Read gen 1Kronikà 5 Bible Online

1Kronikà 5 - gen bible

1Kronikà 5

¹Rubɛ̀n ye nyi Yakɔb be èvi cucugbãa, vɔ̀a, kè Rubɛ̀n dɔ̃ ku ètɔa be èsrɔ̃wo dòmètɔ ɖèkaa, wo xɔ̀ èvi cucugbãa be àcɛ̀ lè e si, sɔ na Yosɛ̀f, ètɔa Yakɔb be èvi. So gbè ŋua gbèa, Rubɛ̀n mu gbà ɖo ŋusùvi cucugbãa be àcɛ̀ ò.

²Yudà be jìjimè ye nyi kè ɖo ŋusɛ̃ wu lè Yakɔb be èviwo dòmèa. Yebe jìjimè mè ye èfìɔvi va to so, vɔ̀ Yosɛ̀f tɔ̀ ye nyi ŋusùvi cucugbã be àcɛ̀a.

³Rubɛ̀n kè nyi Izràɛl be èvi cucugbãa jì Hanɔ̀k, Palù, Hɛsrɔ̀n ku Karmì.

⁴Yoɛ̀l jì Semayà. Semayà jì Gɔg. Gɔg jì Simei. Simei jì Milkà.

⁵Milkà jì Reayà. Reayà jì Baal.

⁶Baal jì Beerà kè Tigla-Pilnezɛr, Àsirìa be èfìɔa la va kplɔ̀ àhùalea. Beerà nyi Rubɛ̀n be jìjimèviwo be èfìɔvi.

⁷Wo ŋlɔ̀ Rubɛ̀n be jìjimèviwo be àxuedowo be ŋùkɔ̀nɔ̀tɔwo be nyikɔwo ɖɛ, ɖo hɛ̃nuwo nu. Ekèwo ye lè ŋùkɔ̀awo ye nyi Yeìɛl, Zakarìa,

⁸Belà kè nyi Azaz kè Yoɛ̀l be èvi Semàr jìa be èvia. Rubɛ̀n be jìjimèviwo nɔ̀nà ànyigbã kèwo Àroà, lè àpùgo, Nebò be ètɔ̀a ku Baal-Mɛɔ̀n be èdùa, lè èvègo pòxla doawo ji.

⁹Lè èwèzɛ̃pea, wo kãkã ɖo zògbè kè lè woabe ànyigbãwo ku Efratà be ètɔ̀a dòmèa to, ɖoa wo ɖo èlã-ha sùgbɔ lè Gilead be àgo kèawo ji.

¹⁰Lè Saolò be hùenua, Rubɛ̀n be jìjimèviwo kpe àhùa ku Hagrìviwo, eye Rubɛ̀n be jìjimèviwo ɖù Hagrìviwo ji. E yomè a, Rubɛ̀n be jìjimèviwo nɔ̀ Hagrìviwo be gòxɔwo mè, lè Gilead be èwèzɛ̃pe-nyigbãa keŋu ji.

¹¹Gad be jìjimèviwo ya nɔ̀nà èvègo na Rubɛ̀n be èviwo, lè Basàn be ètoa tamè, kaka yì Salkà.

¹²Woawo ye nyi: Yoɛ̀l be hɛ̃nua Safàm be hɛ̃nua, Yaɛnai be hɛ̃nua ku Safat be hɛ̃nu lè Basàn-nyigbã ji.

¹³Woa nɔ̀vi ŋusù kèawo cã ɖo woabe xòmèwo ànyi: Mikàɛl, Mesulàm, Sebà, Yorai, Yaekàn, Ziyà ku Ebɛ̀r. Woa kpata wo wɔ̀ xòmè adrɛ̃.

¹⁴Àmè kèwo ɖo xòmè kèawo ànyiawo nyi Àbìgaɛl be èviwo. Àbìgaɛl nyi Huri be èvi. Huri nyi Yaroa be èvi. Yaroa nyi Gilead be èvi. Gilead nyi Mikàɛl be èvi. Mikàɛl nyi Yesisà be èvi. Yesisà nyi Yado be èvi, eye Yado nyi Buzè be èvi.

¹⁵Àhi kè nyi Abdìɛl kè Gumì jìa, be èvia ye nyi woabe xòmèwo be ŋùkɔ̀nɔ̀tɔ.

¹⁶Wo nɔ̀nà Gilead be àgowo ji, lè Bacàn-nyigbã ji ku èdù kèwo trɔ do èa mè kudo Sarɔ̀n be èlãnyìpewo, kaka sɔ yì woabe ènutowo mè.

¹⁷Wo ŋlɔ̀ àmè kèawo keŋu be nyikɔwo ɖɛ, wàlɛbɛ kè Yotàn nyi èfìɔ lè Yudà-nyigbã ji ku wàlɛbɛ kè Yèrobòam ɖùfìɔ lè Yudà-nyigbã jia.

¹⁸Rubɛ̀n be jìjimèviwo, Gad be jìjimèviwo ku Manasè be kɔ̀taa be mamã mè nyi kãlìwɔ̀tɔ kèwo hɛ̃nà àkpoxɔ̀nu, lena èwui, dànà àŋùti, eye wo nya àhùa wɔ̀wɔa. Wo nyi àgbètɔ hotu èwivɔ-ève èkà-woeàsiɖèkɛ. Woawo ye teŋu yìnà àhùagbe ji.

¹⁹Wo kpe àhùa ku Hagrìviwo lè Yatur, Nafis ku Nɔdab.

²⁰Lè àhùa kèawo mèa, kãlìwɔ̀tɔ kèawo biɔ Mawu be àlɔ̀do, ɖoa wo dojì ɖo Mawu ŋuti, eye Mawu ɖo èto woabe kuefã. Mawu sɔ Hagrìviwo ku àmè kèwo keŋu lè woa ŋutiawo do àsi na kãlìwɔ̀tɔ kèawo.

²¹Wo le èkɛ̃tɔwo be èlãwo eye wo kplɔ̀ èsɔ kpotɔnɔ̀ hotu èwì vɔ àtɔ̃ (50000), àlɛ̃ ku ègbɔ hotu èkà ètɔ̃ ci àtɔ̃ (250000), èsɔàkɛtɛ hotu ɖèka (2000), eye wo kplɔ̀ àhùale hotu èkà ci èwo (100000).

²²Kãlìwɔ̀tɔ kèawo wù kɛ̃tɔ sùgbɔ lè àhùagbe kèawo ji, ɖoa, Mawu ŋutɔ ye kplɔ̀ àhùaa na wo. Ekèa yomè a, wo va nɔ̀ kɛ̃tɔwo tèpe kaka va na hùenu kè wo va kplɔ̀ dùkɔ̃a àhùalea.

²³Manasè be kɔ̀taa be mamã mè va ci ànyigbã kè so Basàn kaka va Baal-Hɛrmɔ̀n, Senìr ku Hɛrmɔ̀n be ètoa ŋutia ji. Wo sùgbɔ ŋutɔ.

²⁴Woabe xòmèwo be ŋùkɔ̀nɔ̀tɔwo ye nyi: Efɛ̀r, Yisei, Eliɛl, Azriɛl, Yirmeyà, Hòdavìa ku Yahdiɛl. Àmè kèawo keŋu nyi kãlì-dɔwɔ̀tɔwo, àmè ɖìnyiwo eye wo nyi ŋùkɔ̀nɔ̀tɔwo, na woabe xòmèwo.

²⁵Vɔ̀a, wo mu va wɔ̀ ànùkua na woa tɔgbewo be Mawu a ò. Wo wɔ̀ àhasì ku dùkɔ̃ kèwo Mawu crɔ̃ lè ŋùkɔ̀ woawo be vòduwo.

²⁶Ekèa na be Izràɛl be Mawu a trɔ Pul ku Tilgat-Pilnesɛ̀r, Àsirìa be èfìɔwo be susu, eye wo kplɔ̀ Rubɛ̀n be jìjimèviwo, Gad be jìjimèviwo ku Manasè be kɔ̀taa be mamã mè àhùalewo yì Halà, yì Habɔ̀r, yì Harà, kaka yì kɔ̀ ɖo Gozàn be ètɔ̀a to, so gà ŋua mè, kaka va na fifì.

²⁷Levì be èviwo ye nyi: Gɛrsɔ̀n, Kelat ku Merarì.

²⁸Kelat be èviwo ye nyi: Amràm, Yisebar, Hebrɔ̀n ku Uziɛl.

²⁹Amràm be èviwo ye nyi: Arɔ̀n, Mosè ku Mirìam. Arɔ̀n be èviwo ye nyi: Nadàb, Abihù, Eleazàr ku Itamàr.

³⁰Eleazàr jì Pinhàs. Pinhàs jì Abisùa.

³¹Abisùa jì Bukì. Bukì jì Uzì.

³²Uzì jì Zerahyà. Zerahyà jì Mèrayɔ̀t.

³³Mèrayɔ̀t jì Àmarìa. Àmarìa jì Ahitub.

³⁴Ahitub jì Sadɔk. Sadɔk jì Ahimahàs.

³⁵Ahimahàs jì Àzarìa. Àzarìa jì Yohanàn.

³⁶Yohanàn jì Àzarìa. Àzarìa kèa ye nyi hũbonɔ lè mawuxɔ kè Salomɔ̀n tù ɖo Yèruzàlɛm nyigbã jia mè.

³⁷Àzarìa jì Àmarìa. Àmarìa jì Ahitub.

³⁸Ahitub jì Sadɔk. Sadɔk jì Salum.

³⁹Salum jì Hilkiyà. Hilkiyà jì Àzarìa.

⁴⁰Àzarìa jì Serayà. Serayà jì Yehosàdak.

⁴¹Wo le Yehosàdak jo, wàlɛbɛ kè Tɔhonɔ̀ na Nèbukàdnezà le Yudà be jìjimèviwo ku Yèruzàlɛm be èdùa mètɔwo àhùalewoa.