Read gen 2Kronikà 33 Bible Online

2Kronikà 33 - gen bible

2Kronikà 33

¹Manasè ɖo èpè woèvè, ekè be va èfìɔzìkpea jia. E ɖùfìɔ lè Yèruzàlɛm, èpè èkà ci woeàtɔ̃.

²E wɔ̀ èvuɛ̃ lè Tɔhonɔ̀ be ŋùmè, sɔ zɔ̃ ɖo dùkɔ̃ kèwo Tɔhonɔ̀ nyà lè Izràɛlviwo be ŋùkɔ̀a be ènu nyɔŋuwo wɔ̀wɔ ji.

³E gbìgbɔ̀ tù vɔsatèpe kèwo ètɔa Ezekìas gbã lè ètɔwo jia. E wɔ̀ vɔsakpewo na Baal be vòduwo, eye be wɔ̀ èkpeliwo na Aserà be vòduwo. E do ètagũ na wètriviwo, eye be sumɔ wo.

⁴E li vɔsakpewo ɖo Tɔhonɔ̀ be àxue kè ŋuti Tɔhonɔ̀ gblɔ̃ ɖo be: “Yèruzàlɛm ye nyikɔ nyè la nɔ̀ tɛ̀gbɛ̀!”[60].

⁵E li vɔsakpewo na jiŋùkusi be ènuwo keŋu, ɖo gbàjà èvèawo ji, lè Tɔhonɔ̀ be àxuea mè.

⁶Ye ŋutɔ sɔ èvia ŋusùviwo savɔ lè èzò mè, lè Bɛn-Hinɔ̀n be bàlìa mè. E wɔ̀nà èbo, kãnà àfã, wɔ̀nà àze eye be fɔ̃ Tɔhonɔ̀ be àdɔ̀mèzea.

⁷E sɔ àti kpàkpa ku èkpe tata kèwo be kpàawo ɖo Mawu be àxue kè ŋuti Mawu gblɔ̃ ɖo, na David ku na èvia Salomɔ̀n be: “Mù la sɔ nyikɔ nyè ɖo kuefãpe kèa mè ku Yèruzàlɛm kè mù cã, lè Izràɛl be kɔ̀tawo keŋu dòmèa, kaka sɔ yì.

⁸Ekèa ŋutia, nyè mu gbà la na Izràɛlviwo be àfɔ̀ la ɖè lè ànyigbã kè mù sɔ na woa tɔgbewoa[61] ji, ne wo gbe nɔ̀ ŋùzɔ̃, wɔ̀ ɖo ènu kèwo keŋu mù ɖo na wo, so èseawo ji, ɖoɖo ku ègbè kèwo mù do àsi na wo, to Mosè jiawo keŋu kpòa ò.”

⁹Gãkea, Manasè kplɔ̀ Yudàviwo ku Yèruzàlɛmviwo sɔ trãmɔ, àleke be wo wɔ̀ èvuɛ̃ wu dùkɔ̃ kèwo Tɔhonɔ̀ crɔ̃ lè Izràɛlviwo be ŋùkɔ̀awo.

¹⁰Tɔhonɔ̀ pò nupo na Manasè ku yebe dùkɔ̃a, vɔ̀a, wo mu sɔ èɖe lè e mè ò.

¹¹Ekèa ŋuti ye Tɔhonɔ̀ gbà kplɔ̀ Àsirìa be èfìɔa be àhùakplɔ̀tɔwo be àhùakɔ̃wo va kpe Izràɛlviwo ke. Àsirìa be àhùakɔ̃wo le Manasè àhùale, do è gàjɛ̃ kɔ̀sɔ̀ kɔsɔ, kplɔ̀ ɛ̀ yì Babɛ̀l.

¹²Lè yebe àkpɔ̃ mèa, Manasè ji Tɔhonɔ̀, yebe Mawu be màje, eye be bɔ̀bɔ ye ɖokoe ŋutɔ na Tɔhonɔ̀, tɔgbeawo be Mawu.

¹³Kè Manasè fã yɔ Mawu a, yebe kokopòpoa wɔ̀dɔ ɖo Tɔhonɔ̀ ji, eye Tɔhonɔ̀ ɖo èto yebe àlenanaa. Tɔhonɔ̀ kplɔ̀ ɛ̀ gbɔ̀ va Yèruzàlɛm, ɖo yebe èfìɔzìkpe ji. Wàlɛbɛ ŋua, Manasè nya be Tɔhonɔ̀ ye nyi Mawu.

¹⁴E yomè a, Manasè gbìgbɔ̀ tù èglì ɖo David be èdùa godo, to èwèɖoxɔ̀pe na Gihɔ̀n be èsìsopea, to bàlìa mè, kaka yì àgbo kè wo yɔna be ètɔ̀mèlã be àgboa nu, trɔ do Ofɛ̀l be ètokɔ̃ɛ̃a[62]. E na èglìa gbà yìji kpe è[63]. E ɖo àhùagawo ɖo àgbògbò-dùwo keŋu nu, lè Yudà-nyigbã ji.

¹⁵E ɖè èdù bu mè be vòduwo jo, eye be hɔ̃ legbaa jo lè Tɔhonɔ̀ be àxuea mè. Nène a ke ye be gbã vɔsakpe kèwo be wɔ̀ ɖo Mawuxɔa be ètokɔ̃ɛ̃a ji ku Yèruzàlɛm be èdùa mèawo. E fɔ̀ wo to lè èdùa mè, yì dãŋùgbe.

¹⁶Ekèa yomè a, e gbìgbɔ̀ li Tɔhonɔ̀ be vɔsakpea, e wɔ̀ ŋuti fàfa ku àkpedodo vɔsa le e ji, eye be gblɔ̃ na Yudàviwo be wo ne nɔ sɛ̃ Tɔhonɔ̀, Izràɛl be Mawu a.

¹⁷Gãkea, dùkɔ̃a gbà kpɔ̀tɔ̀ sanavɔ lè ètowo ji, vɔ̀a, Tɔhonɔ̀, woabe Mawu be gogo kpò wo sanavɔa na.

¹⁸Manasè be èfìɔɖùɖu be ŋutinyà kpɔ̀tɛawo ku yebe kuefã na yebe Mawu, kudo ènyà kè ènumè kpɔtɔwo gblɔ̃ na ɛ̀ lè Tɔhonɔ̀, Izràɛl be Mawu a be nyikɔ mèawoa lè Izràɛl be èfìɔwo be ŋutinya xomawo mè.

¹⁹Yebe kuefã ku lekè yebe àlenana wɔ̀dɔ ɖo Mawu ji ɖo, kudo yebe ènuvuɛ̃wo keŋu, gbàkudo ànùkua màwɔ̀, àfi kèwo be tù kuefãpewo ɖo, lè ètowo ji, àfi kèwo be li Aserà be èkpeliwo ku legbawo ɖo, gbɔ̀xue be va bɔ̀bɔ̀ ye ɖokoea, wo ŋlɔ̀ wo ɖo 'Hozayì be ŋutinya-xomawo' mè.

²⁰Manasè trɔ ŋùgbe, yì tɔgbeawo gbɔ, eye wo ɖì ì ɖo yebe èfìɔsa mè. Èvia Amɔ̀n ɖùfìɔ ɖo e tèpe.

²¹Amɔ̀n ɖo èpè èwì vɔ ènè, wàlɛbɛ kè be xɔ̀ èfìɔzìkpea. E ɖùfìɔ èpè èvè, lè Yèruzàlɛm.

²²E wɔ̀ èvuɛ̃ lè Tɔhonɔ̀ be ŋùmè, sìgbè lekè ètɔa Manasè wɔ̀ ɛ̀a nène. Amɔ̀n sumɔ eye be savɔ na legba kèwo ètɔa Manasè liawo.

²³Vɔ̀a, tovò na ètɔa Manasèa, Amɔ̀n mu bɔ̀bɔ̀ ye ɖokoe lè Tɔhonɔ̀ be ŋùkɔ̀ ò. Nène a, Amɔ̀n na yebe nuvuɛ̃a gbà sùgbɔ kpe è.

²⁴Amɔ̀n be àgbònùglawo doxa na ɛ̀, eye wo wù ì, lè yebe èfìɔsaa mè.

²⁵E yomè a, èdùamètɔwo wù àmè kèwo keŋu doxa na Amɔ̀n èfìɔ sɔ wùa, eye wo sɔ èvia Yosìas ɖo èfìɔ ɖo e tèpe.