Read gen 2Kronikà 27 Bible Online

2Kronikà 27 - gen bible

2Kronikà 27

¹Yotam ɖo èpè èwì vɔ àtɔ̃, ekè be va èfìɔzìkpea jia. E ɖùfìɔ èpè woeàdɛ̃, lè Yèruzàlɛm. Ènɔa be nyikɔ ye nyi Yerusà. E nyi Sadɔk be nyɔ̃nùvi.

²Yotam wɔ̀ ènu kè jè a lè Tɔhonɔ̀ be ŋùmè tututu, sìgbè leke ètɔa Uziyà wɔ̀ ɛ̀a nène. Vɔ̀a, e ya mu ɖo Tɔhonɔ̀ be kuefãpe ò. Gãkea, dùkɔ̃a gbà kpɔ̀tɔ̀ le wɔ̀ ènu gbegble.

³Yotam gbìgbɔ̀ tù Tɔhonɔ̀ be kùefãpe be àgbo kè lè èjia. E gbà tù èxɔ̀wo ɖo Ofɛ̀l[48] be èkpa a ji, eye be kɔ ɛ̀ yì èji.[49]

⁴Yotam gbà sò èdùwo ɖo Yudà be ètowo ji, eye be tù àgbògbòwo ku èmɔjikpɔxɔ̀wo ɖo àveawo mè.

⁵Yotam kpe àhùa ku Amɔ̀nviwo be èfìɔa, eye be ɖù woa ji. Èpè ŋua mèa, Amɔ̀nviwo tu klòsalò kpɛ̃kpɛ̃ mè talɛ̃ŋutò èkà èvè takpo, èlù jijenu hotu àtɔ̃, èpò jijenu hotu àtɔ̃. Èfɛ̃ kèa ke Amɔ̀nviwo gbà tu lè èpè èvègɔ̃a ku ètɔ̃gɔ̃a cã mè.

⁶Yotam va kpɔ ŋusɛ̃, ɖoa, e likè yebe àzɔ̃lì lè Tɔhonɔ̀, yebe Mawu be ŋùmè.

⁷Yotam be èfìɔɖùɖu be ŋutinyà kpɔ̀tɛawoa, yebe àhùawɔ̀wɔwo ku yebe wɔ̀nawo keŋuã, wo ŋlɔ̀ wo ɖo Izràɛl be èfìɔwo ku Yudà be èfìɔwo be ŋutinyà xoma mè.

⁸E ɖo èpè èwì vɔ àtɔ̃, ekè be va èfìɔzìkpea jia. E ɖùfìɔ èpè woeàdɛ̃ lè Yèruzàlɛm.

⁹Yotam trɔ ŋùgbe, eye wo ɖì ì ɖo tɔgbeawo gbɔ, lè David be èdùa mè. Èvia Àkaz ɖùfìɔ ɖo e tèpe.