Read gen 2Kronikà 36 Bible Online

2Kronikà 36 - gen bible

2Kronikà 36

¹Yudà-nyigbã ji dùkɔ̃wo sɔ Yoahaz, Yosìas be èvia ɖofìɔ, lè Yèruzàlɛm, ɖo ètɔa tèpe.

²Yoahaz ɖo èpè èwì vɔ ètɔ̃ (23), wàlɛbɛ kè be va àzìkpea jia, eye be ɖùfìɔ wètri ètɔ̃, lè Yèruzàlɛm.

³Ejiptè be èfìɔ, Nekò ɖè Yoahaz lè àzìkpea ji, lè Yèruzàlɛm, eye be kã ègà na Yudàviwo be woa tu klòsalò-ga talɛ̃ŋutò èkà èvè takpo ku sìka-gà talɛ̃ŋutò ɖèka.

⁴Ejiptè be èfìɔa sɔ Yoahaz be nɔ̀vi, Ɛliakim ɖofìɔ, lè Yèruzàlɛm, ɖo Yudà-nyigbã ku Yèruzàlɛm nu. E trɔ Ɛliakim be nyikɔ, sɔ wɔ̀ Yehoyakim. Nekò, Ejiptè be èfìɔa kplɔ̀ Yehoyakim be fòfo[72], Yoahaz jo yì Ejiptè.

⁵Yehoyakim ɖo èpè èwì vɔ àtɔ̃, gà kè mè be xɔ̀ èfìɔzìkpea. E ɖùfìɔ èpè woeɖèka lè Yèruzàlɛm. E wɔ̀ ènu kè mu jè ò a, lè Tɔhonɔ̀, yebe Mawu be ŋùmè.

⁶Babɛ̀l be èfìɔ, Nèbukàdnezà ɖè àhùa kpe na ɛ̀, eye be do è gàjɛ̃ be kɔ̀sɔ̀ kɔsɔ[73], kplɔ̀ ɛ̀ yì Babɛ̀l.

⁷Nèbukàdnezà sɔ ènuzãzãwo cã lè Tɔhonɔ̀ be àxuea mè, yì Babɛ̀l, eye be sɔ wo ɖo yebe èfìɔsa[74] mè, lè Babɛ̀l.

⁸Yehoyakim be èfìɔɖùɖu be ŋutinyà kpɔ̀tɛawo ku ènu nyɔŋu kèwo be wɔ̀ kudo ènu kèwo keŋu jɔ̀ ɖo e jiawo lè Izràɛl ku Yudà be èfìɔwo be ŋutinyà xoma mè. Èvia Yehoyakin ɖùfìɔ ɖo e tèpe.

⁹Yehoyakin ɖo èpè ènyi, ekè be xɔ̀ èfìɔzìkpea. E ɖùfìɔ wètri ètɔ̃, ŋùkèkè èwo, lè Yèruzàlɛm. E wɔ̀ ènu kè mu jè ò a, lè Tɔhonɔ̀ be ŋùmè.

¹⁰Ekè èpèa trɔa, èfìɔ Nèbukàdnezà dɔ̃, wo kplɔ̀ ɛ̀ va Babɛ̀l, eye wo fɔ̀ ènuzãzã xɔ̀ àsìwo cã so Tɔhonɔ̀ be àxuea mè, bɔ̀ ɖo e ŋuti[75]. Nèbukàdnezà sɔ Yehoyakin nɔ̀vi, Sedekìa ɖofìɔ[76] lè Yudà-nyigbã ji ku Yèruzàlɛm.

¹¹Sedekìa ɖo èpè èwì vɔ ɖèka, ekè be xɔ̀ èfìɔzìkpea. E ɖùfìɔ èpè woeɖèka lè Yèruzàlɛm.

¹²E wɔ̀ èvuɛ̃ lè Tɔhonɔ̀, yebe Mawu a be ŋùmè, eye mu bɔ̀bɔ̀ ye ɖokoe lè Yeremìa, gblɔ̃ɖɛtɔ kè lè pò nupo lè Tɔhonɔ̀ be nyikɔ mèa be ŋùkɔ̀ ò.

¹³E jè àgla cã ɖo èfìɔ Nèbukàdnezà kè na be fìã àjɔ̀gbè lè Mawu be nyikɔ mèa ŋuti. E lìa èkɔ̀, eye be trì èjì[77], ekè be la trɔ jè ŋùkɔ̀ Tɔhonɔ̀, Izràɛl be Mawu a bòhũa.

¹⁴Nène a ke, hũbonɔwo be ŋùkɔ̀nɔ̀tɔwo keŋu ku dùkɔ̃a be ànùkua màwɔ̀a cã le yì e ji. Wo kplɔ̀ dùkɔ̃wo be ènu nyɔŋu wɔ̀wɔwo keŋu do, eye wo ɖìgbɔ Tɔhonɔ̀ be kuefãpe kè ŋuti be kɔ̀ lè Yèruzàlɛm, na ye ɖokoea.

¹⁵Tɔhonɔ̀, woa tɔgbewo be Mawu pò nupo na wo eji-eji, to yebe àmèdɔ̃dɔ̃wo ji, ɖoa, yebe dùkɔ̃a be ènu le wɔ̀ ŋuzĩzĩ na ɛ̀, eye be le ku ŋuzĩzĩ na yebe nɔ̀pea.

¹⁶Vɔ̀a, wo kò Mawu be àmèdɔ̃dɔ̃awo, crì yebe àŋɛ̀doawo, do ŋùkpɛ̃ yebe gblɔ̃ɖɛtɔawo, kaka va na gà kè mè Tɔhonɔ̀ be àdɔ̀mèzea hɔ̃ ɖo yebe dùkɔ̃a ŋuti, eye ŋùgbeyìyi ɖekpe mu gbà lè ò a.

¹⁷Ekèa ŋuti ye Tɔhonɔ̀ na Kaldea be èfìɔa ɖè àhùa kpe na yebe dùkɔ̃a. Nène a, dùkɔ̃a be ɖèkajɛwo ku ci Kaldea be èfìɔa be èwui nu, lè kɔ̀kɔ̀ɛpea. Mu ku ŋuzĩzĩ na ɖèkajɛ, àlo, tùgbɛ̀jɛ, àmè sĩsĩ, àlo ɖèvi ò. Mawu do woa kpata àsi na Nèbukàdnezà.

¹⁸E fɔ̀ mawuxɔa mè be ènuzãzãwo, viviawo ku gãgãwo keŋu jo yì Babɛ̀l, eye be fɔ̀ Tɔhonɔ̀ be àxuea be àdɔ̀kùnuwo, èfìɔ xòmè be àdɔ̀kùnuwo ku èfìɔ be àgbònùglawo tɔ̀awo keŋu jo.

¹⁹Wo tɔzò Mawu be àxue eye wo gbã Yèruzàlɛm be èglìawo. Wo tɔzò yebe èfìɔsawo keŋu-keŋu[78], eye wo gbã ènu xɔ̀ àsìwo hãnya-hãnya.

²⁰Ekèa yomè a, Nèbukàdnezà kplɔ̀ àmè kèwo mu ci èwui nu ò a àhùalewo, yì Babɛ̀l, ne woa yì nyi kluviwo na ye ŋutɔ ku èviawo, kaka na hùenu kè Pɛrsìatɔwo be èfìɔɖùɖu la vaa.

²¹Nène a ye Tɔhonɔ̀ be ènyà kè be gblɔ̃ to gblɔ̃ɖɛtɔ Yeremìa be ènu mè be: “Ànyigbã a jitɔwo la ɖù woabe jɛ̃gbɔ̃zãwo be jɛ̃gbɔ̃gbɔ̃a, wo la sɔ woabe èfùlòlo be àzãwo keŋu sɔ gbɔ̃jɛ̃, kaka na gà kè mè èpè èkà takpo ci èwo la sùa” la va e mèa yeŋu[79].

²²Lè Korɛ̀s[80], Pɛrsìa be èfìɔ be èfìɔɖùɖu be èpè cucugbãa mèa, zɔ̃ ɖo Tɔhonɔ̀ be ènyà kè be gblɔ̃ to Yeremìa be ènu mè jia, Tɔhonɔ̀ hũhũ èjì na Korɛ̀s, Pɛrsìa be èfìɔa, ne bèa ɖè ègbèfã lè yebe èfìɔdua keŋu mè, eye woa ŋlɔ̀ ɛ̀ ɖɛ be:

²³“Korɛ̀s, Pɛrsìa be èfìɔa le gblɔ̃ be: 'Tɔhonɔ̀, jiŋùkusi be Mawu a sɔ ànyigbã ji be èfìɔduwo keŋu na mù, eye be ɖo è na mù be ma tù àxue na yè, lè Yèruzàlɛm, lè Yudà be ànyigbã ji. Yebe dùkɔ̃mèvi ɖekpekpe kè lè mìa dòmèa ne so, ne bèa jè èmɔ, eye Tɔhonɔ̀, yebe Mawu a ne nɔ̀ ku ì.'”