Read gen 2Kronikà 10 Bible Online

2Kronikà 10 - gen bible

2Kronikà 10

¹Robòam yì Sikɛ̀m, ɖoa, Sikɛ̀m ye Izràɛl be dùkɔ̃a keŋu va, la ɖo è èfìɔ lè[21].

²Ekè Yèrobòam, Nevat be èvia sè ènyàa, ɖoa e lè Ejiptè, àfi kè be si, lè èfìɔ Salomɔ̀n nu, yì nɔ̀a, e trɔ gbɔ̀ so Ejiptè.

³Wo dɔ̃ àmè yì yɔ ɛ̀ va. Yèrobòam ku Izràɛlviwo keŋu va, eye wo gblɔ̃ na ɛ̀ be:

⁴“Ètɔ wò do èkɔ̀kùti kpɛ̃kpɛ̃ èkɔ̀ na mi. Fifìa, ɖè èkɔ̀kùti kèa, eye wòa ɖiɖi èdɔ sɛ̃sɛ̃awo ji kpɔ̀tɔ̀ na mi, ne mia teŋu sumɔ wò.”

⁵E ɖo e ŋuti na wo be: “Mì trɔ va kpɔ mù, lè ŋùkèkè ètɔ̃ yomè.” Eye dùkɔ̃a trɔ jo.

⁶Èfìɔ Robòam ɖè àɖàŋù ku àmè sĩsĩ kèwo wɔ̀dɔ ku ètɔa Salomɔ̀n, wàlɛbɛ kè be lè àgbèa. E biɔ wo be: 'Mìawo ya ɖe, àɖàŋù kɛ ye mì la ɖo na mù, be ma sɔ ɖo e ŋuti na dùkɔ̃ kèa ò?”

⁷Wo ɖo e ŋuti na ɛ̀ be: “Ne wò wɔ̀ àdɔ̀mè nyuɛ̃ na dùkɔ̃ kèa, eye wò do jìjɔɛ na woa, ne wò le kpɔ ɖoŋuti nyuɛ̃ na woa, wo la nyi sumɔ̃vi nyuɛ̃wo na wò tɛ̀gbɛ̀.”

⁸Gãkea, Robòam mu ɖo èto àɖàŋù kè àmè sĩsĩwo ɖo na ɛ̀a ò. E yì ɖè àɖàŋù ku ɖèkajɛvi kèwo ye be sĩ ku, eye wo le wɔ̀ èdɔ na ɛ̀awo.

⁹E biɔ wo be: “Mìawo ya ɖe, àɖàŋù kɛ ye mì la ɖè na mù ò? Leke ye mi la ɖo e ŋuti na dùkɔ̃ kèa, kè gblɔ̃ na mù be: 'Ɖiɖi èkɔ̀kùti kè ètɔ wò do èkɔ̀ na mia, na miò?'”

¹⁰Èfìɔa be hati, ɖèkajɛviawo ɖo e ŋuti be: “Wò la gblɔ̃ na dùkɔ̃ kè gblɔ̃ be: 'Ètɔ wò na miabe èkɔ̀kùtia kpɛ̃, ekèa ŋutia, ɖiɖi ì kpɔ̀tɔ̀ na mia' be: 'àpe àlɔ̀vi tukui trì wu ètɔ nyè be àlì[22]!

¹¹So egbè jia, ekè ètɔ nyè do èkɔ̀kùti kpɛ̃kpɛ̃ na mìa, ènyè yaa, mù la na be la gbà kpɛ̃ kpe è. Ètɔ nyè pò mì ku àtãŋù. Ènyè yaa, mù la pò mì ku àkeklewo[23].

¹²Ŋùkèkè ètɔ̃gɔ̃a gbèa, Yèrobòam ku Izràɛl dùkɔ̃a keŋu va kpɔ Robòam, sìgbè lekè èfìɔa gblɔ̃a nène be: “Mì trɔ va kpɔ mù, ŋùkèkè ètɔ̃ yomè.”

¹³Èfìɔ Robòam ɖo ènyàa ŋuti na wo ku àdã, eye èfìɔ Robòam mu sɔ èɖe lè àmè sĩsĩawo be ètopòɖoa mè ò.

¹⁴E zɔ̃ ɖo ɖèkajɛviawo be ètopòɖoa ji, sɔ ɖo ènyàa ŋuti gblɔ̃ be: “Ètɔ nyè na mìabe èkɔ̀kùtia kpɛ̃. Ènyè yaa, mù la na, e la gbà kpɛ̃ ɖo e ji na mì kpe è. Ètɔ nyè pò mì ku àtãŋù. Ènyè yaa, mù la pò mì ku àkeklewo.” [24]

¹⁵Èfìɔa mu ɖo èto dùkɔ̃a ò, ɖoa, nènea ye Mawu ɖo è, be yèa wɔ̀, ɖo ènyà kè Tɔhonɔ̀ gblɔ̃ na Yèrobòam, Nevat be èvia, to gblɔ̃ɖɛtɔ Ahiya, Silò be èdùmètɔa jia yeŋu[25].

¹⁶Ekè Izràɛl be dùkɔ̃a keŋu kpɔ be èfìɔa mu ɖo èto yè ò a, dùkɔ̃a to na èfìɔa be: “Gomè kɛ ye mi le kpɔ so David gbɔ fifì ò? Mamã kɛ ye mi ɖo fifì ku Jesè be èvia ò? Izràɛl be dùkɔ̃, mi trɔ yì mia ŋutɔwo miabe gòxɔwo mè! Sɔ so egbè jia, David be jìjimèviwo ne kpɔ woabe àxue gbɔ! Ekèa yomè a, Izràɛlviwo keŋu trɔ jo yì woabe gòxɔwo mè. Izràɛlviwo hũ jo.

¹⁷Izràɛlvi kèwo ye lè Yudà be èdùwo mèa ji kpò ye Robòam ɖùfìɔ ɖo.

¹⁸Èfìɔ Robòam na àcɛ̀ èdùjikpɔtɔ Hadoràm ɖo Izràɛlviwo nu lè àvego, vɔ̀a, Izràɛlviwo pò è èkpe, eye be ku. Èfìɔ Robòam yaa, jè àgbàgba, lia àhùakèke mè, eye be teŋu si jo yì Yèruzàlɛm.

¹⁹Ekèa na be Izràɛl-nyigbãa klã jo lè David be àxuea ŋuti, kaka va na fifì.