Read gen 1Kronikà 7 Bible Online

1Kronikà 7 - gen bible

1Kronikà 7

¹Isakàr jì ŋusùvi ènè. Woawo ye nyi: Tolà, Puà, Yasub ku Simrɔ̀n.

²Tolà be èviwo ye nyi: Uzì, Refayà, Yerìɛl, Yahmai, Yibsam ku Semuɛ̀l. Àmè kèawo ye lè xòmèawo be ŋùkɔ̀ lè Tolà be jìjimèviwo dòmè. Wo nyi kãlìwɔ̀tɔwo eye, lè David be hùenua, Tolà be jìjimèviwo sù àgbètɔ hotu woeɖèka-èkà woeàtɔ̃.

³Uzì be èviwo ye nyi ekèawo: Izrahyà. Izrahyà jì Mikàɛl, Obadìa, Yoɛ̀l ku Yisiyà. Woa kpata wo lè àgbètɔ àtɔ̃ kèwo nyi ŋùkɔ̀nɔ̀tɔwo.

⁴Àmè kèawo ɖè nyɔ̃nù sùgbɔ, eye wo jì èvi sùgbɔ, àleke be woabe xòmèviwo teŋu ɖo àhùakɔ̃ kè be hɛ̃hlɛ̃ mè sù gbãdãgbã hotu woènyi.

⁵Isakàr be hɛ̃nu mètɔ kpɔ̀tɛ kèwo keŋu nyi kãlìwɔ̀tɔwoa be hɛ̃hlɛ̃ mè lè ŋusù hotu èkà ci ètɔ̃ èkà èwì vɔ àtɔ̃ (87000), lè woabe jìjimè be xoma a mè.

⁶Bɛnyamìn be èviwo ye nyi Belà, Bekɛ̀r ku Yediaɛ̀l.

⁷Belà jì èvi àtɔ̃: Ɛsbɔ̀n, Uzì, Uzìɛl, Yerimɔ̀t ku Irì. Àmè kèawo nyi kãlìwɔ̀tɔwo lè ŋùkɔ̀ na woabe xòmè vòvòvòwo. Hɛ̃nu kèa mètɔwo kpata be hɛ̃hlɛ̃ le àgbètɔ hotu woeɖèka ci ègbã vɔ ènè (22034), lè woabe jìjimè be xoma mè.

⁸Bekɛ̀r be èviwo ye nyi ekèawo: Zemirà, Yòas, Eliezɛr, Elioenai, Omrì, Yeremɔ̀t, Abiyà, Ànatɔt ku Alemɛ̀t. Àmè kèawo ye nyi Bekɛ̀r be èvi kèwo nyi kãlìwɔ̀tɔwo lè woabe xòmè vòvòvòwo nu.

⁹Hɛ̃nu kèa mètɔwo be hɛ̃hlɛ̃ mè lè àgbètɔ hotu èwo èkà àtɔ̃ (20200), lè woabe hɛ̃nuxoma mè.

¹⁰Yedaɛl be èviwo ye nyi: Bilhàn, Yeos, Bɛnyamìn, Ehud, Kènanà, Zetàn, Tarsìs ku Ahisahàr.

¹¹Àmè kèawo ye nyi Yedaɛl be èvi kèwo keŋu nyi kãlìwɔ̀tɔwo lè woabe xòmè vòvòvòwo nu. Wo lè àgbètɔ hotu ènyi àlɔ̀ woèvè (17200) kèwo keŋu sɔ̀gbè, la yì àhùagbe jia.

¹²Supviwo ku Hupviwo nyi Ir be jìjimèviwo, eye Husviwo nyi Ahɛ̀r be jìjimèviwo.

¹³Neftalì be èviwo ye nyi: Yahasiɛl, Gunì, Yɛsɛr ku Salum. Wo nyi Bilhà be màmayɔviwo.

¹⁴Manasè be èviwo ye nyi: Asrìɛl kè yebe àzìãvi, Aràm be nyɔ̃nùa jì na ɛ̀a. Nyɔ̃nù kèa gbà jì Makìr, Gilead be ètɔ.

¹⁵Makìr ɖè nyɔ̃nù na Hùpim ku Supim Makìr be nɔ̀vi nyɔ̃nù be nyikɔ ye nyi Maakà. Makìr jì ŋusùvi bu kè tɔ̀ Selofad. Nyɔ̃nùviwo kpò Selofad jì.

¹⁶Maakà, Makìr be èsrɔ̃a jì ŋusùvi kè be ɖo nyikɔ na be Perɛ̀s. Yebe yomètɔ̀ tɔ̀ Serɛ̀s. Serɛ̀s jì Ulàm ku Rekɛ̀m.

¹⁷Ulàm jì Bedan. Àmè kèawo ye nyi Gilead kè Makìr, Manasè be èvia jìa, be jìjimèviwo.

¹⁸Gilead be nɔ̀vi nyɔ̃nù, Homɔlɛkɛt jì Èsehod, Abiezɛr ku Mahlà.

¹⁹Semidà be èviwo ye nyi Aheyàn, Sɛkɛ̀m, Likhì ku Anìam.

²⁰Efràyim jì Sutela, Sutela jì Berɛ̀d, Berɛ̀d jì Tahat, Tahat jì Eleadà, Eleadà jì Tahat.

²¹Tahat jì Zavad. Zavad jì Sutela ku Ezɛ̀r kudo Elead. Vɔ̀a, Gat ŋusùwo, àmè kèwo nyi ànyigbã ŋua ji tɔwo wù Ezɛ̀r ku Elead, ɖoa, Zavad be èviwo va la le Gat tɔwo be èlãhawo jo.

²²Efràyim, woa tɔa, lòfũ ŋùkèkè sùgbɔ, eye, yebe xòmètɔwo va fa àkɔ na ɛ̀.

²³Ekèa yomè a, Efràyim gbà yì èsrɔ̃a gbɔ, eye nyɔ̃nùa jì ŋusùvi kè Efràyim ɖo nyikɔ na be Berìa, ɖoa, nyɔ̃nùa nɔ̀ e ŋuti lè vevesèse mè.

²⁴Efràyim jì nyɔ̃nùvi ɖèka kè wo yɔna be Seeràa. E ye sò Bɛt-Horɔ̀n lè èto ji ku Bɛt-Horɔ̀n lè bàlìa mè, kudo Uzɛn-Seerà be èdùawo.

²⁵Efràyim gbà jì ŋusùvi kè tɔ̀ Refà a. Refà jì Rɛzɛ̀f. Rɛzɛ̀f jì Telà, Telà jì Tahàn.

²⁶Tahàn jì Laedàn. Laedàn jì Amihud. Amihud jì Elisamà.

²⁷Elisamà jì Nun, eye Nun jì Yosùa.

²⁸Ànyigbã kèwo Efràyim be jìjimèviwo xɔ̀awo ye nyi: Betɛ̀l ku kɔpe kèwo ye trɔ do èa, Naaràn lè èwèzɛ̃pe, Gɛzɛ̀r ku kɔpe kèwo ye trɔ do èawo, lè èwèɖoxɔ̀pe, sɔ bɔ̀ ɖo Sikɛ̀m ku kɔpe kèwo ye trɔ do è, kaka yì Ayà ku kɔpe kèwo trɔ do èawo cã ŋuti.

²⁹Manasè be jìjimèviwo tɔ̀ ye nyi Bɛt-Sean ku kɔpe kèwo ye trɔ do èawo, Taanak ku kɔpe kèwo ye trɔ do èawo, Megidò ku kɔpe kèwo ye trɔ do èa, Dɔr ku kɔpe kèwo ye trɔ do èawo. Èdù kèawo mè ye Izràɛl be èvi Yosɛ̀f be jìjimèviwo nɔ̀.

³⁰Àsɛr be èviwo ye nyi Yimnà, Yisvà, Yisvì, Beriyà ku woa nɔ̀vi nyɔ̃nù Sɛrà.

³¹Beriyà be èviwo ye nyi Hebɛ̀r ku Malkiɛl. Malkiɛl jì Birzait.

³²Hebɛ̀r jì Yaflɛ̀t, Somer, Hotam ku woa nɔ̀vi nyɔ̃nù Suà.

³³Yaflɛ̀t be èviwo ye nyi: Pasak, Bimbal ku Asvàt. Woawo ye nyi Yaflɛ̀t be èviwo.

³⁴Nɔ̀via Somer be èviwo ye nyi: Rohgà, Hubà ku Aràm.

³⁵Aràm be fòfo, Helɛ̀m be èviwo ye nyi: Sofà, Yimnà, Selɛ̀f ku Amàl.

³⁶Sofà be èviwo ye nyi: Suà, Harnefɛr, Sual, Berì, Yimrà,

³⁷Bɛsɛ̀r, Hod, Samà, Silsà, Yitràm ku Beerà.

³⁸Yetɛr be èviwo ye nyi: Yefunè, Pispà ku Arà.

³⁹Ulà be èviwo ye nyi: Arà, Haniɛl ku Risìa.

⁴⁰Àmè kèawo keŋu nyi Àsɛr be jìjimèviwo. Wo nyi xòmè ŋùkɔ̀nɔ̀tɔwo eye wo nyi kãlìwɔ̀tɔwo, ègawo be èfìɔviwo. Ekè wo hlɛ̃ woabe jìjimèviwoa, wo sù ŋusù hotu woètɔ̃ lè àhùakɔ̃a mè.