Read gen 2Kronikà 30 Bible Online

2Kronikà 30 - gen bible

2Kronikà 30

¹Ezekìas do àŋɛ̀ ɖoɖa Izràɛl be dùkɔ̃ bliboa ku Yudàviwo, eye be ŋlɔ̀ xoma ɖoɖa Efràyimviwo ku Manasèviwo, sɔ le kpe wo be woa va Tɔhonɔ̀ be àxuea mè, lè Yèruzàlɛm, ne yèwoa ɖù Tɔhonɔ̀, Izràɛl be Mawu a be Toŋutivayì be àzãa.

²Èfìɔa ku yebe àgbònùglawo kudo Yèruzàlɛm be àmèhaa keŋu ɖo è be yèwoa ɖù Toŋutivayì be àzãa lè wètri èvègɔ̃a[54] mè.

³Wo mu teŋu ɖù Toŋutivayì be àzãa, gà kè mè wo ɖùnà ɛ̀a ò. Ɖoa, hũbonɔ nenè kèwo kɔ̀ woa ɖokoewo ŋutia mu sù, gà ŋua mè ò, eye dùkɔ̃a mu bɔ̀ ɖo Yèruzàlɛm gà ŋua mè cã ò.

⁴Ɖoɖo kèa jè ŋùmè na èfìɔa ku àmèha bliboa.

⁵Eye wo ɖo èkpe ènyàa ji be woa kãkã ɛ̀ ɖo Izràɛl-nyigbã bliboa ji. So Bɛr-Cebà be èdùa mè, kaka yì Dàn be èdùa mè, sɔ le kpe dùkɔ̃a be woa va Yèruzàlɛm, ne woa ɖù Toŋutivayì na Tɔhonɔ̀, Izràɛl be Mawu a. Ɖoa, e dìdì kè àmè sùgbɔ mu gbà ɖù ì, sɔ zɔ̃ ɖo ŋɔ̀ŋlɔ̃ a ji kpɔ ò.

⁶Ekè àŋɛ̀dotɔwo xɔ̀ xoma so èfìɔ ku yebe àgbònùglawo gbɔa, wo jè èmɔ, yì Izràɛl-nyigbã bliboa ku Yudà-nyigbã ji, eye wo do àŋɛ̀ kè nyi èfìɔ be ègbèɖèɖea be: “Izràɛlviwo, mì trɔ gbɔ̀ va Tɔhonɔ̀, Abràham, Izàk ku Izràɛl be Mawu a gbɔ, ne bèa trɔ va mì, àmè kèwo teŋu kpɔ̀tɔ̀ so Sirìa be èfìɔwo si mèawo gbɔ.

⁷Mì mu gbà nɔ̀ sìgbè mìa tɔwo ku mìa nɔ̀vi kèwo mu wɔ̀ ànùkua na Tɔhonɔ̀, mìa tɔgbewo be Mawu a nène, eye Mawu sɔ wo do àsi na cɔ̃crɔ̃ ŋɔjitɔ̀, sìgbè lekè mìawo ŋutɔ, mì kpɔa nène ò.

⁸Mì mu gbà lìa èkɔ̀ sìgbè mìa tɔwo nène ò. Mì vlũ àlɔ̀ ɖoɖa Tɔhonɔ̀, mì va yebe kɔ̀kɔ̀ɛpe kè ŋuti be kɔ̀ ɖɛ kaka sɔ yìa, ne mìa sɛ̃ Tɔhonɔ̀ mìabe Mawu, àleke be yebe àdɔ̀mèze gãa ne jo lè mìa ji.

⁹Ne mì trɔ va Tɔhonɔ̀ gbɔa, àmè kèwo kplɔ̀ mìa nɔ̀viwo ku mìabe èviwo àhùaleawo la ku ŋuzĩzĩ na wo, eye wo la trɔ gbɔ̀ va ànyigbã kèa ji, ɖoa, Tɔhonɔ̀, mìabe Mawu a, àdɔ̀mènyuɛ̃ tɔ be nyi, eye be kuna ŋuzĩzĩ na àmè. Mu la trɔ ŋùgbe do mì, ne mì trɔ va e gbɔ ò.

¹⁰Àŋɛ̀dotɔawo zɔ̃ to Efràyim ku Manasè be ànyigbãwo ji, kaka yì kɔ̀ ɖo Zabulɔ̀n-nyigbã ji, so èdù ɖe mè, yì èdù bu mè, vɔ̀a, ɖe kpò èdùawo mètɔwo kò wo, eye wo ɖè àlɔmè so woa ŋuti.

¹¹Gãkea, àmè ɖewo so Àsɛr-nyigbã ji, Manasè-nyigbã ji ku Zabulɔ̀n-nyigbã ji, ekèwo bɔ̀bɔ̀ woa ɖokoe, eye wo yì Yèruzàlɛm.

¹²Lè Yudà-nyigbã ji cã a, Tɔhonɔ̀ be àlɔ̀ na susu ɖèka àmèwo, ne woa wɔ̀ ɖo èfìɔa ku èdùmèmègãwo be ɖoɖo a ji, sɔ zɔ̃ ɖo Tɔhonɔ̀ be ègbè ji.

¹³Àmèha gã ɖe va bɔ̀ lè Yèruzàlɛm, ne woa ɖù Kpɔ̃nɔ àkpiti be àzãa, lè wètri èvègɔ̃a mè, eye àmèawo sùgbɔ ŋutɔ.

¹⁴Wo ɖè vɔsakpe kèwo ye lè Yèruzàlɛm be èdùa mèawo keŋu jo, eye wo fɔ̀ lifi be vɔsakpeawo dãŋùgbe ɖo Kidrɔ̀n be bàlìa mè.

¹⁵Lè wètri èvègɔ̃a be ŋùkèkè woènègɔ̃a gbèa, wo wù Toŋutivayì be àlɛ̃via. Ekè èŋùkpɛ̃ hũbonɔawo ku Levìawoa, wo kɔ̀ woa ɖokoewo ŋuti, eye wo hɛ̃ ènu mème vɔ̀sawo va Tɔhonɔ̀ be àxuea mè.

¹⁶Ekèa yomè a, wo yì nɔ̀tè lè woa tèpewo, lè ɖoɖo kè wo ŋlɔ̀ ɖo Mosè, Mawu be àmèa be èse xoma a mèa nu. Levìwo le èlã be èhũa ɖo àsi, eye hũbonɔwo le hlɛ̃ ɛ̀.

¹⁷Ekè àmè sùgbɔ mu kɔ̀ woa ɖokoewo ŋuti ò a, Levìwo le wù Toŋutivayì be àlɛ̃via na àmè kèwo keŋu ŋuti mu kɔ̀, ne woa savɔ na Tɔhonɔ̀ ò a.

¹⁸Togbɔ be àmè gbogbo kèwo so Efràyim, Manasè, Isakàr ku Zabulɔ̀n-nyigbã jiawo mu lè woa ɖokoewo ɖì ò a, wo ɖù Toŋutivayìa, ènu kè mu zɔ̃ ɖo ŋɔ̀ŋlɔ̃ a ji ò. Gãkea, Ezekìas fãkue ɖo woa ta be: “Tɔhonɔ̀ kè nyi àdɔ̀mè nyuɛ̃tɔa ne sɔ kè

¹⁹àmè sia àmè kè jrà yebe èjì ɖo ɖɛ, sɔ le ji Tɔhonɔ̀ Mawu, tɔgbeawo be Mawu, ne àmèa mu kɔ̀ ŋutɔ cã, sɔ zɔ̃ ɖo kɔ̀kɔ̀ɛpea be èsewo ji ò a.”

²⁰Tɔhonɔ̀ ɖo èto Ezekìas be kuefãa, eye be dà èdɔ̀ na dùkɔ̃a.

²¹Izràɛlvi kèwo ye lè Yèruzàlɛm be èdùa mèawo ɖù Kpɔ̃nɔ àkpiti be àzãa, ŋùkèkè adrɛ̃, ku jìjɔɛ gã ɖe, wàlɛbɛ kè Levìwo ku hũbonɔwo le jìhà, sɔ le kafu Tɔhonɔ̀ gbè sia gbè, ku Tɔhonɔ̀ be èhũ pò nupoawo.

²²Ezekìas pò nupo, sɔ do ŋusɛ̃ Levì kèwo keŋu be èji trɔ ɖoɖa Tɔhonɔ̀ be sùmɔ̀ sumɔ be èdɔa gbɔ ku jìjɔɛa. Wo ɖù àzãa be vɔsa-lãa, ŋùkèkè adrɛ̃ sɔ̃ŋu ku ŋuti fàfa vɔsaa, kudo àkpedodo na Tɔhonɔ̀, woa tɔgbewo be Mawu a.

²³Ekèa yomè a, àmèhaa keŋu gbà lɔ̃ ɖo e ji be yèwoa gbà yì àzãa ji, ŋùkèkè adrɛ̃ bu kpe è. Eye, wo gbà yì àzãa ji ku jìjɔɛ, ŋùkèkè adrɛ̃ bu kpe è.

²⁴Ezekìas, Yudà be èfìɔa na àmèhaa, ènyìsu èkà èwì vɔ àtɔ̃, àlɛ̃ ku ègbɔ hotu ètɔ̃ èkà èwì vɔ àtɔ̃. Èdùmèmègãwo na ènyìsu èkà èwì vɔ àtɔ̃, àlɛ̃ kudo ègbɔ hotu àtɔ̃. Wàlɛbɛ ŋua, hũbonɔ sùgbɔ kɔ̀ woa ɖokoewo ŋuti.

²⁵Yudà be àmèha bliboa kpɔ jìjɔɛ ku hũbonɔawo kudo Levìawo gbàkudo àmè kèwo keŋu so Izràɛl, va bɔ̀awo ku àmèjro kèwo so Izràɛl kudo kèwo nɔ̀nà Yudà-nyigbã jiawo.

²⁶Jìjɔɛ gã ɖe nɔ̀ Yèruzàlɛm, ɖoa, so kaka Salomɔ̀n, David, Izràɛl be èfìɔa be èvia be hùenua, ènu kèa hati ɖekpe mu gbà jɔ̀ lè Yèruzàlɛm kpɔ ò.

²⁷Ekèa yomè a, hũbonɔwo ku Levìwo sitè, eye wo tusì na dùkɔ̃a, eye Mawu sè woabe ègbè, ɖoa, woabe kuefã ɖo jiŋùkusi, Mawu be Nɔ̀pe Kɔ̀kɔ̀ɛ.