Read gen 2Kronikà 18 Bible Online

2Kronikà 18 - gen bible

2Kronikà 18

¹Èfìɔ Yòsafat va kpɔ èci sùgbɔ, eye gogo cã sù e si. Èsrɔ̃ɖèɖe[29] va na be e do xòmè ku èfìɔ Àkab.

²Èpè ɖewo yomè a, èfìɔa ɖìsà yì Sàmarìa, lè Àkab gbɔ. Àkab wù àlɛ̃wo ku ènyìwo fuu, na Yòsafat ku àmèha kè kplɔ̀ ɛ̀ do vaa. Àkab pò nupo ku Yòsafat, ne woa wɔ̀ àhùa ku Ramɔ̀t-dùa, lè Gilead-nyigbã ji[30].

³Àkab, Izràɛl dùkɔ̃a be èfìɔa biɔ Yòsafat, Yudà be èfìɔa be: “Wò la yì Ramɔ̀t, lè Gilead-nyigbã ji ku mùa?” Yòsafat ɖo e ŋuti na Àkab be: “Mù lè sìgbè èwò nène, eye dùkɔ̃ nyè lè sìgbè dùkɔ̃ wò nène. Mi la nɔ̀ ŋuti wò lè àhùaa mè.”

⁴Eye Yòsafat gblɔ̃ na Izràɛl be èfìɔa be: “Gãkea, tɔ̀wò jɔ̀; egbèa, biɔ ègbè Tɔhonɔ̀ gbɔ̀xue.”

⁵Izràɛl be èfìɔa yɔ gblɔ̃ɖɛtɔ àgbètɔ èkà èwo bɔ̀, eye be biɔ wo sè be: “Mi teŋu yì kpe àhùa ku Ramɔ̀t, lè Gilead-nyigbã ji loo, àlo, mi mu ɖo la yì ò?”[31] Wo ɖo e ŋuti na ɛ̀ be: “Yì, Mawu ɖè èdùa do àsi na èfìɔ.”

⁶Vɔ̀a, Yòsafat biɔ be: “Tɔhonɔ̀ be gblɔ̃ɖɛtɔ bu mu gbà lè fikèa, ne mia biɔ ɛ̀ ènyàa?”

⁷Izràɛl be èfìɔa ɖo e ŋuti na Yòsafat be: “Àmè ɖèka gbà lè, ekè ji mi la to, la biɔ ènyà Tɔhonɔ̀ sè, vɔ̀a, nyè yaa, mù crì ì, ɖoa, mu gblɔ̃nà ènyà nyuɛ̃ ɖekpe ɖɛ, so ŋuti nyè gbèɖe ò. Èvuɛ̃ kpò be gblɔ̃nà ɖɛ, so ŋuti nyè. E ye nyi Mikà, Yimlà be èvi.” Yòsafat ɖo e ŋuti be: “Èfìɔ mu gbà pò nupo nènea ò!”

⁸Ekèa yomè a, Izràɛl be èfìɔa yɔ àgbònùgla ɖèka, eye be gblɔ̃ na ɛ̀ be: “Yì kplɔ̀ Mikà, Yimlà be èvia va fikèa, fifì jɛ̃!”

⁹Izràɛl be èfìɔa ku Yòsafat, Yudà be èfìɔa, àmè sia àmè lè yebe èfìɔ be àwù mè, lè yebe èfìɔzìkpe ji, lè Sàmarìa be èdùa be àgboa be gbàjà ji. Gblɔ̃ɖɛtɔwo keŋu le gblɔ̃ ènyà ɖɛ, lè ŋùkɔ̀ na wo.

¹⁰Sedekìa, Kènanà be èvia, sɔ gàyìbɔ wɔ̀ àzò na ye ɖokoe, eye be gblɔ̃ be: “Ènyà kè Tɔhonɔ̀ gblɔ̃a ye nyi be: 'Àzò kèa, wò la sɔ tù Aràmviwo, kaka la crɔ̃ wo keŋu-keŋu!'”

¹¹Gblɔ̃ɖɛtɔ kpɔ̀tɛawo keŋu lè gblɔ̃ ènyà ɖɛ nènea ke be: “Ɖè àhùa kpe na Ramɔ̀t lè Gilead-nyigbã ji. Wò la ɖùji, ɖoa, Tɔhonɔ̀ la sɔ ɛ̀ do àsi na wò!”

¹²Àmèdɔ̃dɔ̃ kè yì yɔ Mikà vaa, gblɔ̃ na ɛ̀ be: “Kpɔɖa, ègbè lè èdu na gblɔ̃ɖɛtɔawo. Woa kpata, wo sɔ ègbè ɖèka, le gblɔ̃ ènyà nyuɛ̃ na èfìɔa. Wò cã, àpo ègbè ne sɔ̀ ku woa tɔ̀. Gblɔ̃ ènyà nyuɛ̃ ɖɛ na ɛ̀!”

¹³Vɔ̀a, Mikà ɖo e ŋuti be: “Kaka kè Tɔhonɔ̀ lè àgbèa, ènyà kè Mawu nyè la gblɔ̃a, ènyà ŋua ke kpò ye mù la gblɔ̃!”

¹⁴Ekè Mikà vaa, èfìɔa biɔ ɛ̀ sè be: “Mikà, mi la teŋu yì ɖè àhùa kpe na Ramɔ̀t be èdùa, lè Gilead-nyigbã ji loo, àlo, mi mu gbà yì ò?” Mikà ɖo e ŋuti be: “Mì yì, mì la ɖùji, eye wo la ci mìa si.”

¹⁵Èfìɔa gblɔ̃ na ɛ̀ be: “Zè nenè ye mù la na, wò la kã àtãŋu, be nyàwo kpò wò la nɔ to na mù, lè Tɔhonɔ̀ be nyikɔ mè ò?”

¹⁶Mikà ɖo e ŋuti be: “Mù kpɔ Izràɛl-dùkɔ̃ bliboa kãkã ɖo ètowo ji, sìgbè àlɛ̃ha kè mu ɖo kplɔ̀tɔ ò a nène[32]. Eye Tɔhonɔ̀ gblɔ̃ be: 'Kplɔ̀tɔ mu gbà lè, la kplɔ̀ wo ò. Àmè sia àmè ne trɔ yì yebe àxomè, lè ŋuti fàfa mè.'”

¹⁷Izràɛl be èfìɔa gblɔ̃ na Yòsafat be: “Nyè mu gblɔ̃ na wò be 'Mu gblɔ̃nà ènyà nyuɛ̃ ɖe so ŋuti nyè gbèɖe ò, vɔ̀a, èvuɛ̃ kpò ye ò a?'”

¹⁸Mikà gblɔ̃ be: “Ekèa ŋutia, ɖo èto Tɔhonɔ̀ be ègbè. Mù kpɔ Tɔhonɔ̀, e nɔ̀ ànyi ɖo yebe èfìɔzìkpe ji, eye jiŋùkusi be àhùakɔ̃ bliboa lètè ɖo yebe ɖùsi ku èmìɔ̃ mè.

¹⁹Eye Tɔhonɔ̀ gblɔ̃ be: 'Àmè kɛ ye la yì flù Àkab, Izràɛl be èfìɔa, ne bèa yì ɖè àhùa kpe na Ramɔ̀t, lè Gilead-nyigbã ji, àleke be ne ku ò?' Àmè ɖe ɖo e ŋuti ɖo èɖe, àmè bu ɖo e ŋuti ɖo èbu.'

²⁰Vɔ̀a, gbɔ̃gbɔ̃ ɖe va Tɔhonɔ̀ be ŋùkɔ̀, eye be gblɔ̃ be: 'Ènyè ye la flù ì. Eye Tɔhonɔ̀ biɔ gbɔ̃gbɔ̃a sè be: 'Leke ye wò la wɔ̀ ɛ̀ ɖo ò?'

²¹Gbɔ̃gbɔ̃ a ɖo e ŋuti be: 'Mù la yì, eye mù la nyi àjèɖàɖa be gbɔ̃gbɔ̃, lè ènu mè na yebe gblɔ̃ɖɛtɔawo keŋu.' Tɔhonɔ̀ ɖo e ŋuti na ɛ̀ be: 'Wò teŋu yì flù ì nyàwo. Yì, ne wòa wɔ̀ nènea.'

²²Ekèa ŋutia, ne Tɔhonɔ̀ ŋutɔ sɔ àjèɖàɖa be gbɔ̃gbɔ̃ ɖo àpo gblɔ̃ɖɛtɔwo be ènu mèa, eŋuã, Tɔhonɔ̀ ŋutɔ ye ɖo gbledo ɖo ŋuti wò.'”

²³Ekèa yomè a, Sedekìa, Kènanà be èvia dɔ̃ gogo Mikà, gbã ètomè na ɛ̀, eye be gblɔ̃ be: “Fikɛ ye Tɔhonɔ̀ be gbɔ̃gbɔ̃a jo lè gbɔ nyè, va pò nupo ku èwò ya lè ò?

²⁴Mikà ɖo e ŋuti be: “E nyɔ! Wò la kpɔ ɛ̀, gbè kè gbè wò la nɔ to lè èxɔ̀ ɖe mè, yì èxɔ̀ bu mè, la yì nɔ wlaa!”

²⁵Izràɛl be èfìɔa gblɔ̃ be: “Mì le Mikà, mì kplɔ̀ ɛ̀ trɔ yì na Amɔ̀n, èdùa ji kpɔtɔa ku Yòas, èfìɔvia,

²⁶eye mì gblɔ̃ na wo be: “Èfìɔ gblɔ̃ be: 'Mì sɔ ŋusù kèa do ègà. Mì la nɔ nyì ì ku kpɔ̃nɔ viɖe kudo èsì viɖe kpò, kaka na gà kè mè, mù la trɔ gbɔ̀, lè ŋuti fàfa mèa.'”

²⁷Mikà gblɔ̃ be: “Ne wò trɔ gbɔ̀ nyàwo, lè ŋuti fàfa mèa, eŋuã, mu nyi Tɔhonɔ̀ ye pò nupo to ji nyè ò[33].” E gbà gblɔ̃ be: “Mìa kpata, mì ɖo èto, ne mìa sè ènyà kè mù gblɔ̃a!”

²⁸Izràɛl be èfìɔa ku Yòsafat, Yudà-nyigbã ji be èfìɔa yì ɖè àhùa kpe na Ramɔ̀t be èdùmètɔwo lè Gilead-nyigbã ji.

²⁹Izràɛl be èfìɔa gblɔ̃ na Yòsafat be: “Mù la ɖɔ̀lì àwù[34], eye mù la ɖo àhùaa mè. Vɔ̀a, èwò yaa, do àwù wòa. “Izràɛl be èfìɔa do àwù bu, eye be ɖo àhùaa mè.

³⁰Vɔ̀a, Aràm be èfìɔa ɖè ègbè na yebe àhùaga kèwo ye kplɔ̀nà àhùakèkewoa be: “Mì mu gbà kpe àkɔ ku àmè vi loo, àlo àmè gã ò. Mì kpe àkɔ ku Izràɛl be èfìɔa ŋutɔ ɖèɖe kpò!”

³¹Eye, ekè àhùakèke kùtɔwo kè ɖo Yòsafat ŋutia, wo gblɔ̃ be: “E ye nyi Izràɛl be èfìɔa!” Wo trɔ do è, ne woa kpe àkɔ ku ì, vɔ̀a, kè Yòsafat do àpaa, Tɔhonɔ̀ hlùɛ̃ ɛ̀ gã, eye Mawu trɔ wo jo lè e gbɔ.

³²Ɖoa, ekè àhùakèke kùtɔwo be ŋùkɔ̀nɔ̀tɔa kpɔ be mu nyi e ye nyi Izràɛl be èfìɔ ò a, wo trɔ lè e yomè.

³³Gãkea, àmè ɖe dà àŋùti kpò, ɖoɖa àmèawo dòmè, eye àŋùtia yì lɔ Izràɛl be èfìɔa, to yebe ègà-wùa be cape ɖe. Èfìɔa to na yebe àhùakèke kùtɔa be: “Trɔ, ne wòa kplɔ̀ mù jo lè àhùagbea ji, ɖoa, mù xɔ̀ àbì.”

³⁴Àhùaa sɛ̃ŋu gbè ŋua gbè kaka, Izràɛl be èfìɔa nɔ̀ ètènu lè yebe àhùakèkea mè, kpã ŋùkɔ̀ Aràmviwo kaka va sɛ̃ wètrɔ mè. Eye ekè èwè ɖo èxɔ̀a, èfìɔa ku.