Read gen 2Kronikà 31 Bible Online

2Kronikà 31 - gen bible

2Kronikà 31

¹Ekè ènu kèa keŋu wu e nua, Izràɛlvi kèwo lè funuawo keŋu yì Yudà be èdùwo mè, yì gbã èkpeliwo, mù Aserà legba-tiwo pu ànyi. Wo kãkã ètoji be vòdu sɛ̃pewo ku vɔsatèpewo lè Yudà ku Bɛnyamìn, Efràyim kudo Manasè-nyigbãwo keŋu ji. Ekè wo gbã ènu kèawo keŋu vɔ̀a, Izràɛlviwo trɔ yì woa ŋutɔwo be èdùwo mè, lè woabe ànyigbãwo ji.

²Ekèa yomè a, Ezekìas ɖo hũbonɔwo ku Levìwo ɖo woabe èhawo nu, àmè sia àmè ɖo yebe èdɔ nu, sìgbè hũbonɔ, àlo Levì nène, ne bèa nɔ wɔ̀ ènumème vɔsa àlo àkpedodo vɔsa, ne bèa nɔ sumɔ, ne bèa nɔ do àkpe, ne bèa nɔ jì kafu-hà lè Tɔhonɔ̀ be Nɔ̀pe Kɔ̀kɔ̀ɛ be àgbo nu.

³Èfìɔa ŋutɔ sɔ, lè yebe àdɔ̀kùnuwo mè, na ne ŋùdekɛ̃nyɛ ku fìɛ̃si be ènumème vɔ̀sawo, bɔ̀ ɖo jɛ̃gbɔ̃zã gbè, wètri yeye tɔ̀ ŋuti kudo àzã buwo sìgbè lekè wo ŋlɔ̀ ɖo Tɔhonɔ̀ be èse xoma a mèa nène.

⁴E ɖè ègbè be àmèha lè Yèruzàlɛm ne woa na àkpa kè la yì na hũbonɔ ku Levìwo, àleke be woa lebè na Mawu be èsea goŋu-goŋu, eye woa sɔ woa ɖokoewo na ɛ̀.

⁵Ekè ègbèɖèɖea gbe va kpòa, Izràɛlviwo na woabe àgblèmè-nuku cucugbãawo fàa, lè ègbɔ sùsu mè: èlù, vɛ̃ yeye, àmì, ànyisi ku ènu kèwo keŋu gbe sona àgblè mè kpòa, wo hɛ̃ wo va be sùgbɔ[55], ɖe sia ɖe be mamã èwogɔ̃a.

⁶Izràɛlvi ku Yudàvi kèwo nɔ̀nà Yudà be èdùwo mèawo, hɛ̃ woabe èlãhawo, ènyìwo ku àlɛ̃wo be mamã èwogɔ̃a kudo ènu nana kèwo ŋuti wo kɔ̀ na Tɔhonɔ̀, woabe Mawu a be mamã èwogɔ̃a va, eye wo bɔ̀ wo ɖɛ ɖo àgbàkà àgbàkà.

⁷Wo tɔ àgbàkàwo bɔ̀bɔ, lè wètri ètɔ̃gɔ̃a mè, eye wo wu e nu lè wètri àdɛ̃gɔ̃ a mè.

⁸Ekè Ezekìas ku yebe àgbònùglawo va kpɔ àgbàkàawoa, wo kafu Tɔhonɔ̀ eye wo tusì na Izràɛl, yebe dùkɔ̃a.

⁹Ezekìas biɔ ènyà hũbonɔwo ku Levìwo sè, so àgbàkà kèwo wo bɔ̀ ɖɛawo ŋuti.

¹⁰Hũbonɔ gã, Àzarìa so Sadɔk be xòmèa mè ɖo e ŋuti be: “So kaka gà kè mè àmèwo tɔ woabe ènu nanawo sɔsɔ va Tɔhonɔ̀ be kuefãpea, ènu ɖùɖu sù na mi, eye sùgbɔ gbà lè, mi pòtɛ ɖɛ, ɖoa Tɔhonɔ̀ tusì na yebe dùkɔ̃a, eye àgbàkà gã kèawo gbà kpɔ̀tɔ̀.

¹¹Ezekìas ɖè ègbè be wo ne tù ènupòtɛɖopewo ɖo Tɔhonɔ̀ be àxuea mè, eye wo wɔ̀ ɛ̀.

¹²Wo sɔ ànùkua hɛ̃ ènu nanawo va e mè ku ènuwo be mamã èwogɔ̃a, kudo ènuzãzã kèwo ŋuti wo kɔ̀ na Tɔhonɔ̀a. Wo sɔ Konanìa, Levì ɖèka ɖo ènupòtɛɖope kèa nu, eye nɔ̀via Simeyì le do è àlɔ̀.

¹³Yehiɛl, Azazìa, Nahat, Asahɛl, Yerimɔ̀t, Yosabad, Elìɛl, Yismakìa, Mahat ku Benayà nyi ènuawo ji kpɔtɔwo, eye wo lè Konanìa ku nɔ̀via Simeyì gɔ̃mè, sɔ zɔ̃ ɖo èfìɔ Ezekìas ku Mawu be àxue jikpɔtɔ Azazìa be ɖoɖo ji.

¹⁴Kore, Yimnà, Levìa be èvi kè ɖiana èwèɖoxɔ̀pe be àgboa nua kpɔna èjro nyuɛ̃ be ènu nana kèwo wo wɔ̀nà na Mawu a ji. E ye ke mana Tɔhonɔ̀ be ènu nana ku ènu nana kèwo ŋuti wo kɔ̀awo na hũbonɔwo ku Levìwo.

¹⁵Edɛ̀n, Minyamìn, Yesùa, Semayà, Àmarìa ku Sekanìa la do è àlɔ̀, lè ànùkua mè, sɔ nɔ ma ènuwo na woabe èhadɔwɔ̀tɔ, hũbonɔwo, lè sùmɔ̀ sumɔ be èdùwo[56] mè, ɖo woabe èhasòsòwo nu, vòvò mà do ɖèvi ku àmègãxo dòmè ò.

¹⁶Sɔ kpe èa, wo gbà ma ènu na ŋusù kèwo be nyikɔwo lè jìjimè xoxoawo mè, so èpè ètɔ̃ ji, àlo, wu èpè ètɔ̃, eye wo ɖo Tɔhonɔ̀ be àxuea mè, be yèwoa wɔ̀ gbè sia gbè be sùmɔ̀ sumɔ be èdɔ vòvòvò kèwo nyi yèwo tɔ̀wo, kù ɖo èhasòso kèwo mè wo lèa ŋuti.

¹⁷Wo ŋlɔ̀nà hũbonɔwo be nyikɔwo ɖo woabe xòmèawo nu, eye wo ŋlɔ̀nà Levìwo be nyikɔwo, ne wo ɖo èpè èwì ku ne wo to e ŋutia, sɔ zɔ̃ ɖo woabe èhasòsòwo ku èdɔdoàsiwo ji.

¹⁸Wo ŋlɔ̀nà nyikɔ kèawo ɖo xòmèa kpata nu, kaka jè ɖèviwo cã ji, sɔ to èsrɔ̃-nyɔ̃nùwo, èvi-ŋusùwo ku èvi-nyɔ̃nùwo ji, àxuedo kè kpata wo ŋlɔ̀ ɖo jìjimè xoma kèa mèa. Vɔ̀a, wo ɖo la wɔ̀ ànùkua, la kɔ̀ woa ɖokoewo ŋuti gbɔ̀xue.

¹⁹Sɔ yì e jia, wo ŋlɔ̀ hũbonɔ Arɔ̀n be jìjimèvi kèwo nɔ̀nà woabe èdùwo be àgblè jiawo cã be nyikɔwo, ɖo àmè kèwo be nyikɔwo wo ŋlɔ̀ lè èdùawo dòmètɔ ɖe sia ɖe mèa dòmè. Wo cã àmèwo, eye wo ŋlɔ̀ woabe nyikɔwo, ne woa nɔ mã ènu na ŋusùwo lè hũbonɔwo dòmè, ku àmè kèwo keŋu be nyikɔwo wo ŋlɔ̀ ɖɛ lè Levìwo dòmèawo.

²⁰Ezekìas wɔ̀ ènu kèa lè Yudà-nyigbã keŋu ji, eye be wɔ̀ ènu kè nyɔ, eye be jɔ̀, nyi ànùkua, lè Tɔhonɔ̀, yebe Mawu be ŋùmè a.

²¹Lè èdɔ kèwo keŋu Ezekìas wɔ̀ na Mawu sɛ̃sɛ̃, lè Mawuxɔa mèawo mèa, e wɔ̀ wo na Mawu be ɖoɖowo ji wɔ̀wɔ, sɔ ji yebe Mawu ku yebe èjì blibo, eye be kpɔ ɛ̀ cã.