Read gen 2Kronikà 22 Bible Online

2Kronikà 22 - gen bible

2Kronikà 22

¹Yèruzàlɛmtɔwo sɔ Àkazìa, Yòram be ŋusùvi àdɔ̀mlɛ̃a ɖo èfìɔ, ɖo ètɔa tèpe. Ɖoa, àhùakɔ̃ kèwo so Arabìa va cɔ̃ àsàɖaa, wù fòfoawo kpata. Ekèa ŋuti Àkazìa, Yòram, Yudà be èfìɔa be èvia trɔ zũ èfìɔ ɖo.

²Àkazìa ɖo èpè èkà ci èvè, wàlɛbɛ kè be va àzìkpea jia. E ɖùfìɔ èpè ɖèka, lè Yèruzàlɛm. Ènɔa be nyikɔ ye nyi Àtalìa, Omrì tɔ̀ jìji.

³Ye cã zɔ̃ Àkab be xòmèwo be àfɔ̀tope, ɖoa, ènɔa do è ŋusɛ̃ lè èvuɛ̃ wɔ̀wɔ mè.

⁴Sìgbè Àkab be jìjimèviwo nènea, e wɔ̀ èvuɛ̃ lè Tɔhonɔ̀ be ŋùku mè, ɖoa, lè ètɔa be èku yomè a, Àkab be jìjimèviwo ye nyi yebe ètopòɖotɔwo, na ye ŋutɔ be cɔ̃crɔ̃.

⁵Woabe ètopòɖo ji Àkazìa ŋutɔ cã zɔ̃ ɖo, kplɔ̀ Izràɛlviwo be èfìɔ Yòram, Àkab be èvi do, yì wɔ̀ àhùa ku Hàzàɛl, Aràm be èfìɔa, lè Ramɔ̀t, lè Gilead-nyigbã ji. Aràmtɔwo do àbì Yoram ŋuti,

⁶eye be trɔ va Yizrɛ̀l-nyigbã ji, ne woa dà ègbe lè àbì kè be xɔ̀ lè Ramà, wàlɛbɛ kè be kpe àhùa ku Hàzàɛl, Aràm be èfìɔa ŋuti na ɛ̀. Wàlɛbɛ ŋua ye Àkazìa, Yudà be èfìɔ, Yòram be èvia va Yizreɛl, ne bèa kpɔ Àkab be èvi, Yòram kè jè àbì a.

⁷Mawu gbɔ ye Àkazìa be cɔ̃crɔ̃ so, wàlɛbɛ kè be yì ji Yòram kpɔa. Ekè be va ɖoa, ye kudo Yòram to, la yì dogò Yehù, Nimsì be èvi kè Tɔhonɔ̀ do àmì èta na, ne bèa crɔ̃ Àkab be xòmèa.

⁸Wàlɛbɛ kè Yehù le gblehùɛ do Àkab be xòmèa, e kè ɖo Yudà be èfìɔviwo ku Àkazìa be nɔ̀viwo be ŋusùvi kèwo wɔ̀nà èdɔ ku èfìɔa ŋuti, eye be wù wo.

⁹Ekèa yomè a, e na wo ji Àkazìa, eye wàlɛbɛ kè Àkazìa bè ɖo Samarìaa, wo le è va na Yehù, eye wo wù ì. Wo ɖì ì, ɖoa, wo gblɔ̃ be: “E nyi Yòsafat, àmè kè sɔ yebe èjì blibo ji Tɔhonɔ̀a be èvi.” Ekèa yomè a, àmè ɖekpe mu gbà kpɔ̀tɔ̀ lè Àkazìa be xòmèa mè, kè ɖo ŋusɛ̃ la ɖùfìɔ ò.

¹⁰Ekè Àtalìa, Àkazìa be ènɔ̀ kpɔ be yebe èvia kua, e sitè, eye be tɔ èfìɔ be xòmèa keŋu-keŋu cɔ̃crɔ̃, lè Yudà-nyigbã ji.

¹¹Gãkea, èfìɔ be nyɔ̃nùvi, Yehosebat fĩ Yòas, Àkazìa be èvia jo, lè èfìɔvi kèwo wo le ji, la wùawo dòmè. E kplɔ̀ èfìɔvia ku yebe ànɔnatɔa yì wla ɖo èxɔ̀dɔ̃me ɖe mè. Yehosebat nyi èfìɔ Yòram be nyɔ̃nùvi. Ekè Yehosebat fĩ Yòas yì wla do Àtalìaa, Àtalìa mu gbà teŋu wù ɖèvia ò.

¹²Ɖèvia bè ɖo Tɔhonɔ̀ be àxuea mè ku wo, èpè àdɛ̃, wàlɛbɛ kè Àtalìa le ɖùfìɔ lè Yudà-nyigbã jia.