Read gen 2Kronikà 25 Bible Online

2Kronikà 25 - gen bible

2Kronikà 25

¹Àmasìa ɖo èpè èwì vɔ àtɔ̃ wàlɛbɛ kè be xɔ̀ fìɔzìkpea, eye be ɖùfìɔ èpè èwì vɔ àsiɖèkɛ lè Yèruzàlɛm. Ènɔa tɔ̀ Yehoadìan, eye be nyi Yèruzàlɛmvi.

²E wɔ̀ ènu kè jɔ̀ a lè Tɔhonɔ̀ be ŋùku mè, vɔ̀a, mu wɔ̀ ɛ̀ ku èjì blibo ò.

³Ekè fìɔdua likè lè e si mè vɔ̀a, e wù àgbònùgla kèwo ye wù ètɔa, èfìɔa.

⁴Vɔ̀a, mu wù woabe èviwo ò, sɔ zɔ̃ ɖo ènu kè wo ŋlɔ̀ ɖo èsea mè, lè Mosè be xoma a mèa ji. Tɔhonɔ̀ do èse be: “Ètɔwo mu la ku ɖo èviwo tèpe ò, eye èviwo mu la ku ɖo ètɔwo tèpe ò. Vɔ̀a, àmè sia àmè la ku ɖo ye ŋutɔ be nuvuɛ̃wo ŋuti.”

⁵Àmasìa na Yudà-nyigbã bliboa jitɔwo wɔ̀ ɖèka. E ɖo àmè èkà èwì vɔ àtɔ̃ ku àmè èkà èvè takpowo be àhùa be ŋùkɔ̀nɔ̀tɔwo, sɔ zɔ̃ ɖo àxuedowo be ɖoɖo nu, na Yudà-nyigbã ku Bɛnyamìn-nyigbã bliboawo. E na, wo hlɛ̃ àmè kèwo ye ɖo èpè èwì ku e ji vɔwo, eye be kpɔ ŋusù kãlì àdodoe hotu àlɔ̀ ɖèka èkà ci èwo kèwo la teŋu yì àhùagbe ji, eye wo nya àkpoxɔ̀nu ku èhuã zãzãa.

⁶E yomè a, e sɔ klòsalò-gà, talɛ̃ŋutò èkà èvè takpo xɔ̀ àhùawɔ̀tɔ kãlìwɔ̀tɔ cãcã hotu èkà ci èwo, lè Izràɛl-nyigbãa ji.

⁷Vɔ̀a, Mawu be àmè ɖe va gblɔ̃ na èfìɔa be: “Aò, èfìɔ! Izràɛl be àhùakɔ̃a mu gbà kplɔ̀ wò do ò, ɖoa, Tɔhonɔ̀ mu lè ku Izràɛlvi, Efràyim be èvi ŋuawo keŋu ò!

⁸Ɖoa, ne wo yì ku wòa, èwò yaa, wò teŋu sɛ̃ŋu eye wò teŋu wɔ̀ kãlì, gãkea, Mawu la na, wò la ci kɛ̃tɔ wòwo si, ɖoa, Mawu ɖèka ye ɖo ŋusɛ̃ la xɔ̀ na àmè, àlo, la na woa crɔ̃.”

⁹Àmasìa gblɔ̃ na Mawu be àmèa be: “Vɔ̀a, klòsalò gà talɛ̃ŋutò èkà èvè takpo kè mù sɔ na Izràɛl be àhùakɔ̃a ya ɖe?” Mawu be àmèa ɖo e ŋuti na ɛ̀ be: “Tɔhonɔ̀ ɖo ènu la na wò, wu eŋuã!”

¹⁰Ekèa yomè a, Àmasìa ɖè àhùakɔ̃ kè so Efràyim-nyigbã ji vaa, eye be ɖo wo ɖoɖa àxue. Ekèa ve àdɔ̀mè na Izràɛl be àhùakɔ̃a ŋutɔ ɖo Yudà ŋuti, eye wo yì àxue ku àdɔ̀mèze.

¹¹Àmasìa ɖɔ ku ŋusɛ̃ eye be sɔ jìdo kplɔ̀ yebe àhùakɔ̃a, zɔ̃ ɖo èjè be bàlìa mè, eye be wù Seir be jìjimèviwo dòmètɔ hotu àtɔ̃.

¹²Yudàviwo gbà lè àmè hotu àtɔ̃ buwo àgbè àgbè. Wo kplɔ̀ wo yì àkpã ɖe tamè, eye wo tùtù wo ɖoɖa gɔ̃mè. Woawo keŋu kãkã, eye woa kpata wo ku.

¹³Vɔ̀a, gbãdãgbã kèwo Àmasìa mu lɔ̃ na be wo ne yì àhùa ku yè ò a, wo kãkã ɖo Yudà be èdùwo mè, so Sàmarìa kaka va Bɛt-Horɔ̀n. Wo wù àmè hotu ɖèka èkà èwì vɔ àtɔ̃, eye wo lɔ àmɔ̀nyɔ̀nu sùgbɔ.

¹⁴Ekè Àmasìa ɖù Edɔ̀mviwo ji vɔ̀, eye be trɔ gbɔ̀a, e hɛ̃ Seirviwo be legbawo gbɔ̀. E sɔ wo wɔ̀ yebe vòduwo, do èta gũ na wo, eye be tɔ èzò lifi na wo.

¹⁵Tɔhonɔ̀ do àdɔ̀mèze ɖo Àmasìa ŋuti, eye be dɔ̃ gblɔ̃ɖɛtɔ ɖe ɖoɖa ɛ̀ be: “Nukɛ ŋuti wò do bùbu dùkɔ̃ kèa be vòdu kèwo mu teŋu hlùɛ̃ woabe dùkɔ̃ gã, lè àsi wò mè ò a, ŋuti ò?”

¹⁶Àmasìa sò ènyà lè e nu, gblɔ̃ be: “Èwò ye wo sɔ ɖo èfìɔ be ètopòɖotɔa? Ne wò mu nɔ̀tè ènyà ŋua ò a, wò la xɔ̀ èba fifì jɛ̃!” Gblɔ̃ɖɛtɔa sò ènyàa nu, gblɔ̃ be: “Mù nya be Mawu ɖo è be yèa crɔ̃ wò, ekè wò wɔ̀ nène, eye wò gbe be yè mu la ɖo èto àpe ètopòɖo ò a.”

¹⁷Yudà be èfìɔ, Àmasìa ɖè àɖàŋù, eye be dɔ̃ àmè ɖoɖa Izràɛl be èfìɔ, Yòas, Yòakaz kè Yehù jìa be èvi, be: “Va, mia kpe àkɔ, sɔ wɔ̀ àhùa kpɔ!”

¹⁸Yòas, Izràɛl be èfìɔa dɔ̃ àmè, ne woa yì gblɔ̃ na Àmasìa, Yudà be èfìɔa be: “Libàn be àŋùja do àŋɛ̀ ɖoɖa Libàn be sedàti be: 'Sɔ nyɔ̃nùvi wò na èvi nyè ŋusù, bèa ɖè.” Vɔ̀a, Libàn be ègbemèlã ɖe va yì, eye be ɖo àfɔ̀ àŋùjaa ji.

¹⁹Wò le gblɔ̃ kòkòkò be, yè ɖù Edɔ̀mviwo ji, eye èjì wò le yigò, eye wò lè kɔkɔ ɖokoe wò yì ji. Gãkea, nɔ̀ àpo àxomè! Nukɛ ŋuti ye wò le ji la sɔ ɖokoe wò do gbledo be àhùa kè mè wò la crɔ̃ lè, eye Yudàviwo cã la crɔ̃ kplɔ̀ wò do lè ò ɖo ò?

²⁰Gãkea, Àmasìa mu jro la sè ènu ɖekpe gɔ̃mè ò, ɖoa, Mawu ye jro ekèa be yèa sɔ Àmasìa ku Yudàviwo do àsi na wo, ɖoa, wo sɛ̃ Edɔ̀m be vòduwo.

²¹Yòas, Izràɛl be èfìɔa jè èmɔ, eye ye ku Àmasìa, Yudà be èfìɔ, wo kpe àkɔ lè Bɛt-Semès, lè Yudà-nyigbã ji.

²²Izràɛlviwo ɖù Yudàviwo ji, eye woa kpata wo si yì woabe gòxɔwo mè.

²³Yòas, Izràɛl be èfìɔa le Àmasìa, Yudà be èfìɔ kè nyi Yòas, Yòakaz be èvia, lè Bɛt-Semès, eye be kplɔ̀ ɛ̀ va Yèruzàlɛm. E gbã Yèruzàlɛm be èglìa, so kaka Efràyim be àgboa nu, va ɖo koŋùji be àgboa gbɔ. Yebe dìdimè nyi àbɔglìgo èkà èwo.

²⁴E hlà sìka ku klòsalò, ènuzãzã kèwo keŋu ye lè Mawu be àxuea mè, eye Obɛd-Edɔ̀m kpɔna woa jiawo jo ku àdɔ̀kùnu kèwo ye lè èfìɔ-xomèa keŋu. E kplɔ̀ àhùalewo kpe ɖo woa ŋuti, eye be trɔ yì Sàmarìa.

²⁵Àmasìa, Yòas be èvi, Yudà be èfìɔa, gbà nɔ̀ àgbè, èpè woeàtɔ̃, ekè Yòas, Yòakaz be èvi, Izràɛl be èfìɔa ku vɔ̀a.

²⁶Àmasìa be ŋutinya kpɔ̀tɛawo, so cucugbãawo ji, va ɖo kpɔ̀tɛawo jia, wo ŋlɔ̀ wo ɖo Izràɛl ku Yudà be èfìɔwo be xoma mè,

²⁷so kaka hùe kè nu Àmasìa trɔ lè Tɔhonɔ̀ yomè a. Wo bla èse, doxa na ɛ̀ lè Yèruzàlɛm, eye be si yì Làkis. Wo dɔ̃ àmè kplɔ̀ ɛ̀ do, yì Làkis, eye wo wù ì.

²⁸Wo kɔ ɛ̀ ɖo èsɔwo ji gbɔ̀, eye wo ɖì ì ɖo tɔgbeawo gbɔ, lè Yudà be èdù ɖe mè.