Read gen 2Kronikà 34 Bible Online

2Kronikà 34 - gen bible

2Kronikà 34

¹Yosìas ɖo èpè ènyi, wàlɛbɛ kè be xɔ̀ èfìɔzìkpea. E ɖùfìɔ èpè ègbã vɔ ɖèka lè Yèruzàlɛm.[64]

²E wɔ̀ ènu kè jɔ̀ a lè Tɔhonɔ̀ be ŋùmè, eye be to tɔgbea David be àfɔ̀tope, èmɔ mà trã, yì ɖùsi, àlo, èmìɔ̃ mè ò.

³Lè yebe èfìɔɖùɖu be èpè ènyigɔ̃a mèa, wàlɛbɛ kè be gbà nyi ɖèvi kpòa, e tɔ tɔgbea David be Mawu jiji. Lè èpè woèvègɔ̃a mèa, e tɔ sɛ̃sɛ̃tèpewo lè ètowo ji, Aserà be èkpeliwo, legba kpàkpa ku legba tatawo gbãgbã lè Yudà-nyigbã ji ku Yèruzàlɛm be èdùa mè.

⁴Ye ŋutɔ na wo kãkã Baal be vɔsakpewo, wo mù ègbe hɔ̃ɛ titi be vɔsakpe kèwo ye lè woabe tamèa, wo gbã Aserà be èkpeliwo, legba ku èkpe tatawo[65]. Ekè be gbã ènu kèawoa, e flì wo wli wli, sɔ kãkã ɖo àmè kèwo ye savɔ na woawo be èyɔ̀dowo ji.

⁵E tɔzɔ̀ hũnɔ̀wo be èpuwo lè woabe vɔsakpewo ji[66], eye be gbìgbɔ̀ kɔ̀ Yudà ku Yèruzàlɛm ŋuti.

⁶Lè Manasè be èdùwo mè, lè Efràyim be èdùwo mè ku Simeɔ̀n be èdùwo mè, kaka va ɖo Neftalì be èdùwo ku èdù kèwo pòxla woawo mèa,

⁷e gli vɔsakpewo ku Aserà be èkpeliwo, tùkù legbawo sɔ trɔ èkɔ, kãkã lifi be vɔsa kpewo hãnya-hãnya lè Izràɛl-nyigbãa keŋu ji. Ekèa yomè a, e trɔ yì Yèruzàlɛm.

⁸Lè Yosìas be èfìɔɖùɖu be èpè woènyigɔ̃a mèa, ekè be kɔ̀ ànyigbãa ku Mawu be àxuea ŋuti vɔ̀a, Yosìas dɔ̃ Safàn, Àsalìa be èvia ku Màaseyà, èdùa jiɖùtɔa kudo Yoàh, Yoahaz, èfìɔ be cãmìa, be woa jrà Tɔhonɔ̀, yèbe Mawu be àxuea ɖo.

⁹Wo yì Hilkiyàhu, hũbonɔ gãa gbɔ, sɔ ègà kè wo hɛ̃ va Mawu be àxuea mè, eye Levì kèwo ɖiana àgboa nuawo xɔ̀ lè Manasèviwo, Efràyimviwo, Izràɛlviwo, Yudàviwo, Bɛnyamìnviwo ku Yèruzàlɛmviwo keŋu sia na ɛ̀.

¹⁰Ekèa yomè a, wo sɔ ɛ̀ do àsi na àmè kèwo wo cã be woa kpɔ èdɔa ji, lè Tɔhonɔ̀ be àxuea mèawo. Àmè kèawo tufɛ̃ na èdɔwɔ̀tɔ kèwo gbìgbɔ̀ le jrà Tɔhonɔ̀ be àxuea ɖo, eye wo gbìgbɔ̀ na ɛ̀ àgbèa.

¹¹Wo sɔ ègàa na àtikpàtɔwo ku èxɔ̀tùtɔwo, ne woa sɔ gbìgbɔ̀ jrà èxɔ̀ kèwo Yudà be èfìɔwo gble ɖɛ, eye wo le gbãawo.

¹²Àmèawo wɔ̀ èdɔawo ku ànùkua. Yahat ku Obadìa nɔ̀ woa nu. Wo nyi Levìwo, Merarì ku Zakarìa be èviwo. Mesulàm, so Kehàt be jìjimèviwo dòmèa bɔ̀ ɖo woa ŋuti. Woawo ye nɔ̀ ŋùkɔ̀ na èdɔwɔ̀tɔwo. Levì kèwo pònà èhàjìnuwo nyuɛ̃ ɖe a,

¹³le kplɔ̀ àgbãdrotɔawo, eye wo le kpɔ èdɔ vòvòvò ɖe sia ɖe wɔ̀tɔwo ji. Levìawo dòmètɔ buwo nyi èdɔnunɔ̀tɔwo, ènuŋlɔ̀tɔwo ku àgbonuɖiatɔwo.

¹⁴Wàlɛbɛ kè wo ji la yì xɔ̀ ègà kè wo hɛ̃ va Tɔhonɔ̀ be àxuea mèa, Hilkiyàhu, hũbonɔa fɔ̀ Tɔhonɔ̀ be èse xoma kè be na, to Mɔsè jia.

¹⁵Hilkiyàhu gblɔ̃ na Safàn, ènuŋlɔ̀tɔa be: “Mù kpɔ èse xoma a lè Tɔhonɔ̀ be àxuea mè.” Eye be sɔ ɛ̀ na Safàn.

¹⁶Safàn sɔ xoma a yì na èfìɔa, eye be gbà gblɔ̃ na èfìɔa be: “Sumɔvi wòwo le wɔ̀ èdɔ kèwo wò do àsi na woa.

¹⁷Wo sɔ Tɔhonɔ̀ be àxuea be ègàa tufɛ̃, eye wo sɔ do àsi na èdɔjikpɔtɔwo ku èdɔwɔ̀tɔwo.”

¹⁸Eye Safàn, ènuŋlɔ̀tɔa gbà gblɔ̃ na èfìɔa be: “Hilkiyàhu, hũbonɔa sɔ xoma ɖe na mù”. E hlɛ̃ xoma a, lè èfìɔa be ŋùku mè.

¹⁹Ekè èfìɔa sè èsea be ènyàwoa, èfìɔa zɛ̃ yebe àwùwo lè èkɔ̀.

²⁰E yomè a, e sɔ ègbè kèa do àsi na Hilkiyàhu, na Ahikàm, Safàn be èvi, na Abdɔ̀n, Mikà be èvi, na ènuŋlɔ̀tɔ Safàn ku Asayà, èfìɔ be sumɔ̃via be:

²¹“Mì yì biɔ Tɔhonɔ̀, ènyà gɔ̃mè na mù, na Izràɛlvi ku Yudàvi kpɔ̀tɛawo, so ènu kè wo ŋlɔ̀ ɖo xoma kè wo fɔ̀a mèa ŋuti. Ɖoa, àdɔ̀mèze gã ɖe ye Tɔhonɔ̀ do do mi, ekè mia tɔgbewo mu zɔ̃ ɖo Tɔhonɔ̀ be ègbè ji ò a. Wo mu wɔ̀ ɖo ènu kèwo keŋu wo ŋlɔ̀ ɖo xoma kèa mèa ji ò.”

²²Hilkiyàhu ku àmè kèwo èfìɔa dɔ̃ bɔ̀ ɖo e ŋutiawo yì nyɔ̃nù gblɔ̃ɖɛtɔ, Huldà, Salum kè kpɔna àwùwo jia be èsrɔ̃ gbɔ. Salum nyi Tokhat be èvi, eye Tokhat nyi Hasrà be èvi. Huldà nɔ̀nà Yèruzàlɛm, lè èkɔ yeyea mè. Wo do àŋɛ̀a na ɛ̀.

²³E ɖo e ŋuti na wo be: “Ènyà kè Tɔhonɔ̀, Izràɛl be Mawu a gblɔ̃a ye nyi ekèa: 'Mì gblɔ̃ na ŋusù kè dɔ̃ mì ɖoɖa mùa be:

²⁴Ènyà kè Tɔhonɔ̀ gblɔ̃a ye nyi be: Mù la hɛ̃ èvuɛ̃ va ànyigbã kèa ku e ji nɔ̀tɔwo ji! E la nyi kpɛ̃sɛ̃ kèwo keŋu wo ŋlɔ̀ ɖo xoma kè wo hlɛ̃ lè Yudà be èfìɔa be ŋùkɔ̀awo ɖèɖe!

²⁵Ekè ànyigbãa ji nɔ̀tɔwo gble mù ɖɛ, le tɔzò lifi na vòduwo, le sɔ woabe àlɔ̀nudɔwo keŋu le do àdɔ̀mèze na mùa, àdɔ̀mèze nyèa la gbã ɖo ànyigbã kèa ji, eye e nu mu la sò ò!

²⁶Vɔ̀a, mì gblɔ̃ na Yudà be èfìɔ kè dɔ̃ mì ɖoɖa be mìa va biɔ ènyà Tɔhonɔ̀ sè a be: Ènu kè Tɔhonɔ̀, Izràɛl be Mawu a gblɔ̃ so ènyà kè wo sè a ŋutia ye nyi ekèa:

²⁷Ekè àpo èjì sè è, eye wò bɔ̀bɔ̀ ɖokoe wò, lè Tɔhonɔ̀ be ŋùkɔ̀, wàlɛbɛ kè wò sè ènyà kè be gblɔ̃ so tèpe kèa ku e ji nɔ̀tɔwo ŋutia, kè wò bɔ̀bɔ̀ ɖokoe wò lè àpe ŋùkɔ̀, eye wò zɛ̃ àpo àwùwo, fã àvi, lè àpe ŋùmè a, nyè cã, mù ɖo èto wò!' Tɔhonɔ̀ ye gblɔ̃ ɛ̀.”

²⁸“Fifìa, mù kpɔ be mù la bɔ̀ wò ɖoɖu ku tɔgbe wòwo. Wo la ɖì wò lè ŋuti fàfa mè, ɖo èyɔ̀do wò mè. Ŋùkuvi wòwo mu la kpɔ gbledo kèwo mù la hɛ̃ va tèpe kèa ku e ji nɔ̀tɔwo ji ò.” Ekèa yomè a, àmè dɔ̃dɔ̃awo sɔ ɖoŋutia yì na èfìɔa.

²⁹Eye èfìɔa yɔ Yudà-nyigbã jitɔwo ku àmèsĩsĩwo keŋu bɔ̀.

³⁰Èfìɔa yì Tɔhonɔ̀ be kuefãpea ku Yudà ŋusùwo, Yèruzàlɛmtɔwo, hũbonɔwo ku Levìwo, àmèwo keŋu, so sĩsĩawo ji, va vifɛ̃wo ji. E hlɛ̃ ènyà kè lè zòɖùɖu xoma kè wo fɔ̀ lè Tɔhonɔ̀ be kuefãpea mèa ɖo èto mè na wo.

³¹Èfìɔa nɔ̀tè ɖo ye tèpea, eye be gbìgbɔ̀ ɖùzòa lè Tɔhonɔ̀ be ŋùmè, be yè la nɔ̀ Tɔhonɔ̀ yomè, yè la le yebe èsewo, ègbèɖèɖewo ku yebe ɖoɖowo ɖo àsi, ku èjì blibo, ku èkla blibo, eye, yè la nɔ wɔ̀ ɖo zòɖùɖu be ènyà kèwo wo ŋlɔ̀ ɖo xoma kèa mèa ji.

³²Ekèa yomè a, e na Yèruzàlɛmtɔwo ku Bɛnyamìn-nyigbã jitɔwo keŋu ɖo zòɖùɖua mè. Eye Yèruzàlɛmtɔwo zɔ̃ ɖo Mawu, woa tɔgbewo be Mawu be zòɖùɖua nu.

³³E yomè a, Yosìas ɖè ènu nyɔŋuwo ku legbawo keŋu jo lè ànyigbã kèwo keŋu nyi Izràɛlviwo tɔ̀awo ji, eye be na àmè sia àmè kè lè Izràɛl-nyigbã jia sumɔ Tɔhonɔ̀, woabe Mawu a. Lè yebe àgbè ŋùkèkèwo mèa, àmè ɖekpe mu trɔ lè Tɔhonɔ̀, woa tɔgbewo be Mawu a yomè ò.