Read gen 2Kronikà 24 Bible Online

2Kronikà 24 - gen bible

2Kronikà 24

¹Yòas ɖo èpè adrɛ̃, wàlɛbɛ kè be va fìɔzìkpea jia. E ɖùfìɔ èpè èkà, lè Yèruzàlɛm. Ènɔa be nyikɔ ye nyi Sibìa,[43] so Beɛr-Seva.

²Yòas wɔ̀ ènu jɔ̀jɔɛ lè Tɔhonɔ̀ be ŋùmè, lè Yehoyada, hũbonɔa be àgbè mè ŋùkèkèwo keŋu mè.

³Yehoyada ɖè nyɔ̃nù èvè na Yòas, eye Yòas jì ŋusùvi ku nyɔ̃nùviwo.

⁴Ekèa yomè a, Yòas sɔ ɛ̀ ɖo ye ɖokoe ji be yèa gbìgbɔ̀ jrà Tɔhonɔ̀ be àxuea ɖo.

⁵E bɔ̀ hũbonɔwo ku Levìwo, eye be gblɔ̃ na wo be: “Mì yì Yudà-nyigbã be èdùwo mè, ne mìa jɔ̀ èpè mè gà kè Izràɛlviwo jɔ̀nàa, ne mìa sɔ jrà mìabe Mawu be àxuea ɖo. Mì ɖèbla wɔ̀ ɛ̀!” Vɔ̀a, Levìawo mu ɖèbla ò.

⁶Ekèa ŋutia, èfìɔa dɔ̃, wo yɔ hũbonɔ gã, Yehoyada va, eye be biɔ ɛ̀ sè be: “Nukɛ ŋuti wò mu tɛ ègbè ɖo e ji na Levìawo be wo ne hɛ̃ ètaci kè Mosè, Mawu be sumɔ̃via ku Izràɛlviwo be àmèhaa ɖo na zòɖùɖu be gòxɔa va kaba, so Yudà ku Yèruzàlɛm ò? [44]

⁷Ɖoa, Àtalìa bàɖà ŋua ku yebe èviwo gble Mawu be àxuea ɖɛ be gbã, eye wo zã Mawu be àxuea be ènu kɔ̀kɔ̀ɛawo kpata na Baal be vòduwo ŋutɔ cã.

⁸Ekèa ŋutia, èfìɔa ɖè ègbè be wo ne wɔ̀ àɖakà ɖe, ne woa sɔ ɛ̀ ɖo Tɔhonɔ̀ be àxuea be àgbo nu.

⁹Ekèa yomè a, wo na àmè sia àmè nya lè Yudà-nyigbã ji ku Yèruzàlɛm be wo ne hɛ̃ ètaci kè Mosè, Mawu be sumɔ̃via biɔ so Izràɛl be dùkɔ̃a si, lè zògbè a jia va na Tɔhonɔ̀.

¹⁰Ègawo keŋu ku dùkɔ̃ bliboa, hɛ̃ woabe ènu nana va ku jìjɔɛ, eye wo dà wo ɖo àɖakà a mè kaka be ɖɔ.

¹¹Ne wo kpɔ be ègà sùgbɔ lè àɖakà a mèa, Levìwo kɔkɔna ɛ̀ va fìɔna èdɔjikpɔtɔ kè èfìɔ ɖoawo. Èfìɔa be ènu ŋlɔ̀tɔ ku hũbonɔ gã be ènujikpɔtɔa ɖɔ̀lìnà ènu kè lè àɖakà a mèa kɔ̀ ɖɛ, eye wo gbà sɔna àɖakà a yì ɖona e tèpe. Wo wɔ̀ ekèa gbè sia gbè, eye wo kpɔ ègà sùgbɔ.

¹²Èfìɔa ku Yehoyada sɔ ègà a do àsi na àmè kè le kplɔ̀ èdɔ kèwo hiã lè Tɔhonɔ̀ be àxue a ŋuti a. Wo xɔ̀ èkpekpàtɔwo ku àtikpàtɔwo, ne woa jrà Tɔhonɔ̀ be àxue a ɖo. Wo gbà xɔ̀ ègàyìbɔ-dɔwɔ̀tɔwo ku ègàjɛ̃-dɔwɔ̀tɔwo ne woa jrà Tɔhonɔ̀ be àxuea ɖo.

¹³Èdɔa wɔ̀tɔwo pò èta ɖo èdɔa mè, eye èdɔa yì ŋùkɔ̀ lè woa si mè. Wo gbìgbɔ̀ tù Mawu be àxuea, zɔ̃ ɖo yebe nɔ̀nɔmè ji, eye wo na be sɛ̃ŋu kpe è.

¹⁴Ekè wo wu èdɔa nu vɔ̀a, wo sɔ ègà kpɔ̀tɛa va na èfìɔa ku Yehoyada. Wo sɔ ègà kèa wɔ̀ ènu zãzãwo ɖo Tɔhonɔ̀ be àxuea mè. Sùmɔ̀ sumɔ-dɔ ku ènumème vɔsa be ènuzãzãwo, èzewo, sìka ku klòsalò-nu zãzã buwo. Eye wo wɔ̀nà ènumème vɔsa na Tɔhonɔ̀ lè Yehoyada be àgbè mè ŋùkèkèwo kpata mè.

¹⁵Yehoyada va ku àmègã, eye àgbè tì ì, eye ekè be ɖo èpè èkà ètɔ̃ ci èwoa, e ku.

¹⁶Wo ɖì ì ɖo David be èdùa mè, lè èfìɔwo gbɔ, ɖoa, e wɔ̀ ènyuɛ̃ na Izràɛl be dùkɔ̃a, eye be wɔ̀ ènyuɛ̃ lè Mawu be ŋùmè, na Mawu be àxuea.

¹⁷Ekè Yehoyada ku vɔ̀a, Yudà be ègawo va jè èɖɛ̀ na èfìɔa, eye èfìɔa ɖo èto woabe ègbè.

¹⁸Wo gble Tɔhonɔ̀ Mawu, woa tɔgbewo be Mawu be àxuea ɖɛ, eye wo sɛ̃ Aserà be kpeliwo ku legbawo. Ekèa na be Mawu be àdɔ̀mèze jè Yudà ku Yèruzàlɛm ji, ɖo àgɔ̀jèje kèa ŋuti.

¹⁹Togbɔ be Tɔhonɔ̀ ɖo gblɔ̃ɖɛtɔwo ɖoɖa wo, ne woa kplɔ̀ wo gbɔ̀ va Tɔhonɔ̀ gbɔ cã a, Yudà-nyigbã jitɔwo ku Yèruzàlɛmtɔwo mu ɖo èto wo ò.

²⁰Eye Mawu be gbɔ̃gbɔ̃ jè Zakarìa, Yehoyada be èvi, hũbonɔa ji. E nɔ̀tè ɖo dùkɔ̃a be ŋùkɔ̀, eye be to na wo be: “Ènyà kè Mawu gblɔ̃a ye nyi ekèa: 'Nukɛ ŋuti ye mìawo yaa, mì le dà Tɔhonɔ̀ be èseawo ji ɖo, ne nyɔna ɖekpe mu gbà nɔ̀ mìa ji ò? Ekè mì gble Tɔhonɔ̀ ɖɛa, ye cã gble mì ɖɛ.'”

²¹Vɔ̀a, wo bla èse ɖo e ŋuti, eye wo zɔ̃ ɖo èfìɔa be ègbèɖèɖe ji, pò èkpe è wù, lè Tɔhonɔ̀ be àxuea be èkpa mè.

²²Èfìɔ Yòas mu ɖoŋù àdɔ̀mè nyuɛ̃ kè Zakarìa be ètɔ, Yehoyada wɔ̀ na ɛ̀a ò, eye be wù èvia. Ekè be la kua, Zakarìa gblɔ̃ be: “Tɔhonɔ̀ ŋutɔ ne kpɔ, ne bèa biɔ wò ènyà gɔ̃mè sè!”

²³Le èpè ɖèka yomè a, Aram be àhùakɔ̃a va ɖè àhùa kpe na Yòas. Wo va cɔ̃ Yudà ku Yèruzàlɛm-nyigbãwo ji, eye wo wù dùkɔ̃a be kplɔ̀tɔwo keŋu. Wo lɔ àmɔ̀nyɔ̀nuawo ɖoɖa Damaskò be èfìɔa.

²⁴Togbɔ be Aràmtɔwo be àhùakɔ̃a mu sùgbɔ ò cã a, Tɔhonɔ̀ ɖè Yudàviwo be àhùakɔ̃ gã ɖe do àsi na wo. Ekè, Yudàtɔwo trɔ ŋùgbe ɖo Tɔhonɔ̀, woa tɔgbewo be Mawu a, jɔ̀jɔɛwɔ̀wɔa jè Yòas ji.

²⁵Wàlɛbɛ kè Aràmviwo be àhùakɔ̃a joa, e gble Yòas ɖɛ ku àbì veve kèwo be xɔ̀a. Yebe àgbònùglawo bla èse ɖo e ŋuti, ɖoa, e wù Yehoyada, hũbonɔa be èviwo, eye wo wù ì ɖo yebe àba a ji. Ekè be kua, wo ɖì ì ɖo David be èdùa mè. Vɔ̀a, wo mu ɖì ì ɖo èfìɔwo be èyɔ̀do mè ò.

²⁶Àmè kèwo bla èse ɖo e ŋutiawo ye nyi: Zàbad, Simeat, Amɔ̀n nyɔ̃nùa be èvi, ku Yehozabad, Simri, Mòab nyɔ̃nùa be èvi.

²⁷Yòas be èviwo, yebe ŋutinyawo, ènyàgblɔ̃ɖɛ sùgbɔ kèwo ye so e ŋutiawo, ku Mawu be àxuea be jàjràɖo be ŋutinyawo keŋu lè ŋɔ̀ŋlɔ̃ ɖo èfìɔwo be ŋutinya xoma mè. Yòas be èvi, Amazìa ɖùfìɔ ɖo e tèpe.