Read gen 2Kronikà 28 Bible Online

2Kronikà 28 - gen bible

2Kronikà 28

¹Àkaz ɖo èpè èwì, ekè be va èfìɔzìkpea jia. E ɖùfìɔ èpè woeàdɛ̃, lè Yèruzàlɛm. Mu wɔ̀ ènu kè jɔ̀ a lè Tɔhonɔ̀ be ŋùmè, sìgbè lekè ètɔa David wɔ̀ ɛ̀a nène ò.

²Bòhũa, e zɔ̃ to Izràɛl be èfìɔwo be àfɔ̀tope, eye be li legbawo na Baal be vòduwo.

³E tɔzò vɔsa lè Bɛn-Hinɔ̀n be bàlìa mè, eye be sɔ èvia ŋusùwo savɔ, lè èzò mè, sɔ zɔ̃ ɖo dùkɔ̃ kèwo Tɔhonɔ̀ nyà lè Izràɛlviwo be ŋùkɔ̀a be wɔ̀na kpòtoewo nu[50].

⁴E savɔ eye be tɔzò lifi lè vɔsatèpewo, lè ètowo ji, lè ètokɔ̃ɛ̃wo tamè, ku lè àti do àmàwo keŋu gɔ̃mè.

⁵Ekèa ŋutia, Tɔhonɔ̀, yebe Mawu sɔ ɛ̀ do àsi na Aràm be èfìɔa. Aràmtɔwo ɖù e ji, eye wo kplɔ̀ yebe àmè sùgbɔ àhùale, yì Damaskò. Tɔhonɔ̀ do è àsi na Izràɛl be èfìɔa[51] cã, eye be ɖù e ji veve ɖe.

⁶Lè ŋùkèkè ɖèka jia, Pekà, Rèmalìa be èvia wù Yudà be gbãdãgbã kãlì hotu èkà takpo, ɖoa, Yudàviwo gble Tɔhonɔ̀, woa tɔgbewo be Mawu a ɖɛ.

⁷Zikrì, Efràyimviwo be àhùawɔ̀tɔ ɖèka wù Màaseyà, èfìɔ be èvi, Azrikam, èfìɔsaa ji kpɔtɔa ku Ɛlkanà, èfìɔ gɔ̃mènɔ̀tɔa.

⁸Izràɛlviwo kplɔ̀ àhùale hotu èkà èvè takpo kèwo nyi nyɔ̃nùwo, ŋusùviwo ku nyɔ̃nùviwo jo lè woa nɔ̀vi Yudàviwo gbɔ. Wo gbà lɔ àmɔ̀nyɔ̀nu sùgbɔ, eye wo sɔ wo yì Sàmarìa.

⁹Vɔ̀a, Tɔhonɔ̀ be gblɔ̃ɖɛtɔ ɖe kè tɔ̀ Odɛd lè funua dogò àhùakɔ̃a, wàlɛbɛ kè àhùakɔ̃a trɔ gbãnàa Samarìaa. E gblɔ̃ na wo be: “Kpɔɖa, Tɔhonɔ̀, mìa tɔgbewo be Mawu a do àdɔ̀mèze ɖo Yudàviwo ŋuti, eye be do wo àsi na mì. Gãkea, mì sɔ èjìbibi wù wo, àleke be ènu kèa va ɖo jiŋùkusi, lè Mawu gbɔ.

¹⁰Fifìa, mì ji la sɔ Yudàviwo ku Yèruzàlɛmviwo wɔ̀ kluviwo ku kòsìwo na mìa ɖokoe. Mì mu nya be, lè eŋuã mèa, àgɔ̀ kpò mì gbà le jè do Tɔhonɔ̀, mìabe Mawu a?

¹¹Fifìa, mì ɖo èto mù! Mì trɔ mìa nɔ̀vi kèwo mì kplɔ̀ àhùaleawo ɖoɖa, ɖoa, Tɔhonɔ̀ be àdɔ̀mèzea lè mìa ji.”

¹²Eye ŋusù ɖewo sitè lè Efràyim be kplɔ̀tɔwo dòmè; woawo ye nyi: Àzarìa, Yehohanàn be èvi, Berekìa, Mesilemɔt be èvi, Yèhizkìa, Salum be èvi ku Àmasà, Hadlai be èvi. Wo sitè ɖo àmè kèwo gbɔ̀ so àhùaawo ŋuti.

¹³Eye wo gblɔ̃ na wo be: “Mì mu ɖo la kplɔ̀ àhùale kèawo va àfi kèa ò; ne mu nyi nène ò a, mi la jè àgɔ̀ do Tɔhonɔ̀. Mì jro be yèwoa sɔ àgɔ̀jèje kpe miabe nuvuɛ̃woa? Miabe àgɔ̀jèjewo lòlò xoxo vɔ̀, eye Tɔhonɔ̀ be àdɔ̀mèze gãɖe lè Izràɛl ji.

¹⁴Ekèa ŋutia, gbãdãgbãawo ɖè àsi lè àhùaleawo ku àmɔ̀nyɔ̀nuawo ŋuti, lè ègaawo ku àmèhaa keŋu be ŋùmè.

¹⁵Eye ŋusù kèwo be nyikɔwo wo yɔawo sitè, xɔ̀ àhùaleawo, sɔ àwùwo lè àmɔ̀nyɔ̀nuawo mè, do na àmè kèwo lè àma-àmaawo. Wo na wo àwù, wo do, wo na wo ènu, wo ɖù gbà nù èsì. Wo na wo àmì, wo sì, eye wo kɔkɔ àmè kèwo keŋu gbɔjɔawo ɖo èsɔ-àkɛtɛwo ji, eye wo kplɔ̀ wo gbɔ̀ va na woa nɔ̀viwo lè Yerikò, èdekã be èdùa mè, eye woa ŋutɔwo, wo trɔ yì Sàmarìa.

¹⁶Gà ŋua mèa, èfìɔ Àkaz do àŋɛ̀ ɖoɖa Sirìa be èfìɔa, ne bèa do yè àlɔ̀.

¹⁷Edɔ̀m be èfìɔa gbà va ɖè àhùa kpe na Yudà-nyigbã. E ɖù e ji, eye be kplɔ̀ àhùalewo jo.

¹⁸Wàlɛbɛ ŋua, Filistìtɔwo va xa èdù kèwo lè ètoawo gɔ̃mèawo ku Negev-nyigbã ji, eye wo nyi Yudà-nyigbãwo. Wo ɖo àlɔ̀ Bɛt-Semès ji, Ayalɔ̀n ji ku Gèderɔ̀t ji. Wo gbà ɖo àlɔ̀ Sokò ji, Timnà ku Gimzò ji. Wo ɖo àlɔ̀ kɔpe kèwo trɔ do èdù kèawoa keŋu ji.

¹⁹Tɔhonɔ̀ dà Yudàviwo ɖo ànyi, ɖo Àkaz, Izràɛl be èfìɔa[52] ŋuti. Àkaz na Yudàviwo mu nɔ̀ ŋùzɔ̃ ò, vɔ̀a, wo yì èvuɛ̃wɔ̀wɔwo ji, eye wo le na ànùkua màwɔ̀ na Tɔhonɔ̀a, le kãkã ɖo ji.

²⁰Piglat-Pil nehɛzɛr, Sirìa be èfìɔa va Àkaz gbɔ, vɔ̀a, mu va do è àlɔ̀ ò. Àhùa bòhũ be hɛ̃, sɔ va zĩ Àkaz ji ɖɛ.

²¹Àkaz fɔ̀ mawuxɔa mè be àdɔ̀kùnu ɖewo, èfìɔ be àxuea mè be àdɔ̀kùnu ɖewo ku àgbònùglawo be àxuewo mè be àdɔ̀kùnu ɖewo, sɔ na Sirìa be èfìɔa, vɔ̀a, ekèa mu wɔ̀ ènu ɖekpe ò.

²²Wàlɛbɛ kèwo èfìɔ Àkaz nɔ̀nà tùkaɖa mèa, e gbà wɔ̀nà ènu kpòtoewo ɖo Tɔhonɔ̀ ŋuti wu.

²³E savɔ na Damaskò be vòdu kèwo ye ɖù e jiawo, ku susu be: “Ekè Aràm be èfìɔa be vòduwo le kpe ɖo Aràmviwo ŋutia, mù la savɔ na vòduawo, ne woa kpe ɖo ŋuti nyè. “Vɔ̀a, woawo bòhũ ye nyi ye ku Izràɛlviwo keŋu be àfɔ̀ku.

²⁴Àkaz bɔ̀ ènu zãzã kèwo ye lè Tɔhonɔ̀ be àxuea mèa, eye be gbã ènuzãzã kèawo. E yomè a, e tu Tɔhonɔ̀ be àxuea be hɔ̃truwo. E tù vɔsakpe ɖo Yèruzàlɛm be èmɔ̃zɛ̃kpliwo keŋu.

²⁵Lè Yudà be èdù sia èdù mèa, e ɖo èto ji vɔsatèpewo, ne bèa nɔ tɔzò vɔsa na èdù bu mètɔwo be vòduwo. Ekèa na be e do àdɔ̀mèze na tɔgbeawo be Mawu a.

²⁶Àkaz be èfìɔɖùɖu be ŋutinyàa, yebe wɔ̀nà cucugbãwo ku kpɔ̀tɛawoa[53], wo ŋlɔ̀ wo ɖo Izràɛl be èfìɔwo ku Yudà be èfìɔwo be ŋutinyà xoma mè.

²⁷Kè Àkaz trɔ ŋùgbe, yì tɔgbeawo gbɔa, wo ɖì ì ɖo Yèruzàlɛm be èdùa mè, vɔ̀a, wo mu sɔ ɛ̀ ɖo Izràɛl be èfìɔwo be èyɔ̀do mè ò. Èvia Ezekìas ɖùfìɔ ɖo e tèpe.