Read gen 1Kronikà 27 Bible Online

1Kronikà 27 - gen bible

1Kronikà 27

¹Ekèa ye nyi Izràɛlviwo be hɛ̃hlɛ̃, ɖo xòmè be ŋùkɔ̀nɔ̀tɔwo nu, ɖo gbãdãgbã èkàwì vɔ àtɔ̃wo ku èkà èvè takpowo be ŋùkɔ̀nɔ̀tɔwo nu, ɖo ènuŋlɔ̀tɔwo. Wo kpɔna èdɔ kèwo kù ɖo èfìɔɖùpea be àhùakɔ̃wo be èha vòvòvòwo ji kpɔtɔwo ŋutiawo. Èha kèawo be hɛ̃hlɛ̃ mè lè àmè kèwo ji èdɔ jènà, wètri sia wètria nu. E lè àmè kèwo xɔ̀nà èdɔ ku àmè kèwo wuna èdɔ nu, wètri sia wètriawo nu, lè èpè sia èpè mè. Àhùakɔ̃ ɖe sia ɖe mètɔwo be hɛ̃hlɛ̃ mè lè ŋusù hotu woèvè.

²Wètri cucugbãa be àhùakɔ̃a ye nyi àhùakɔ̃ cucugbãa, eye Yasbehàm, Zabdìɛl be èvia ye nyi àhùakɔ̃ kèa be ŋùkɔ̀nɔ̀tɔ. Gbãdãgbã kèwo ye lè àhùakɔ̃ kèa mèawo lè àgbètɔ hotu woèvè (24000).

³Yasbehàm so Perɛz be jìjimèviwo dòmè, eye be kpànà àcɛ̀ na àhùaŋùkɔ̀nɔ̀tɔwo keŋu lè wètri cucugbãa be àhùakɔ̃a mè.

⁴Dodaì kè so Ahohì be jìjimèviwo dòmèa, ye kplɔ̀nà wètri èvègɔ̃a be àhùakɔ̃ kè be ŋùkɔ̀ Miklɔ̀t lèa. Gbãdãgbã kèwo ye lè àhùakɔ̃ kèa mèawo lè àgbètɔ hotu woèvè (24000).

⁵Benayà ye lè ŋùkɔ̀ na wètri ètɔ̃gɔ̃a be àhùakɔ̃ be èha kè nyi àhùakɔ̃ ètɔ̃gɔ̃a. Benayà nyi hũbonɔ gã Yehoyada be èvi. Gbãdãgbã hotu woèvè ye lè yebe àhùakɔ̃a mè.

⁶Benayà kèa nyi kãlìwɔ̀tɔ nɔ̀ àmè ègbã[17] be èhaa mè, eye be nɔ̀ ŋùkɔ̀ na wo. Èvia, Amizabad kè lè yebe àhùakɔ̃a mèa, nɔ̀ ye tèpe, lè àhùakɔ̃a be ŋùkɔ̀.

⁷Asahɛl ye lè ŋùkɔ̀ na wètri ènègɔ̃a be àhùakɔ̃ kè lè nyi àhùakɔ̃ ènègɔ̃a. Asahɛl nyi Yoab be nɔ̀vi, eye èvia Zevadeyà va nɔ̀ e tèpe, lè yebe àhùakɔ̃ kè mè gbãdãgbã hotu woèvè (24000) lèa nu.

⁸Samhùt ye lè ŋùkɔ̀ na wètri àtɔ̃gɔ̃a be àhùakɔ̃ kè le nyi àhùakɔ̃ àtɔ̃gɔ̃a. Samhùt so Yizrà be jìjimèviwo dòmè, eye gbãdãgbã hotu woèvè (24000) ye lè yebe àhùakɔ̃a mè.

⁹Irà, kè nyi Ikɛ̀s, Tekoa ŋusùa be èvia ye lè ŋùkɔ̀ na wètri àdɛ̃gɔ̃ a be àhùakɔ̃ kè le nyi àhùakɔ̃ àdɛ̃gɔ̃ a. Gbãdãgbã hotu woèvè ye lè yebe àhùakɔ̃a mè.

¹⁰Helɛs kè nyi Pelɔn ŋusù kè so Efràyim be jìjimèviwo dòmèa ye lè ŋùkɔ̀ na wètri adrɛ̃gɔ̃ a be àhùakɔ̃ kè nyi àhùakɔ̃ adrɛ̃gɔ̃ a. Gbãdãgbã hotu woèvè (24000) ye lè yebe àhùakɔ̃a mè.

¹¹Sibekai, Hucà ŋusù kè so Zerà be jìjimèa ye lè ŋùkɔ̀ na wètri ènyigɔ̃a be àhùakɔ̃ kè le nyi àhùakɔ̃ ènyigɔ̃a. Gbãdãgbã hotu woèvè ye lè yebe àhùakɔ̃a mè.

¹²Abiezɛr, Ànatɔt ŋusù kè so Bɛnyamìn be jìjimèviwo dòmèa ye lè ŋùkɔ̀ na wètri àsiɖèkɛgɔ̃a be àhùakɔ̃ kè le nyi àhùakɔ̃ àsiɖèkɛgɔ̃a. Gbãdãgbã hotu woèvè (24000) ye lè yebe àhùakɔ̃a mè.

¹³Mahrai, Nètofà ŋusù kè so Zerà be jìjimèviwo dòmèa ye lè ŋùkɔ̀ na wètri èwogɔ̃a be àhùakɔ̃ kè le nyi àhùakɔ̃ èwogɔ̃a. Gbãdãgbã hotu woèvè (24000) ye lè yebe àhùakɔ̃a mè.

¹⁴Benayà, Pireatɔ̀n ŋusù kè so Efràyim be jìjimèviwo dòmèa ye lè ŋùkɔ̀ na wètri woeɖèkagɔ̃a be àhùakɔ̃ kè le nyi àhùakɔ̃ woeɖèkagɔ̃a. Gbãdãgbã hotu woèvè (24000) ye lè yebe àhùakɔ̃a mè.

¹⁵Hɛldai, Nètofà ŋusù kè so Otnìɛl be jìjimèviwo dòmèa ye lè ŋùkɔ̀ na woètri woèvègɔ̃a be àhùakɔ̃ kè le nyi àhùakɔ̃ woèvègɔ̃a. Gbãdãgbã hotu woèvè (24000) ye lè yebe àhùakɔ̃a mè.

¹⁶Eliezɛr, Zikrì be èvi kè so Rubɛ̀n be kɔ̀tawo mèa ye lè ŋùkɔ̀ na Izràɛl be jìjimèviwo be kɔ̀tawo. Sefatìa, Maakà be èvia lè ŋùkɔ̀ na Simeɔ̀n be jìjimèviwo.

¹⁷Hasabyà, Kemùɛl be èvia lè ŋùkɔ̀ na Levì be jìjimèviwo. Sadɔk, lè ŋùkɔ̀ na Arɔ̀n be jìjimèviwo.

¹⁸Èlìhu kè so David be nɔ̀viwo dòmèa lè ŋùkɔ̀ na Yudà be jìjimèviwo. Omrì, Mikàɛl be èvia lè ŋùkɔ̀ na Isakàr be jìjimèviwo.

¹⁹Yismayà, Obadìa be èvia lè ŋùkɔ̀ na Zabulɔ̀n be jìjimèviwo. Yerimɔ̀t, Azriɛl be èvia lè ŋùkɔ̀ na Neftalì be jìjimèviwo.

²⁰Hosèa, Azazeyà be èvia lè ŋùkɔ̀ na Efràyim be jìjimèviwo. Yoɛ̀l, Pèdayà be èvia lè ŋùkɔ̀ na Manasè be kɔ̀ta be mamã mè.

²¹Idò, Zakarìa be èvia lè ŋùkɔ̀ na Manasè be kɔ̀ta mamã mè kè lè Gilead-nyigbã jia. Yaazìɛl, Abnɛ̀r be èvia lè ŋùkɔ̀ na Bɛnyamìn be jìjimèviwo.

²²Àzarɛ̀l, Yerohàm be èvia lè ŋùkɔ̀ na Dàn be jìjimèviwo. Àmè kèawo ye nyi Izràɛlviwo be hɛ̃nuwo be ŋùkɔ̀nɔ̀tɔwo.

²³David mu hlɛ̃ àmè kèwo ɖo èpè èwì ku àmè kèwo mu kpɔ ɖo èpè èwì hàɖe òa ò, ɖoa, Tɔhonɔ̀ gblɔ̃ na ɛ̀ be yè la na Izràɛl dùkɔ̃a la sùgbɔ sìgbè wètriviwo nène lè èji[18].

²⁴Yoab, Seruyà be èvia, tɔ wo hɛ̃hlɛ̃, vɔ̀a mu teŋu wu e nu ò, ɖoa, ènu kèa wɔ̀wɔ na be Tɔhonɔ̀ be àdɔ̀mèze jè Izràɛl dùkɔ̃a ji. Ekèa na be àmè kèwo mu ɖo èpè èwì òa be hɛ̃hlɛ̃ mè mu lè èfìɔ David be èxotùnya xoma a mè ò[19].

²⁵Azmàvɛt, Adìɛl be èvi kpɔna èfìɔa be àdɔ̀kùnuwo ji. Yehonatàn Uziyà be èvi kpɔna ènu kèwo keŋu wo pòtɛ ɖo èfìɔɖùpea be ènuwlapewo, lè àgbowo, èdùwo ku kɔpewo mè lè àgblèwo ji.

²⁶Ezri, kelub be èvi lè àgblèdàtɔ kèwo wɔ̀nà èdɔ lè àgblèwo jia nu.

²⁷Simei, Ramà ŋusùa kpɔna vɛ̃-gblewo ji. Zabdì, Sifmì ŋusùa lè àmè kèwo kpɔna vɛ̃ be kplikpãwo jia nu.

²⁸Baal-Hanàn, Bɛt-Gedɛ̀r ŋusùa kpɔna àmìti ku ègboti kèwo wo do ɖo bàlì mè be ànyigbãwo ji, lè ètɔ̀wo toa ji. Yòas kpɔna àmì be kplikpãwo ji.

²⁹Sitai, Sarɔ̀n ŋusùa kpɔna ènyì kèwo ye wo le nyì lè Sarɔ̀n be ànyigbã jiawo ji, eye Safat, Adlai be èvia kpɔna ekèwo wo le nyì lè bàlìa mèa ji.

³⁰Obil, Ismàɛl be jìjimèvia kpɔna èsɔ èkpovènɔ̀wo ji. Yehdeyà, Merɔ̀n ŋusùa kpɔna èsɔ-àkɛtɛwo ji.

³¹Yaziz, Yagrì ŋusùa kpɔna àlɛ̃wo ji. Àmè kèawo keŋu kpɔna èfìɔ David be ènu nɔ̀ àmèsiwo ji.

³²Yehonatàn, David be àtàvi nyi àɖàŋùɖotɔ, nugɔ̃mèsèse ku nunya lè e si, eye be nyi ènuŋlɔ̀tɔ. Yehiɛl kè nyi Hakmɔnì be èvia nɔ̀nà èfìɔa be èviwo ŋuti.

³³Ahitofɛl nyi èfìɔa be àɖàŋùɖotɔ, eye Husai, Arkì ŋusùa nyi èfìɔa be èxlɔ̃.

³⁴Yehoyada, Benayà be èvia va nɔ̀ Ahitofɛl tèpe. E yomè a, Abiatàr cã va nɔ̀ Yehoyada tèpe. Yoab ye nyi èfìɔa be àhùakɔ̃a kplɔ̀tɔ.