Read gen 2Kronikà 16 Bible Online

2Kronikà 16 - gen bible

2Kronikà 16

¹Lè èfìɔ Asà be èfìɔɖùɖu be èpè ègbãvɔ àdɛ̃gɔ̃ a mèa, Basà, Izràɛl be èfìɔa zɔ̃ ɖo Yudà ji, gbìgbɔ̀ sò Ramà, sɔ tù àgbògbò-dù, ne bèa sɔ xe èmɔ na Yudà be èfìɔ, Asà[26].

²Asà sɔ klòsalò ku sìka, lè mawuxɔa ku èfìɔ be àxuea be àdɔ̀kùnuwo mè, ɖoɖa Bɛn-Hadad, Aràm be èfìɔ kè nɔ̀nà Damaskò-dùa mèa. E do àŋɛ̀ ɖoɖa ɛ̀ be:

³“Zòɖùɖu ne nɔ̀ nyè ku wò dòmè, sìgbè lekè be nɔ̀ ètɔ nyè ku ètɔ wò dòmèa nène. Kpɔɖa, mù sɔ klòsalò ku sìka le ɖoɖa wò, ne wòa tu zòɖùɖu kè bla wò ku Basà, Izràɛl be èfìɔa, àleke be mu gbà va ɖè àhùa kpe na mù ò.”

⁴Bɛn-Hadad sè èfìɔ Asà be ègbè, eye be ɖo yebe àhùakɔ̃wo be ŋùkɔ̀nɔ̀tɔwo, wo yì ɖè àhùa kpe na Izràɛl be èdù: Iyɔ̀n, Dàn, Abɛ̀l-Mayìm kèwo wo xɔ̀[27], ku ènupòtɛɖope kèwo lè Neftalì-nyigbã jiawo.

⁵Ekè Basà sè ènyà kèa, e ɖo àlɔ̀ tè, eye be tɔtè èdɔ kèwo be le wɔ̀, sɔ le tù àgbògbò ɖo Ramà a.

⁶Ekèa yomè a, èfìɔ Asà kplɔ̀ Yudà bliboa. Wo fɔ̀ èkpeawo ku àtiawo, so Ramà kè Basà le tù àgbògbò ɖoa, yì tù Gebà ku Mispà.

⁷Wàlɛbɛ ŋua, ènu mèkpɔtɔ Hananì va kpɔ Yudà be èfìɔ Asà, eye be gblɔ̃ na ɛ̀ be: “Kè wò gba ɖo Aràm be èfìɔa ŋuti, eye wò mu gbà gba ɖo Tɔhonɔ̀, Mawu wò ŋuti ò a, Aràm be èfìɔa be àhùakɔ̃a gɛ̃ lè àsi wò.

⁸Kusìtɔwo ku Libìatɔwo mu nyi àhùakɔ̃ gã ɖe kè si àhùakèke ku èsɔdotɔwo lè gbãŋu gbãŋu ò a? Ekè wò gba ɖo Tɔhonɔ̀ ŋutia, Tɔhonɔ̀ sɔ wo do àsi na wò[28].

⁹Ɖoa, Tɔhonɔ̀ sãnà ŋùkuvi lè ànyigbãa keŋu ji, ne bèa do ŋusɛ̃ àmè kèwo kù ɖo e ŋuti ku woabe èjì bliboa. Vɔ̀ èwò yaa, wò wɔ̀ sùkunɔ̀ be ènu. Ekèa ŋutia, so fifìa, àhùa la sò àxue ɖo dòmè na wò.”

¹⁰Asà bijì do gblɔ̃ɖɛtɔa, eye be na wo le è, sɔ ɛ̀ do ègàkpamè, ɖoa, ènyà kè be gblɔ̃ na ɛ̀a, ve àdɔ̀mè na ɛ̀ ŋutɔ. Gà ŋua mèa, Asà le do àyà na dùkɔ̃a mèvi ɖewo.

¹¹Kpɔɖa, Asà be ŋutinyawo lè Yudà ku Izràɛl be èfìɔwo be ŋutinya xoma mè, so gɔ̃mèjèje sɔ yì ènuwuwu.

¹²Lè Asà be èfìɔɖùɖu be èpè ègbã vɔ àsiɖèkɛgɔ̃a mèa, e jè èdɔ̀. Yebe àfɔ̀wo le èdɔ̀ veve ɖe. Gãkea, mu ji Tɔhonɔ̀ be xɔ̀ na àmè ò. E jè ŋùkɔ̀ ègbewɔ̀tɔwo.

¹³Asà trɔ ŋùgbe, eye be yì mlɔ̃ tɔgbeawo gbɔ, lè yebe èfìɔɖùɖu be èpè èkà ci ɖèkagɔ̃a mè.

¹⁴Wo ɖì ì ɖo èyɔ̀do kè be kù ɖo David be èdùa mèa mè. Wo dà ɛ̀ ɖo mlɔ̃pe kè wo do àtikè hɔ̃ɛ titi vòvòvò kèwo àtikèwɔ̀tɔ nyuɛ̃wo wɔ̀a, eye wo do èzò gãɖe, sɔ do bùbu e ŋuti.