfa so David gbɔ, eye wo bɔ̀bɔ̀ woa ɖokoewo ɖo gɔ̃mè na David. Aràmviwo mu gbà jro be yèwoa va do àlɔ̀ Amɔ̀nviwo ò.