Read gen 2Kronikà 1 Bible Online

2Kronikà 1 - gen bible

2Kronikà 1

¹Salomɔ̀n, David be èvia likè lè yebe èfìɔɖùɖu mè, ɖoa, Tɔhonɔ̀, yebe Mawu nɔ̀ ku ì, eye be kɔ ɛ̀ yì èji.

²E va e mè be Salomɔ̀n pò nupo na Izràɛl dùkɔ̃a keŋu, na àmè èkà èwì vɔ àtɔ̃wo (1000) ku àmè èkà èvè takpo (100) be àhùakɔ̃wo be ŋùkɔ̀nɔ̀tɔwo, na kòjoɖotɔwo, kudo Izràɛl bliboa be xòmè ŋùkɔ̀nɔ̀tɔwo.

³Àmèha bliboa kplɔ̀ Salomɔ̀n do, yì (vɔsa-to) kè lè Gibeɔ̀n ji, ɖoa funua ye Mawu be Egòdodo be gòxɔa lè. Gòxɔ kèa ye Tɔhonɔ̀ be sumɔ̃vi, Mosè wɔ̀ lè zògbè a ji.

⁴Vɔ̀a, David na, wo sɔ Mawu be Zòɖùɖu-Ɖakà a so Kiryat-Yearim, yì tèpe kè be jràɖo ɖɛ na ɛ̀a, ɖoa e tù gòxɔ ɖe ɖɛ na ɛ̀, lè Yèruzàlɛm.

⁵Eye gàjɛ̃ be vɔsakpe ke Bezalɛl, Urì be èvi, Ur be tɔgbeyɔvi wɔ̀a lè funu, lè Tɔhonɔ̀ be nɔ̀pea be ŋùkɔ̀. [1] Funua tutu ye Salomɔ̀n ku àmèhaa va ji Tɔhonɔ̀ lè.

⁶Funua, Salomɔ̀n yì gàjɛ̃ be vɔsakpea gbɔ, lè Tɔhonɔ̀ be ŋùkɔ̀, le ègòdodo be gòxɔa gbɔ, eye be wɔ̀ ènumème vɔsa ku èlã èkà èwì vɔ àtɔ̃ (1000).

⁷Ezã mèa, Mawu ɖè ye ɖokoe fiɔ Salomɔ̀n, eye be gblɔ̃ na ɛ̀ be: “Biɔ ènu kè mù la na wòa!”

⁸Salomɔ̀n ɖo e ŋuti na Mawu be: “Èwò ye ɖe màje gã ɖe fiɔ ètɔ nyè David, eye wo ɖo mù èfiɔ ɖo ye tèpe.

⁹Fifìa, Tɔhonɔ̀ Mawu, wɔ̀ ɖo àjɔ̀gbè ke wò fìã na David, ètɔ nyèa ji, ɖoa, èwò ye ɖo mù èfiɔ ɖo dùkɔ̃ kè sùgbɔ, [2]sìgbè ànyigbã be èkɔsawɔɛ nènea nu.

¹⁰Ekèa ŋutia, na mù àdòdò ku ènunya, àleke be ma teŋu nɔ yì, la nɔ gbɔ̀, le dùkɔ̃ kèa be ŋùkɔ̀. Ne mu nyi nène ò a, àmè kɛ ye la teŋu kplɔ̀ dùkɔ̃ wò kè lòlò lekea ò?”

¹¹Eye Mawu ɖo e ŋuti na Salomɔ̀n be: “Ekè ènu kèa ye lè èji mè na wò, eye wò mu biɔ èci kpɔkpɔ ku àdɔ̀kùnuwo, àlo bùbu kudo àgbè dìdì, àlo kɛ̃tɔ wòwo be èku ò, vɔ̀a, ekè wò biɔ àdòdò ku ènunya, ne wòa sɔ kplɔ̀ dùkɔ̃ nyè kè nu mù ɖo wò èfìɔ ɖoa,

¹²wò la xɔ̀ àdòdò ku ènunya, kudo èci kpɔkpɔ, gbàkudo àdɔ̀kùnuwo, eye mù la sɔ gogo kè èfìɔ ɖekpe mu ɖo, jè ŋùkɔ̀ na wò, eye ekè ɖekpe mu la gbà ɖo lè yo wò mè ò a, bɔ̀ ɖo woa ŋuti na wò!”

¹³Ekèa yo mèa, Salomɔ̀n ɖì so vɔsatèpe kè lè Gibeɔ̀n, so ègòdodo be gòxɔa ŋùkɔ̀, va Yèruzàlɛm. E ɖùfìɔ lè Izràɛl dùkɔ̃a nu.

¹⁴Salomɔ̀n bɔ̀ àhùakèkevi ku èsɔdotɔwo. Salomɔ̀n ɖo àhùakèkevi àlɔ̀ woènè (1400) ku èsɔ ɖotɔ hotu àdɛ̃ (12000). E na wo tèpe ɖo àhùakɔ̃ be èdùwo mè kudo ye ɖokoe gbɔ lè Yèruzàlɛm.

¹⁵Èfìɔa na be klòsalò ku sìka sùgbɔ sìgbè lekè èkpewo sùgbɔ lè Yèruzàlɛm a nène. Nène a ke sedàtiwo cã sùgbɔ sìgbè ègbo-ti kèwo ye mìɔ̃nà ɖo ètogɔ̃mè-nyigbãa jia nène.

¹⁶Wo hɛ̃nà Salomɔ̀n be èsɔwo va, so Ejiptè ku so Kowà. Èfìɔa be àsì-sahawo yì plènà wo so Kowà.

¹⁷Ne wo trɔ gbɔ̀ so Ejiptè a, wo plènà àhùakèkevi ɖèka, klòsalò-gà èkà woeàtɔ̃ (600), eye èsɔ ɖèka xɔ̀nà klòsalò-gà, àlɔ̀ ɖèka ku èfã (150). Lekea ke ye wo hɛ̃nà wo yìnà na Hitìtɔwo be èfìɔwo ku Aràmtɔwo be èfìɔwo keŋu.

¹⁸Ekèa yomè a, Salomɔ̀n ɖè ègbè be wo ne tù èxɔ̀ na Tɔhonɔ̀ be gogo, ku èfìɔ-gbàsa kè la nyi èfìɔ be nɔ̀pea.