Read gen 2Kronikà 4 Bible Online

2Kronikà 4 - gen bible

2Kronikà 4

¹E wɔ̀ gàjɛ̃ vɔsakpe kè dìdì àbɔglìgo èwìa; e kèkè àbɔglìgo èwì, eye be kɔ yì èji àbɔglìgo èwo.

²E srè ègà sɔ wɔ̀ àdàwa gãa. Àdàwa gãa mè sòso lè dòdò mè lè àbɔglìgo èwo, eye be lè klòbòtò. E yì èji àbɔglìgo àtɔ̃ eye èkà kè be dìdì mè nyi àbɔglìgo ègbãa, la trɔ do è kpe do.

³Ènyì be èkpetatawo trɔ do, lè gɔ̃mè na àdàwa gãa, eye èwo lè àbɔglìgo ɖe sia ɖe ji, kpe do, lè àdàwa a gɔ̃mè. Ènyì kèawo lè èflì èvè ji, eye wo srè ègà ènu ɖèka, sɔ mè wo ku àdàwa a.

⁴Àdàwa gãa nɔ̀ ènyì woèvè ji: Ètɔ̃ trɔ ɖoɖa àvego, ètɔ̃ ɖoɖa èwèɖoxɔ̀pe, ètɔ̃ ɖoɖa àpùgo, eye ètɔ̃ ɖoɖa èwèzɛ̃pe. Àdàwa gãa nɔ̀ woa ji, eye woabe ègũinuwo trɔ ɖoɖa àdàwa gãa gɔ̃mè.

⁵Àdàwa gãa be tìtri mè sɔ̀ ku àlɔ̀gba ɖèka be kèkemè. Wo trɔ àsi lè yebe èto mè ŋuti, eye be lè sìgbè kogò kè ɖo zògbè sepòpo ɣe be nɔ̀nɔmèa nène. E xɔ̀nà èsì jije-gò àkpe ètɔ̃ (3000).

⁶E wɔ̀ gàgbã èwo; e sɔ àtɔ̃ ɖo ɖùsi mè, eye be sɔ àtɔ̃ ɖo èmìɔ̃ mè, na ènuwo be kɔklɔ. Ekèawo mè wo klɔna ènu kèwo wo zã, sɔ wɔ̀ ènumème vɔsaawo lè. Vɔ̀a, hũbonɔwo lènà woa ɖokewo ɖì, lè àdàwa gãa mè.

⁷E wɔ̀ sìka kãligbɛ̃-ti èwoawo, zɔ̃ ɖo ɖoɖo kèwo be xɔ̀a nu, eye be sɔ wo ɖo mawuxɔa mè. E ɖo àtɔ̃ ɖo ɖùsi mè, eye be ɖo àtɔ̃ ɖo èmìɔ̃ mè.

⁸E wɔ̀ èkplɔ̃ èwo, sɔ ɖo mawuxɔa mè. Àtɔ̃ ɖo ɖùsi mè, àtɔ̃ ɖo èmìɔ̃ mè. E wɔ̀ sìka kogò èkà èvè takpo na èhũ wuwu.

⁹E tɔ̃ hũbonɔwo be èkpa, wɔ̀ gbàjà ji gãa, ku gbàjà ji gãa be àgboawo. E fã gàjɛ̃ ɖo àgboawo ŋuti.

¹⁰E sɔ àdàwa gãa ɖo ɖùsi mè lɔ̀ge, lè àpùgo èwèzɛ̃pe lɔ̀ge.

¹¹Huram wɔ̀ àdàwawo, sɔfìwo ku ènu-wu kogòwo, eye be wu èdɔ kè be ɖo la wɔ̀ na èfìɔ Salomɔ̀n, lè Mawu be àxuea ŋutia nu.

¹²E wɔ̀ sɔti èvèawo ku woabe àcɔ sìhɛ̃wo lè woabe ètawo, sìgbè wo lɔ̃wo ɖɛ nène, ɖo sɔtiawo ji.

¹³E wɔ̀ yòvobòɖà èkà èwo be tatawo, ɖo sìhɛ̃ lɔ̃lɔ̃ èvèawo ŋuti, lè àgbàkà èvè mè, na lɔ̃lɔ̃ ɖe sia ɖe, eye wo nɔ̀ sɔtiawo be tamè.

¹⁴E wɔ̀ gɔ̃mèɖonuawo, eye be wɔ̀ gàgbãwo ɖo gɔ̃mèɖonuawo ji.

¹⁵Àdàwa gãa ɖèka kpò be wɔ̀ ku ènyì woèvè kèwo ji be lèa.

¹⁶Gàgbãwo, sɔfìawo, gafòawo ku woabe ŋutinuwo. Huram-Àbì sɔ gàjɛ̃ wɔ̀ ènu kèawo keŋu, eye wo zrɔ̃ woa ŋuti. E wɔ̀ wo na èfìɔ Salomɔ̀n be woa nɔ zã wo, lè Tɔhonɔ̀ be àxuea mè.

¹⁷Èfìɔa na, wo wɔ̀ ènu kèawo keŋu be nɔ̀nɔmè ku ànyikɔ, gbɔ̀xue srè ègàa, kɔ̀ ɖo woa mè, lè Yɔrdàn be ètɔ̀a be nutowo mè, lè Sukɔ̀t ku Seredata dòmè.

¹⁸Salomɔ̀n wɔ̀ ènu kèawo, wo sùgbɔ, àleke be àmè ɖekpe mu teŋu nya gàjɛ̃ kè wo èzã be kpɛ̃kpɛ̃ mè ò.

¹⁹Salomɔ̀n wɔ̀ ènuzãzã kèwo Mawu be àxuea gbà hiãawo: sìka-vɔsakpea, èkplɔ̃ kèwo ji wo dànà vɔsa kpɔ̃nɔ ɖoa.

²⁰Kãligbɛ̃tiawo ku woabe kãligbɛ̃wo, ne woa nɔ bì ɖo ɖoɖo nu lè èxɔ̀ kɔ̀kɔ̀ɛa be ŋùkɔ̀: wo wɔ̀ ɛ̀ ku sìka meme.

²¹Sepòpo tatawo, kãligbɛ̃awo, èzò lenuawoa, wo sɔ sìka, sìka àdodoe wɔ̀ wo.

²²Wo gbà sɔ sìka meme wɔ̀ àzìzɔ donuwo, èhũ wu-kogòwo, kɔpòwo, ku lififiɔ̃nuwo. Àxuea be àgboa, hɔ̃tru kèwo ye lè e mèawo, hɔ̃tru kèwo ye wo hũnà yìnà kɔ̀kɔ̀ɛpewo be Kɔ̀kɔ̀ɛpea hɔ̃tru kè hũnà ɖo èxɔ̀ gãawo mèa, wo sɔ sìka meme wɔ̀ woawo keŋu.