Read gen 2Kronikà 15 Bible Online

2Kronikà 15 - gen bible

2Kronikà 15

¹Mawu be gbɔ̃gbɔ̃ ɖì va Azarya, Obɛd be èvia ji;

²e to yì dogò Asà, eye be gblɔ̃ na ɛ̀ be: “Asà, ɖo èto mù, èwò ku Yudà dùkɔ̃a kudo Bɛnyamìn dùkɔ̃a keŋu! Tɔhonɔ̀ la nɔ̀ ku mì, ne mì lè ku ìa. Ne mì ji ìa, mì la kpɔ ɛ̀. Vɔ̀a, ne mì gble è ɖɛa, e la gble mì ɖɛ.

³Izràɛl dùkɔ̃a nɔ̀ ànyi dìdì ɖe, mà-ɖo Mawu àgbèagbea kaka la ɖo hũbonɔ kè la fiɔ èsea.

⁴Vɔ̀a, ekè wo ɖo tùkaɖa mèa, wo trɔ gbɔ̀ va Tɔhonɔ̀, Izràɛl be Mawu a gbɔ. Wo ji ì, eye be ɖè àsi lè ye ɖokoe ŋuti, wo kpɔ ɛ̀.

⁵Hùe ŋuawo nua, ŋuti fàfa mu lè na àmè kèwo yìnà, gbɔ̀nàawo ò, ɖoa càkà-caka gã ɖe nɔ̀ ànyigbã jitɔwo dòmè.

⁶Dùkɔ̃ ɖe yì gbãnà dùkɔ̃ bu. Èdù ɖè yì gbãnà èdù bu, ɖoa, Mawu sɔ tùkaɖa hamè-hamèwo do nupo na wo.

⁷Vɔ̀a, mìawo yaa, mì likè sɛ̃sɛ̃ɖe, mìabe àlɔ̀wo mu gbà gbɔjɔ ò, ɖoa, èfɛ̃tu lè èdɔ kè mì le wɔ̀a mè!

⁸Ekè Asà sè ènyà kèawo ku gblɔ̃ɖɛtɔ Obɛd be ènyàgblɔ̃ɖɛawoa, e dojì, eye be ɖè ènu nyɔŋuwo jo lè Yudà ku Bɛnyamìn-nyigbãa keŋu ji, eye be ɖè wo jo lè èdù kèwo be xɔ̀ lè Efràyim be ètoawo jia mè. E gbìgbɔ̀ jrà Tɔhonɔ̀ be vɔsakpe kè lè mawuxɔa be ŋùkɔ̀a ɖo.

⁹E bɔ̀ Yudà ku Bɛnyamin-nyigbã ji tɔwo keŋu, kudo àmè kèwo si àhùa so Efràyim-nyigbã ji, Manasè-nyigbã ji ku Simeɔ̀n-nyigbã jiawo keŋu, ɖo àmè sùgbɔ so Izràɛl, va ci e gbɔ, ekè wo kpɔ be Tɔhonɔ̀, yebe Mawu lè ku ìa.

¹⁰Lè Asà be èfìɔɖùɖu be èpè woeàtɔ̃gɔ̃a mè, lè wètri ètɔ̃gɔ̃a mèa, wo yì bɔ̀ lè Yèruzàlɛm.

¹¹Gbè ŋua gbèa, wo sɔ ènyì àlɔ̀ adrɛ̃ (700), àlɛ̃ ku ègbɔ àkpe adrɛ̃ (7000), lè èlã kèwo wo hlà gbɔ̀awo dòmè, savɔ na Tɔhonɔ̀.

¹²Eye wo ɖùzò, be yèwo la ji Tɔhonɔ̀, yèwo tɔgbewo be Mawu a, ku èjì blibo, kudo èkla blibo.

¹³Eye àmè ɖekpekpe àmè kè mu la ji Tɔhonɔ̀, woa tɔgbewo be Mawu a ò, so àmègãxo ji, kaka va jè ɖèvi ji, e nyi ŋusù àlo nyɔ̃nù ò, wo la wù ì.

¹⁴Wo sɔ àbòbo kpàkpa, jìjɔɛ kpɔkpɔ, èkpɛ̃ ku èzè kuku sɔ fìã àjɔ̀gbè na Tɔhonɔ̀,

¹⁵Yudàviwo keŋu kpɔ jìjɔɛ ɖo àjɔ̀gbèa ŋuti, ɖoa, wo fìã ku èjro nyuɛ̃, kudo èjì blibo. Ekè wo ji Tɔhonɔ̀ veveɖea, wo kpɔ ɛ̀, eye be na wo jɛ̃gbɔ̃gbɔ̃ trɔ do.

¹⁶Èfìɔ Asà ɖè ènɔa Maakà ŋutɔ cã jo lè èfìɔ-nɔ̀ be àzìkpea ji, ɖoa, e li legba nyɔŋu ɖe na vòdu Aserà. Asà crɔ̃ vòdu nyɔŋu ŋua, gbã ɛ̀, eye be tɔ ɛ̀ èzò lè Kidrɔ̀n be bàlìa mè.

¹⁷Vɔ̀a, vɔsatèpe lè ètowo ji mu gũ keŋu lè Izràɛl nyigbã-ji, togbɔ be Asà be èjì blibo tɛ ɖo Tɔhonɔ̀ ŋuti, lè yebe àgbè ŋùkèkèwo mè ò.

¹⁸E sɔ klòsalò, sìka, ku ènu bu kèwo ŋuti ètɔa ku ye ŋutɔ wo kɔ̀awo va ɖo Mawu be àxuea mè.

¹⁹Àhùa ɖekpe mu gbà jɔ̀ kaka na Asà be èfìɔɖùɖu be èpè ègbã vɔ àtɔ̃gɔ̃a (35) ò.