Read gen 2Kronikà 11 Bible Online

2Kronikà 11 - gen bible

2Kronikà 11

¹Ekè Robòam va ɖo Yèruzàlɛm be èdùa mèa, e yɔ Yudà be xòmèa ku Bɛnyamìn be xòmèawo bɔ̀. Woa kpata, wo nyi àhùawɔ̀tɔ àdodoe hotu èkà èvè takpo, ne woa kpe àhùa ku Izràɛl be dùkɔ̃a, àleke be woa gbà trɔ èfìɔɖùɖua do àsi na Robòam.

²Vɔ̀a, Tɔhonɔ̀ be ègbè ɖì na Semayà, Mawu be àmèa be:

³“Gblɔ̃ na Robòam, Salomɔ̀n be èvi, Yudà be èfìɔ, ku Izràɛlvi kèwo keŋu lè Yudà ku Bɛnyamìn-nyigbã jia be:

⁴“Tɔhonɔ̀ gblɔ̃ be: Mì mu gbà yì kpe àhùa ku mìa nɔ̀viwo ò! Àmè sia àmè ne trɔ yì yebe àxomè! Ɖo a, ènu kè jɔ̀ a, gbɔ nyè be so.” “Wo ɖo èto Tɔhonɔ̀ be ègbè, wo trɔ, eye wo mu gbà yì kpe àhuùa ku Yèrobòam ke ò.

⁵Robòam nɔ̀ Yèruzàlɛm eye be sò àgbògbò be èdùwo ɖo Yudà-nyigbã ji.

⁶E sò Bɛtlɛhɛ̀m, Etàm ku Tekoa be èdùawo,

⁷E gbà sò Bet-Sur, Sokò, ku Adulàm be èdùawo,

⁸Gat, Maresà, Zif,

⁹Adòràyìm, Làkis Àzekà,

¹⁰Zorea, Ayalɔ̀n ku Hebrɔ̀n. Èdù kèawo nyi àgbògbò be èdù sɛ̃ŋuwo lè Yudà ku Bɛnyamìn be ànyigbãwo ji.

¹¹Robòam na èdù kèawo be àgbògbòwo gbà sɛ̃ŋu kpe è. E ɖo àhùagawo ɖo woa nu, eye be ɖo nuɖùɖu, àmì ku vɛ̃ be pòtɛpewo ɖo èdù kèawo mè.

¹²E sɔ àkpoxɔ̀nuwo ku èhuãwo ɖo èdù ɖe sia ɖe mè, eye be na wo trɔ zũ èdù sɛ̃sɛ̃wo ŋutɔ. Nène a ye Yudà ku Bɛnyamìn be ànyigbãwo trɔ zũ ye tɔ̀a yeŋu.

¹³Hũbonɔ ku Levì kèwo ye lè Izràɛl be èdùa keŋu mèawo so woabe ànyigbã vòvòvòawo ji, va lè e yomè.

¹⁴Levìawo gble woabe èlãnyìpewo ku woabe ènu nɔ̀amèsiwo ɖɛ, eye wo hũ va Yudà-nyigbã ji ku Yèruzàlɛm, ɖoa, Yèrobòam ku èviawo gbe be wo mu gbà wɔ̀ Tɔhonɔ̀ be sɛ̃sɛ̃dɔa ò.

¹⁵Ekèa yomè a, Yèrobòam ŋutɔ ɖo hũbonɔwo na ye ɖokoe. E ɖo vɔsa tèpewo lè ètowo ji, na ègbɔsuwo ku ènyìvi kèwo ye ŋutɔ na wo wɔ̀a.

¹⁶Gãkea, àmè kèwo so Izràɛlviwo be kɔ̀tawo keŋu mè, eye wo ɖo lè woabe èjiwo mè be yèwoa ji Tɔhonɔ̀, Izràɛl be Mawu a, wo jè hũbonɔawo yomè, va Yèruzàlɛm, la savɔ na Tɔhonɔ̀, woa tɔgbewo be Mawu.

¹⁷Woawo ye likè Yudà be fìɔdua, eye wo do ŋusɛ̃ Robòam, Salomɔ̀n be èvia èpè ètɔ̃ sɔ̃ŋu.

¹⁸Robòam ɖè Màhalàt, Yerimɔ̀t be nyɔ̃nùvi. Yerimɔ̀t nyi David ku Abihayil, Eliab be èvi nyɔ̃nù be èvi. Eliab ŋutɔ nyi Jesè be èvi.

¹⁹Màhalàt jì ŋusùviwo na Robòam. Woawo ye nyi: Yeùs, Semarìa ku Zaham.

²⁰Ekèa yomè a, Robòam gbà ɖè Àbsàlɔm be èvi nyɔ̃nù, Maakà, àmè kè jì Abiyà, Ataì, Zizà ku Selomit na ɛ̀.

²¹Robòam lɔ̃ Maakà, Àbsàlɔm be èvia wu èsrɔ̃a kpɔ̀tɛawo ku àzìãviawo keŋu. Robòam ɖè nyɔ̃nù woenyi, ku àzìãvi èkà takpo. E jì ŋusùvi èwì vɔ ènyi ku nyɔ̃nùvi èkà takpo.

²²Robòam cã Maakà be èvi Abiyà, èfìɔvia, sɔ ɖo nɔ̀viawo nu, ɖoa, e jro la ɖo è èfìɔ.

²³E sɔ àyè mã èvia ŋusùawo keŋu ɖo Yudà ku Bɛnyamìn be ànyigbãwo keŋu ji, àgbògbò be èdùawo keŋu mè. E na wo sɔ ènuzãzãwo ɖo woa gbɔ gbãŋu-gbãŋu, eye be ɖè èsrɔ̃ sùgbɔ na wo.