Read gen 2Kronikà 20 Bible Online

2Kronikà 20 - gen bible

2Kronikà 20

¹Ekèa yomè a, Mòabviwo ku Amɔ̀nviwo kplɔ̀ Mɛunìviwo[35] ɖo ŋuti, va wɔ̀ àhùa ku Yòsafat.

²Àmèwo va gblɔ̃ na Yòsafat be: “Àhùakɔ̃ gã ɖe so Edɔ̀m, lè àpùa godo gbãnà, la va wɔ̀ àhùa ku wò. E va ɖo Hasasɔ̀n-Tamàr kè nyi Ein-Gedid vɔ̀.”

³Vɔ̃vɔ̃ ɖo Yòsafat, eye be trɔ jè ŋùkɔ̀ Tɔhonɔ̀. E na wo ɖo ènubabla lè Yudà-nyigbã keŋu ji.

⁴Yudà dùkɔ̃a keŋu bɔ̀, eye wo blìbɔ̀ na Tɔhonɔ̀. Àmèwo so èdùwo keŋu mè, lè Yudà-nyigbã ji va biɔ Tɔhonɔ̀ be àlɔ̀do.

⁵Yòsafat nɔ̀tè lè Yudà ku Yèruzàlɛm be èhabɔ̀bɔa mè, lè Tɔhonɔ̀ be àxuea mè, jè ŋùkɔ̀ èkpa yeyea.

⁶Eye be gblɔ̃ be: “Tɔhonɔ̀, mia tɔgbewo be Mawu, mu nyi èwò ye nyi Mawu kè lè jiŋùkusi, kè ɖùfìɔ ɖo èfìɔduwo keŋu ji ò a? Àpo àlɔ̀ mè ye ŋusɛ̃ ku hɔ̃hlɔ̃ lè, eye àmè ɖekpe mu la teŋu nɔ̀tè ɖo ŋùkɔ̀ na wò ò.

⁷Mu nyi èwò, miabe Mawu ye nyà ànyigbã kèa jitɔwo lè àpo dùkɔ̃, Izràɛl be ŋùkɔ̀, eye wò sɔ ɛ̀ na èxlɔ̃ wò Abràham[36] be jìjimèviwo ò a?

⁸Wo nɔ̀ ànyigbã kèa ji, eye wo tù kɔ̀kɔ̀ɛpe ɖo e ji na wò, sɔ kafu àpo nyikɔ gblɔ̃ be:

⁹'Ne gbledo ɖe jɔ̀ ɖo mia ji, ètodɔ̃ be èwui, èdɔ̀vuɛ̃, àlo àdɔ̀wùamè a, mi la nɔ̀tè ɖo àpo ŋùmè, lè Mawuxɔ kèa, kè ŋuti nyikɔ wò lèa mè, eye mi la fã yɔ wò, lè miabe àkpɔ̃a mè, eye wò la sè miabe àpa[37], eye wò la hlùɛ̃ mi gã.'

¹⁰Vɔ̀ fifìa, kpɔɖa, Amɔ̀nviwo ku Mòabviwo kudo àmè kèwo lè Seyir-Towo ji, ekèwo dòmè, wo mu ɖè èmɔ na Izràɛlviwo be wo ne to, wàlɛbɛ kè wo so Ejiptè-nyigbã jia ò a, vɔ̀ bòhũa, Izràɛlviwo zɛ̃ to àfi bu[38], eye wo mu crɔ̃ ò.

¹¹Fifìa, ne woa sɔ do àkpe na mia, àmè kèawo va, la nyà mi jo lè ècrɔ̃-nyigbã kè wò sɔ na mia ji.

¹²Aò Mawu, miabe Mawu, wò mu la dohùɛ do wo òa? Ɖoa, ŋusɛ̃ ɖekpe mu lè mia si, ne mia sɔ kpã ŋùkɔ̀ àhùakɔ̃ gã kèa, kè ɖè àhùa kpe na mia ò. Mi mu nya ènu kè mi la wɔ̀, tovò na miabe ŋùku kè lè ji wòa ò!”

¹³Yudà be dùkɔ̃wo keŋu lètè lè Tɔhonɔ̀ be ŋùkɔ̀, ku woabe xòmèwo, nyɔ̃nùwo ku ɖèviwo.

¹⁴Wàlɛbɛ ŋua, Tɔhonɔ̀ be gbɔ̃gbɔ̃ jè Yahazìɛl, Zakarìa be èvi ji. Zakarìa ŋutɔ nyi Benayà kè Yeìɛl jia be èvi. Yeìɛl nyi Mataneyà, Levì kè so Àsaf be jìjimèviwo dòmèa be èvi.

¹⁵Yahazìɛl gblɔ̃ be: “Mìa Yudàviwo kpata, mì ɖo èto! Mìa Yèruzàlɛm be dùmèviwo ku èfìɔ Yòsafat! Tɔhonɔ̀ le gblɔ̃ na mì be: 'Mì mu gbà vɔ̃ ò, eye àhùakɔ̃ gbogbo kèa mu gbà sò àdìka na mì ò! Ɖoa, àhùa kèa, mu nyi mìa tɔ̀ ò, vɔ̀a, Mawu tɔ̀ ye be nyi!

¹⁶Èsɔ̀a, mì la ɖì yì kpã ŋùkɔ̀ wo. Kpɔɖa, wo le lia flawà be èkpoa. Mì la kè ɖo woa ŋuti lè bàlìa be vɔ̀vɔnu, lè Yeruɛl be zògbè a be ŋùkɔ̀.

¹⁷Mì mu la tɔ àhùaa ji ŋutɔ cã ò! Vɔ̀a, mì sitè, mì tɔtè goŋu-goŋu, ne mìa kpɔ lekè Tɔhonɔ̀ la xɔ̀ na mìa ɖa. Yudàviwo ku Yèruzàlɛmviwo, mì mu gbà vɔ̃ ò, àdìka mu gbà sò mì ò, eye vɔ̃vɔ̃ cã mu gbà ɖo mì ò![39] Èsɔ̀a, mìa to yì kpã ŋùkɔ̀ wo. Tɔhonɔ̀ la nɔ̀ ku mì.'”

¹⁸Eye Yòsafat bɔ̀bɔ̀ cɔ̃ ŋùmè ànyi, eye Izràɛlviwo ku Yudàviwo kpata cɔ̃ ŋùmè ànyi lè Tɔhonɔ̀ be ŋùkɔ̀, eye wo sɛ̃ Tɔhonɔ̀.

¹⁹Levì kèwo nyi Kehàtviwo ku Koràviwo sitè, eye wo kafu Tɔhonɔ̀, Izràɛl be Mawu a ku ègbè sɛ̃sɛ̃ ɖe.

²⁰Dùkɔ̃a fɔ̃zã, jè èmɔ tùtà Tekoa be zògbè a ji. Ekè wo le joa, Yòsafat tɔtè, gblɔ̃ be: “Yudàviwo ku Yèruzàlɛmviwo, mì ɖo èto mù! Mì dojì ɖo Tɔhonɔ̀, mìabe Mawu a ŋuti, ne mìa likè. Mì dojì ɖo yebe gblɔ̃ɖɛtɔwo ŋuti, ne mìa ɖùji!”

²¹Ekè be ɖè àɖàŋù ku dùkɔ̃a vɔ̀a, Yòsafat cã àmèwo, ne woa nɔ jì èhà na Mawu, eye woa nɔ mlã yebe gã nyinyi, lè ŋùkɔ̀ na àhùakɔ̃a, la nɔ gblɔ̃ be: “Mì do àkpe na Tɔhonɔ̀, ɖoa, yebe ànùkua wɔ̀wɔ lè tɛ̀gbɛ̀!”

²²Wàlɛbɛ kè wo tɔ jìjɔɛ kpɔkpɔ ku kàfù kafu be èhàwo jìjia, Tɔhonɔ̀ sɔ tìtɔ̀ titɔ ɖo Amɔ̀nviwo ku Mòabviwo kudo àmè kèwo so Sèyir be èto ji va cɔ̃ Yudà-nyigbã jiawo dòmè, eye wo crɔ̃ wo.

²³Amɔ̀nviwo sitè ɖo àmè kèwo so Seyir-To jiawo ŋuti, eye wo crɔ̃ wo. Ekè wo crɔ̃ Seyirtɔwo vɔ̀a, woa ŋutɔwo wù woa nɔ̀nɔwo.

²⁴Kè Yudàviwo ɖo èkpo kè ji wo la teŋu kpɔ zògbè a ji lèa, wo trɔ jè ŋùkɔ̀ àhùakɔ̃ gã ŋua, vɔ̀a, kpɔɖa, àmèkukuwo kpò ye ɖɔ ànyigbãa, eye àmè ɖekpe mu ci àgbè, lè woa dòmè ò.

²⁵Yòsafat ku àmèha kè lè e ŋutia va hlà àmèkukuawo be ènuwo, eye wo kpɔ[40] ènuzãzã sùgbɔ, àdɔ̀kùnuwo, àwùwo ku ènu xɔ̀asìwo. Wo hlà ènu sùgbɔ wu ekè wo la teŋu fɔ̀ joa, àleke be wo sɔ ŋùkèkè ètɔ̃, sɔ lɔ wo, ɖoa, ènuawo sùgbɔ ŋutɔ.

²⁶Ŋùkèkè ènègɔ̃a gbèa, wo va bɔ̀ lè sìtu be bàlìa mè, ɖo funua, wo kafu Tɔhonɔ̀, eye wo tusì na ɛ̀, eye wo ɖo nyikɔ na tèpea be 'Sìtu be bàlìa' mè, kaka va na egbè.

²⁷Ekèa yomè a, Yudàviwo ku Yèruzàlɛmviwo keŋu trɔ gbɔ̀ va Yèruzàlɛm lè jìjɔɛ mè, ɖoa, Tɔhonɔ̀ na wo kpɔ jiɖùɖu ɖo kɛ̃tɔwo ji, eye Yòsafat lè woa nu.

²⁸Wo ɖo Yèruzàlɛm be èdùa mè ku èkà-sãŋùguwo, sãŋùguwo ku èzèwo, eye wo yì Tɔhonɔ̀ be Mawuxɔa mè.

²⁹Mawu be vɔ̃vɔ̃ jè ànyigbã ji be èfìɔduwo keŋu ji, wàlɛbɛ kè wo sè àlekè Tɔhonɔ̀ wɔ̀ àhùa ku Izràɛlviwo be kɛ̃tɔwo ɖoa.

³⁰Ekèa yomè a, Yòsafat be èfìɔɖùpea nɔ̀ ŋuti fàfa mè, ɖoa, yebe Mawu na ɛ̀ jɛ̃gbɔ̃gbɔ̃ lè àgo sia àgo ji.

³¹Nène a ye Yòsafat, Asà be èvia ɖùfìɔ lè Yudà-nyigbã jia yeŋu. E ɖo èpè ègbã vɔ àtɔ̃, gà kè mè wo ɖo è èfìɔa. E ɖùfìɔ èpè èwì vɔ àtɔ̃ lè Yèruzàlɛm. Ènɔa be nyikɔ ye nyi Àzubà, Silhì be èvi.

³²E zɔ̃ ɖo ètɔa, Asà be àfɔ̀ ji, eye mu trã èmɔ ò. E wɔ̀ ènu kè jɔ̀ a lè Tɔhonɔ̀ be ŋùmè.

³³Gãkea, vòduwo be sɛ̃pe lè ètowo ji mu gũ ò, eye dùkɔ̃a mu kpɔ sɔ yebe èjì blibo na woa tɔgbewo be Mawu a hàɖe ò.

³⁴Yòsafat be wɔ̀na kpɔ̀tɛawo, so ŋùkɔ̀gbe tɔ̀awo ji, va jè ŋùgbesi tɔ̀awo jia, kpɔɖa, wo ŋlɔ̀ wo ɖo Yehù, Hananì be èvia be èdɔwɔ̀wɔ kèwo ye wo sɔ do Izràɛl be èfìɔwo be xoma mèa mè.

³⁵Ekèa yomè a, Yudà-nyigbã be èfìɔ, Yòsafat va le do èha ku Àhazìa, Izràɛl be èfìɔ kè wɔ̀nà ènu kpòtoea.

³⁶E ɖùzò ku ì, be yèwoa kpà ètɔ̀jihũ gã kèwo ye la nɔ yì Tarsìs be èdù mèa[41]. Wo wɔ̀nà èhũawo lè Eziyɔ̀n-Gebɛr.

³⁷Eliezɛr, Dodavàhu kè so Maresàa, be èvi gblɔ̃ ènyà ɖɛ so Yòsafat ŋuti be: “Ekè wò ɖùzò ku Ahazìa a, Tɔhonɔ̀ la gble èdɔwɔ̀na wòwo mè.” Eye ètɔ̀jihũawo gbã, eye wo mu teŋu ɖo Tarsìs ò.