Read gen 2Kronikà 29 Bible Online

2Kronikà 29 - gen bible

2Kronikà 29

¹Ekè Ezekìas va èfìɔzìkpea jia, e ɖo èpè èwì vɔ àtɔ̃. E ɖùfìɔ lè Yèruzàlɛm, èpè èwì vɔ àsiɖèkɛ. Ènɔa be nyikɔ ye nyi Abiyà, e nyi Zakarìa be nyɔ̃nùvi.

²E wɔ̀ ènu kè jɔ̀ a lè Tɔhonɔ̀ be ŋùmè, sìgbè lekè tɔgbea David wɔ̀ ɛ̀a nène.

³Lè yebe èfìɔɖùɖu be èpè cucugbãa be wètri cucugbãa mèa, e hũ Tɔhonɔ̀ be àxuea be hɔ̃truwo, eye be jrà wo ɖo.

⁴E na hũbonɔwo ku Levìwo va, eye be bɔ̀ wo ɖo èwèzɛ̃pe be tèpea.

⁵E gblɔ̃ na wo be: “Levìwo, mì ɖo èto mù nyuɛ̃ ɖe! Fifìa, mì la kɔ̀ mìa ɖokoewo ŋuti, ne mìa kɔ̀ Tɔhonɔ̀, mìa tɔgbewo be Mawu a be àxuea ŋuti. Mì ɖè èɖinu ɖe sia ɖe to lè kɔ̀kɔ̀ɛpea.

⁶Ɖoa, mia tɔwo mu wɔ̀ ànùkua ò. Wo wɔ̀ èvuɛ̃ lè Tɔhonɔ̀, mia tɔgbewo be Mawu a be ŋùmè, eye wo gble è ɖɛ. Wo trɔ woabe ŋùmè jo lè Tɔhonɔ̀ be nɔ̀pea gbɔ, eye wo trɔ ŋùgbe do è.

⁷Wo tu àsaji be hɔ̃truawo cã, eye wo ci èzòawo. Wo mu gbà le tɔzò lifi ku ènumème vɔsa lè kɔ̀kɔ̀ɛpea na Izràɛl be Mawu a ke ò.

⁸Ekèa ŋutia, Tɔhonɔ̀ be àdɔ̀mèze jè Yudà ku Yèruzàlɛm ji. Eye be na wo trɔ zũ vɔ̃vɔ̃ ku ŋɔjinu kudo ènu ɖì kòkoe be kpɔwɔɛ, sìgbè lekè mìa ŋutɔ, mì le kpɔ ɛ̀, ku mìabe ŋùkuviwo nènea.

⁹Ekèa ŋuti ye mia tɔwo ci èwui nu, miabe ŋusùviwo ku nyɔ̃nùviwo kudo mia srɔ̃wo nyi àhùalewo ɖo.

¹⁰Fifìa, mù jro be ma ɖùzò ku Tɔhonɔ̀, Izràɛlviwo be Mawu a, ne yebe àdɔ̀mèze ɖo mia ŋutia nu ne fa.

¹¹Èvi nyèwo, fifìa, èɖe mà sɔ lè e mè mu gbà lè ò. Ɖoa, miawo ye Tɔhonɔ̀ cã, ne mia nɔ̀tè lè ŋùkɔ̀ na ɛ̀, la sumɔ ɛ̀, ne mia nyi hũbonɔwo, lè yebe ŋùmè, ne mia nɔ tɔzò lifi na ɛ̀.”

¹²Ekèa yomè a, Levì kèawo sitè: Kehàt be jìjimèviwo: Mahat, Àmasài be èvi, Yoɛ̀l, Àzarìa be èvi. So Mɛharì be èviwo dòmèa: Kis, Abdì be èvi, Àzarìa, Yehalelɛ̀l be èvi. So Gɛrsɔ̀n be èviwo dòmèa: Yoàh, Zimà be èvi, Edɛ̀n, Yoàh be èvi.

¹³So Elisafàn be èviwo dòmèa, Simri ku Yehìɛl. So Àsaf be èviwo dòmèa, Zakarìa ku Màtanìa.

¹⁴So Hemàn be èviwo dòmèa, Yehìɛl ku Simeyì. So Yedutùm be èviwo dòmèa, Semayà ku Uziɛl.

¹⁵Ekè wo bɔ̀ woa nɔ̀viwo, eye wo kɔ̀ woa ɖokoewo ŋutia, wo wɔ̀ ɖo èfìɔ be ègbè ji, sɔ zɔ̃ ɖo Tɔhonɔ̀ be ɖoɖo kè be na èfìɔa ji, eye wo yì kɔ̀ Tɔhonɔ̀ be àxuea ŋuti.

¹⁶Hũbonɔwo ɖo Tɔhonɔ̀ be àxuea mè, ne woa yì kɔ̀ e ŋuti. Wo ɖè ènu màkɔ̀ màkɔ kèwo keŋu wo kpɔ lè Tɔhonɔ̀ be àxuea mèa to, va kɔ̀ ɖo kuefãpea be gbàjà ji. Hũbonɔwo fɔ̀ wo to, yì Kidrɔ̀n be bàlìa mè.

¹⁷Wo tɔ ŋutikɔ̀kɔ kèa ji lè wètri cucugbãa be ŋùkèkè cucugbãa ji, eye lè wètria be ŋùkèkè ènyigɔ̃a gbèa, wo ɖo Tɔhonɔ̀ be àsaji. Wo sɔ ŋùkèkè ènyi sɔ̃ŋu sɔ kɔ̀ Tɔhonɔ̀ be èxɔ̀a ŋuti, eye lè wètri cucugbãa be ŋùkèkè woeàdɛ̃gɔ̃a gbèa, wo wu e nu.

¹⁸Ekèa yomè a, wo yì èfìɔ Ezekìas gbɔ, eye wo gblɔ̃ na ɛ̀ be: “Mi kɔ̀ Tɔhonɔ̀ be àxuea ŋuti keŋu-keŋu. Ènu mème vɔsakpea ku yebe ŋutinuwo, kudo ŋùku mè ɖo kpɔ̃nɔ kɔ̀kɔ̀ɛa be èkplɔ̃a cã gbàkudo yebe ŋutinuwo keŋu.

¹⁹Mi jrà ènuzãzã kèwo keŋu èfìɔ Àkaz ɖè jo, wàlɛbɛ kè be le ɖùfìɔ lè yebe ànùkua mà wɔ̀ mèawo keŋu ɖo, eye mi kɔ̀ woa ŋuti. Kpɔɖa, wo lè Tɔhonɔ̀ be vɔsakpea be ŋùkɔ̀.”

²⁰Ekè èŋù kèa, èfìɔ Ezekìas fɔ̃ kaba. E bɔ̀ èdù mèmègãwo, eye be yì Tɔhonɔ̀ be àxuea mè.

²¹Wo hɛ̃ ènyìsu adrɛ̃, àgbò adrɛ̃, àlɛ̃suvi adrɛ̃ ku ègbɔsu adrɛ̃, ne woa sɔ savɔ ɖo nuvuɛ̃wo ta, ɖo èfìɔdua ta, ɖo kɔ̀kɔ̀ɛpea ta ku Yudà-nyigbã ta. Èfìɔa ɖè ègbè na hũbonɔawo, Arɔ̀n be jìjimèviwo, be wo ne sɔ ènu kèawo savɔ lè Tɔhonɔ̀ be vɔsakpea ji.

²²Eye wo wù ènyìsuawo, eye hũbonɔawo sɔ woabe èhũ wu ɖo vɔsakpea ji. E yomè a, wo wù àgbòawo, sɔ woabe èhũ wu ɖo vɔsakpea ji. E yomè a, wo wù àlɛ̃suviawo, sɔ woabe èhũ wu ɖo vɔsakpea ji.

²³Ekèa yomè a, wo kplɔ̀ nuvuɛ̃ klɔ vɔsa be gbɔsuviawo va èfìɔa ku àmèhaa be ŋùkɔ̀. Wo vlũ àlɔ̀ ɖo woa ji.

²⁴Hũbonɔawo wù gbɔgbɔɛawo, sɔ woabe èhũ sɔ na ɖo nuvuɛ̃ ta, lè vɔsakpea ji, sɔ ɖè kuku ɖo Izràɛl dùkɔ̃ bliboa ta, ɖoa, Izràɛl bliboa ta ye èfìɔa ɖè ègbè be wo ne wɔ̀ ènumème vɔsa ɖo nuvuɛ̃ ta ɖo.

²⁵Èfìɔa ɖo Levìwo ɖo Tɔhonɔ̀ be àxuea mè. Wo le ègàkokoewo, sãŋùguwo ku èkàsãŋùguwo ɖo àsi, sɔ zɔ̃ ɖo èfìɔ David be ènumèkpɔtɔ Gad ku Natàn, gblɔ̃ɖɛtɔa be ɖoɖo kè Mawu do àsi na wo, to gblɔ̃ɖɛtɔwo jia nu.

²⁶Levìawo lè ètè ku èhũ pò nupoawo, eye hũbonɔawo le èkpɛ̃awo ɖo àsi.

²⁷Ezekìas ɖè ègbè be wo ne mè vɔsaa lè Tɔhonɔ̀ be vɔsakpea ji. Ekè wo tɔ vɔsaa jia, wo tɔ èhà cã jìji na Tɔhonɔ̀ ku èkpɛ̃ kudo David, Izràɛl be èfìɔa be èhũ pò nupowo.

²⁸Àmèhaa keŋu do èta gũ, sɔ sɛ̃ Mawu, wàlɛbɛ kè èhàjìjia ku èkpɛ̃kukua le yì e ji, kaka na ènumème vɔsaa be vɔ̀vɔ.

²⁹Ekè vɔsaa wu e nua, èfìɔa ku àmè kèwo keŋu lè e ŋutiawo jè èklò, eye wo cɔ̃ ŋùmè ànyi.

³⁰Èfìɔ Ezekìas ku yebe àgbònùglawo ɖè ègbè na Levìawo be wo ne sɔ David ku yebe ènumèkpɔtɔ, Àsaf be èhàwo be ènyàtiwo nɔ kafu Tɔhonɔ̀. Eye wo jì kàfù kafu be èhàwo ku jìjɔɛ, eye wo do èta gũ, sɔ sɛ̃ Mawu.

³¹Ekèa yomè a, Ezekìas gblɔ̃ be: “Fifìa, mì kɔ̀ mìa ɖokoewo ŋuti na Tɔhonɔ̀. Mì sɔ vɔ̀sawo ku àkpedodo be ènunanawo va Tɔhonɔ̀ be àxuea mè.” Eye àmèhaa sɔ vɔ̀sawo ku àkpedodo be ènunanawo, eye àmè kèwo keŋu jroawo hɛ̃ ènumème vɔ̀sawo va.

³²Ènumème vɔsa kèwo àmèhaa hɛ̃ va kpata lè: ènyìsu èkà takpo ci èwo; àgbò èkà èvè takpo ku àlɛ̃suvi èkà àtɔ̃. Wo hɛ̃ woa kpata va na ènumème vɔsa.

³³Èlã kèwo keŋu wo sɔ savɔawo lè ènyìsu èkà woeàtɔ̃, àlɛ̃ ku ègbɔ caka hotu ɖèka èkà èwì vɔ àtɔ̃.

³⁴Hũbonɔawo ɖèɖe hùe, la ko ènumème vɔsaawo keŋu. Ekèa ŋutia, woabe èhadɔwɔ̀tɔ Levìwo do wo àlɔ̀, kaka na èdɔa be ènuwuwu, kaka na gà kè mè hũbonɔwo kɔ̀ woa ɖokoewo ŋutia, ɖoa, Levìawo lebè na woa ɖokoewo ŋuti kɔ̀kɔ wu hũbonɔawo.

³⁵Ènumème vɔsaa sùgbɔ, sɔ bɔ̀ ɖo ŋuti fàfa vɔsaa be àmìawo, ku èsìkɔ̀ɖɛ be àhà kèwo zɔ̃ ku ènumème vɔsaawoa ŋuti. Nène a ye wo gbìgbɔ̀ ɖo sɛ̃sɛ̃a ànyi lè Tɔhonɔ̀ be àxuea mè.

³⁶Ezekìas ku dùkɔ̃ bliboa kpɔ jìjɔɛ ɖo ènu kè Tɔhonɔ̀ wɔ̀ na yebe dùkɔ̃a ŋuti, ɖoa, ekèa jɔ̀ kpò, lè àvò mè.