Read gen 2Kronikà 19 Bible Online

2Kronikà 19 - gen bible

2Kronikà 19

¹Ekè Yòsafat, Yudà be èfìɔa trɔ yì yebe èfìɔsa mè, lè Yèruzàlɛm, lè ŋuti fàfa mèa,

²Yehù, Hananì be èvi, ènu mè kpɔtɔa to va dogò è. E gblɔ̃ na èfìɔ Yòsafat be: “Àmè kpòtoe ŋuti ye wò yì kpe ɖoa? Eye àmè kèwo crì Tɔhonɔ̀a ye wò lɔ̃nàa? Ekèa ŋutia, Tɔhonɔ̀ be àdɔ̀mèze lè ji wò.

³Gãkea, ènu nyuɛ̃ wɔ̀wɔ lè èwò mè, ɖoa, wò ɖè Aserà be èkpeliwo jo lè èdùa mè, eye wò likè èjì wò, sɔ ji Mawu.”

⁴Yòsafat nɔ̀ Yèruzàlɛm. E gbà va to yì dùkɔ̃a mè, so Beɛr-Seba, kaka yì Efràyim be ètowo ji, eye be na dùkɔ̃a trɔ va Tɔhonɔ̀, woa tɔgbewo be Mawu a gbɔ.

⁵E ɖo kòjoɖotɔwo ɖo ànyigbãa keŋu ji, ɖo àgbògbò-dùwo keŋu mè, lè Yudà-nyigbã be èdù sia èdù mè.

⁶E gblɔ̃ na kòjoɖotɔawo be: “Mì lebè na ènu kè mì le ji la wɔ̀a nyuɛ̃ ɖe, ɖoa, mu nyi àgbètɔ ye mì la wɔ̀ ɛ̀ na ò, Tɔhonɔ̀ kè lè ku mì, wè sia wè kè mì gbe le sò kòjo kpòa ye.

⁷Fifìa, Tɔhonɔ̀ be vɔ̃vɔ̃ ne nɔ̀ mìa mè. Mì ɖo kòjo ku àdòdò, ɖoa, lè Tɔhonɔ̀, miabe Mawu a gbɔa, màjɔ̀ màjɔ mu lè ò. Àmè ji dɔ̃dɔ̃ mu lè ò, eye èzãnu ɖùɖu cã mu lè ò.”

⁸Lè Yèruzàlɛm cã a, Yòsafat ɖo Levì ɖewo ku hũbonɔ ɖewo bɔ̀ ɖo Izràɛlviwo be xòmèga ɖewo ŋuti, ne woa nɔ ɖo kòjo, sɔ zɔ̃ ɖo Tɔhonɔ̀ be èsewo ji, sɔ nɔ fa àjrè be ènyàwo lè Yèruzàlɛm.

⁹E do èse kèa na wo be: “Mì ɖo la wɔ̀ ànùkua ku mìabe èjì blibo, lè Tɔhonɔ̀ be vɔ̃vɔ̃ mè.

¹⁰Lè ènyà ɖekpekpe kè mìa nɔ̀vi kèwo lè èdùawo mèa, la sɔ va ɖo ŋùmè na mìa mèa, e teŋu nyi èhlɔ̃dãdã be ènyà, àlo, èse fiɔfiɔ be ènyà ɖe, e teŋu nyi ègbè doàsiwo, ɖoɖo àlo èkɔ̀ dodo ji wɔ̀wɔa, mì fiɔ wo ènu, ne wo mu gbà wɔ̀ èvuɛ̃ ɖo Tɔhonɔ̀ ŋuti, ne yebe àdɔ̀mèze ne jè mìa ku mìa nɔ̀viwo ji ò.

¹¹Kpɔɖa, Àmarìa, hũbonɔ gãa la nɔ̀ mìa nu, na ènyà kèwo ye kã Tɔhonɔ̀a, eye Yudà be àxuea be ŋùkɔ̀nɔ̀tɔ Zebadìa, Ismàɛl be èvia la nɔ̀ mìa nu, na ènyà kèwo kã èfìɔa. Levìwo la nɔ̀ mìa nu sìgbè ènuŋlɔ̀tɔwo nène. Mì dojì, eye Tɔhonɔ̀ ne nɔ̀ ku àmè kè la wɔ̀ ènyuɛ̃a.”