Read gen 2Kronikà 13 Bible Online

2Kronikà 13 - gen bible

2Kronikà 13

¹Lè Yèrobòam be èfìɔɖùɖu be èpè woènyigɔ̃a mèa, Abiyà va èfìɔzìkpea ji, lè Yudà-nyigbã ji.

²E ɖùfìɔ èpè ètɔ̃ lè Yèruzàlɛm. Ènɔa be nyikɔ ye nyi Mikayà, Urìɛl, Gibea ŋusùa be èvi. Àhùa nɔ̀ Abiyà ku Yèrobòam dòmè.

³Abiyà sɔ ŋusù kãlìwɔ̀tɔ cãcã hotu àlɔ̀ èvè (400000) jè àhùaa gɔ̃mè. Yèrobòam cã ɖo ŋusù kãlìwɔ̀tɔ cãcã hotu àlɔ̀ ènè (800000) kpe àkɔ ku wo.

⁴Abiyà yì tɔtè ɖo Zemarayimtoa tamè, le Efràyim be ètoa ji, eye be gblɔ̃ be: “Mì ɖo èto mù, Yèrobòam ku Izràɛlviwo keŋu!

⁵Mì mu nya be Tɔhonɔ̀, Izràɛl be Mawu a sɔ èfìɔɖùɖua do àsi na David, ɖo Izràɛl nu, kaka sɔ yì, na David ku yebe jìjimèviwoa? E nyi èjè be èzòɖùɖu mà-gble mà-gble kòkòɖàbì.

⁶Vɔ̀a Yèrobòam, Nevat be èvi, Nevat kè nyi Salomɔ̀n, David be èvia be sumɔ̃via sitè, eye be jè àgla ɖo àpetɔa ŋuti.

⁷Eye yàkàmèwo ku àmèɖìgbɔwo va bɔ̀ ku Yeroboam do Robòam, Salomɔ̀n be èvia, eye wo dè e nu. Ɛ̃ɛ, wo kpɔ vifɛ̃ le ŋùmè na ɛ̀, ekè èjì mu trì na ɛ̀, eye be ɖo ŋusɛ̃ ò a, mu teŋu kpe woa ji ò.

⁸Fifìa, mì ɖo è be yèwo la teŋu nɔ̀tè ɖo Tɔhonɔ̀ be èfìɔɖùɖu ke lè David be jìjimèviwo si mèa nu! Ɛ̃ɛ, mìabe àhùakɔ̃a sùgbɔ, eye sìka be ènyìvi kèwo Yèrobòam wɔ̀ na mì, be vòduwoa lè ku mì.

⁹Mì mu nyà Tɔhonɔ̀ be hũbonɔ kèwo nyi Arɔ̀n be jìjimèvi ku Levìwo, eye mìawo ŋutɔwo mì ɖo hũbonɔwo na mìa ɖokoewo, sìgbè lekè ànyigbã bu ji tɔwo wɔ̀nàa nènea. Nène a, àmè kè gbe va be wo ne ɖo yè hũbonɔ kpòa, sɔna ènyì-suvi ɖèka ku àgbò adrɛ̃ va nana, eye wo ɖona ɛ̀, ènu màteŋu ɖì mawuwo be hũbonɔ.

¹⁰Vɔ̀a, miawo yaa, Tɔhonɔ̀ ye nyi miabe Mawu, eye mi mu gble è ɖɛ ò. Hũbonɔ kèwo le sumɔ ɛ̀awo nyi Arɔ̀n be èviwo, eye Levìwo lè woabe èdɔwo nu.

¹¹Woawo ye tɔna èzò ènumème vɔsa na Tɔhonɔ̀, ŋùdekɛ̃nyɛ sia ŋùdekɛ̃nyɛ, fìɛ̃si sia fìɛ̃si, eye wo dona àtikè hɔ̃ɛ lili be àzìzɔ na ɛ̀. Wo ɖona kpɔ̃nɔ ɖo èkplɔ̃ kɔ̀kɔ̀ɛa ji, eye wo sũnà sìka kãligbɛ̃tia be èzòwo fìɛ̃si sia fìɛ̃si. Ɖoa, miawo yaa, mi le Tɔhonɔ̀, miabe Mawu be ɖoɖowo ɖo àsi. Vɔ̀a, mìawo yaa, mì gble è ɖɛ.

¹²Mì kpɔ ɖa! Mawu ye nyi miabe kplɔ̀tɔ. Yebe hũbonɔwo sɔ̀gbè, la ku èkpɛ̃wo sɔ yɔ mi na àhùa. Izràɛlviwo, mì mu gbà kpe àhùa ku Tɔhonɔ̀, mìa tɔgbewo be Mawu ò, ɖoa, mì mu la ɖùji ò.”

¹³Yèrobòam na gbãdãgbã ɖewo yì doxa na wo, to ŋùgbedòmè. Izràɛlviwo lè ŋùkɔ̀ na Yudàviwo, eye èxadotɔwo lè ŋùgbedòmè na wo.

¹⁴Ekè Yudàviwo trɔa, kpɔɖa, àhùa kpe wo lè ŋùkɔ̀, gbà kpe wo lè ŋùgbe. Wo fã yɔ Tɔhonɔ̀, eye hũbonɔwo ku èkpɛ̃awo.

¹⁵Eye Yudàviwo do àhùapa, eye wàlɛbɛ kè Yudàviwo le do àhùapaa, Mawu pò Yèrobòam ku Izràɛl be àhùakɔ̃ bliboa lè Abiyà ku Yudàviwo be ŋùkɔ̀.

¹⁶Eye Izràɛlviwo si lè Yudàviwo be ŋùkɔ̀, eye Mawu do wo àsi na Yudàviwo.

¹⁷Abiyà ku yebe dùkɔ̃a ɖù woa ji veve ɖe, eye wo wù gbãdãgbã àdodoe àkpe àlɔ̀ àtɔ̃ (500000) lè Izràɛlviwo be àhùakɔ̃a dòmè.

¹⁸Nène a ye wo do ŋùkpɛ̃ Izràɛlviwo, gà ŋua mè, eye Yudàviwo ɖùji, ɖoa, wo gba ɖo woa tɔgbewo be Mawu a ŋuti.

¹⁹Abiyà kplɔ̀ Yèrobòam do, eye be xɔ̀ yebe èdù gãwo sìgbè Betɛ̀l nène, ku kɔpe kèwo ye lè e ŋutiawo; Yesana ku kɔpe kèwo ye lè e ŋutiawo; Efrɔ̀n ku kɔpe kèwo ye lè e ŋutiawo.

²⁰Ekèa yomè a, ŋusɛ̃ ɖekpe mu gbà nɔ̀ Yèrobòam ŋuti lè Abiyà be àgbè hùenu ke ò. Tɔhonɔ̀ pò è pu ànyi, eye be ku.

²¹Abiyà yaa va likè ye ɖokoe. E ɖè nyɔ̃nù woènè (14), jì ŋusùvi èwì vɔ èvè (22) ku nyɔ̃nùvi woeàdɛ̃ (16).

²²Wo ŋlɔ̀ Abiyà be ŋutinya, yebe wɔ̀nawo ku yebe ènyà gbɔ̃gblɔ̃wo ɖo gblɔ̃ɖɛtɔ Idò be ènyà ŋɔ̀ŋlɔ̃wo mè.

²³Ekè Abiyà trɔ ŋùgbea, wo sɔ ɛ̀ mlɔ̃ tɔgbeawo gbɔ, lè David be èdùa mè. Èvia Asà ɖùfìɔ ɖo ye tèpe Yebe hùenua, ŋuti fàfa nɔ̀ ànyigbãa ji èpè èwo sɔ̃ŋu.