Read gen 1Kronikà 23 Bible Online

1Kronikà 23 - gen bible

1Kronikà 23

¹Kè David sĩ, eye be ɖo èpè sùgbɔ vɔ̀a, e sɔ èvia Salomɔ̀n ɖofìɔ[12] ɖo Izràɛlviwo nu.

²Ekèa yomè a, e bɔ̀ Izràɛlviwo be ŋùkɔ̀nɔ̀tɔwo, hũbonɔwo ku Levìwo.

³Wo hlɛ̃ Levì kèwo ye ɖo èpè ègbã àlo wu nènea. Ŋusù kèwo wo hlɛ̃ ɖèka ɖèkaawo lè àgbètɔ hotu woeàsiɖèkɛ.

⁴Lè woa dòmèa, àmè hotu woèvè lè Tɔhonɔ̀ be àxuea be èdɔwo nu. Àmè hotu ètɔ̃ la nyi ènuŋlɔ̀tɔwo ku kòjoɖotɔwo. Èfìɔa gbà gblɔ̃ be:

⁵“Àmè hotu èvè la nyi àgbonuɖiatɔwo, eye àmè hotu èvè la nɔ kafu Tɔhonɔ̀ ku èhàjìnu kudo èhũpònu kèwo mù wɔ̀ na kafuhàwoa.”

⁶David ma Levìwo ɖo èha sòsoe vòvòvòwo mè, sɔ zɔ̃ ɖo àmè kè be hɛ̃nu mè wo soa ji, ɖo Gɛrsɔ̀n, Kehàt ku Merarì nu.

⁷Gɛrsɔ̀n be èviwo ye nyi: Laedàn ku Simei.

⁸Laedàn be èviwo ye nyi: Yehìɛl, woabe ŋùkɔ̀nɔ̀tɔa, Zetmàn ku Yoɛ̀l. Àmè ètɔ̃. Wo nyi Laedàn be jìjimèviwo be ŋùkɔ̀nɔ̀tɔwo.

⁹Simei be èviwo ye nyi: Selomit, Haziɛl, ku Haràn. Àmè ètɔ̃. Wo nyi Laedàn be jìjimèviwo be ŋùkɔ̀nɔ̀tɔwo.

¹⁰Simei gbà jì ŋusùvi èvè buwo. Woawo ye nyi: Yahat, Zizà, Yehus ku Berìa.

¹¹Yahat nyi àmègãxoa, Zizà kplɔ̀ ɛ̀ do, vɔ̀a, Yehus ku Berìa mu jì ŋusùvi sùgbɔ ò, eye wo hlɛ̃ wo ɖo xòmè ɖèka mè.

¹²Kehàt be èviwo ye nyi Amràm, Yisehar, Hebrɔ̀n ku Uzìɛl. Wo àmè ènè.

¹³Amràm be èviwo ye nyi: Arɔ̀n, ku Mosè. Wo ɖè Arɔ̀n ɖo vò, ne bèa sɔ yeɖokoe na kɔ̀kɔ̀ɛpea be èdɔ, àleke be ye ŋutɔ ku yebe jìjimèviwo, woa nɔ tɔzò lifi lè Tɔhonɔ̀ be ŋùkɔ̀, ne woa nɔ wɔ̀ èdɔ na Tɔhonɔ̀, eye woa nɔ tu sì na àmèwo lè Tɔhonɔ̀ be nyikɔ mè, kaka sɔ yì.

¹⁴Mosè kè nyi Mawu be àmèa, wo hlɛ̃nà yebe èviwo ɖo Levì be jìjimèviwo dòmè.

¹⁵Mosè be èviwo ye nyi: Gɛrsɔ̀n ku Eliezɛr.

¹⁶Gɛrsɔ̀n be èvi cucugbãa ye nyi Sevuɛl, woabe ŋùkɔ̀nɔ̀tɔa.

¹⁷Eliezɛr be èviwo ye nyi: Rehabìa, woabe ŋùkɔ̀nɔ̀tɔa. Eliezɛr mu gbà jì èvi buwo ò, vɔ̀a, Rehabìa be èviwo sùgbɔ ŋutɔ.

¹⁸Yisehar be jìjimèviwo be ŋùkɔ̀nɔ̀tɔ ye nyi Selomit.

¹⁹Hebrɔ̀n be èviwo ye nyi: cucugbãa, Yeriyà; èvègɔ̃a, Àmàryà; ètɔ̃gɔ̃a, Yahazìɛl; ènègɔ̃a, Yikameàm.

²⁰Uzìɛl be èviwo ye nyi: cucugbãa, Mikà; èvègɔ̃a, Yisiyà.

²¹Merarì be èviwo ye nyi: Mahlì ku Musì. Mahlì be èviwo ye nyi: Eleazàr ku Kis.

²²Eleazàr mu jì ŋusùvi kaka ku ò, vɔ̀ nyɔ̃nùviwo kpò be jì. Woa fòfo kèwo nyi woabe àtàvi Kis be èviwoa ye ɖè wo.

²³Musì jì èvi ètɔ̃. Woawo ye nyi: Mahlì, Edɛ̀r ku Yeremɔ̀t.

²⁴Ekèawo ye nyi Levì be jìjimèviwo ɖo woabe xòmèwo nu, ku èdɔ kèwo wo do àsi na wo, so gà kè mè wo ŋlɔ̀ woabe nyikɔwo ɖɛ, sɔ hlɛ̃ wo ɖèka ɖèkaa. Ne àmè kèawo gbe ɖo èpè èwì àlo wu nènea kpòa, wo tɔna èdɔ wɔ̀wɔ lè Tɔhonɔ̀ be àxuea mè.

²⁵Nyàwo ye be nyi be, David gblɔ̃ be “Tɔhonɔ̀, Izràɛlviwo be Mawu a na jɛ̃gbɔ̃gbɔ̃ yebe dùkɔ̃a, eye ye ŋutɔ va lè Yèruzàlɛm kaka sɔ yì.

²⁶Ekèa ŋutia, Levìwo mu la gbà nɔ dro Mawu be nɔ̀pea ku yebe sùmɔ̀ sumɔ be ènuawo ò.”

²⁷Vɔ̀a, sɔ zɔ̃ ɖo ɖoɖo mlɛ̃ kè David wɔ̀a jia, wo ŋlɔ̀nà Levìwo be nyikɔwo ɖo àmè hɛ̃hlɛ̃ be xoma a mè, ne wo gbe ɖo èpè èwì àlo wu nènea kpòa.

²⁸Àmè kèawo nɔ̀nà Arɔ̀n be jìjimèviwo gɔ̃mè, na Tɔhonɔ̀ be àxuea ŋuti-dɔwo wɔ̀wɔ. Wo lenabè na mawuxɔa, àxuea mè, èxɔ̀wo mè, wo kɔ̀nà sɛ̃sɛ̃nu kɔ̀kɔ̀ɛwo ŋuti, eye wo wɔ̀nà èdɔ tɔ̀xɛ vòvòvòwo lè kɔ̀kɔ̀ɛpea.

²⁹Woawo ye la nɔ wɔ̀ kpɔ̃nɔ kɔ̀kɔ̀ɛ kè wo sɔ wɔ̀nà vɔsa na Mawu a. Woawo ye la nɔ kpɔ vɔsa be èwɔa gbɔ. Wo la gbà nɔ kpɔ mawɔɛ àkpiti be klàkowo ku kekè, kudo èkpo mè be ènu mèmewo keŋu ji, sɔ bɔ̀ ɖo jijenuwo keŋu ŋuti.

³⁰Wo ɖo la nɔ̀ ànyi, ŋùdekɛ̃nyɛ ku wètrɔ, la nɔ do àkpe na Tɔhonɔ̀, gbà nɔ kafu ì.

³¹Wo ɖo la nɔ̀ ènumème vɔsa ɖe sia ɖe tèpe, lè jɛ̃gbɔ̃-zãwo gbè, wètri jè èji-zãwo ku àzã buwo gbè. Wo ɖo la nɔ wɔ̀ èdɔ kè wo do àsi na woa, lè Tɔhonɔ̀ be ŋùmè, wè sia wè, ɖo hɛ̃hlɛ̃ kè wo na woa nu, kaka sɔ yì.

³²Wo ɖo la nɔ̀ lebè na ègòdodo be gòxɔa ku kɔ̀kɔ̀ɛpea, eye Arɔ̀n be jìjimèviwo, woa nɔ̀viwo, la kpɔ èdɔ kèwo ye lè mawuxɔa mèa gbɔ.