Read gen 1Kronikà 9 Bible Online

1Kronikà 9 - gen bible

1Kronikà 9

¹Wo hlɛ̃ Izràɛlviwo kpata eye wo ŋlɔ̀ woabe nyikɔwo ɖo xòmèwo nu, ɖo Izràɛl be èfìɔwo be xomawo mè. Wo kplɔ̀ àmè kèwo ye nɔ̀nà Yudà-nyigbã jiawo àhùale yì Babɛ̀l-nyigbã ji, ɖo woabe ànùkua mà-wɔ̀ na Mawu ŋuti.

²Yèruzàlɛm be èdùmèvi kèwo ye trɔ gbɔ̀ cucugbã, eye wo gbìgbɔ̀ yì woabe èdùwo mè, gbìgbɔ̀ xɔ̀ woabe ènu nɔ̀ àmè siwoa, nyi Izràɛlvi gbalowo, hũbonɔwo ku Levìwo kudo mawuxɔ mè be èdɔwɔ̀tɔwo.

³Yudà, Bɛnyamìn, Efràyim ku Manasè be jìjimèvi ɖewo ye nyi àmè kèwo va sò ci Yèruzàlɛm be èdùa mè.

⁴Utài kè nyi Amihud kè Omrì jìa be èvi, Omrì ŋutɔ nyi Imrì kè Banì jìa be èvi. Wo so Yudà be èvi Perɛ̀s be jìjimèviwo dòmè.

⁵Lè Silɔ̀n be jìjimèviwo dòmèa Asayà be èvi cucugbãa ku yebe jìjimèviwo,

⁶Lè Zerà be jìjimèviwo dòmèa, Yehuɛl. Yudà be jìjimèviwo kpata lè àgbètɔ àlɔ̀ àdɛ̃ èkà èvè ci èwo (690).

⁷Lè Bɛnyamìn be jìjimèviwo dòmèa, Salù nyi Mesulàm be èvi, Mesulàm nyi Hodavyà be èvi. Hodavyà nyi Ha-Senua be èvi.

⁸Yibneyà nyi Yerohàm be èvi, Elà nyi Uzì be èvi. Uzì nyi Mikrì be èvi, eye Mesulàm nyi Sefatyà be èvi. Sefatyà nyi Reùɛl be èvi. Reùɛl nyi Yibniyà be èvi.

⁹Àmè kèawo keŋu nyi ŋùkɔ̀nɔ̀tɔwo na woabe xòmè vòvòvòwo. Bɛnyamìn be jìjimèvi kèwo ye nɔ̀nà Yèruzàlɛm ku woabe hɛ̃numewo sù àgbètɔ àlɔ̀ àsiɖèkɛ èkà ci woeàdɛ̃ (956).

¹⁰Àmè kèwo so hũbonɔwo dòmèawo ye nyi: Yèdayà, Yehoyàrib, Yakìn,

¹¹Azaryà, Hilkiyà be èvi. Hilkiyà, nyi Mesulàm be èvi. Mesulàm kè nyi Sadɔk be èvi. Sadɔk nyi Mèrayɔ̀t be èvi. Mèrayɔ̀t kè nyi Ahitub be èvi. Ahitub ye nyi mawuxɔa ji kpɔtɔ.

¹²Adayà, Yerohàm be èvi. Yerohàm nyi Pasehur be èvi. Pasehur nyi Malkìa be èvi ku Masai, Adìɛl be èvi. Adìɛl nyi Yahzerà be èvi. Yahzerà nyi Mesulàm be èvi. Mesulàm nyi Mesilemìt be èvi. Mesilemìt nyi Imèr be èvi.

¹³Àmè kèawo ku hũbonɔ kpɔ̀tɛawo nyi woabe xòmè vòvòvòwo be ŋùkɔ̀nɔ̀tɔwo. Woa kpata wo nyi kãlìwɔ̀tɔ kèwo keŋu be hɛ̃hlɛ̃ mè le àgbètɔ àkpe ɖèka àlɔ̀ adrɛ̃ èkà takpo (1760) kèwo wɔ̀nà èdɔ lè mawuxɔa mè.

¹⁴Àmè kèwo so Levìwo dòmèawo ye nyi: Semayà nyi Hasub be èvi, Hasub nyi Azrikàm be èvi, Azrikàm nyi Hasabyà be èvi, Hasabyà nyi Merarì be èviwo dòmètɔ ɖèka.

¹⁵Bakbakar, Hɛrɛ̀s, Galàl, ku Matanya nyi Mikà be èviwo. Mikà nyi Zikrì be èvi, Zikrì nyi Àsaf be èvi.

¹⁶Obadìa nyi Semayà be èvi, Semayà nyi Galàl be èvi, Galàl nyi Yedutùn be èvi, eye Berɛkìa nyi Asà be èvi. Asà nyi Ɛlkanà kè nɔ̀nà Netofà-nyigbã be kɔpe mèa be èvi.

¹⁷Àgbonuɖiatɔwo dòmètɔwo ye nyi Salum, Àkub, Talmɔ̀n, Ahimàn ku woa nɔ̀vi ŋusùwo. Salum ye lè ŋùkɔ̀ na wo.

¹⁸Àgbonuɖiatɔ ŋuawo be jìjimèviwo ye gbà le ɖia èwèzɛ̃pe be àgbo kè wo yɔna be èfìɔwo be àgboa kaka va na egbè. Woa tɔgbe tɔ̀gbèwo ye ɖiana Levì be jìjimèviwo be àsàɖawo sãa.

¹⁹Salum, Kore be èvi, Kore kè nyi Ebiasàf kè Korà jìa be èvi ku àmè kèwo keŋu so Korà be xòmè mèawo xɔ̀ èdɔ do àsi kè nyi Tɔhonɔ̀ be gòxɔa nu ɖiaɖia. Woa-tɔwo be èdɔ do àsi ye nyi be wo ɖiana Tɔhonɔ̀ be àsàɖaa be àgbonu.

²⁰Pinhàs, Eleazàr be èvia ye nɔ̀ woa nu sãa, ɖoa, Tɔhonɔ̀ nɔ̀ ku ì.

²¹Zakarìa, Meselɛmiyà be èvia nyi àgbonuɖiatɔ lè Ègòdodo be gòxɔa nu.

²²Àmè kèwo keŋu wo cã, eye wo ɖiana àgboawo nua be hɛ̃hlɛ̃ mè lè àgbètɔ èkà àtɔ̃ ci woèvè (212). Wo hlɛ̃ wo eye wo ŋlɔ̀ woabe nyikɔwo ɖɛ lè woabe kɔpewo mè. Eye David ku gblɔ̃ɖɛtɔ Samuɛl ye ɖo wo ànyi kaka sɔ yì, wàlɛbɛ kè wo do èdɔ kèa àsi na woa.

²³Àgbonuɖiatɔ kèawo ku woabe jìjimèviwo be èdɔ do àsi ye nyi be woa nɔ ɖia Tɔhonɔ̀ be àxue, kè nyi gòxɔ be nɔ̀pea be àgboa nu.

²⁴Àgbonuɖiatɔwo nɔ̀nà koŋù ènèawo ji: wo nɔ̀nà èwèzɛ̃pe, èwèɖoxɔ̀pe, èvègo ku àpùgo.

²⁵Woa nɔ̀vi kèwo nɔ̀nà kɔpe vòvòvòwo mèa, va bɔ̀nà ɖo woa ŋuti, wɔ̀nà èdɔa ŋùkèkè adrɛ̃ adrɛ̃,

²⁶Vɔ̀a, àgbonuɖiatɔ be ŋukɔ̀nɔ̀tɔ ènèawo yaa, nɔ̀nà èdùanu, lè mawuxɔa nu, wè sia wè. Àgbonuɖiatɔwo be ŋùkɔ̀nɔ̀tɔ kèawo nyi Levì be jìjimèvi kèwo kpɔna èxɔ̀ kèwo ye lè Mawu be àxuea mè ku àdɔ̀kùnu kèwo lè woa mèawo ji.

²⁷Wo ɖiana èzã, trɔ do Mawu be àxuea, ɖoa, woabe èdɔ ye nyi be woa nɔ kpɔ e ji, eye woa nɔ hũ àgboawo, ŋùdekɛ̃nyɛ sia ŋùdekɛ̃nyɛ.

²⁸Àgbonuɖiatɔ kèawo dòmètɔ ɖewo be èdɔ ye nyi be wo ne nɔ hlɛ̃ sùmɔ̀ sumɔ be èdɔwɔ̀nuawo, wàlɛbɛ kè wo le ɖè wo to, ku wàlɛbɛ kè wo le trɔ wo gbɔ̀a, àleke be èdɔwɔ̀nu kèawo ne sɔ̀gbè wè sia wè.

²⁹Woa dòmètɔ buwo kpɔna sùmɔ̀-sumɔ be ènu buwo ji, sìgbè kogò ku àgbã kèwo ŋuti wo kɔ̀awo nène. Wo gbà wɔ̀nà èwɔ meme, vɛ̃, àmì, lifi ku àmì xɔ̃ɛ titi be èdɔ.

³⁰Vɔ̀a, hũbonɔwo be èviwo dòmètɔ ɖewo be èdɔ be nyi be, woa caka lifi ku ènu kèwo wo tɔna èzòawo na àzìzɔ vɔsa na Tɔhonɔ̀.

³¹Wo sɔ klàko wɔ̀wɔ be èdɔa do àsi na Matitiyà. E so Levìwo dòmè, eye be nyi Salum kè so Kore be jìjimèa be ŋùkɔ̀gbevi.

³²Levì bu kèwo so Kehàt be hɛ̃nu mèawo be èdɔ do àsi ye nyi be woa nɔ wɔ̀ kpɔ̃nɔ kè wo sɔ ɖona Tɔhonɔ̀ be ŋùmè lè jɛ̃gbɔ̃zã gbèa.

³³Levì kèwo ye nyi hàsìnɔ̀woa nyi xòmè be ŋùkɔ̀nɔ̀tɔ kèwo ɖo woabe nɔ̀pe lè èxɔ̀awo mè. Èdɔ bu ɖe mu gbà lè woa ji ò, ɖo wo wɔ̀nà woabe èdɔ do àsia, èzã ku kedè.

³⁴Àmè kèawo nyi xòmè be ŋùkɔ̀nɔ̀tɔ kèwo so Levìwo dòmè, eye wo nyi xòmèwo be ŋùkɔ̀nɔ̀tɔwo ɖo jìjimèawo nu. Wo nɔ̀nà Yèruzàlɛm.

³⁵Yeìɛl kè sò Gibeɔ̀n be èdùa, nɔ̀nà èdùa mè ku èsrɔ̃a Maakà.

³⁶Èvia ŋusùvi àmègãxoa ye nyi Abdɔ̀n. Nɔ̀viawo ye nyi: Sur, Kis, Baal, Ner, Nadàb,

³⁷Gedɔr, Ahìo, Zakarìa, ku Miklɔ̀t.

³⁸Miklɔ̀t jì Simàm. Woawo cã, wo nɔ̀nà Yèruzàlɛm sìgbè woa nɔ̀vi buwo nène.

³⁹Ner jì Kis. Kis jì Saolò. Saolò jì Yonatàn, Malki-Sua, Abinadab ku Ɛsbal.

⁴⁰Yonatàn be èvi ye nyi Meribaal, Meribaal jì Mikà.

⁴¹Mikà be èviwo ye nyi Pitɔ̀n, Mèlɛk, Tahreà,

⁴²Àhaz kè jì Yaheràa. Yaherà jì Alemɛ̀t, Azmàvɛt ku Zimrì, Zimrì jì Mɔsà.

⁴³Mɔsà jì Bìnea, Bìnea jì Refayà. Refayà jì Eleazàr. Eleazàr jì Asɛ̀l.

⁴⁴Asɛ̀l jì ŋusùvi àdɛ̃. Woawo ye nyi: Azrikàm, Bokrù, Yismàɛl, Searyà, Ubadìa, ku Hanàn. Àmè kèawo ye nyi Asɛ̀l be èviwo.