Read gen 1Kronikà 20 Bible Online

1Kronikà 20 - gen bible

1Kronikà 20

¹Kè èpèa trɔa, wàlɛbɛ kè èfìɔwo yìnà àhùagbe jia, Yoab kplɔ̀ àhùakɔ̃a yì gble ènu lè Amɔ̀nviwo be ànyigbã ji. E yomè a, e sɔ àhùakɔ̃a trɔ do Rabà be èdùa. Wàlɛbɛ ŋua, David lè Yèruzàlɛm. Yoab ɖù Rabà be èdùa ji, eye be gbã ɛ̀.

²David ɖè fìɔkukua lè èta na Milkɔ̀m, Rabà be èfìɔa. E kpɔ be kukua be kpɛ̃kpɛ̃ mè lè sìka-dànu ɖèka; èkpe xɔ̀asì ɖe lè e ŋuti. Wo sɔ fìɔkukua ɖo èta na David, eye be lɔ àmɔ̀nyɔ̀nu sùgbɔ jo lè èdùa mè.

³E kplɔ̀ dùkɔ̃a ya jo yì èdɔ-sɛ̃sɛ̃wo wɔ̀wɔ mè, na àti sòso, àti fɛ̃fɛ̃ ku èkpe gbãgbã. Nène a ye David wɔ̀ ku Amɔ̀nviwo be èdù kèwo keŋu be xɔ̀a mètɔwo. E yomè a, David trɔ gbɔ̀ va Yèruzàlɛm.

⁴Izràɛlviwo gbà va kpe àhùa bu ku Filistìtɔwo lè Gezɛ̀r be èdùa mè. Àhùa kèa mè ye Sibekayì so Husà wù Sipayì, kè nyi Refayì be jìjimèvi kèwo nyi àmè jɔ̀ àsuwoa dòmètɔ ɖèka lè. To ekèa mèa, wo bɔ̀bɔ̀ woa ɖokoewo ɖo Izràɛlviwo gɔ̃mè.

⁵Àhùa bu gbà jɔ̀ ku Filistìtɔwo ke, eye Ɛlhanàn, Yàir be èvia wù Lahni kè le nyi Golìat, Gat ŋusù kè be èhuã trì sìgbè àvɔlɔ̃ti nènea be nɔ̀vi.

⁶Izràɛlviwo gbà wɔ̀ àhùa bu lè Gat. Àmè jɔ̀ àsu ɖe to àlɔ̀vi àdɛ̃, kè na be yebe àlɔ̀vi ku àfɔ̀viwo kpata lè èwì vɔ ènè. E cã nyi Harafà be jìjimèvi.

⁷E pò àdègbè ɖo Izràɛlviwo ŋuti, vɔ̀a, Yehonatàn kè nyi David be fòfo Simèa be èvia, wù ì.

⁸Àmè jɔ̀ àsu kèawo keŋu nyi Harafà, Gat ŋusùa be jìjimèviwo. Woawo keŋu ku lè David ku yebe Gbãdãgbãwo be èwuiwo nu.