Read gen 1Kronikà 26 Bible Online

1Kronikà 26 - gen bible

1Kronikà 26

¹Àgbonuɖiatɔwo cã wɔ̀ èhasòsoewo. Kore be jìjimèviwo ye nyi: Meselɛmiyà, Kore be èvi, Àsaf be tɔgbeyɔvi.

²Meselɛmiyà jì Rekariyà, ŋusùvi cucugbãa, Yediɛ̀l èvègɔ̃a, Zedabiyà ètɔ̃gɔ̃a, Yatniɛ̀l ènègɔ̃a,

³Elàm àtɔ̃gɔ̃a, Yehohanàn àdɛ̃gɔ̃ a, Ɛlyehonaì adrɛ̃gɔ̃ a.

⁴Obɛd-Edɔ̀m jì Semayà cucugbãa; èvègɔ̃a, e jì Yehozavad; ètɔ̃gɔ̃a, e jì Yoàh, ènègɔ̃a, e jì Sakar; àtɔ̃gɔ̃a, e jì Netanèl,

⁵àdɛ̃gɔ̃a, e jì Amiɛl; adrɛ̃gɔ̃ a, e jì Isakàr; ènyigɔ̃a, e jì Pehuletai, ɖoa, Mawu tu sì na ɛ̀.

⁶Pelehutai be ŋusùvi Semayà jì ŋusù kèwo ɖo àcɛ̀ lè woabe xòmèa mè, ɖoa, àmè jɔ̀ àmè ye wo nyi.

⁷Semayà be ŋusùviwo ye nyi: Otnì, Refaɛl, Obɛd, Ɛlzavad ku nɔ̀viawo nyi àmè jɔ̀ àmèwo keŋu, sɔ bɔ̀ ɖo woa nɔ̀vi Elihud ku Semakeyà ŋuti.

⁸Àmè kèawo keŋu nyi Obɛd-Edɔ̀m be èviwo. Woawo ŋutɔwo, woabe èviwo ku woa nɔ̀viwo nyi àmè jɔ̀ àmèwo, ɖo wo dona veve ènu lè woabe èdɔ wɔ̀wɔ mè. Woa kpata, wo lè àgbètɔ èkà takpo ci èvè, kèwo nyi Obɛd-Edɔ̀m be jìjimèviwo.

⁹Meselɛmiyà be ŋusùviwo ku nɔ̀viawo lè àgbètɔ woènyi, ekèwo nyi àmè jɔ̀ àmèwo keŋu.

¹⁰Merarì be jìjimèvi Hosà jì ŋusùvi ènè. Woabe ŋùkɔ̀nɔ̀tɔ ye nyi Simri, vɔ̀a mu nyi e ye nyi àmègãxoa ò. Ètɔa ye ɖo è ɖo nɔ̀viawo nu.

¹¹Hilkiyà ye nyi èvègɔ̃a, eye Tebaleyà nyi ètɔ̃gɔ̃a. Zakarìa nyi ènègɔ̃a. Hosà be èviwo keŋu lè àgbètɔ woeàtɔ̃.

¹²Àgbonuɖiatɔwo be èhasòso kèawo mènɔ̀tɔwo ku woabe ŋùkɔ̀nɔ̀tɔwo keŋu wɔ̀nà woabe èdɔ doàsiwo lè Tɔhonɔ̀ be àxuea mè.

¹³Wo dà àkɔ̀ na àmè sia àmè, so ɖèvi ji kaka va jè àmègãxo ji, ɖo woabe xòmèwo nu, na àgbo ɖe sia ɖe kè àmè sia àmè le ɖiaa.

¹⁴Èwèzɛ̃pe be àgboa be àkɔ̀a jè Meselɛmiyà ji. Àkɔ̀a sɔ àgbo kè lè àvegoa na èvia Zakarìa kè nyi àɖàŋùɖotɔ kè si ènunya lèa.

¹⁵Obɛd-Edɔ̀m xɔ̀ àpùgo be àgboa, eye èviawo xɔ̀ èxɔ̀ kèwo mè wo pònà tɛ ènuwo ɖoa.

¹⁶Supim ku Hosà xɔ̀ èwèɖoxɔ̀pe lè Salekɛ̀t be àgboa nu, sɔ jè èmɔ kè lia ètoa jia ji. Èdɔ vòvòvò kèwo wo do àsi na woa ye nyi ekèawo:

¹⁷Levì àdɛ̃ la nɔ ɖia èwèzɛ̃pe be àgboa, gbè ɖèka. Levì ènè la nɔ ɖia àvego be àgboa, gbè ɖèka. Ènè la nɔ ɖia àpùgo be àgboa. Àmè èvè èvè la nɔ ɖia ènupòtɛ be èxɔ̀awo.

¹⁸Lè Parbɔr[16] be èxɔ̀a gbɔ lɔ̀ge lè èwèzɛ̃pea, àmè ènè la nɔ̀ èmɔa to, eye àmè èvè la nɔ̀ Parbɔr be àgboa nu.

¹⁹Ekèa ye nyi àgbonuɖiatɔwo be ɖoɖo na Kore be jìjimèviwo ku Merarì be jìjimèviwo.

²⁰Wo ɖè Levìwo be nɔ̀vi ɖewo ɖo mawuxɔa be àdɔ̀kùnuwo jikpɔkpɔ nu ku ènu kɔ̀kɔ̀ɛwo be nɔ̀pea jikpɔkpɔ nu.

²¹Laedàn be jìjimèviwo, so Gɛrsɔ̀n be hɛ̃nu mè be xòmè vòvòvòwo be ŋùkɔ̀nɔ̀tɔwo ye nyi Yehiɛl be jìjimèviwo.

²²Èviawo ye nyi: Zetàm ku nɔ̀via Yoɛ̀l. Wo kpɔna Tɔhonɔ̀ be mawuxɔa be àdɔ̀kùnuwo ji.

²³Lè àmè kèwo ye so Amràm be jìjimè, Yisehar be jìjimè, Hebrɔ̀n be jìjimè, Uziɛl be jìjimèviwo be xòmèwo mèa,

²⁴Sebuɛl kè nyi Gɛrsɔ̀n kè Mosè jìa be èvia ye kpɔna àdɔ̀kùnuawo ji.

²⁵Gɛrsɔ̀n be nɔ̀vi, Eliezɛr be jìjimèviwo: Rehabeyà jì Ezayà. Ezayà jì Yòram. Yòram jì Zikrì. Zikrì jì Selomìt.

²⁶Selomìt ku nɔ̀viawo ye lè ŋùkɔ̀ na ènu kɔ̀kɔ̀ɛ kèwo keŋu ŋuti èfìɔ David, xòmèwo be ŋùkɔ̀nɔ̀tɔwo, gbãdãgbã èkà èwì vɔ àtɔ̃wo, èkà èvè takpowo ku àhùa ŋùkɔ̀nɔ̀tɔwo, kɔ̀ na Mawu be sɛ̃sɛ̃dɔwɔ̀wɔa be àdɔ̀kùnuwo jikpɔkpɔ.

²⁷Wo ɖè àdɔ̀kùnu kèawo lè àmɔ̀nyɔ̀nuawo mè, eye wo kɔ̀ woa ŋuti na èdɔwɔ̀wɔ lè Tɔhonɔ̀ be àxuea mè.

²⁸Ènu kèwo keŋu ŋuti Samuɛl, àvìmènukpɔtɔa, Saolò, Kis be èvia, Abnɛ̀r, Ner be èvia ku Yoab, Seruyà be èvia, kɔ̀a wo sɔ wo do àsi na Selomìt ku nɔ̀viawo.

²⁹Lè Yisehar be jìjimèviwo keŋu dòmèa, wo do èdɔ àsi na Kenaneyà ku nɔ̀viawo, ne woa nɔ kpɔ Izràɛl be ènyà kèwo ye kã èdù buwoa. Wo la nɔ wɔ̀ ènuŋlɔ̀tɔ ku kòjoɖotɔ be èdɔwo.

³⁰Lè Hebrɔ̀n be jìjimèviwo dòmèa, wo do èdɔ àsi na Hasabeyà ku nɔ̀viawo, àgbètɔ hotu ènyi èkà èwì vɔ àtɔ̃, àmè jɔ̀ àmèwo keŋu, be wo ne nɔ̀ Izràɛl be ànyigbã kè lè Yɔrdàn be ètɔ̀a be èwèɖoxɔ̀pea nu, ne woa nɔ kpɔ Tɔhonɔ̀ be èdɔwo kpata ku èfìɔ be sùmɔ̀ sumɔ ji.

³¹Yeriyà ye lè Hebrɔ̀n be jìjimèviwo nu. Lè David be èfìɔɖùɖu be èpè èkàgɔ̃a mèa, wo wɔ̀ ènumèkùku lè woabe xòmèwo be hɛ̃nuwo mè, eye wo kpɔ be àmè jɔ̀ àmè lè woa dòmè lè Yazɛ̀r, lè Gilead-nyigbã ji.

³²Yeriyà ku nɔ̀viawo lè àgbètɔ hotu èvè èkà woeadrɛ̃ takpo, kèwo keŋu nyi xòmè ŋùkɔ̀nɔ̀tɔ jɔ̀ àmè kèwo David ɖo, ɖo Rubɛ̀n be jìjimèviwo ku Manasè be kɔ̀ta be mamã mè nu, ɖo Tɔhonɔ̀ ku èfìɔa be ènyàwo ŋuti.