Read gen 2Kronikà 35 Bible Online

2Kronikà 35 - gen bible

2Kronikà 35

¹Yosìas ɖù Toŋutivayì be àzãa na Tɔhonɔ̀, lè Yèruzàlɛm, eye wo sɔ Toŋutivayì be àlɛ̃via savɔ, lè wètri cucugbãa be ŋùkèkè woènègɔ̃a ji.

²E do èdɔ àsi na hũbonɔwo, eye be do ŋusɛ̃ wo ɖo woabe èdɔwo nu, lè Tɔhonɔ̀ be àxuea mè.

³E gblɔ̃ na Levì kèwo ye fiɔna ènu Izràɛl bliboa, àmè kèwo ŋuti wo kɔ̀ na Tɔhonɔ̀ ku ènyà kèawo be: “Mì sɔ àɖakà kɔ̀kɔ̀ɛa ɖo àxue kè Salomɔ̀n, David, Izràɛl be èfìɔa be èvi tùa mè. Mu la gbà nyi àgbã, mì la nɔ dro ɖo àbɔta ò. Eye, fifìa, mì sumɔ Tɔhonɔ̀, mìabe Mawu a ku Izràɛl, yebe dùkɔ̃a.

⁴Mì zɔ̃ ɖo ɖoɖo kè Izràɛl be èfìɔ David ku èvia Salomɔ̀n ŋlɔ̀ ɖɛa ji, ne mìa nɔ̀ kɔ̀ta ku xòmèwo mè, lè èdɔ[67] kèwo wo do àsi na mìawo nu.

⁵Mì nɔ̀ Levìwo be xòmèwo be mamãwo mè, lè kɔ̀kɔ̀ɛpea, ɖo kɔ̀ta ɖe sia ɖe be xòmè vòvòvò kèwo nyi mìa nɔ̀viwoa nu,

⁶eye mì sɔ Toŋutivayì be àlɛ̃via nɔ savɔ, mìa nɔ kɔ̀ mìa ɖokoewo ŋuti, eye, mìa nɔ sɔ̀gbè ɖo mìa nɔ̀viwo ŋuti, ne woa nɔ wɔ̀ ɖo Tɔhonɔ̀ be ègbè kè be do àsi na Mosè a ji.”

⁷Èfìɔ Yosìas ŋutɔ sɔ àlɛ̃vi ku ègbɔvi hotu woeàtɔ̃ na, na àmè kèwo kpata lè funuawo be Toŋutivayì vɔsa, sɔ bɔ̀ ɖo ènyì hotu ɖèka èkà èwì vɔ àtɔ̃ ŋuti. Wo ɖè woa kpata so èfìɔ ŋutɔ be ènu ɖoɖowo mè.

⁸Èfìɔa be àgbònùglawo cã na ènu fàa, dùkɔ̃a, hũbonɔwo ku Levìwo: Hilkiyà, Zakarìa, ku Yehìɛl kèwo kpɔna Mawu be àxuea jiawo, na Toŋutivayì be àlɛ̃vi hotu ɖèka èkà èwì vɔ àtɔ̃ ku ènyì èkà takpo ci àtɔ̃, hũbonɔwo.

⁹Konanìa ku nɔ̀viawo, Semayà kudo Netaɛl, Asabìa, Yehìɛl gbàkudo Yosabad, Levìwo be ŋùkɔ̀nɔ̀tɔwo na àlɛ̃vi hotu èvè èkà èwì vɔ àtɔ̃, na Levìwo be Toŋutivayì be vɔ̀sawo.

¹⁰Ekèa yomè a, wo ɖo èdɔawo cã ɖo ɖoɖo nu: hũbonɔwo lè woa tèpewo, eye Levìwo lè woabe mamãwo mè, sɔ zɔ̃ ɖo èfìɔa be ègbèɖèɖe ji.

¹¹Wo wù Toŋutivayì be àlɛ̃viawo, eye hũbonɔwo wu èhũ kè wo sɔ do àsi na woa, wàlɛbɛ kè Levìwo le ko èlãawoa.

¹²Wo sɔ ènumème vɔsa be èlãa ɖo àkpa ɖèka, ne woa sɔ na dùkɔ̃a, ɖo kɔ̀tawo be xòmèwo be mamã nu, ne woa sɔ savɔ na Tɔhonɔ̀, sɔ zɔ̃ ɖo èse kè lè Mosè be xoma a mèa ji. Nène a ke ye wo wɔ̀ na ènyìawo cã yeŋu.

¹³Wo mè Toŋutivayì be èlãawo lè èzò nu, sìgbè leke wo ŋlɔ̀ ɛ̀ ɖɛa nène, eye wo ɖà vɔsa kɔ̀kɔ̀ɛ be èlãawo lè èzewo, gàzewo, àgbãawo mè, eye wo mã wo kaba na dùkɔ̃a mèviwo keŋu.

¹⁴Ekèa yomè a, wo ɖà ènu na woa ɖokoewo, ku hũbonɔwo, ɖoa, hũbonɔawo, sìgbè Arɔ̀n be jìjimèviwo nènea, wo wɔ̀ ènumème vɔ̀sawo ku àmìawo, kaka èwè ɖo èxɔ̀. Ekèa ŋuti ye Levìawo ɖà ènu na woa ɖokoewo ku hũbonɔ kèwo ye nyi Arɔ̀n be jìjimèviwo ɖo.

¹⁵Èhũpòtɔawo, Àsaf be jìjimèviwo lè tèpe kè David, Àsaf, Hemàn ku Yedutun, èfìɔa be ènumèkpɔtɔa ɖo na woa[68]. Àgbonu ɖiatɔwo mu hiã la jo lè àgboawo nu, lè woa tèpewo ò, ɖoa, woa nɔ̀vi Levìwo ɖà ènu na wo.

¹⁶Nène a ye wo wɔ̀ Tɔhonɔ̀ be sùmɔ̀ sumɔ be èdɔa, gbè ŋua gbè, sɔ ɖù Toŋutivayìa, wɔ̀ ènumème vɔsa, lè Tɔhonɔ̀ be vɔsakpea ji, sɔ zɔ̃ ɖo èfìɔ Yosìas be ègbèɖèɖe ji.

¹⁷Izràɛlvi kèwo vaawo ɖù Toŋutivayì be àzãa, gà ŋua mè, eye wo ɖù kpɔ̃nɔ àkpiti[69] be àzãa, ŋùkèkè adrɛ̃.

¹⁸So gblɔ̃ɖɛtɔ Samuɛl be hùenua, wo mu ɖù Toŋutivayì lekea kpɔ, lè Izràɛl-nyigbã ji ò. Izràɛl be èfìɔ ɖekpe cã mu ɖù Toŋutivayì ɖe lekea, sìgbè lekè Yosìas ɖù ìa nène, ku hũbonɔwo, Levìwo, eye Yudàviwo ku Izràɛlviwo keŋu va kudo Yèruzàlɛmviwo ò.

¹⁹Wo ɖù Toŋutivayì kèa lè Yosìas be èfìɔɖùɖu be èpè woènyigɔ̃a mè.

²⁰Ekèawo keŋu yomè a, kè Yosìas jrà Mawuxɔa ɖo vɔ̀a, Ejiptè be èfìɔ, Nekò jè èmɔ, la yì wɔ̀ àhùa lè Karkemìs, lè Efratà be ètɔ̀a to. Yosìas to yì kpã ŋùkɔ̀ ɛ̀.

²¹Vɔ̀a Nekò do àŋɛ̀ ɖoɖa ɛ̀ be: “Àjrè kɛ ye lè nyè ku wò dòmè ò, Yudà be èfìɔ? Mu nyi èwò ye mù le ɖè àhùa kpe na egbè ò, vɔ̀ bòhũa, kɛ̃tɔ nyè kè mù ɖo ènyà kua ye. Mawu gblɔ̃ na mù be ma ɖèbla. Ye ŋutia, mù gbà xe èmɔ na Mawu ò, ɖoa, e lè ku mù. Ne mu nyi nène ò a, e la crɔ̃ wò.”

²²Gãkea, Yosìas mu trɔ lè e ŋuti ò[70]. Vɔ̀a, e ji èmɔ ɖe nu kè be la sɔ kpe àkɔ ku Nekòa. Mu ɖo èto Nekò be ènyà kè so Mawu be ɖoɖo mèa ò, eye Yosìas ɖè àhùa kpe na Nekò[71], lè Megidò be gbàjàa ji.

²³Ekè àŋùtidàtɔwo ɖà àŋùti èfìɔ Yosìasa, e gblɔ̃ na yebe ŋutimewo be: “Mì kɔkɔ mù jo. Mù xɔ̀ àbì veve ɖe ŋutɔ!”

²⁴Yebe ŋutimewo kɔ ɛ̀ jo lè yebe àhùakèkea mè, ɖo àhùakèke bu mè, eye wo kɔ ɛ̀ yì Yèruzàlɛm. E ku, eye wo ɖì ì ɖo tɔgbeawo be èyɔ̀do mè, eye Yudà-nyigbã jitɔwo ku Yèruzàlɛmtɔwo keŋu lòfũ ɖo Yosìas ta.

²⁵Yeremìa kpà àvifãhà ɖo Yosìas ŋuti. Kaka va na egbèa, hàsìnɔ̀ ŋusùwo ku nyɔ̃nùwo jìnà àvifãhà, yɔna Yosìas be nyikɔ. Ekèa nyi èkɔ̀nu lè Izràɛl, eye wo ŋlɔ̀ wo ɖo àvifãhà xomawo mè.

²⁶Yosìas be èfìɔɖùɖu ŋutinyawo ku yebe ènu jɔ̀jɔɛ wɔ̀wɔ, sɔ zɔ̃ ɖo ènu kè wo ŋlɔ̀ ɖo Tɔhonɔ̀ be èseawo mèa ji,

²⁷yebe ŋutinyà, so cucugbãa ji, va kɔ̀ ɖo kpɔ̀tɛawo jia, wo ŋlɔ̀ wo ɖo Izràɛl be èfìɔwo be ŋutinyà xoma mè.