Read gen 1Kronikà 21 Bible Online

1Kronikà 21 - gen bible

1Kronikà 21

¹Satana va sitè ɖo Izràɛl be dùkɔ̃a ŋuti, eye be na David hlɛ̃ Izràɛl be dùkɔ̃a mèviwo.

²David gblɔ̃ na Yoab ku dùkɔ̃a be ŋùkɔ̀nɔ̀tɔwo be: “Mì yì hlɛ̃ Izràɛlviwo, so Beɛr-Sebà, kaka yì Dàn. E yomè a, mìa va na ma nya woabe hɛ̃hlɛ̃ mè.”

³Yoab gblɔ̃ be: “Tɔhonɔ̀ ne na be yebe dùkɔ̃a ne sùgbɔ èkà èvè takpo jivɔwo, wu lekè be lè fifìa! Woawo keŋu mu nyi sumɔ̃viwo na àpetɔ nyè, èfìɔ bùbutɔa? Nukɛ ŋuti èfìɔ bùbùtɔ jro be yèa nya ɖo, la sɔ kplɔ̀ Izràɛl be dùkɔ̃a ɖo àgɔ̀jèje mè ò?”[10]

⁴Vɔ̀a, kè èfìɔa be ènyàa nyi èsea, Yoab jè èmɔ, to Izràɛl-nyigbãa keŋu ji, eye be gbɔ̀ va Yèruzàlɛm.

⁵Yoab ɖè dùkɔ̃a be hɛ̃hlɛ̃ mè na David. Izràɛlvi kèwo ye la teŋu yì àhùaa be hɛ̃hlɛ̃ mè lè àgbètɔ milìɔn ɖèka àkpe èkà èvè takpo (1100000). Yudàviwo be hɛ̃hlɛ̃ mè lè àgbètɔ milìɔn ènè èkà woeadrɛ̃ takpo (4700000) kèwo ye la teŋu yì àhùaa.

⁶Vɔ̀a, Yoab mu hlɛ̃ Levì be jìjimèviwo ku Bɛnyamìn be jìjimèviwo ò, ɖoa, èfìɔa be ènyàa kpaca Yoab ŋutɔ.

⁷Ènu kèa nyi àgɔ̀jèje lè Mawu be ŋùmè. Ekèa ŋutia, Tɔhonɔ̀ dɔ̃ èto na Izràɛl be dùkɔ̃a.

⁸Ekèa na be David gblɔ̃ na Mawu be: “Èvuɛ̃ gã ɖe ye mù wɔ̀. Gãkea, tɔ̀wò jɔ̀, sɔ sumɔ̃vi wòa be èvuɛ̃ kè è, ɖoa, mù wɔ̀ ènu sìgbè àɖàhùatɔ[11]nène!”

⁹Tɔhonɔ̀ pò nupo na Gad, David be gblɔ̃ɖɛtɔa, eye be gblɔ̃ na ɛ̀ be:

¹⁰“Yì gblɔ̃ na David be: 'Mù le sɔ ètodɔ̃ ètɔ̃ ɖo ŋùmè na wò. Ekè wò sɔa ye wò la xɔ̀.'”

¹¹Gad yì David gbɔ, eye be gblɔ̃ na David be: “Tɔhonɔ̀ gblɔ̃ be: 'Ètodɔ̃ kɛ ye wò la sɔ ò?

¹²Àdɔ̀ la to, èpè ètɔ̃ loo, àlo kɛ̃tɔ wòwo la ɖù ji wò, wètri ètɔ̃ sɔ̃ŋu ku èwui loo, àlo Tɔhonɔ̀ be èwui la va dùkɔ̃a ji ku èdɔ̀ vuɛ̃, eye Tɔhonɔ̀ be àtikplɔtɔa la wù àmè lè Izràɛl-nyigbãa keŋu ji.' Fifìa, bù e ŋuti, ne wòa gblɔ̃ ɖoŋuti kè mù la yì na àmè kè do mù àŋɛ̀a.”

¹³David ɖo e ŋuti na Gad be: “Àkpɔ̃ gã ɖe ɖɔ mù. Vɔ̀a, e nyɔ na mù wu be ma xɔ̀ ètodɔ̃ lè Tɔhonɔ̀ si mè bòhũ. Ɖoa, Tɔhonɔ̀ kuna ŋuzĩzĩ sùgbɔ na àmè. Eye, nyè mu jro be ma jè àgbètɔwo si mè ò.”

¹⁴Ekèa yomè a, Tɔhonɔ̀ ɖo èdɔ̀ vuɛ̃ ɖoɖa Izràɛl-nyigbã ji, eye àgbètɔ hotu ègbã vɔ àtɔ̃ ku lè Izràɛlviwo dòmè.

¹⁵Mawu dɔ̃ àtikplɔtɔ ɖe ɖoɖa, eye be le gble ènu lè Yèruzàlɛm. Vɔ̀a, wàlɛbɛ kè àtikplɔtɔa le gble ènua, Tɔhonɔ̀ kpɔ gbledo kèa, eye be sè veve. E gblɔ̃ na àtikplɔtɔ kè le crɔ̃ àmèa be: “E sù! Fifìa, ɖo àlɔ̀ tè. Wàlɛbɛ ŋua, Tɔhonɔ̀ be àtikplɔtɔa ɖo Ɔrnàn, Yebusì ŋusùa be èlùfupea.

¹⁶Kè David kɔ ŋùmè yìjia, e kpɔ Tɔhonɔ̀ be àtikplɔtɔa lè jiŋùkusi ku ànyigbãa dòmè. Àtikplɔtɔa le èwui ɖo àsi, eye be trɔ èwuia be ènugbɔ ɖo Yèruzàlɛm ŋuti. David ku Izràɛl be àmèsĩsĩwo tà kòtòku, eye wo sɔ ŋùmè cɔ̃ ànyi.

¹⁷David gblɔ̃ na Mawu be: “Mu nyi ènyè ye ɖè ègbè be wo ne hlɛ̃ dùkɔ̃a? Ènyè ye wɔ̀ ènu vuɛ̃, eye mù wɔ̀ ènu bàɖà. Àlɛ̃ kèawo ya ɖe, nukɛ ye wo wɔ̀ ò? Tɔhonɔ̀ Mawu nyè, àpo àlɔ̀ ne pò ènyè ku xòmè nyèa. Vɔ̀a, tɔ̀ wò jɔ̀, àlɔ̀ wò mu gbà hɛ̃ gbledo va na dùkɔ̃ wòa ya ò!”

¹⁸Tɔhonɔ̀ be àtikplɔtɔa to na Gad be ne gblɔ̃ na David be: “David ne tù vɔsakpe ɖo Ɔrnàn, Yebusì ŋusùa be èlùfupea na Tɔhonɔ̀!”

¹⁹David wɔ̀ ɖo ènyà kè Gad gblɔ̃ na ɛ̀ lè Tɔhonɔ̀ be nyikɔ mèa ji.

²⁰Ɔrnàn le fu èlù, wàlɛbɛ ŋua. Ekè be trɔa, e kpɔ àtikplɔtɔa. Èvia, ŋusùvi ènè kèwo ye le wɔ̀ èdɔ ku ìawo si yì bè.

²¹David zɔ̃ gogo Ɔrnàn. Kè Ɔrnàn kpɔ David èfìɔa, e sitè lè yebe èdɔa gbɔ, va cɔ̃ ŋùmè ànyi, jè èɖɛ̀ na David.

²²David gblɔ̃ na Ɔrnàn be: “Sɔ èlùfupe wòa na mù, ne ma tù vɔsakpe na Tɔhonɔ̀, àleke be jɔ̀gbèvuɛ̃ kè lè dùkɔ̃a jia ne tɔtè. Sɔ ɛ̀ na mù, ne ma tu yebe èfɛ̃ na wò.”

²³Ɔrnàn ɖo e ŋuti na David be: “Èfìɔ bùbùtɔ ne sɔ ènu kè hiã ɛ̀a fàa, sɔ wɔ̀ ènu kè be jro a. Sɔ yì ejia, mù le sɔ ènyì nyèwo le na, na vɔsa mèmea. Kèkevi nyèwo la nyì ànakèa. Mù gbà le na èlù, ne ènu nana vɔsaa. Mù le na ènuwo keŋu-keŋu.”

²⁴Vɔ̀a, èfìɔ David ɖo e ŋuti na Ɔrnàn be: “Gbèɖe! Mù la plè è ɖo yebe èci nu. Nyè mu la xɔ̀ àpo ènu, la sɔ na Tɔhonɔ̀ ò, eye nyè mu la wɔ̀ ènumème vɔsa na Tɔhonɔ̀, èfɛ̃ ma tu ò!

²⁵Ekèa yomè a, David tu sìka-gà àlɔ̀ àdɛ̃ (600) be èfɛ̃, ɖo tèpea ta, na Ɔrnàn.

²⁶David tù vɔsakpe ɖo funu na Tɔhonɔ̀, eye be wɔ̀ ŋuti fàfa be ènumème vɔsa. David yɔ Tɔhonɔ̀, eye Tɔhonɔ̀ tɔ̀ na ɛ̀ ku èzò kè Tɔhonɔ̀ ɖiɖi so jiŋùkusi, va vɔsakpea jia.

²⁷Ekèa yomè a, Tɔhonɔ̀ ɖè ègbè na yebe àtikplɔtɔa be ne sɔ yebe èwuia do àku mè.

²⁸Kè David kpɔ be Tɔhonɔ̀ tɔ̀ na yè, wàlɛbɛ ŋuaa, lè Ɔrnàn, Yebusì ŋusùa be èlùfupea, David wɔ̀ vɔsaawo.

²⁹Wàlɛbɛ ŋua, Tɔhonɔ̀ be nɔ̀pe kè Mosè wɔ̀ sãa, lè ègbea jia, ku ènumème vɔsakpea nɔ̀ Gabaɔ̀n be ètoa tamè, gà ŋua mè.

³⁰Gãkea, David mu teŋu yì yɔ Mawu lè funua ò, ɖoa, Tɔhonɔ̀ be àtikplɔtɔ be èwuia ɖo vɔ̃vɔ̃ na ɛ̀.