Read gen 1Kronikà 24 Bible Online

1Kronikà 24 - gen bible

1Kronikà 24

¹Arɔ̀n jì ŋusùvi ènè. Woawo ye nyi: Nadàb, Abihù, Eleazàr ku Itamàr. Wo ma wo ɖo èhasòso vòvòvòwo mè.

²Nadàb ku Abihù ku jè ŋùkɔ̀ na woa tɔ, ŋusùvi mà ji. Ekèa na be Eleazàr ku Itamàr kpò ye wɔ̀ hũbonɔ be èdɔa.

³David ku Sadɔk kè nyi Eleazàr be èvia, kudo Ahimèlɛk kè nyi Itamàr be èvia va ma hũbonɔwo ɖo èhasòso vòvòvòwo mè, ɖo woabe èdɔ̀ do àsi vòvòvòwo nu.

⁴Wo va kpɔ be ŋusùviwo lè Eleazàr be jìjimèviwo dòmè wu Itamàr be jìjimèviwo dòmè. Ekèa na be wo ma Eleazàr be jìjimèviwo ɖo xòmè woeàdɛ̃ (16) mè, eye wo ma Itamàr be jìjimèviwo ɖo xòmè ènyi (8) mè, ɖe sia ɖe ku yebe ŋùkɔ̀nɔ̀tɔ.

⁵Wo dà àkɔ̀, so ma wo àmètɔ̀ àmètɔ̀, ɖoa, wo yɔ woa dòmètɔ ɖewo be “Kɔ̀kɔ̀ɛpea be èfìɔviwo” eye wo yɔ woa dòmètɔ buwo be “Mawu be èfìɔviwo”[13] lè Eleazàr ku Itamàr be èviwo dòmè.

⁶Semayà kè nyi Netanèl be èvia nyi ènuŋlɔ̀tɔ lè Levìwo dòmè. E ŋlɔ̀ xòmè ŋùkɔ̀nɔ̀tɔ kèawo be nyikɔwo lè èfìɔa, èfìɔviwo ku hũbonɔ Sadɔk be ŋùmè, lè Ahimèlɛk, Abiatàr be èvia be ŋùmè ku mawudɔwɔ̀tɔwo kudo Levìwo be xòmèwo be ŋùmè. Wo dànà àkɔ̀ na Eleazàr be xòmèa, zè èvè[14], wàlɛbɛ kè wo dànà àkɔ̀ zè ɖèka na Itamàr tɔ̀a ya.

⁷Àkɔ̀ cucugbãa jè Yehoyàrib ji, eye èvègɔ̃a jè Yèdayà ji.

⁸Ètɔ̃gɔ̃a jè Harìm ji, ènègɔ̃a jè Seorìm ji.

⁹Àtɔ̃gɔ̃a jè Malkìa ji, àdɛ̃gɔ̃ a jè Miyamìn ji.

¹⁰Adrɛ̃gɔ̃ a jè Hakɔ̀s ji, ènyigɔ̃a jè Abiyà ji.

¹¹Àsiɖèkɛgɔ̃a jè Yesùa ji, èwogɔ̃a jè Sekaneyà ji.

¹²Woeɖèkagɔ̃a jè Eliasib ji, woèvègɔ̃a jè Yakìm ji.

¹³Woètɔ̃gɔ̃a jè Hupà ji, woènègɔ̃a jè Yesebèab ji.

¹⁴Woeàtɔ̃gɔ̃a jè Bilgà ji, woeàdɛ̃gɔ̃a jè Imerì ji.

¹⁵Woeadrɛ̃gɔ̃a jè Hezìr ji, woènyigɔ̃a jè Hapisɛ̀s ji.

¹⁶Woeàsiɖèkɛgɔ̃a jè Pètahìa ji, èwìgɔ̃a jè Yehezkɛ̀l ji.

¹⁷Wìvɔɖèkagɔ̃a jè Yakìn ji, wìvɔèvègɔ̃a jè Gamùl ji.

¹⁸Wìvɔètɔ̃gɔ̃a jè Dèlayà ji, wìvɔènègɔ̃a jè Maaziyà ji.

¹⁹Nène a ye wo ma wo ɖo woabe èdɔwo nu, ne woa ɖo Tɔhonɔ̀ be àxuea mè, le ɖoɖo kè woa tɔgbe Arɔ̀n na wo, sɔ zɔ̃ ɖo lekè Tɔhonɔ̀, Izràɛlviwo be Mawu a ɖè ègbè na woa ji.

²⁰Levì cã be ŋusùvi kpɔ̀tɛawo ye nyi ekèawo[15]:

²¹Rehabiyà be jìjimèviwo be àkɔ̀a jè Yisiyà, woabe ŋùkɔ̀nɔ̀tɔa ji.

²²Yisehar be jìjimèviwo be àkɔ̀a jè Selomɔ̀t ji. Selomɔ̀t be èviwo tɔ̀a jè Yahat ji.

²³Hebrɔ̀n be jìjimèviwo be àkɔ̀a jè Yeriyà ji, cucugbãa, èvègɔ̃a jè Àmarìa ji, eye ètɔ̃gɔ̃a jè Yahazìɛl ji. Ènègɔ̃a jè Yekameàm ji.

²⁴Uzìɛl be èvi ye nyi Mikà. Lè Mikà be èviwo dòmèa, àkɔ̀a jè Samìr ji.

²⁵Mikà be nɔ̀vi ye nyi Yisiyà. Lè Yisiyà be èviwo dòmèa, àkɔ̀a jè Zakarìa ji.

²⁶Merarì be jìjimèviwo ye nyi Mahlì ku Musì kèwo nyi èvia Yahaziyà be èviwoa.

²⁷Merarì be jìjimèvi kèwo Yahaziyà jìawo ye nyi: Sohàm, Zàkur ku Ibrì.

²⁸Lè Mahlì be èviwo dòmèa, àkɔ̀a jè Eleazàr kè mu jì ŋusùvi òa ji.

²⁹Kis ku Kis be èviwo tɔ̀a jè Yerahmèl ji.

³⁰Musì be èviwo ye nyi: Mahlì, Edɛ̀r ku Yerimɔ̀t. Àmè kèawo ye nyi Levìwo be jìjimèviwo, lè woabe xòmèwo nu.

³¹Àmè kèawo cã dà àkɔ̀, sìgbè woa nɔ̀vi, Arɔ̀n be èviwo nène, lè èfìɔ David be ŋùmè, lè Sadɔk be ŋùmè, lè Ahimèlɛk be ŋùmè ku mawudɔwɔ̀tɔwo kudo Levìwo, hũbonɔwo be xòmèwo be ŋùmè, lè ŋùkɔ̀nɔ̀tɔwo be xòmèwo gbàkudo èfìɔa ku yebe yomètɔ̀ vifɛ̃tɔa be xòmèwo be ŋùmè.