Read gen 2Kronikà 21 Bible Online

2Kronikà 21 - gen bible

2Kronikà 21

¹Yòsafat yì èyɔ̀ mè, lè tɔgbeawo gbɔ, eye wo sɔ ɛ̀ mlɔ̃ tɔgbeawo gbɔ lè David be èdùa mè. Èvia, Yòram ɖùfìɔ ɖo e tèpe.

²Yòram be nɔ̀vi ŋusùwo, Yòsafat be èviwo ye nyi: Àzarìa, Yerìɛl, Zakarìa, Àzarìa, Mikàɛl ku Sefatìa. Woa kpata wo nyi Yòsafat, Izràɛl be èfìɔa be èviwo.

³Woa tɔ na wo ènu sùgbɔ: klòsalò, sìka, ènu xɔ̀asìwo ku àgbògbò be èdùwo lè Yudà-nyigbã ji, vɔ̀a, e sɔ èfìɔdua do àsi na Yòram, ɖoa, Yòram ye nyi àmègãxoa.

⁴Ekè Yòram likè ye ɖokoe ɖo ètɔa be èfìɔdua nua, e sɔ èwui wù nɔ̀via ŋusùwo keŋu ku Izràɛl bè èfìɔvi ɖewo.

⁵Yòram ɖo èpè ègbã vɔ èvè, gà kè mè be trɔ zũ èfìɔa. E ɖùfìɔ èpè ènyi, lè Yèruzàlɛm.

⁶E zɔ̃ to Izràɛl be èfìɔwo be àfɔ̀tope[42] sìgbè àlekè Àkab be xòmètɔwo zɔ̃a nène, ɖoa, e ɖè Àkab be nyɔ̃nùvi, eye be wɔ̀ ènu kè nyi èvuɛ̃a lè Tɔhonɔ̀ be ŋùmè.

⁷Gãkea, Tɔhonɔ̀ mu jro be yèa crɔ̃ David be jìjimèviwo ò, sɔ kù ɖo èzò kè be ɖù ku David, eye be gblɔ̃ na ɛ̀ be yè la sɔ kakati do àsi na David ku yebe jìjimèviwo, kaka sɔ yìa ŋuti.

⁸Lè Yòram be hùenua, Edɔ̀m-nyigbã jitɔwo jè àgla ɖo Yudà be èfìɔa ŋuti, eye woa ŋutɔwo cã èfìɔ na woa ɖokoe.

⁹Eye Yòram ku yebe àhùagawo jè èmɔ kudo yebe àhùakèkewo keŋu. Wàlɛbɛ kè Edɔ̀mtɔwo trɔ do ye ku yebe àhùagawo, Yòram fɔ̃zã, eye be ɖù Edɔ̀mtɔwo ji.

¹⁰Kaka va na egbèa, Edɔ̀m gbà jè àgla kòkòkò ɖo Yudà-nyigbã be jiɖùɖua ŋuti, ɖoa, Yudà be èfìɔa trɔ ŋùgbe do Tɔhonɔ̀.

¹¹Èfìɔa ɖo vòdu sɛ̃pewo ɖo Yudà be ètowo ji, eye be na Yèruzàlɛmtɔwo wɔ̀ àhasì, eye Yudàviwo nɔ àgbè kpòtoe.

¹²Yòram xɔ̀ xoma ɖe so gblɔ̃ɖɛtɔ Eli gbɔ. Xoma a le gblɔ̃ be: “Tɔhonɔ̀, tɔgbe wò, David be Mawu a gblɔ̃ be: Ekè wò mu zɔ̃ to ètɔ wò Yòsafat ku Asà, Yudà be èfìɔa be àfɔ̀tope ò a,

¹³vɔ̀ bòhũa, wò to Izràɛl be èfìɔwo be àfɔ̀topewo, eye wò na Yudàviwo ku Yèruzàlɛmtɔwo wɔ̀ àhasì, sìgbè lekè Àkab be xòmèwo wɔ̀ na ɛ̀a nène, eye wò gbà crɔ̃ nɔ̀vi wò ŋusùwo, ètɔ wò be jìjimèvi kèwo ye wɔ̀ àmè wu wòa ŋutɔ cã a,

¹⁴kpɔɖa fifìa, Tɔhonɔ̀ la hɛ̃ èfũ do na àmè gã ɖe va dùkɔ̃ wòa, èvi wòwo, èsrɔ̃ wòwo ku àpo àdɔ̀kùnuwo kpata ji.

¹⁵Wò ŋutɔ yaa, wo la jè èdɔ̀. Wò la le àdɔ̀mè-dɔ̀ sɛ̃sɛ̃ ɖe, kè la na be àdɔ̀gbo wòwo la to jè xixenu, eye be la nɔ nyrã ɖo e ji gbè sia gbè.”

¹⁶Eye Tɔhonɔ̀ ɖè Filistìtɔwo ku Arabìatɔ kèwo gogo Kusìtɔwoa be èvuɛ̃ ji na àmè, to ɖo Yòram ŋuti.

¹⁷Wo ɖè àhùa kpe na Yudàtɔwo. Wo va Yudà-nyigbã ji, eye wo hlà àdɔ̀kùnu kèwo ye lè èfìɔ be àxuea mèawo. Wo le èfìɔ be èviwo ku èsrɔ̃awo ŋutɔ cã, eye ŋusùvi ɖekpe mu kpɔ̀tɔ̀ na ɛ̀, tovò lè Yohakaz, ŋusùvi vifɛ̃tɔa ŋuti ò.

¹⁸Ènu kèawo keŋu yomè a, Tɔhonɔ̀ pò Yòram ku èdɔ̀ màdà gbèɖe ɖe kè le yebe àdɔ̀gbowo a.

¹⁹Èŋùwo le kè, èzãwo le do, eye, lè èpè èvè be nuwùwua, èdɔ̀lelea na be èfìɔa be àdɔ̀gbowo to, eye veve sèseawo na be èfìɔa ku. Yebe dùkɔ̃a mu sũ èzò, sɔ do bùbu e ŋuti, sìgbè lekè wo wɔ̀ ɛ̀ na tɔgbeawoa nène ò.

²⁰Yòram ɖo èpè ègbã vɔ èvè, wàlɛbɛ kè be trɔ zũ èfìɔa. E ɖùfìɔ èpè ènyi, lè Yèruzàlɛm. Ekè be trɔ ŋùgbea, èdùa mètɔwo mu sè veve ò. Wo ɖì ì lè David be èdùa mè, vɔ̀a, wo mu ɖì ì ɖo èfìɔwo be èyɔ̀do mè ò.