Read gen 2Kronikà 14 Bible Online

2Kronikà 14 - gen bible

2Kronikà 14

¹Asà wɔ̀ ènu kè nyɔa ku ènu kè jɔ̀ a lè Tɔhonɔ̀, yebe Mawu be ŋùku mè.

²E gũ vɔsakpe kèwo so ànyigbã buwo jia ku ètowo ji be sɛ̃sɛ̃tèpewo, eye be gbã èkpeliwo ku èyɔ̀xɔwo.

³E gblɔ̃ na Yudàviwo be wo ne ji Tɔhonɔ̀, woa tɔgbewo be Mawu a, wo ne wɔ̀ ɖo èsea ku ɖoɖoawo ji.

⁴Lè èdùwo keŋu mè, lè Yudà-nyigbã jia, e ɖè vɔsatèpewo ku lifĩfiɔ̃pewo jo lè ètowo ji, eye fìɔdua, kpɔ ŋuti fàfa lè yebe èfìɔɖùɖu hùenu.

⁵Ekè èdùa ɖo ŋuti fàfaa, e sò àgbògbò be èdùwo. Àmè ɖe mu kpe àhùa ku ì, èpè ŋuawo mè ò, ɖoa, Tɔhonɔ̀ na ɛ̀ jɛ̃gbɔ̃gbɔ̃.

⁶E gblɔ̃ na Yudàviwo be: “Mia tù èdù kèawo, mia ɖo èglì trɔ do wo ku mɔjikpɔxɔwo, mia do àgbowo ku àsawo woa nu. Ànyigbã a kpɔ jɛ̃gbɔ̃gbɔ̃ lè ŋùkɔ̀ na mi. Ekè mi ji Tɔhonɔ̀, miabe Mawu a. Ɛ̃ɛ mi ji ì, eye be na mi jɛ̃gbɔ̃gbɔ̃ trɔ do.” Ekèa yomè a, wo tù èdùawo, eye èdùawo yì ŋùkɔ̀.

⁷Asà be àhùakɔ̃a ɖo gbãdãgbã àkpe àlɔ̀ ètɔ̃ (300000) kèwo hɛ̃na àkpoxɔ̀nu gãa ku èhuãa. Wo so Yudà-nyigbã ji. So Bɛnyamìn-nyigbã jia, àhùakɔ̃a ɖo gbãdãgbã àkpe àlɔ̀ èvè ci èkà èvè (280000) kèwo hɛ̃na àkpoxɔ̀nuvi, eye wo dànà àŋùtia. Woa kpata wo nyi àhùawɔ̀tɔ kãlìwo.

⁸Zerà, Kusì ŋusùa hɔ̃ ku àhùawɔ̀tɔ milìɔn ɖèa ku àhùakèke àlɔ̀ ètɔ̃ (300), va kpe àhùa ku wo, eye be va ɖo kaka Maresà.

⁹Asà be àhùakɔ̃a cã to va, kpã ŋùkɔ̀ wo, na àhùa lè Sefatà be bàlìa mè, lè Maresà gbɔ.

¹⁰Asà do àpa yɔ Tɔhonɔ̀, yebe Mawu, gblɔ̃ be: “Tɔhonɔ̀, àmè ɖekpe mu lè, tovò na wò kè la xɔ̀ na àmè gbɔjɔ, kpã ŋùkɔ̀ àmè sɛ̃ŋu ò. Tɔhonɔ̀, miabe Mawu, xɔ̀ na mi! Ɖoa, èwò ŋuti mi gba ɖo, eye àpo nyikɔ mè ye mi va kpã ŋùkɔ̀ àhùakɔ̃ gbogbo kèa lè. Tɔhonɔ̀, èwò ye nyi miabe Mawu. Wò mu la ɖè àsi lè àgbètɔ ŋuti, be la ɖù ji wò ò!”

¹¹Tɔhonɔ̀ pò Kusìtɔwo pu ànyi, lè Asà ku Yudàtɔwo be ŋùkɔ̀, eye Kusìtɔwo si.

¹²Asà ku àhùakɔ̃ kè lè e ŋuti a nyà wo ɖo èdùnu, kaka yì Geràr. Kusìtɔwo ci àhùa, àleke be àmè ɖekpe mu ci àgbè, lè woa dòmè ò. Wo crɔ̃ lè Tɔhonɔ̀ ku àhùakɔ̃a be ŋùkɔ̀. Asà be àhùakɔ̃a lɔ àmɔ̀nyɔ̀nu sùgbɔ jo.

¹³Àhùakɔ̃a gbã èdù kèwo keŋu trɔ do Geràr, ɖoa, Tɔhonɔ̀ kɔ̀ vɔ̃vɔ̃ ɖo woa dòmè, eye àhùakɔ̃a hlà wo keŋu, ɖo ènu sùgbɔ lè èdù kèawo mè.

¹⁴Àhùakɔ̃a gbã èlãhawo be nyìpewo, eye wo le àlɛ̃ ku ègbɔ sùgbɔ kudo èsɔkpotɔnɔ̀wo. E yomè a, wo trɔ yì Yèruzàlɛm.