Read gen 1Kronikà 28 Bible Online

1Kronikà 28 - gen bible

1Kronikà 28

¹David yɔ Izràɛl dùkɔ̃a be ŋùkɔ̀nɔ̀tɔwo keŋu bɔ̀, so kɔ̀tawo be ŋùkɔ̀nɔ̀tɔwo ji, va to àhùakɔ̃wo be kplɔ̀tɔ kèwo ye sumɔna èfìɔa ji, ku gbãdãgbã èkà èwìvɔ àtɔ̃wo kudo èkà èvè takpowo be ŋùkɔ̀nɔ̀tɔwo ji, va jè àmè kèwo keŋu kpɔna èfìɔa ku èviawo be ènu nɔ̀ àmèsiwo ku woabe èlãwo jia, gbàkudo kobonɔ̀wo, ku kãlìwɔ̀tɔwo kudo àmè jɔ̀ àmèwo keŋu, lè Yèruzàlɛm.

²Ekè èfìɔ David sitèa, e gblɔ̃ na wo be: “Nɔ̀vi nyèwo ku dùkɔ̃ nyè mètɔwo, mì ɖo èto mù. Mù ɖo è ɖo ètamè be ma tù àxue kè la nyi nɔ̀pe na Tɔhonɔ̀ be Zòɖùɖu-Ɖakà a ku miabe Mawu be àfɔ̀ɖojinu, eye mù jràɖo ɖo yebe tùtu ŋuti.

³Vɔ̀a, Mawu gblɔ̃ na mù be: “Wò mu la tù àxue ɖekpe na mù ò, ɖoa, àhùawɔ̀tɔ ye wò nyi, eye wò kɔ̀ èhũ ɖɛ.”

⁴Tɔhonɔ̀ Izràɛl be Mawu a cã mù lè ètɔ nyè be èviwo dòmè be mà-ɖùfìɔ lè Izràɛl dùkɔ̃a nu, kaka sɔ yì, ɖoa e cã Yudà, ne bèa nyi kplɔ̀tɔ, eye, lè tɔgbe nyè Yudà be àxuedoa mèa, lè tɔgbe nyè be jìjì mèviwo dòmèa, e jè ŋùmè na Tɔhonɔ̀ be, Tɔhonɔ̀ ne ɖo mù èfìɔ ɖo Izràɛl dùkɔ̃a keŋu nu.

⁵Eye, lè ŋusùvi sùgbɔ kèwo keŋu Tɔhonɔ̀ na mùawo dòmèa, Tɔhonɔ̀ dà àlɔ̀ ɖo Salomɔ̀n ji, ne bèa ɖùfìɔ lè Izràɛl, Tɔhonɔ̀ be dùkɔ̃a nu, lè Tɔhonɔ̀ be nyikɔ mè.

⁶Tɔhonɔ̀ gblɔ̃ na mù be: “Èvi wò Salomɔ̀n ye la tù èxɔ̀ na mù, la tɔ̃ èkpa do è ku yebe gbàjà jiwo. Mù cã ɛ̀ be ne nyi èvi na mù, eye nyè cã mù la nyi ètɔ na ɛ̀.

⁷Mù la likè yebe èfìɔɖùɖua tɛ̀gbɛ̀, ne e le èse[20] ku ɖoɖo nyèwo ɖo àsi sɛ̃sɛ̃ ɖe, sìgbè egbè nènea.

⁸Ekèa ŋutia, lè Izràɛl, Tɔhonɔ̀ be dùkɔ̃ bliboa be ŋùmè a, eye, lè miabe Mawu be ŋùmèa, mì zɔ̃ ɖo Tɔhonɔ̀, miabe Mawu be èsewo ji, eye mìa jrò woa mè kpɔ, àleke be èdù nyuɛ̃ kèa ne sù mìa si, ne mìa teŋu va gble è ɖɛ na mìabe jìjimèviwo gbè ɖèka, ne bèa nyi ècrɔ̃nu kòkòɖàbì na wo.

⁹Eye, èwò, èvi nyè Salomɔ̀n, jèsi ètɔ wò be Mawu a, ne wòa sumɔ ɛ̀ ku àpo èjì blibo, ku àpo èkla blibo, ɖoa, Tɔhonɔ̀ jrònà èjìwo keŋu mè kpɔna, eye be nyana ètamè be susuwo keŋu. Ne wò ji Tɔhonɔ̀a, e la na wò la jèsi ì. Vɔ̀a, ne wò trɔ lè Tɔhonɔ̀ yomè a, e la sɔ wò dãŋùgbe kaka sɔ yì.

¹⁰Kpɔɖa, fifìa, Tɔhonɔ̀ cã wò, ne wòa tù àxue kè la nyi kɔ̀kɔ̀ɛpe na yèa. Dojì, ne wòa wɔ̀ ɛ̀, ŋusùtɔ̀!”

¹¹Ekèa yomè a, David sɔ Mawu be àxuea be àsaa ji, ènuwlapewo, èxɔ̀dɔ̃me kèwo lè àsãŋu jia, dòdòmèxɔ̀awo ku Zòɖùɖu-Ɖakà a cɔ̃nua be èxɔ̀a be tata do àsi na èvia Salomɔ̀n.

¹²David gbà sɔ ènu kèwo lè ètamè na ɛ̀, ɖo Tɔhonɔ̀ be àxuea mè be gbàjà jia ŋutia ku èxɔ̀ kèwo ye trɔ do gbàjà kèa ji, kudo àxuea be àdɔ̀kùnuwo be èxɔ̀a, gbàkudo ènu kɔ̀kɔ̀ɛwo be nɔ̀pe be ɖoɖowo do àsi na Salomɔ̀n.

¹³David gbà sɔ ɖoɖo kèwo ye kù ɖo hũbonɔwo ku Levìwo ŋuti kudo sùmɔ̀ sumɔ be èdɔ lè Tɔhonɔ̀ be àxuea mèa, gbàkudo sùmɔ̀ sumɔ be ènuzãzãwo ŋutia, do àsi na Salomɔ̀n.

¹⁴David gblɔ̃ kpɛ̃kpɛ̃ mè kè la nɔ̀ sùmɔ̀ sumɔ-dɔ be sìka ku klòsalò be ènuzãzã ɖe sia ɖe sia, na Salomɔ̀n.

¹⁵David gbà gblɔ̃ kpɛ̃kpɛ̃ mè kè la nɔ̀ sìka kãligbɛ̃tiawo ku woabe kãligbɛ̃awo si, ku kãligbɛ̃ti ɖe sia ɖe be kpɛ̃kpɛ̃, kudo kãligbɛ̃ ɖe sia ɖe be kpɛ̃kpɛ̃ mè na Salomɔ̀n. E gbà gblɔ̃ kpɛ̃kpɛ̃ mè kè la nɔ̀ klòsalò kãligbɛ̃tiawo si, ku woabe kãligbɛ̃ti ɖe sia ɖe be kpɛ̃kpɛ̃ mè, kudo kãligbɛ̃ ɖe sia ɖe be kpɛ̃kpɛ̃ mè, sɔ zɔ̃ ɖo èdɔ kè wo la sɔ kãligbɛ̃ ɖe sia ɖe wɔ̀a ji.

¹⁶David gbà gblɔ̃ sìka ku klòsalò be kpɛ̃kpɛ̃ mè kè wo la sɔ wɔ̀ èkplɔ̃ kè ji, wo dànà kpɔ̃nɔ àkpiti ɖo ku klòsalò kè hiã na klòsalò be èkplɔ̃awo cã na ɛ̀.

¹⁷David gbà gblɔ̃ sìka àku-àku kè wo la sɔ wɔ̀ gafòwo, èsìkùnuwo, kogòwo ku àgbãwo. E gblɔ̃ kpɛ̃kpɛ̃ mè kè la nɔ̀ sìkanuawo ku klòsalò tɔ̀awo sia na ɛ̀.

¹⁸David gbà gblɔ̃ sìka be kpɛ̃kpɛ̃ mè kè wo la sɔ wɔ̀ lifi vɔsakpe kè wo ɖo la sɔ sìka àku-àku wɔ̀a[21], eye be gbà gblɔ̃ kpɛ̃kpɛ̃ mè kè wo la na kèkèvi kè ji sìka Kèrubimwo la vlũ àwàda lè, sɔ cɔ̃ Tɔhonɔ̀ be Zòɖùɖu-Ɖakà a jia ku yebe tata.

¹⁹Tɔhonɔ̀ ŋlɔ̀ ekèa keŋu ku yebe àlɔ̀, eye be ɖè tata ku ɖoɖo kèwo la nyi mawuxɔa be tùtua keŋu mè na mù[22].

²⁰Ekèa yomè a, David gblɔ̃ na èvia Salomɔ̀n be: “Dojì, ne wòa wɔ̀ ekèawo keŋu ŋusùtɔ̀! Vɔ̃vɔ̃ mu gbà ɖo wò ò, eye, ènu ɖekpe mu gbà sò àdìka na wò ò, ɖoa, Tɔhonɔ̀ Mawu kè nyi Mawu nyèa lè ku wò. Mu la ɖè àsi lè ŋuti wò ò, mu la trɔ lè yomè na wò, kaka na Tɔhonɔ̀ be àxuea be èdɔ ɖe sia ɖe be ènuwuwu ò!

²¹Hũbonɔwo be èhasòso vòvòvòwo ku Levì kèwo la wɔ̀ èdɔ kèawo keŋu lè Tɔhonɔ̀ be àxuea mèawo ye nyi ekèawo. Lè èdɔ kèa keŋu mèa, ŋusù kèwo ɖo èjro nyuɛ̃awo la nɔ̀ ŋuti wò ku àɖàŋù, lè èdɔ ɖekpekpe wɔ̀wɔ mè. Eye, ŋùkɔ̀nɔ̀tɔwo keŋu ku dùkɔ̃a keŋu la bɔ̀bɔ̀ ɖo àpo ègbèɖèɖe gɔ̃mè.