Read gen 2Kronikà 26 Bible Online

2Kronikà 26 - gen bible

2Kronikà 26

¹Yudà dùkɔ̃ bliboa sɔ Uziyà, wàlɛbɛ kè be ɖo èpè woeàdɛ̃a ɖo èfìɔ ɖo ètɔa Àmasìa tèpe.

²E ye gbìgbɔ̀ Elàt be èdùa tù, eye be gbìgbɔ̀ trɔ ɛ̀ na Yudà-nyigbã, ekè èfìɔa trɔ jo yì èkuwode, lè tɔgbeawo gbɔa.

³Uziyà ɖo èpè woeàdɛ̃, wàlɛbɛ kè be va èfìɔzìkpea jia. E ɖùfìɔ èpè èkà ci woèvè lè Yèruzàlɛm. Ènɔa be nyikɔ ye nyi Yekilìa, so Yèruzàlɛm.

⁴E wɔ̀ ènu kè jɔ̀ lè Tɔhonɔ̀ be ŋùmè, sìgbè lekè ètɔa Àmasìa wɔ̀ ɛ̀a nène.

⁵E ji Mawu, lè àmè kè fiɔ ɛ̀ Mawu vɔ̃vɔ̃a be àgbènɔ̀nɔ hùenu, eye ènuwo keŋu jènà e ji na ɛ̀, wàlɛbɛ kèwo keŋu be jina Mawu a.

⁶E kpe àhùa ku Filistìtɔwo, eye be gbã Gat be èglìwo, Yabnè be èglìwo ku Asdɔ̀d be èglìwo. Ekèa yomè a, e gbìgbɔ̀ tù èdùwo ɖo Asdɔ̀d be ègowo ji, ku Filistìtɔwo dòmè.

⁷Mawu do è àlɔ̀, kpã ŋùkɔ̀ Filistìtɔwo, kpã ŋùkɔ̀ Arabìatɔ kèwo nɔ̀nà Gur-Baal, eye be gbà kpã ŋùkɔ̀ Mɛunìtɔwo[45].

⁸Amɔ̀n be jìjimèviwo hɛ̃nà ètaci vana na Uziyà, eye yebe nyikɔ ɖì, yì ɖo Ejiptè be lipòwo ji, ɖoa, e va ɖo ŋusɛ̃ ŋutɔ.

⁹Uziyà tù èmɔjikpɔxɔ̀wo ɖo Yèruzàlɛm, lè koŋù ji be àgboa nu, lè bàlì be àgboa nu, lè èglìa be koŋù ji, eye be na, wo sɛ̃ŋu.

¹⁰E gbà tù èmɔjikpɔxɔ̀wo ɖo zògbè a ji, eye be ɖè èsìdo sùgbɔ, ɖoa, èlãha sùgbɔ lè e si, lè bàlì kè lè ètowo gɔ̃mè-nyigbã jia ji ku lè ànyigbã gbàjàa ji. Àgblèdàtɔwo le dè yebe vɛ̃-gblewo, lè èkpoawo ji ku lè àtikusɛ̃sɛ̃-nyigbã[46] nyuɛ̃wo ji, ɖoa, e lɔ̃nà àgblèdàda.

¹¹Uziyà ɖo àhùawɔ̀tɔ kãlìwo lè mamã vòvòvòwo nu. Wo yìnà àhùa, sɔ zɔ̃ ɖo mamã ku ègbɔsùsu kè Yehìɛl, ènuŋlɔ̀tɔa ku Maaseyìa, àhùajikpɔtɔa ɖoa nu. Èfìɔa be èdɔjikpɔtɔ ɖèka, Hananìa ye kpà àcɛ̀ na wo.

¹²Xòmè-ga kèwo kpata ye lè ŋùkɔ̀ na àhùawɔ̀tɔ kãlì kèawoa lè àgbètɔ hotu ɖèka àlɔ̀ woeàdɛ̃.

¹³Wo kpà àcɛ̀ na àhùakɔ̃ kè be hɛ̃hlɛ̃ mè nyi gbãdãgbã àgbètɔ àkpe àlɔ̀ ètɔ̃ ci adrɛ̃ ku àlɔ̀ àtɔ̃ kèwo yì kpla àhùawɔ̀wɔ, eye wo nyi ŋusɛ̃tɔ kèwo lè èfìɔa ŋuti, ɖo kɛ̃tɔwo ŋutia.

¹⁴Uziyà wɔ̀ àkpoxɔ̀nuwo, èhuãwo, ègàkukuwo, ègàwùwo, àŋùdàtiwo ku rɔbàtu be èkpewo na àhùakɔ̃ bliboa.

¹⁵E na, àmè ɖè àɖàŋùwo, wɔ̀ èmɔwo ɖo èmɔjikpɔxɔ̀wo tamè ku koŋùwo tamè, lè Yèruzàlɛm, sɔ dànà àŋùtiwo, gbà sɔ mlìnà èkpe gãwo ɖo kɛ̃tɔwo be àhùakɔ̃wo ji. Uziyà be nyikɔ ɖìnyi, kaka yì dìdìpe, ɖoa, wo kpe ɖo e ŋuti, ŋùdãtɔ̀, kaka na wàlɛbɛ kè be ɖo ŋusɛ̃a.

¹⁶Vɔ̀a, kè Uziyà va kpɔ ŋusɛ̃a, ègòyiyi va ɖɔ yebe èjì, kaka va gble yebe àmètia. Mu gbà wɔ̀nà ànùkua na Tɔhonɔ̀, yebe Mawu ò, eye be ɖo Tɔhonɔ̀ be kuefãpea, yì tɔzò lifi lè ègbe hɔ̃ɛ titi vɔsakpea ji.

¹⁷Àzarìa, hũbonɔa jè e yomè, eye Tɔhonɔ̀ be hũbonɔ èkà èvè bu kèwo nyi ŋusùti kãlìwoa kplɔ̀ ɛ̀ do, ɖo e mè.

¹⁸Wo kpã ŋùkɔ̀ èfìɔ Uziyà, tɔ ɛ̀ ègbè be: “Mu nyi èwò Uziyà ye la tɔzò lifi na Tɔhonɔ̀ ò, vɔ̀ bòhũa, hũbonɔ kèwo nyi Arɔ̀n be jìjimèvi kèwo ŋuti wo kɔ̀[47] na lifi fiɔ̃fiɔ̃awo ye la tɔzòa. To lè Kɔ̀kɔ̀ɛpea, ɖoa, wò mu le wɔ̀ ànùkua ò, eye Tɔhonɔ̀ mu la do bùbu ènu kè wò le wɔ̀a ŋuti ò!”

¹⁹Uziyà bijì, wàlɛbɛ kè lififiɔ̃nua gbà lè e si, ne bèa tɔzò lifia. Eye, wàlɛbɛ kè be le do àdɔ̀mèze ɖo hũbonɔawoa ŋutia, e jè èkpò ɖo ŋùgonu zè ɖèka, lè hũbonɔawo be ŋùkɔ̀, lè Tɔhonɔ̀ be mawuxɔa mè, lè lifi be vɔsakpea be ŋùkɔ̀.

²⁰Ekè Àzarìa, hũbonɔ gãa ku hũbonɔ kpɔ̀tɛawo keŋu le ŋùku ɖo e ŋutia, kpɔɖa, èkpò ye be jè ɖo ŋùgonu! Ekèa ŋutia, wo nyà ɛ̀ to lè funua kaba, eye ye ŋutɔ ɖèbla to, ɖoa, Tɔhonɔ̀ pò è.

²¹Nène a ye èfìɔ Uziyà jè èkpò, kaka na yebe èku gbè. Kè e jè èkpòa, wo ɖè è ɖo àsà mè, lè àxue bu mè, sìgbè èkpònɔ̀wo nène, eye wo ɖè è ɖo àsà mè, jo lè Tɔhonɔ̀ be kuefãpea gbɔ. Èvia Yotam nɔ̀ èfìɔzìkpea ji, eye be kplɔ̀ woabe ànyigbã a be dùkɔ̃a.

²²Uziyà be èfìɔɖùɖu be ŋutinya kpɔ̀tɛawo, so cucugbãawo ji, sɔ yì kpɔ̀tɛawo jia, gblɔ̃ɖɛtɔ Esayà, Àmos be èvia ŋlɔ̀ wo ɖɛ.

²³Uziyà trɔ ŋùgbe, eye wo ɖì ì ɖo tɔgbeawo gbɔ, lè àgblè kè lè èfìɔwo be ɖìpe gbɔa mè, ɖoa, wo gblɔ̃ be: “E jè èkpò.” Èvia Yotam ɖùfìɔ ɖo e tèpe.