Read gen 2Kronikà 23 Bible Online

2Kronikà 23 - gen bible

2Kronikà 23

¹Lè èpè adrɛ̃gɔ̃ a mèa, Yehoyada dojì, wɔ̀ ɖèka ku àmè èkà èvè takpo be àhùakɔ̃wo be ŋùkɔ̀nɔ̀tɔwo: Àzarìa, Yerohàm be èvia; Ismàɛl, Yohanàn be èvia; Àzarìa, Obɛd be èvia; Màseyà, Adayà be èvia; kudo Elisafàt, Zikrì be èvia.

²Wo ɖìsà to Yudà-nyigbã ji, eye wo bɔ̀ Levì kèwo lè Yudà be èdùwo keŋu mèawo, kpe ɖo Izràɛl be xòmèwo keŋu be ègawo ŋuti, eye, e yomè a, wo trɔ gbɔ̀ va Yèruzàlɛm.

³Àmèha bliboa ɖùzò ku èfìɔa, lè mawuxɔa mè. Eye Yehoyada gblɔ̃ na wo be: “Èfìɔ be èvia ye nyi ekèa. E ɖo la ɖùfìɔ, zɔ̃ ɖo ènyà kè Tɔhonɔ̀ gblɔ̃ so David be jìjimèviwo ŋutia ji.

⁴Ènu kè mì la wɔ̀a ye nyi ekèa: Mìabe mamã ètɔ̀gɔ̃a, hũbonɔwo ku Levì kèwo la xɔ̀ èdɔ na jɛ̃gbɔ̃zãa, mì la ɖia àgbɔ̀awo nu.

⁵Mamã ètɔ̃gɔ̃ bu la nɔ̀ èfìɔxuea mè, eye mamã ètɔ̃gɔ̃ kpɔ̀tɛa la nɔ̀ Yɛsɔd be àgboa nu. Àmèhaa keŋu la nɔ̀ Tɔhonɔ̀ be àxuea mè lè mawuxɔa nu.

⁶Àmè ɖekpe mu gbà ɖo Tɔhonɔ̀ be àxuea mè, tovò na hũbonɔwo ku Levì kèwo ye xɔ̀ èdɔawo ò. Woa yaa, wo teŋu ɖo è mè, ɖoa, wo kɔ̀ woa ŋuti. Vɔ̀a, àmèhaa la nyi Tɔhonɔ̀ be àmè ɖiatɔwo.

⁷Levìwo la trɔdo èfìɔa klòbòtò, eye àmè sia àmè la le yebe àhùawɔ̀nu ɖo àsi. Àmè ɖekpekpe kè la jro be yèa ɖo mawuxɔa mèa, wo la wù ì. Àfi sia àfi kè èfìɔa la yìa, mì la nɔ̀ e ŋuti.”

⁸Levìwo ku Yudà ŋusùwo keŋu wɔ̀ ɖo ènu kèwo keŋu Yehoyada, hũbonɔa gblɔ̃a ji tututu. Àmè sia àmè kplɔ̀ yebe àmèwo, àmè kèwo le xɔ̀ èdɔ lè jɛ̃gbɔ̃zã gbèawo ku àmè kèwo le to lè èdɔ mèawo, ɖoa, hũbonɔ Yehoyada mu ɖè àsi lè èhasòso kèwo xɔ̀ èdɔa ŋuti ò.

⁹Ekèa yomè a, e sɔ èfìɔ David be èhuã ku àkpoxɔ̀nu vòvòvò kèwo ye lè Mawu be àxuea mèawo do àsi na àmè èkà èvè takpo be àhùa ŋùkɔ̀nɔ̀tɔawo.

¹⁰E ɖo àmèha bliboa, àmè sia àmè ku yebe èhuã, so àxuea be ɖùsi mè, kaka sɔ yì èmìɔ̃ mè, lè àxuea be vɔsakpea gbɔ, àleke be woa pòxla èfìɔa.

¹¹Wo kplɔ̀ èfìɔ be èvia to, wo cɔ̃ jègbàa na ɛ̀, eye wo wɔ̀ èfìɔɖùɖu be jèsìwo na ɛ̀. Eye wo ɖo è èfìɔ. Yehoyada ku èviawo do àmì èta na ɛ̀, eye wo do àpa be “Èfìɔ ne nɔ̀ àgbè tɛ̀gbɛ̀!”.

¹²Ekè Àtalìa sè dùkɔ̃ kè nyà àpa va lè kafu èfìɔa be zigìdi a, e yì àmèhaa gbɔ, lè Tɔhonɔ̀ be àxuea mè.

¹³Ekè be kpɔ be èfìɔa lètè ɖo àgbà kè wo ɖo na ɛ̀a ji, lè sɔti ɖe gbɔ, lè èmɔa nu, eye àhùakplɔ̀tɔwo, èkpɛ̃kutɔwo, èhàjìtɔwo ku èhũpòtɔwo trɔ do è, wàlɛbɛ kè èdùa mètɔwo keŋu lè jìjɔɛ mè, eye wo le ku èzè, le jì èhà, èhũpòtɔwo le kplɔ̀ kàfù kafuawoa, Àtalìa zɛ̃ àwù lè ye ɖokoe ŋuti, eye be kpà àbòbo be “Èsebla! Èsebla!”

¹⁴Yehoyada, hũbonɔa, ɖe gbãdãgbã èkà èvè takpo be ŋùkɔ̀nɔ̀tɔ kèwo ye kpɔna àhùakɔ̃a jìawo to, eye be gblɔ̃ na wo be: “Mì ɖè è to lè àmèawo dòmè! Àmè ɖekpekpe àmè kè la kplɔ̀ ɛ̀ do a, la ku lè èwui nu!” Eye hũbonɔa gblɔ̃ be; “Mì mu la wù ì lè Tɔhonɔ̀ be àxuea mè ò.”

¹⁵Wo le Àtalìa, eye wàlɛbɛ kè wo to èsɔwo be àgboa nu, le ɖo èfìɔ be àxuea mèa, wo wù ì lè funua.

¹⁶Ekèa yomè a, Yehoyada ɖùzò ku dùkɔ̃a keŋu, kudo èfìɔa be, yèwoa nyi Tɔhonɔ̀ be dùkɔ̃.

¹⁷Dùkɔ̃a kpata zɔ̃ hòo yì vòdu Baal be vòdu-xɔa nu, eye wo gbã ɛ̀; wo kãkã yebe vɔsakpe ku yebe èkpetatawo, eye wo wù Matàn kè nyi Baal be hũnɔ̀a.

¹⁸Yehoyada sɔ Tɔhonɔ̀ be àxuea mè be èdɔwo do àsi na hũbonɔ kèwo nyi Levìwo, àmè kèwo David ɖo ɖo èhasòsòwo mè, ne woa nɔ wɔ̀ ènumème vɔsa na Tɔhonɔ̀, sɔ zɔ̃ ɖo Mosè be èsea ji, lè jìjɔɛ kpɔkpɔ ku èhàjìji mè, sìgbè lekè David ɖo è ɖɛa nène.

¹⁹E ɖo àgbònu ɖiatɔwo cã ɖo Tɔhonɔ̀ be àxuea be àgboawo nu, àleke be ènu màkɔ̀ màkɔ ɖekpe, le èmɔ dekpe nu mu gbà gɛ̃ ɖo e mè ò.

²⁰Ekèa yomè a, Yehoyada kplɔ̀ gbãdãgbã èkà èvè takpo be àhùakɔ̃ be ŋùkɔ̀nɔ̀tɔwo, àgbònùglawo, dùkɔ̃a kplɔ̀tɔwo, ku ànyigbã ji be dùkɔ̃awo keŋu, eye be kplɔ̀ èfìɔa ɖì so Tɔhonɔ̀ be àxuea mè. Wo to èfìɔsaa be àgbo kè lè èjia nu, ɖo èfìɔ-xuea mè, eye wo sɔ èfìɔa ɖo fìɔzìkpea ji.

²¹Ànyigbã a jitɔwo keŋu kpɔ jìjɔɛ. Eye èdùa mètɔwo nɔ̀ fàfa mè, ekè wo wù Àtalìa ku èwuia.