Read gen 2Kronikà 32 Bible Online

2Kronikà 32 - gen bible

2Kronikà 32

¹Lè ènu kèwo keŋu Ezekìas wɔ̀ lè ànùkua mèa yomè a, Senakerib, Àsirìa be èfìɔa va ci Yudà be ànyigbã a ji. Yebe àhùakɔ̃a va trɔ do àgbògbò-dùawo, nɔ̀ woa ji, le sùsu be yèa xɔ̀ wo, na yè ɖokoe.

²Ekè Ezekìas kpɔ be Senakerib va, ku sùsu be yèa ɖè àhùa kpe na Yèruzàlɛm be èdùa,

³e kpe èta ku yebe àgbònùglawo kudo àhùagawo, so lekè wo la wɔ̀ ɖo, la tu èmɔ kèwo keŋu yì èdùa godo be èsìdowo gbɔa. Àmè kèawo do è àlɔ̀.

⁴Ŋusùwo be àmèha gã ɖe bɔ̀, eye wo xe èmɔ kè yì èsìjɔ̀peawo keŋu, ku ètɔ̀ sàsra kè to ànyigbãa ji, va yìa. Wo gblɔ̃ be: “Nukɛ ŋuti ye Àsirìa be èfìɔwo la va kpɔ èsì sùgbɔ ɖo ò?”

⁵Ezekìas dojì, gbìgbɔ̀ jrà àfi kèwo gbã na èdùa be èglìkpaa ɖo, eye be tù èmɔjikpɔxɔ̀wo ɖo e tamè. E gbà tù èglìkpa bu ɖo cucugbãa godo, eye be gbà na ŋusɛ̃ èkpe gbàjà kè lè David be èdùa mè be èkpa a jia. E gbà wɔ̀ àhùawɔ̀nu sùgbɔwo ku àkpoxɔ̀nuwo.

⁶E ɖo àhùagawo dùkɔ̃a nu, eye be bɔ̀ wo ɖo ye ɖokoe gbɔ, lè gbàjà ji, lè èdùgboa nu. E pò nupo na woabe èjìwo be:

⁷“Èjì ne nɔ̀ mìa si, eye mì dojì. Mì mu gbà vɔ̃, eye àdìka mu gbà sò mì, ɖo Àsirìa be èfìɔa ku yebe àhùakɔ̃ gbogbo ŋua ŋuti ò. Ɖoa, ŋusɛ̃ kè lè mia jia lòlò wu ekè lè e ya jia.

⁸E yaa, ŋutilã mè be àhùawɔ̀wɔ be ŋusɛ̃ ye lè e ji. Vɔ̀a, miawo yaa, Tɔhonɔ̀, miabe Mawu ye lè mia ji, ne bèa xɔ̀ na mi, eye, bèa xɔ̀ àhùaa wɔ̀ na mi.” Yudà be èfìɔ Ezekìas be ènyàawo do ŋusɛ̃ dùkɔ̃a kpata.

⁹Ekèa yomè a, wàlɛbɛ kè Àsirìa be èfìɔ Senakerib nɔ̀ Làkis be èdùa ji ku yebe àhùakɔ̃a keŋuã, e dɔ̃ yebe àhùaŋùkɔ̀nɔ̀tɔwo ɖoɖa Yèruzàlɛm ku Ezekìas, Yudà be èfìɔa, kudo Yudàvi kèwo keŋu lè funua be:

¹⁰“Senakerib, Àsirìa be èfìɔa be mia biɔ mì sè be: Nukɛ ji ye mì le kã ɖo, eye mì gbà kpɔ̀tɔ̀ lè Yèruzàlɛm, èdù kè ji mi va nɔ̀a ò?

¹¹Ekè Ezekìas le gblɔ̃ be 'Tɔhonɔ̀, miabe Mawu la hlùɛ̃ mi gã, lè Àsirìa simèa,' e le flù mì, ne mìa ku àdɔ̀-ku ku èsì-ku.

¹²Mu nyi Ezekìas ŋua ŋutɔ ke ye ɖè vòdu ŋua be sɛ̃pewo jo lè ètowo ji, ku yebe vɔsakpewo, eye be gblɔ̃ na Yudàvi ku Yèruzàlɛmviwo be: “Vɔsakpe ɖèka kpò be ŋùkɔ̀ ye mì ɖo la sumɔ lè, eye mì ɖo la wɔ̀ ènumème vɔsa lè” ò a?

¹³Mì mu nya ènu kè nyè ku tɔgbe nyèwo mi wɔ̀ ku xixea mè be dùkɔ̃ kpɔ̀tɛawo ò a? Dùkɔ̃ ŋuawo be vòduwo teŋu hlùɛ̃ woabe dùkɔ̃wo gã so àsi nyèa?

¹⁴Èdù kèwo tɔgbe nyèwo gbãawo dòmètɔ kɛ be vòduwo dòmètɔ ɖe teŋu hlùɛ̃ yebe dùkɔ̃a gã so àsi nyè ò? Eye, leke ye mìawo yaa, mìabe Mawu a la wɔ̀, la teŋu hlùɛ̃ mì gã so àsi nyè ò?

¹⁵Ye ŋutia, mì mu gbà na, Ezekìas ne flù mì nènea, ne mìa bu èmɔ ò! Mì mu gbà xɔ̀ ènyà kè be le gblɔ̃a ji sè ò, ɖoa, èdù ɖekpekpe, àlo, èfìɔdu ɖekpekpe be vòdu mu teŋu hlùɛ̃ yebe dùkɔ̃a gã, so àsi nyè, àlo, so tɔgbe nyèwo si, kaka mìabe Mawu bèa teŋu va hlùɛ̃ mì gã, so àsi nyè ò!”

¹⁶Senakerib be èdùmèmègãwo gbà ɖè àlɔmè lè Tɔhonɔ̀ ku yebe sumɔ̃vi Ezekìas ŋuti.

¹⁷Èfìɔ Senakerib cã gbà ŋlɔ̀ xoma, le zũ Tɔhonɔ̀, Izràɛl be Mawu a be: “Sìgbè lekè ànyigbã bu ji be vòduwo mu teŋu hlùɛ̃ woabe dùkɔ̃wo gã, so àsi nyè nène òa, Ezekìas cã be vòdua mu la teŋu hlùɛ̃ yebe dùkɔ̃a gã, so àsi nyè mè ò.”

¹⁸Senakerib be sumɔ̃viwo do àpa lè Yudàviwo be ègbè mè ɖoɖa Yèruzàlɛmvi kèwo lè èglìawo tamèa, ne woa sɔ do vɔ̃vɔ̃ na wo, àleke be àdìka ne sò wo, ne Àsirìatɔwo ne ɖo àsi èdùa ji.

¹⁹Wo ɖè àlɔmè lè Yèruzàlɛm be Mawu a ŋuti, sìgbè lekè wo ɖè àlɔmè lè ànyigbã ji dùkɔ̃wo be vòdu kèwo nyi àgbètɔ be àlɔ̀nu-dɔwɔ̀wɔwo ŋutia nène.

²⁰Ekèa ŋutia, èfìɔ Ezekìas ku gblɔ̃ɖɛtɔ Ezayà, Àmos be èvia do àpa, fãkue[57] yɔ Mawu.

²¹Eye Tɔhonɔ̀ dɔ̃ yebe àtikplɔtɔ ɖe ɖoɖa, be va crɔ̃ àhùawɔ̀tɔ kãlì ku àhùaŋùkɔ̀nɔ̀tɔ kèwo keŋu ye lè Àsirìa be èfìɔa be àhùakɔ̃awo mèawo, eye Àsirìa be èfìɔa trɔ yì àxue ku ŋùkpɛ̃. Ekè be ɖo yebe vòduwo be èxɔ̀ mèa, ye ŋutɔ èviawo crɔ̃ ɛ̀ ku èwui.

²²Lekea ye Tɔhonɔ̀ hlùɛ̃ Ezekìas ku Yèruzàlɛm dùkɔ̃a gã, lè Senakerib, Àsirìa be èfìɔa si, ku lè àmè kpɔ̀tɛawo si. Tɔhonɔ̀ lebè na wo, lè ègo sia ègo mè.

²³Àmè sùgbɔ hɛ̃ ènu nanawo va Yèruzàlɛm, na Tɔhonɔ̀, ku ènuxɔ̀asìwo va na Ezekìas, Yudà be èfìɔa. So gà ŋua mè, sɔ yìa, bùbu nɔ̀ Ezekìas ŋuti, lè dùkɔ̃wo keŋu be ŋùmè.

²⁴Àzã ŋuawo jia, Ezekìas va jè èdɔ̀ kaka ɖo èku-donu. E fãkue yɔ Tɔhonɔ̀, eye Tɔhonɔ̀ ɖo èto è, eye be wɔ̀ ŋùdã be jèsìdo na ɛ̀.

²⁵Vɔ̀a, Ezekìas be èjì ɖɔ ku jajra, eye mu xɔ̀ Mawu be àdɔ̀mènyuɛ̃a ku àkpedodo ò. Ekèa hɛ̃ Mawu be àdɔ̀mèze va e ji, va Yudà be èfìɔdua ji, ku Yèruzàlɛm be èdùa ji.

²⁶Eye, togbɔ be jajra lè yebe èjì mè cã a, Ezekìas trɔ èjì mè, eye, ye ku Yèruzàlɛmviwo jèsi woabe èvuɛ̃wo, eye Tɔhonɔ̀ be àdɔ̀mèze mu gbà jè woa ji, lè Ezekìas be àgbèzãwo mè ò.

²⁷Ezekìas ɖo àdɔ̀kùnuwo fuu, eye bùbu gã ɖe lè e ŋuti. E ɖo àdɔ̀kùnu pòtɛɖopewo na klòsalò, na sìka, na èkpe xɔ̀asìwo, na ègbe hɔ̃ɛ titiwo ku àkpoxɔ̀nuwo[58], sɔ bɔ̀ ɖo ènu xɔ̀ àsì buwo ŋuti.

²⁸E na wo tù ènu ɖùɖu ɖopewo ku àvàwo cã na èlù ku èlì, na vɛ̃ yeye ku àmì. E tù èlãnyìpe vòvòvòwo, eye be tɔ̃ èkpawo na èlãhawo.

²⁹E sò èdùwo eye be ɖo ènyì, àlɛ̃ ku ègbɔwo be èlãhawo fuu, ɖoa, Mawu na ɛ̀ àdɔ̀kùnu sùgbɔ ŋutɔ.

³⁰Ezekìas ye xe èmɔ kè to ejia, na Gihɔ̀n be ètɔ̀ sàsraa, eye be ɖè èmɔ bu na èsìa, to gɔ̃mè, yì David be Èdùa be èwèɖoxɔ̀pe lɔ̀ge. Ènu sia ènu kè Ezekìas wɔ̀nàa, jènà e ji nyuɛ̃ ɖe.

³¹Gãkea, ekè àmèdɔ̃dɔ̃wo so Babɛ̀l be àgbònùglawo gbɔ va biɔ ɛ̀ ènyà sè, so ŋùdã be jèsìdo kèwo jɔ̀ lè ànyigbãa jia ŋutia, Mawu gble è ɖɛ, be yèa sɔ do è kpɔ, ne yèa sɔ nya ènu ɖe sia ɖe kè lè yebe èjì mèa.

³²Ezekìas be èfìɔɖùɖu be ŋutinyà kpɔ̀tɛawo ku yebe ènu jɔ̀jɔɛwɔ̀wɔ, lè Tɔhonɔ̀ be ŋùmè a, wo ŋlɔ̀ wo ɖo gblɔ̃ɖɛtɔ Ezayà, Àmos be èvia be àvìmènu[59] kpɔkpɔwo mè, lè Izràɛl ku Yudà be èfìɔwo be Xoma mè.

³³Ezekìas trɔ ŋùgbe, eye wo ɖì ì ɖo tɔgbeawo be àxàda mè, lè ètokɔ̃ɛ̃ kè ji David be jìjimèviwo be èyɔ̀dowo lèa ji. Yudà be dùkɔ̃a ku Yèruzàlɛm be dùkɔ̃a keŋu do bùbu e ŋuti, ekè be kua. Èvia Manasè ɖùfìɔ lè e yomè.