Read gen 1Kronikà 29 Bible Online

1Kronikà 29 - gen bible

1Kronikà 29

¹Èfìɔ David gblɔ̃ na àmèha bliboa be: “Èvi nyè Salomɔ̀n ɖèka kè Tɔhonɔ̀ cã a gbà nyi ɖèvi, eye mu kpɔ nya ènu ɖe ò, vɔ̀a, èdɔ kè lè ŋùkɔ̀ na ɛ̀a kèkè èta. Ekèa gɔ̃mè ye nyi be èfìɔsa kè be la tùa mu nyi àgbètɔ be àgbògbò ye ò, vɔ̀a, Tɔhonɔ̀ Mawu be àxue ye be la nyi.

²Mù sɔ àpe ŋusɛ̃ kpata jrà ènu kè hiãa ɖo, ɖɛ na Tɔhonɔ̀ Mawu nyè be àxuea tùtu. Na ènu kè wo la sɔ sìka wɔ̀a, mù jrà sìka ɖo ɖɛ. Na ènu kè wo la sɔ klòsalò wɔ̀a, mù jrà klòsalò ɖo ɖɛ. Na ènu kè wo la sɔ gàjɛ̃ wɔ̀a, mù jrà gàjɛ̃ ɖo ɖɛ. Na ènu kè wo la sɔ ègà yìbɔ wɔ̀a, mù jrà ègà yìbɔ ɖo ɖɛ. Na ènu kè wo la sɔ àti wɔ̀a, mù jrà àti ɖo ɖɛ. Na ènu kè wo la sɔ sohàm-kpe[23] wɔ̀a, mù jrà sohàm-kpe ɖo ɖɛ. Mù sɔ èkpe do àwùwo[24] ɖo àlɔ̀ ji ɖe, gbà sɔ èkpe àmàdodo vòvòvòwo ku èkpe xɔ̀ àsì hamè-hamèwo ɖɛ, eye wo sùgbɔ gbãŋu-gbãŋu.

³Sɔ bɔ̀ ɖo ekèa ŋutia, ɖo leke Mawu nyè be àxuea le jɔ̀jì na mùa ŋutia, mù le sɔ sìka ku klòsalò kè nyi nyè ŋutɔ tɔ̀ nyèa le na, ne Mawu nyèa be àxuea tùtu, ku ènu kèwo keŋu mù jràɖo ɖɛ na àxue kɔ̀kɔ̀ɛ kèa.

⁴Mù la na Ofir-nyigbã ji be sìka, kpɛ̃kpɛ̃ mè talɛ̃ŋutò àkpe ètɔ̃, ku klòsalò àdodoe kpɛ̃kpɛ̃ mè talɛ̃ŋutò àkpe adrɛ̃, ne woa sɔ tre ɖo èxɔ̀a be èglìawo ŋuti.

⁵Wo la gbà zã wo na ènu kèwo keŋu nyi sìkanuawo ku ènu kèwo keŋu nyi klòsalòawo kudo àɖàŋù be àlɔ̀nu-dɔwɔ̀wɔ̀wo. Àmè kɛ ye gbà sɔ̀gbè la na ènu fàa, egbè na Tɔhonɔ̀ ò?”

⁶Ekèa yomè a, xòmèwo be ŋùkɔ̀nɔ̀tɔwo, Izràɛlviwo be hɛ̃nuwo be ŋùkɔ̀nɔ̀tɔwo, gbãdãgbã èkàwì vɔ àtɔ̃wo ku èkà èvè takpowo be ŋùkɔ̀nɔ̀tɔwo kudo àmè kèwo ye kpɔna èfìɔ be èdɔwo jiawo na ènu fàa;

⁷Wo wɔ̀ ènu nana kèawo, ne woa sɔ tù Mawu be àxuea. Wo na sìka kpɛ̃kpɛ̃ mè talɛ̃ŋutò àkpe àtɔ̃, ku sìka-gà hotu àtɔ̃. Wo gbà na klòsalò talɛ̃ŋutò hotu àtɔ̃, gàjɛ̃ talɛ̃ŋutò hotu àsiɖèkɛ, ku ègà yìbɔ talɛ̃ŋutò hotu èkà ci èwo.

⁸Àmè kèwo si èkpe xɔ̀asìwo lèa, sɔ wo do àsi na Gɛrsɔ̀n be jìjimèvi Yehiɛl na Mawu be àxuea be àdɔ̀kùnuwo ɖope.

⁹Ekèa yomè a, dùkɔ̃a sò àyo ɖo woabe ènu nana fàa ŋuti, ɖoa, wo na ènu kèawo ku èjìmè kɔ̀kɔ̀ɛ na Tɔhonɔ̀. Ekèa do jìjɔɛ gã ɖe na èfìɔ David.

¹⁰David kafu Mawu lè dùkɔ̃a keŋu be ŋùkɔ̀, eye be gblɔ̃ be: “Woa kafu wò, Tɔhonɔ̀, Izràɛlviwo be Mawu, mia tɔ, so màvɔ, yì mà-vɔ mè!

¹¹Tɔhonɔ̀, tɔ̀ wò ye nyi ègãnyinyi, ŋusɛ̃, kɛ̃klɛ̃, bùbu ku gogo, ɖoa, tɔ̀ wò ye nyi ènu kèwo keŋu lè jiŋùkusi, ku ànyigbã jia. Tɔhonɔ̀, tɔ̀ wò ye nyi èfìɔɖùɖu eye wò kpà àcɛ̀ ɖo ènuwo keŋu ji.

¹²Ècikpɔkpɔ ku gogo so gbɔ wò, eye èwò ye ɖo ŋusɛ̃ ɖo ènuwo keŋu ji. Ègãnyinyi ku ŋusɛ̃ lè àsi wò. Èwò ye nana àmè trɔ na zũ àmègã, gbà linakè.

¹³Ekèa ŋuti mi le kafu wò, miabe Mawu, eye mi le mlã àpo nyikɔ kɔ̀kɔ̀ɛa.

¹⁴Ɖoa, àmè kɛ ye mù nyi, eye àmè kɛ ye dùkɔ̃ nyèa nyi, ne mia teŋu kpɔ ŋusɛ̃, la na ènu fàa, sìgbè lekè mi wɔ̀ ɛ̀ fifìa nène ò? Ènu sia ènu so gbɔ wò, eye ènu kèwo keŋu mi na wòawo so àsi wò.

¹⁵Eye, àmèjrowo mi nyi, lè ŋùku wò mè, àmègbɔnɔ̀tɔwo sìgbè mia tɔgbewo keŋu nène. Miabe ŋùkèkèwo lè ànyigbã ji lè sìgbè vɔ̃vɔ̃lì nène, eye ŋùɖo mu lè mia si ò.

¹⁶Tɔhonɔ̀ Mawu, ènu gbogbo kèwo mi jràɖo ɖɛ, ne mia sɔ tù èxɔ̀, sɔ kafu àpo nyikɔ kɔ̀kɔ̀ɛa keŋu so àsi wò mè, eye wo nyi tɔ̀ wò.

¹⁷Mawu nyè, mù nya be wò jrònà èjì mè kpɔ, eye ènu jɔ̀jɔɛ ye wò lɔ̃nà. E nyè ya, èjì mè kɔ̀kɔ̀ɛ ye mù sɔ na ènu kèa keŋu fàa. Egbèa, mù kpɔ dùkɔ̃ wòa cã lè jìjɔɛ mè, le na wò ènu fàa ku èjì mè kɔ̀kɔ̀ɛ.

¹⁸Tɔhonɔ̀ Mawu, Abràham be Mawu, Izàk be Mawu, Izràɛl be Mawu, mia tɔgbewo be Mawu, mi le ɖè kuku na wò: na be àpo dùkɔ̃a be susu ku ètamè ɖoɖo kèa ne nɔ̀ lekea tɛ̀gbɛ̀, lè yebe èjì mè, eye, trɔ dùkɔ̃ wòa be èjì ɖoɖa gbɔ wò goŋu-goŋu.

¹⁹Mù ɖè kuku na wò be wòa na èjì blibo èvi nyè Salomɔ̀n, ne bèa le èse, ɖoɖo ku ègbèɖèɖe wòwo ɖo àsi, àleke be ne wɔ̀ ènu sia ènu àdodoe, ne bèa tù èfìɔsa kè mù jro a na wò.”

²⁰Ekèa yomè a, David gblɔ̃ na àmèha keŋu be: “Mì kafu Tɔhonɔ̀, miabe Mawu!” Eye àmèhaa kafu Tɔhonɔ̀, woa tɔgbewo be Mawu. Wo do ètagũ, eye wo jè èɖɛ̀ na Tɔhonɔ̀ ku èfìɔa.

²¹Ekè èŋù kèa, wo wɔ̀ vɔ̀sawo na Tɔhonɔ̀. Wo na ènumème vɔsaa, wo zã ènyìsu àkpe ɖèka, àgbò àkpe ɖèka, àlɛ̃vi àkpe ɖèka, eye wo wɔ̀ èsìkɔ̀ɖɛ kèwo ye bɔ̀nà ɖo vɔ̀sawo ŋutia ku vɔsa sùgbɔ ɖo Izràɛl dùkɔ̃a keŋu ta.

²²Gbè ŋua gbèa, wo ɖù ènu, eye wo nù ènu ku jìjɔɛ gã ɖe, lè Tɔhonɔ̀ be ŋùmè, eye, zè èvègɔ̃a, wo sɔ Salomɔ̀n, David be èvia ɖo èfìɔ. Wo do àmì èta na ɛ̀, lè Tɔhonɔ̀ be ŋùmè, eye wo sɔ Sadɔk ɖo hũbonɔ.

²³Ekèa yomè a, Salomɔ̀n bɔ̀bɔ̀ nɔ̀ ànyi ɖo Tɔhonɔ̀ be fìɔzìkpea ji, eye be ɖùfìɔ lè ètɔa David tèpe, eye nyɔna nɔ̀ e yomè. Izràɛl dùkɔ̃a kpata sè ètonu na ɛ̀.

²⁴Àmègãwo keŋu, àgbònùglawo keŋu, gbãdãgbãwo kãlìsukawo keŋu ku èfìɔ David be èviwo keŋu bɔ̀bɔ̀ ɖo èfìɔ Salomɔ̀n gɔ̃mè[25].

²⁵Tɔhonɔ̀ kɔ Salomɔ̀n yì èji, lè Izràɛl dùkɔ̃ bliboa be ŋùmè ŋutɔ, eye be na gogo kè èfìɔ ɖekpekpe mu ɖo kpɔ, lè Izràɛl-nyigbã ji òa.

²⁶David, Jesè be èvia ɖùfìɔ ɖo Izràɛl dùkɔ̃a keŋu ji.

²⁷David nɔ̀ Izràɛl dùkɔ̃a nu èpè èkà: e ɖùfìɔ lè Hebrɔ̀n èpè adrɛ̃ eye be nɔ̀ Yèruzàlɛm èpè ègbã vɔ ètɔ̃[26].

²⁸E sĩ, ku àmègã lè nyɔna mè, eye yebe àgbè ŋùkèkè-zã kèwo ɖɔ ku àdɔ̀kùnuwo kudo gogoa va tì ì, gbɔ̀xue be ku. Èvia Salomɔ̀n va ɖùfìɔ lè e tèpe.

²⁹Wo ŋlɔ̀ èfìɔ David be ŋutinyawo cucugbã tɔ̀awo ku ŋùgbesi tɔ̀awo ɖo àvìmènukpɔtɔ Samuɛl be ŋutinya xoma, gblɔ̃ɖɛtɔ Natàn be ŋutinya xoma ku àvìmènukpɔtɔ Gad be ŋutinya xoma mè.

³⁰Sɔ bɔ̀ ɖo David be ŋutinya ŋutia, yebe èfìɔɖùɖu ku yebe ŋusɛ̃, ènu kèwo jɔ̀ ɖo David ji, ènu kèwo jɔ̀ ɖo Izràɛl dùkɔ̃a ji, kudo Izràɛl be ànyigbã keŋu jiawo lè ŋɔ̀ŋlɔ̃awo mè.